Bakı Apelyasiya məhkəməsində Xətai rayon sakinləri Çaadayeva Yelena Gennadyevna və Mereşkin Aleksandr Vasilyeviçin məhkəməsi başlayıb. Gün.Az-ın məlumatına görə, azyaşlı uşağı öldürməkdə təqsirləndirilən sevgililərin məhkəməsi hakim İlqar Murquzovun sədrliyi ilə keçirilir.

Bakı Ağır Cinayətlər Məhkəməsinin hökmü ilə Çaadayeva Yelena Gennadyevna və Mereşkin Aleksandr Vasilyeviç 15 il müddətinə azadlıqdan məhrum edilib.

İttihama görə, ötən il noyabrın 28-də Nobel prospekti 7 ünvanında Usov Gennadi Andreyeviçin meyiti aşkarlanıb. Araşdırmalar zamanı azyaşlının qətlə yetirildiyi müəyyən edilib. Həyata keçirilən əməliyyat nəticəsində hadisəni törədən Usov Gennadinin anası Çaadayeva Yelena Gennadyevna və onun sevgilisi saxlanılıb.

İstintaqa ifadə verən ana oğlunu ona qarşı əxlaqsız hərəkət etdiyi üçün öldürdüyünü bildirib.

Anaya oğlunu boğmaqda Mereşkin Aleksandr Vasilyeviç də köməklik edib.

Onlar törətdikləri cinayəti ört-basdır etmək məqsədilə əvvəlcə meyiti hadisə baş verən otağın giriş qapısının yuxarı hissəsində bərkidilmiş turnik kimi istifadə edilən dəmirdən asıb, sonra isə evdən çıxararaq yaşadığı evin sol tərəfində tikintisi aparılan bünövrəyə atıblar.