12-05-2023, 21:12
İdmançımız İtaliyada keçirilən Qran-pridə qızıl medalın sahibi oldu
Azərbaycan para-atleti Lamiyə Vəliyeva İtaliyanın Cesolo şəhərində keçirilən Qran-pridə qızıl medal qazanıb. Milli Paralimpiya Komitəsindən verilən məlumata görə, o, 400 metr məsafəyə qaçışda 56.75 saniyə nəticə göstərərək birinci yeri tutub. Paralimpiya çempionu bu göstərici ilə cari ilin iyulunda Fransanın paytaxtı Parisdə təşkil olunacaq dünya birinciliyinə lisenziya əldə edib.
8-05-2023, 12:31
İdmançımız Avropa çempionu titulunu qazandı
Azərbaycan bodibildinqçisi Vüqar Verdiyev Avropa çempionu olub. O, İspaniyada keçirilən qitə çempionatında bu uğura nail olub. Verdiyev 45-49 yaşlıları arasında +80 kq çəkidə fəxri kürsünün ən yüksək pilləsinə qalxıb. Təmsilçimiz bununla da ikinci dəfə Avropa çempionu tituluna yiyələnib. Qeyd edək ki, bodibildinq yarışlarında dəfələrlə Azərbaycan çempionu olan veteran idmançı müxtəlif vaxtlarda dünya çempionatının və beynəlxalq turnirlərin də mükafatlarını qazanıb.
6-05-2023, 14:23
Boksçumuz iranlı həmkarına qalib gəldi
Azərbaycan boksçusu Nəbi İsgəndərov Özbəkistanın paytaxtı Daşkənddə keçirilən dünya çempionatına qələbə ilə başlayıb. Çempionatda 67 kiloqram çəki dərəcəsində mübarizə aparan yığmamızın üzvü 1/16 finalda Ali Habibinejadla (İran) döyüşüb. Görüş N.İsgəndərovun qələbəsi ilə yekunlaşıb. Gəncə boks məktəbinin yetirməsi rəqibini 4:1 hesabı ilə məğlub edib. O, səkkizdəbir finalda rusiyalı Tarxan İdiqovla üz-üzə gələcək. Döyüş mayın 9-da olacaq. Qeyd edək ki, 107 ölkədən 538 boksçunun qatıldığı dünya çempionatı mayın 14-də başa çatacaq.
5-05-2023, 12:44
“Neftçi”nin maliyyə hesabatı müəyyənləşib - 14 milyon
“Neftçi” futbol klubunun 2022-ci il üçün maliyyə hesabatı açıqlanıb. Bu barədə klubun rəsmi saytında məlumat yayılıb. Məlumata görə, "ağ-qaralar" ötən il gəlirləri 14 milyon 127 min manat təşkil edib. Qeyd olunub ki, 2021-ci ildə bu rəqəm 13 milyon 736 min manat olub, yəni gəlirlər 391 min manat artıb.
2-05-2023, 21:00
“Qarabağ” “Neftçi”ni 4 qolla məğlub etdi
Azərbaycan Premyer Liqasında XXXII turun son oyunu keçirilib. Həftənin mərkəzi qarşılaşmasında "Neftçi" ilə "Qarabağ" klubları üz-üzə gəliblər. Görüş Ağdam klubunun 4:2 hesablı qələbəsi ilə yekunlaşıb. Qolları Ramil Şeydayev, Leandro Andrade, Mateus Saldanya (2 qol, biri avtoqol), Emin Mahmudov, Abdullah Zubir vurublar. Bununla da "Neftçi"nin sona 4 tur qalmış mövsümü bürünc medalla başa vuracağı rəsmiləşib. Lider "Qarabağ" isə xallarının sayını 81-ə yüksəldib.
30-04-2023, 16:30
İdmançımız Avropa rekordunu qıraraq qızıl medal qazandı
Azərbaycan Respublikası Milli Paralimpiya Komitəsinin para-pauerliftinq idman növü üzrə milli komandasının üzvü Leyla Kərimova Gürcüstanın Tbilisi şəhərində keçirilən Dünya kubokunda iştirak edib. İdmançımız gənclər arasında 76 kq nəticə göstərərək fərdi çəkidə Avropa rekordunu qıraraq qızıl medal qazanıb. Bu nəticə ilə idmançımız ümumi çəkidə də daha bir qızıl medalın sahibi olub. Qeyd edək ki, Leyla Kərimova ümumi kateqoriyada isə 147 kq nəticə ilə yarışı 4-cu pillədə tamamlayıb.
23-04-2023, 22:30
Güləşçimiz çempionatı qızıl medalla bitirdi
Daha bir yunan-Roma güləşçimiz Zaqrebdə keçirilən Avropa çempionatında qızıl medal qazanıb. 72 kiloqram çəki dərəcəsində çıxış edən Ülvü Qənizadə finalda fransalı İbrahim Qanemlə üz-üzə gəlib. Görüş 7:7 hesabı ilə başa çatıb, lakin xal prinsipinə əsasən qələbə Azərbaycan təmsilçisinə verilib. Bu, Azərbaycanın Xorvatiyadakı qitə birinciliyində yunan-Roma güləşi üzrə 2-ci, ümumilikdə isə 5-ci qızıl medalıdır.
23-04-2023, 21:00
Güləşçimiz Avropa çempionatını qızıl medalla başa vurdu
Azərbaycanın yunan-Roma güləşçisi Həsrət Cəfərov Zaqrebdə keçirilən Avropa çempionatında qızıl medal qazanıb. 67 kiloqram çəki dərəcəsində mübarizə aparan güləşçimiz finalda gürcüstanlı Coni Xetsuriani ilə qarşılaşıb. Rəqibinə 3:2 hesabı ilə qalib gələn Həsrət Cəfərov Avropa çempionu olub.
23-04-2023, 20:00
Güləşçimiz erməni rəqibini məğlub etdi
Xorvatiyanın paytaxtı Zaqrebdə keçirilən Avropa çempionatında Azərbaycanın yunan-Roma güləşçisi Nihat Məmmədli bürünc medal qazanıb. 60 kiloqram çəki dərəcəsində yarışan idmançımız ermənistanlı Gevorq Qaribyanla qarşılaşıb. Rəqibinə 9:5 hesabı ilə qalib gələn N.Məmmədli Avropa üçüncüsü olub.
22-04-2023, 21:00
Güləşçilərimiz Avropa çempionatının finalına vəsiqə qazandı
Azərbaycanın iki idmançısı Xorvatiyanın paytaxtı Zaqrebdə keçirilən yunan-Roma güləşi üzrə Avropa çempionatının finalına yüksəlib. Həsrət Cəfərov (67 kq) səkkizdəbir finalda portuqaliyalı Pedro De Moraisə tam üstünlüklə qalib gəlib. Dörddəbir finalda norveçli Havard Yorgensen ilə qarşılaşan güləşçimiz qalib gəlib. Onun növbəti mərhələdə rəqibi türk Murat Fırat olub. Görüşünü qələbə ilə başa vuran pəhləvanımız finala yüksəlib. O, qızıl medal uğrunda görüşdə gürcüstanlı Coni Xetsuriani ilə üz-üzə gələcək. Səkkizdəbir finalda ukraynalı Andrey Kulikə qalib gələn Ülvi Qənizadə (72 kq) dörddəbir finalda bolqarıstanlı Deyvid Dimitrovu, yarımfinalda türk Selçuk Canı üstələyib. Həlledici görüşdə təmsilçimizin rəqibi fransalı İbrahim Qanem olacaq. Üçqat Avropa çempionu Rafiq Hüseynov (82 kq) səkkizdəbir finalda isveçrəli Mark Veberə şans verməyib. Güləşçimiz dörddəbir finalda ermənistanlı Samvel Qriqoryan ilə gərgin keçən mübarizədən də qalib ayrılıb. R.Hüseynov yarımfinalda türk Burhan Akbudaka uduzub. Güləşçimiz bürünc medal uğrunda görüşdə Branko Kovaçeviç (Serbiya) - Roland Şvarts (Almaniya) qarşılaşmasının qalibi ilə üz-üzə gələcək. Qeyd edək ki, daha əvvəl sərbəst güləşçilərimizdən Əliabbas Rzazadə (57 kq) və Hacı Əliyev (70 kq) Avropa çempionu olublar. Osman Nurmaqomedov (92 kq), Maqomedxan Maqomedov (97 kq) gümüş, Abubakr Abakarov (86 kq) və Georgi Meşvildişvili (125 kq) bürünc medal qazanıblar. Qadınlardan isə Mariya Stadnik (50 kq) qızıl, Jalə Əliyeva (57 kq) bürünc medala sahib olublar. Avropa çempionatına aprelin 23-də yekun vurulacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!