12-01-2024, 19:52
Naxçıvanda reyd: Azyaşlılara siqaret satanlar cəzalandırıldı
Naxçıvan polisi tərəfindən yetkinlik yaşına çatmayanlara tütün məmulatları satan şəxslərə qarşı reyd keçirilib.
Bu barədə Naxçıvan MR DİN-in Mətbuat xidmətindən məlumat verilib.
Bildirilib ki, yetkinlik yaşına çatmayanlara alkoqollu içkilərin və tütün məmulatlarının satışının qarşısının alınması istiqamətində Naxçıvan polisi tərəfindən reyd keçirilib. Reyd zamanı yetkinlik yaşına çatmayanlara tütün məmulatları satan bir neçə obyekt aşkar edilib.
Aşkar edilən faktlarla bağlı həmin obyektlərin sahibləri Məmiyev Nihad, Qasımov Ülvi və Bağırov Mənsum barələrində İnzibati Xətalar Məcəlləsinin 455.2-ci maddəsi (Etil (yeyinti) spirti, alkoqollu içkilər və ya tütün məmulatı ticarəti qaydalarının pozulması) ilə protokol tərtib və xəbərdarlıq ediliblər.
Nəzərinizə çatdıraq ki, qeyd edilən məhsulları satan şəxslərdə onlardan siqaret və spirtli içki alanın azyaşlı olduğu barədə şübhə yarandığı təqdirdə satışı dayandırmalı həmin müştəridən şəxsiyyəti təsdiq edən sənəd tələb etməlidirlər. Sənəd təqdim etmədikdə həmin şəxsə tütün məmulatı və spirtli içki satılmamalıdır.
Qeyd edək ki, bu cür tədbirlər polis əməkdaşları tərəfindən mütamadi olaraq bundan sonra da davam etdiriləcək.
12-01-2024, 16:59
İlham Əliyevin fərqli formatda çıxışı diqqət mərkəzindədir
Son illər Azərbaycan Prezidenti İlham Əliyevin fərqli formatlarda ictimaiyyət qarşısına çıxması diqqəti cəlb edir. Bu formatlardan biri Prezidentin yanında sosial-iqtisadi sahə ilə bağlı keçirilən müşavirələrdir. Əvvəlkindən fərqli olaraq artıq belə müşavirələrə müzakirə olunan mövzu ilə bağlı sırf aidiyyəti qurumların rəhbərləri qatılır; format daha cəlbedici, daha uğurlu şəkil alıb.
Başqa bir format ADA Universitetinin xətti ilə keçirilən görüşlərdir. Burada iştirak edən nüfuzlu xarici ekspertlər və beyin mərkəzlərinin təmsilçiləri ilə açıq ünsiyyətdə olan Prezident bu yolla Azərbaycanın mövqeyini bir neçə dildə bütün dünyaya çatdırır.
Ən uğurlu formatlardan digəri isə sözsüz, Prezidentin yerli televiziya kanallarına müsahibələridir. Bu müsahibələr, ilk növbədə Prezidentin Azərbaycan mediasına verdiyi dəyər və qiymətin göstəricisidir. Belə olmasaydı, Prezident elə yuxarıda qeyd etdiyimiz formatlarda və ya ayrı-ayrı tədbirlərdə çıxışında ölkənin qarşısında duran məsələlərə aydınlıq gətirdiyini nəzərə alıb yenidən yerli media ilə bu şəkildə təmasa lüzum görməzdi.
Kimsə Azərbaycan xalqı və dünya ilə media vasitəsilə dialoqun bu uğurlu formasına kölgə salmaq üçün müəyyən fikirlər irəli sürə bilər. Amma reallıq budur ki, Prezidentin yaratdığı səmimi mühit, tam açıq atmosferin mövcudluğu ölkəmizin gündəmi, gələcəyi ilə bağlı sualların verilməsinə imkan yaradır. Elə sonuncu müsahibədə Azərbaycan cəmiyyəti birinci şəxsin dilindən növbədənkənar Prezident seçkilərindən tutmuş, ölkənin bu günü, gələcək planları, Qarabağ probleminin həlli, sülh müqaviləsinin imzalanması, Zəngəzur dəhlizi, Fransa və digər Azərbaycana qarşı qərəzli münasibətdə olan ölkələr, Azərbaycan-Türkiyə dostluğu və başqa digər məsələlərlə bağlı dolğun məlumat ala bildi. Düzdür, Prezident ayrı-ayrı müstəvilərdə Azərbaycanla bağlı məsələlərə daim münasibət bildirir. Amma bu, daha çox beynəlxalq aləmə çatdırılması gərəkən mesajlar olur. Prezidentin yerli televiziya kanallarına müsahibəsi isə Azərbaycana cəmiyyətinə ünvanlanmış mesajlar, bir növ Prezidentin xalq qarşısında hesabatı baxımından xüsusi çəkiyə malik olur.
Digər tərəfdən, bu format Prezidentin mediaya açıqlığının bariz nümunəsidir. Azərbaycan cəmiyyəti, o cümlədən dünya 44 günlük Vətən müharibəsində bunun əyani şahidi oldu. Prezident İlham Əliyev Vətən müharibəsində xalq və dünya ilə media vasitəsilə dialoqun nadir nümunəsini yaratdı. İndiyə qədər, elə indinin özündə də belə bir nümunə tapmaq mümkün deyil ki, müharibə aparan ölkənin Ali Baş Komandanı hər iki müstəvidə bu şəkildə aktiv çalışsın. Vətən müharibəsində bütün dünya təkcə cəbhədə müharibəyə sərkərdəlik edən Lideri deyil, həm də diplomatik müstəvidə, heç də cəbhədəkindən az əhəmiyyət kəsb etməyən, mübarizə aparan Lideri gördü. Ali Baş Komandan Vətən müharibəsinin hər günündə bir yandan xalqla birbaşa dialoqa girir, tvitlər paylaşır, müraciətlər edir, digər yandan beynəlxalq mediaya müsahibələr verirdi. Diplomatik və informasiya savaşı cəbhəsində misilsiz nümunənin təməlini qoyan İlham Əliyev Azərbaycana qarşı informasiya blokadasını yarmağı bacardı. Müharibənin gedişində və müharibədən sonra nüfuzlu medialar vasitəsilə elə onların öz dilində ən sərt suallara cavab verdi, tarixi həqiqətləri sübutlarla, faktlar əsasında dünya ictimaiyyətinə çatdırdı. Dövlət başıçımız bu dövrdə dünyanın aparıcı media orqanlarına 30-a yaxın müsahibəsində əsl diplomatiya, natiqlik, məlumatlılıq, dəmir məntiq sərgilədi. Prezident İlham Əliyev Ermənistanın onilliklərlə beynəlxalq ictimaiyyəti zəhərləyən təbliğatını darmadağın etdi, həm münaqişə, həm də müharibə haqqında həqiqətləri çəkinmədən dilə gətirdi, kimin işğalçı, kimin isə işğala məruz qalan tərəf olduğunu faktlarla isabatladı. Həmin müsahibələrin hər biri Azərbaycanın diplomatik uğurudir. Məhz media vasitəsilə aparılan bu mübarizə beynəlxalq təşkilatların ölkəmizə qarşı qərəzli təzyiqlər cəhdinin qarşısının alınmasında önəmli rol oynadı.
Müharibə arxada qalsa da, Azərbaycanın suverenliyi tam bərpa olunsa da, arxayınlaşmaq olmaz. Necə ki bunu Prezident yerli televiziya kanallarına müsahibəsində xüsusi vurğuladı və cəmiyyətə önəmli mesajlar ötürdü. Qalib, tam müstəqil siyasətə, güclü Liderə malik Azərbaycanı istəməyən qüvvələrin həmlələri, çirkin planları hələ də davam edir. Bütün bunları böyük diplomatik ustalıqla dəf edən Prezident İlham Əliyev həm yerli, həm də xarici medianın imkanlarından və gücündən də elə eyni ustalıqla yararlanmağı bacarır. Bir yandan xalqa hesabat verir, digər yandan Azərbaycana qarşı olan qüvvələrə lazımi fikirləri çatdırır. Ən nəhayət, məmurların üzərinə fərdi şəkildə məsuliyyət qoyur və verilən tapşırıqlar, aparılan islahatlar istiqamətində konkret iş tələbi meydana çıxarır. Bütün bunlardan çıxan nəticə isə birdir- xalqın, dövlətin mənafeyi naminə taixi nəticələr, qələbələr!
12-01-2024, 16:41
“Azəriqaz” rəsmisi ictimaiyyəti maraqlandıran məsələlərə aydınlıq gətirdi
"Azəriqaz" İstehsalat Birliyində növbəti açıq qapı aksiyası keçirilib. İctimaiyyəti maraqlandıran məsələlərə aydınlıq gətirilib.
Qaz istifadəçiləri bu ay ötən aylara nisbətən sayğacdakı məbləğin daha artıq olması ilə bağlı postlar paylaşıb.
"Azəriqaz"ın istehsalçılara satılan qaza nəzarət şöbəsinin rəisi Elçin Qocayev məsələ ilə bağlı bildirib ki, problemi olan vətəndaşlar aidiyyəti üzrə müraciət etməlidir:
"Mexanik sayğaclarla bağlı problem varsa, bizə müraciət edə bilərlər. Mexaniki səhv tək-tük ola bilər. Ona biz düzəliş edirik. Lakin kütləvi halda belə bir məsələ yoxdur. Bu suallar qazın limit ilə bağlı olur. Qazın həcmi başqa bir şeydir, həcminə uyğun qazın dəyərinin hesablanması başqa bir şeydir. Ola bilsin ki, limitlə hesablandığından fərq olur".
Qurumun mətbuat xidmətinin rəisi Eldəniz Vəliyev isə bu halın fəsil dəyişikliyi ilə bağlı ola biləcəyini söyləyib:
"Dekabr ayı soyuq hava kütləsi olan aylardan biridir. Eyni zamanda bayramda insanların tələbatının artması kimi məsələlər müəyyən rol oynayır. 30 günün müqabilində bu bildirişlər gəlib. Bu il yanvar ayıının sərfiyyatı ilə bağlı bildiriş gəlir, adamlar fikirləşir ki, məbləğ çoxdur. Tutaq ki, siz kombini siz 60 dərəcəyə qoyursunuz. Kombi istidə daha çox isti verir və daha az yazır. Soyuqda isə daha çox yazır. Çünki kombilər müəyyən fasilə ilə işləyir. Soyuq hava kütləsi olan günlərdə fasilə çox gec yaranır. Ona görə insanlar mart ayının sərfiyyatı ilə noyabr-dekabr aylarının sərfiyyatını heç vaxt eyniləşdirə bilməzlər. Əlbəttə ki, iki-üç dəfə fərq olacaq".
Qeyd edək ki, 2023-cü ilin yanvar-dekabr aylarında 1 milyon 199 min 375 abonent 12 qəpik tariflə, 998 min 946 abonent 20 qəpik tariflə təbii qazdan istifadə edib.
12-01-2024, 16:28
Azərbaycan kubokunda 1/4 final mərhələsinin ilk oyunlarının vaxtı müəyyənləşdi
Azərbaycan kubokunda 1/4 final mərhələsinin ilk oyunlarının vaxtı müəyyənləşib.
İki günü əhatə edəcək mərhələnin görüşləri aşağıda göstərilən saatlarda başlayacaq:
30 yanvar (çərşənbə axşamı)
“Səbail” – “Zirə”
“ASCO Arena”, 15:00
“Sabah” – “Qarabağ”
“Bank Respublika Arena”, 19:00
31 yanvar (çərşənbə)
“Araz-Naxçıvan” – “Qəbələ”
“Dalğa Arena”, 16:00
“Sumqayıt” – “Neftçi”
“Kapital Bank Arena”, 19:00
12-01-2024, 16:12
İlham Əliyev bu qanunlara dəyişiklikləri təsdiqlədi
Prezident İlham Əliyev “Mühasibat uçotu haqqında” və “Dövlət sirri haqqında” Azərbaycan Respublikasının qanunlarında dəyişiklik edilməsi barədə” Azərbaycan Respublikasının 2023-cü il 22 dekabr tarixli 1073-VIQD nömrəli Qanununun tətbiqi haqqında sərəncam imzalayıb.
Sərəncama əsasən, “Mühasibat uçotu haqqında” və “Dövlət sirri haqqında” Azərbaycan Respublikasının qanunlarında dəyişiklik edilməsi barədə”qanunun qüvvəyə minməsi ilə əlaqədar həmin qanunun tətbiqini təmin etmək məqsədilə Nazirlər Kabineti Azərbaycan Respublikası qanunlarının və Azərbaycan Respublikası Prezidentinin aktlarının “Mühasibat uçotu haqqında” və “Dövlət sirri haqqında” Azərbaycan Respublikasının qanunlarında dəyişiklik edilməsi barədə” Azərbaycan Respublikasının 2023-cü il 22 dekabr tarixli 1073-VIQD nömrəli Qanununa uyğunlaşdırılması ilə bağlı təkliflərini üç ay müddətində hazırlayıb Azərbaycan Respublikasının Prezidentinə təqdim etməlidir.
Həmin qanundan irəli gələn digər məsələləri həll etməlidir.
11-01-2024, 21:00
Bakının mərkəzindəki universitetlər kənar ərazilərə köçürülə bilər - ViDEO
Bakıda sıxlığı azaltmaq üçün şəhərin mərkəzi hissələrində yerləşən universitetlər kənar ərazilərə köçürülə bilər.
Baş Planda Bakıda bir neçə universitetin ixtisaslaşmış vahid bir şəhərcikdə yerləşdirilməsi və yaxud mövcud ali məktəblərdən birinin tamamilə yeni bir yerə köçürülməsi nəzərdə tutulur.
Təhsil eksperti Kamran Əsədov deyir ki, ölkədə olan ali təhsil müəssisələrinin əksəriyyəti paytaxtda fəaliyyət göstərir. Tələbə sayının çoxluğu ictimai nəqliyyatın yükünü birə-beş artırır.
Ekspert bildirib ki, sıxlığa səbəb olan əsas amillərdən biri də metrostansiyaların ətrafında bir neçə universitetin yerləşməsidir.
Kamran Əsədov digər ərazilərə köçürülməsi ehtimal edilən ali təhsil müəssisələrinin adlarını da açıqlayıb.
Daha ətraflı aşağıdakı videomaterialda:
[media=https://youtu.be/KMI9H8zOg3o]
11-01-2024, 20:44
İlham Əliyevin müsahibəsi Türkiyə mediasında işıqlandırıldı
Azərbaycan Prezidenti İlham Əliyevin yanvarın 10-da yerli televiziya kanallarına müsahibəsi Türkiyə mediasında geniş işıqlandırılıb.
Dövlətimizin başçısının fikirləri Türkiyənin TRT, Anadolu Agentliyi, İHA, NTV, “Haber Global”, ATV kimi nüfuzlu KİV-lərində geniş yayımlanıb.
Anadolu agentliyində dərc olunan yazıda dövlətimizin başçısının İkinci Qarabağ müharibəsi dövründə ən çox Türkiyə Prezidenti Rəcəb Tayyib Ərdoğan və Rusiya Prezidenti Vladimir Putin ilə danışıqlar apardığına dair ifadələri əks olunub: “Bu da təbiidir, Türkiyə Prezidenti müharibənin ilk günündən son gününə qədər bizim yanımızda idi, Azərbaycana verdiyi siyasi və mənəvi dəstək bir çoxlarına bir mesaj idi”.
TRT-nin yayımladığı xəbərdə isə Azərbaycan Prezidentinin Zəngəzur dəhlizinin açılmasının önəmi barədə fikri xüsusi vurğulanıb, dövlətimizin başçısının çıxışından sitatlar tamaşaçıların diqqətinə çatdırılıb. Məlumatda Prezident İlham Əliyevin “Azərbaycandan Azərbaycana insanlar və yüklər heç bir yoxlama aparılmadan keçməlidir. Əks təqdirdə, Ermənistan əbədi dalan kimi qalacaq və əgər, dediyim marşrut (Zəngəzur dəhlizi – red.) açılmasa, biz Ermənistanla heç bir başqa yerdə sərhədimizi açmaq fikrində deyilik” ifadələrinə yer verilib. Məqalədə, həmçinin dövlətimizin başçısının fevralın 7-nə təyin edilən növbədənkənar prezident seçkilərini şərtləndirən əsas amilləri açıqladığı bildirilib.
“Haber Global”da yayımlanan informasiyada isə Prezident İlham Əliyevin Fransanın Ermənistanı müharibəyə hazırlaşdırması barədə sözləri diqqətə çatdırılıb: “Bu gün Ermənistanı silahlandıran, onlara ürək-dirək verən, onların hərbçilərini hazırlayan və növbəti müharibəyə hazırlayan ölkə Fransadır”. Xəbər dövlətimizin başçısının “Xankəndidə Bayrağın qaldırılması Zəfərimizin son nöqtəsi idi”, “Əsgərlərimiz böyük qəhrəmanlıq göstərdi”, “Bizimlə hədə-qorxu dili ilə, yaxud da təkəbbürlə davranmaq mümkün deyil”, “Zəngəzur dəhlizi açılmasa Ermənistan zərər çəkəcək”, “Ermənistanı silahlandıran, müharibəyə hazırlayan ölkə Fransadır”, “Ciddi məsələ olarsa, ilk zəng edəcəyim şəxs Ərdoğandır” və “Azərbaycanlılar Qarabağa qayıdır” fikirlərindən ibarət alt başlıqlarla təqdim olunub. Bundan başqa, xəbərdə dövlətimizin başçısının Qarabağ Zəfəri, Xankəndidə, Xocalıda Azərbaycan Bayrağını ucaltması barədə fikirləri də diqqətə çatdırılıb.
“Haber Global” televiziya kanalında da Azərbaycan Prezidentinin müsahibəsinə dair süjet yayımlanıb.
“İhlas” xəbər agentliyi (İHA) dövlətimizin başçısının yerli televiziya kanallarına müsahibəsi barədə xəbəri oxuculara Prezident İlham Əliyevin “Ermənistanı silahlandıran, müharibəyə hazırlayan ölkə Fransadır” ifadəsindən ibarət sərlövhə ilə təqdim edib. Məqalədə bildirilir ki, Azərbaycan Prezidentinin Qarabağ məsələsində ədalətin Zəfər çalması barədə sözləri sitat gətirilib: “Ədalət zəfər çalıb, biz öz haqq işimizi yekunlaşdırmışıq və ədaləti özümüz bərpa etmişik... Halbuki, əfsuslar olsun ki, beynəlxalq aləmin əsas oyunçuları bizim bu fikrimizə şərik olmadılar. Əksinə, bizi ittiham etməyə çalışdılar, bizə qarşı müxtəlif təzyiq mexanizmlərini işə salmağa çalışdılar... Yəni, biz bu ədaləti, eyni zamanda, beynəlxalq müstəvidə siyasi və diplomatik savaş apararaq əldə etmişik. Ona görə bizim Zəfərimizin əhəmiyyəti daha önəmlidir”.
Yazıda Prezident Əliyevin Xankəndi və işğaldan azad edilən digər bölgələrimizdə Azərbaycan Bayrağını ucaltması, ölkəmizin ərazi bütövlüyünün və suverenliyinin tam bərpa olunması, Fransanın bölgədə təxribatçı fəaliyyəti və Ermənistanın silahlandırılması, dövlətimizin başçısının Türkiyə Prezidenti ilə bağlı fikirlərinə də geniş yer verilib.
“Star” qəzeti isə xəbəri “Əliyev: Ciddi məsələ olarsa, ilk zəng edəcəyim şəxs Ərdoğandır” sərlövhəsi ilə təqdim edib. Yazıda Prezident Əliyevin Vətən müharibəsi dövründə ən çox Türkiyə və Rusiya prezidentləri ilə danışıqlar aparması barədə fikrinə xüsusi yer verilib: “Türkiyə Prezidenti müharibənin ilk günündən son gününə qədər bizim yanımızda idi, Azərbaycana verdiyi siyasi və mənəvi dəstək bir çoxlarına bir mesaj idi”.
11-01-2024, 19:45
Azərbaycan və Ermənistan arasında sülhü dəstəkləyirik - ABŞ rəsmisi
ABŞ Azərbaycan və Ermənistan arasında sülhü və münasibətlərin normallaşmasını dəstəkləyir.
Bunu ABŞ Dövlət katibinin Avropa və Avrasiya məsələləri üzrə köməkçisi Ceyms Obrayn xarici jurnalistlər üçün onlayn brifinqdə deyib.
"Biz tərəflər arasında sülh sazişini, dayanıqlı və ləyaqətli sülhün əldə olunmasını dəstəkləyirik. Biz iki ölkənin sülhlə bağlı sağlam gündəliyinin olmasından həvəslənirik", - o deyib.
O bildirib ki, ABŞ-nin Azərbaycan və Ermənistanla siyasi, iqtisadi və təhlükəsizlik sahələrində yaxşı əlaqələri var.
"Biz hesab edirik ki, tərəflər arasında sülhün əldə olunması regional iqtisadi inkişaf üçün imkanlar yaradacaq".
Obrayn vurğulayıb ki, sülh region xalqları üçün səmərə verəcək.
11-01-2024, 18:51
Keçən il Astara terminalında 700 min tona yaxın yük aşırılıb - ADY
“Şimal-Cənub” Beynəlxalq Nəqliyyat Dəhlizinin önəmli struktur vahidlərindən biri olan Astara terminalında 2023-cü il ərzində 700 min tona yaxın yük aşırılıb, bu da 2018-ci il - fəaliyyətə başladığı dövr ilə müqayisədə üç dəfə çoxdur.
Bu barədə məlumatı "Azərbaycan Dəmir Yolları" QSC (ADY) yayıb.
Hazırda terminalda biraşırımlı avtomobil yolu körpüsünün, üçaşırımlı Kəmərbəndi körpüsünün, 4 biraşırımlı dəmir yolu körpüsünün, 10 xidmət binasının və 2 platformanın tikintisi işləri davam etdirilir.
2024-cü ildə terminalın tikintisi tamamlandıqdan sonra yükaşırma gücünün illik 3,5-4 milyon tona çatdırılması nəzərdə tutulur.
Aşırılan yüklər taxta və taxta məmulatları, tikinti materialları (klinker, sement, qranit və mərmər daşlar, kafel), kimyəvi məhsullar, dənli bitkilər (arpa, taxıl, buğda və mərci), meyvə və tərəvəzlər, konservləşdirilmiş məhsullar, qida məhsulları və alkoqolsuz içkilərdir.
Qeyd edək ki, “Şimal-Cənub” Beynəlxalq Nəqliyyat Dəhlizi çərçivəsində Azərbaycan və İran hökumətləri arasında əldə olunmuş razılaşmaya əsasən, 2017-ci ildə qlobal ticarətin təşviqi istiqamətində Astara terminalının inşasına başlanılıb. Terminal İranın Astara şəhərində 35 ha ərazidə, Azərbaycan-İran sərhədindən 1,4 km aralıqda yerləşir. Tikintisi ADY tərəfindən aparılan terminalın ərazisi Azərbaycana 25 il müddətinə icarəyə verilib. Astara terminalında yükaşırma əməliyyatları 2018-ci ildən həyata keçirilir və 2022-ci ilin sentyabr ayından ADY-nin törəmə şirkəti olan “Astara Terminal” MMC tərəfindən aparılır.
11-01-2024, 17:41
Elbay Qasımzadə:”Paytaxt Bakının digər əraziyə köçürülməsi yanlış fikirdir”
“Paytaxt Bakının digər əraziyə köçürülməsi yanlış fikirdir. Paytaxtın öz funksiyaları var və bu funksiyalar daxilində şəhər öz həyatını yaşamalıdır”.
Bunu AZƏRTAC-a “Bakı şəhərinin 2040-cı ilədək inkişafına dair Baş planı”na münasibət bildirərkən Azərbaycan Memarlar İttifaqının sədri Elbay Qasımzadə deyib.
Bakıda həddən artıq yüklənmə olduğunu etiraf edən E.Qasımzadə bildirib ki, bir çox iri dövlət qurumları artıq şəhərin mərkəzi hissəsindən köçürülüb:
“Eyni zamanda, Heydər Əliyev prospektində böyük dövlət qurumları üçün yeni ofislərin tikintisi aparılır. Bu düzgün siyasət olmaqla yanaşı özünü tam doğruldur. Həmçinin şəhərin mərkəzində nəqliyyatın sıxlığını bir qədər yüngülləşdirir. Amma əsas bu deyil. Paytaxtın köçürülməsi ilə birgə böyük sayda mütəxəssislərin, dövlət qulluqçularının da başqa yerə köçürülməsi düşünülməlidir. Bu mümkündürmü?”
Paytaxtın köçürülməsi ilə bağlı Qazaxıstan nümunəsindən danışan sədr bildirib ki, ölkə paytaxtının Almatıdan Astanaya köçürülməsinin təkcə Almatı şəhərinin yüklənməsi problemi deyil, digər səbəblər də var idi:
“Amma nə əldə olundu? Bu gün Astana maraqlı bir memarlıq muzeyidir, amma bir şəhər olaraq canlanma yoxdur. Mütəxəssislər və dövlət qulluqçuları Astanaya məcburiyyət qarşısında köçürüldülər. Lakin Almatının əsas sakinləri köçmədilər”.
E.Qasımzadə qeyd edib ki, ali tədris müəssisələrinin də Bakıdan çıxarılması və onlar üçün kampusların tikilməsi barədə fikirlər səsləndirilir. Bu ideya Bakının Baş planının əvvəlki redaksiyalarında da olub.
“Amma bunu həyata keçirmək o qədər də asan deyil. Çünki sözügedən tədris ocaqlarında çalışan professor, müəllim heyəti hər gün uzaq məsafə qət etməli olacaqlar. Bu, əslində böyük problemdir. Odur ki, Azərbaycan paytaxtının kənara köçürülməsi yanlış fikirdir”, - deyə Elbay Qasımzadə əlavə edib.
Bakının Baş planı təsdiq edildikdən sonra ən çox müzakirə olunan mövzulardan olan paytaxtda tramvay nəqliyyatının bərpasına da toxunan E.Qasımzadə Baş planda qeyd olunan qərarın lehinə olduğunu açıqlayıb:
“Əslində etiraf etməliyik ki, tramvayın olub-olmaması Bakının inkişafına o qədər də böyük təsir göstərmir. Amma bir Bakı sakini olaraq düşünürəm ki, Avropanın və dünyanın bir çox qədim şəhərlərində olduğu kimi Bakıda da tramvay olmalıdır, tramvayı bərpa etmək vacibdir. Bilirəm ki, dövlət tərəfindən bu istiqamətdə hansısa addımlar atılır. Tramvay yaxşı nəqliyyat vasitəsidir və öz yolu ilə gedir. Ona görə də avtomobilin hərəkətinə o qədər də mənfi təsir göstərmir. Avtobuslar üçün isə xüsusi yollar salınmasına baxmayaraq, yenə də küçənin ortası ilə avtomobillərlə bərabər hərəkət edirlər. Bu, problem yaradır. Amma tramvay heç bir problem yaratmayacaq. Sakinlər üçün cəlbedici bir nəqliyyat vasitəsidir. Ona görə tramvayın bərpasının tam tərəfdarıyam”.
Paytaxtın Baş planında yer alan yaşıllaşdırma planlarına da toxunan Azərbaycan Memarlar İttifaqının sədri Bakının yaşıllaşdırılması proqramının 1971-ci ildə Ulu Öndərin Azərbaycana rəhbərlik etdiyi dövrdən Azərbaycan Kommunist Partiyasının və Nazirlər Sovetinin birgə qərarı ilə planlaşdırıldığını qeyd edib.
Onun sözlərinə görə, Bakıda yaşıllıqların artırılması sahəsində son 50 ildə çox böyük işlər görülüb.
“Çox təəssüf ki, bəzi yaşıllıq massivlərində ağaclar qırılıb, tikililər aparılıb. Amma Bakının yaşıllaşdırılması problemi bu gün dövlət başçısının diqqət mərkəzindədir. Son bir neçə ildə bir neçə böyük yaşıllıq sahələri yarandı. Nümunə olaraq Füzuli küçəsi boyu Mərkəzi Park, dənizkənarı bulvarın genişlənməsi və s. Gələcəkdə bulvarın uzunluğu 21 kilometrə qədər çatdırılacaq və Baş planda bu əlbəttə ki, nəzərdə tutulub. Ümumiyyətlə Baş planda Bakının bir sıra yenidənqurmaya məruz qalacaq ərazilərində də yeni yaşıllıq sahələrinin salınması nəzərdə tutulub. Yəni Baş plan konkret tikililərin aparılması üçün olan sənəd deyil. Baş plan şəhərin inkişaf konsepsiyasını müəyyənləşdirən, istiqamətlərini göstərən və ən vacib problemlərin həllini təklif edən bir sənəddir. Bu plan 2040-cı ilədək olan müddətə tərtib olunub. Bu müddətə isə 16 il qalıb. Bu müddətdə ola bilər ki, hansısa yeni fikirlər, təkliflər yarana bilər. Bu o demək deyil ki, o fikirləri biz saxlamalı və yalnız 2040-cı ildən sonra tətbiq etməliyik. Biz şəhərin xeyrinə olan hər bir sağlam təklifi və fikri istifadə etməliyik və vaxtında yerinə yetirməliyik”.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!