11-10-2025, 18:33
Ərdoğan Qəzzaya gedəcək - "Öncə mən, sonra siz!"
Türkiyə Prezidenti Rəcəb Tayyib Ərdoğan yaxın gələcəkdə Qəzza zolağını ziyarət etməyi planlaşdırdığını bildirib.
O, bu barədə hakim Ədalət və İnkişaf Partiyasının Rizə vilayətində keçirilən toplantısında çıxışı zamanı danışıb.
Ərdoğan partiya üzvlərinin zalda səsləndirdiyi “biz də gedəcəyik” replikasına cavab olaraq deyib: “Əvvəlcə mən ora gedəcəyəm, sonra siz.”
Prezident qeyd edib ki, atəşkəs razılaşmasından sonra bölgədə döyüşlərə qayıdış olmamalıdır. Onun sözlərinə görə, İsrail tərəfi üzərinə götürdüyü öhdəlikləri yerinə yetirməli və regionun sabitliyini, həmçinin öz vətəndaşlarının təhlükəsizliyini təhdid edən aqressiv siyasətdən imtina etməlidir.
Ərdoğan həmçinin vurğulayıb ki, Qəzzaya humanitar yardımın çatdırılması heç bir maneə ilə üzləşməməlidir.
Türkiyə lideri çıxışının sonunda iki dövlətin yaradılmasını Yaxın Şərqdə “daimi sülhün açarı” adlandırıb.
Ərdoğanın Qəzzaya nə vaxt gedəcəyi məlum deyil.
11-10-2025, 18:31
Bakıda binada yanğın
Bakı şəhərinin Suraxanı rayonunda çoxmərtəbəli yaşayış binasının 8-ci mərtəbəsində ümumi sahəsi 76 m² olan 3 otaqlı mənzilin 1 otağının yanar konstruksiyaları 12 m² sahədə yanıb.
Bu barədə FHN-dən məlumat verilib. Bildirilib ki, mənzilin qalan hissəsi yanğından mühafizə olunub.
Yanğın yanğından mühafizə bölmələri tərəfindən söndürülüb.
11-10-2025, 18:25
Daha bir küçədə velosiped zolağı çəkildi
Azərbaycan Yerüstü Nəqliyyat Agentliyi (AYNA) tərəfindən Bakı şəhərində mikromobillik infrastrukturunun inkişaf etdirilməsi istiqamətində işlər davam etdirilir.
AYNA-dan bildirilib ki, məqsəd şəbəkənin davamlılığına nail olmaq və mikromobillik vasitələrindən istifadə edən hərəkət iştirakçılarının təhlükəsizliyini və rahatlığını təmin etməkdir.
Kəsintisiz mikromobillik zolağının təşkili üçün mərhələli qaydada velosiped yolları əlaqələndirilir. Hazırda bu istiqamətdə işlər metronun “Elmlər Akademiyası” stansiyası ətrafında və əlaqəli küçə-prospektlərdə görülür. Belə ki, daha öncə Hüseyn Cavid prospektində təşkil edilən mikromobillik şəbəkəsi uzadılır və hazırda işlər Əbdürrəhim bəy Haqverdiyev küçəsinin Hüseyn Cavid prospekti ilə kəsişməsindən İnşaatçılar prospekti ilə kəsişməsinə kimi aparılır.
Bununla yanaşı, müvafiq nişanlanma işləri həyata keçirilir. Yaxın günlərdə yol nişanlarının və təhlükəsizlik sədlərinin quraşdırılmasına başlanılacaq.
Növbəti mərhələdə isə mikromobillik zolaqları İnşaatçılar prospektində təşkil ediləcək və paytaxtın mərkəzi küçələrində mövcud olan zolaqlarla daha bir istiqamətdən əlaqələndirmə təmin ediləcək. Xatırladaq ki, daha öncə bu əlaqələndirmə digər istiqamətdən Mikayıl Müşfiq küçəsi vasitəsilə həyata keçirilib.
11-10-2025, 17:52
Yaxşı variantlar var - Zelenski-Tramp danışığı olub - YENİLƏNİB
Ukrayna prezidenti Vladimir Zelenski ilə ABŞ prezidenti Donald Tramp arasında telefon danışığı olub. Söhbət zamanı xüsusilə Yaxın Şərqdəki vəziyyət müzakirə olunub.
Bu barədə Ukrayna lideri öz Telegram kanalında bildirib.
"Prezident Trampı onun həqiqətən təmin etdiyi Yaxın Şərq üzrə uğur və razılaşmaya görə təbrik etdim və bu, güclü nəticədir. Əgər biz bu regionda müharibəni dayandıra bilsək, şübhəsiz ki, digər müharibələr də, o cümlədən Rusiya müharibəsi dayandırıla bilər", - Zelenski bildirib.
Prezident əlavə edib ki, Trampla söhbətdə Ukraynadakı hadisələrə də toxunulub. Konkret olaraq, Zelenski Ağ Ev rəhbərini Rusiyanın Ukraynanın enerji sektoruna zərbələri barədə məlumatlandırıb.
"Bizi dəstəkləmək istəyinizə görə minnətdaram. Biz hava hücumundan müdafiə sistemimizi gücləndirmək imkanlarını və bununla bağlı hazırladığımız müqavilələri müzakirə etdik. Bizi həqiqətən necə gücləndirmək barədə yaxşı variantlar, güclü ideyalar var. Bizə rusların əsl diplomatiya ilə məşğul olmağa hazır olması lazımdır. Buna güc yolu ilə nail olmaq olar. Təşəkkür edirəm, cənab prezident!", - Zelenski Trampa xitab edərək deyib.
***
ABŞ və Ukrayna prezidentləri Donald Tramp və Vladimir Zelenski arasında telefon danışığı aparılıb.
Bu barədə Zelenskinin ofis rəhbəri Andrey Yermak Telegram-da bildirib.
Söhbətin mövzusu dəqiqləşdirilməyib.
Ukrayna lideri bir gün əvvəl Finlandiya prezidenti Aleksandr Stubb, Böyük Britaniyanın baş naziri Key Starmer və Almaniya kansleri Fridrix Merzlə danışıb.
Bundan başqa, Zelenski baş nazir Yuliya Svırıdenkonun başçılıq etdiyi nümayəndə heyətinin gələn həftə ABŞ-a səfər edəcəyini açıqlayıb. O qeyd edib ki, Vaşinqtonla Ukraynanın hava hücumundan müdafiəsinin gücləndirilməsi, enerji sektorunun qorunması, sanksiyalar tədbirləri müzakirə olunacaq.
11-10-2025, 17:45
Ankarada Türkiyə-Suriya danışıqları aparılacaq
Türkiyə və Suriya təhlükəsizlik nümayəndə heyətləri oktyabrın 12-də Ankarada görüşəcək.
Bu barədə Türkiyə Xarici İşlər Nazirliyinin məlumatında bildirilib.
Nümayəndə heyətlərinin tərkibinə hər iki ölkənin xarici işlər nazirləri, müdafiə nazirləri və Milli Kəşfiyyat xidmətlərinin rəhbərləri daxildir.
Danışıqlar təhlükəsizlik sahəsində əməkdaşlıq və cari hadisələri müzakirə etmək üçün keçirləcək.
11-10-2025, 17:10
Türkiyə polisi məşhur narkobaronu həbs edib
Türkiyə hüquq-mühafizə orqanlarının əməkdaşları Don Vito təxəllüsü ilə tanınan narkobaron Abdulla Ayp Üstün və onun cinayətkar qrupunun maliyyə əməliyyatlarına cavabdeh olan Həsən Laləni həbs ediblər.
Bu barədə Türkiyənin daxili işlər naziri Əli Yerlikaya sosial şəbəkədəki səhifəsində yazıb.
Don Vitonun “CHROOKE” adlı cinayətkar qruplaşmaya rəhbərlik etdiyi, Həsən Lalənin isə həmin qrupun maliyyə işləri ilə məşğul olduğu açıqlanıb. Hər iki şəxs İnterpol tərəfindən beynəlxalq axtarışa verilib.
11-10-2025, 16:46
Qaradağdakı palçıq vulkanı üç fazada püskürüb
11 oktyabr 2025-ci il tarixində Qaradağ rayonunda yerləşən Otman Bozdağ palçıq vulkanında püskürmə qeydə alınıb.
Bu barədə AMEA nəzdində Respublika Seysmologiya Xidmət Mərkəzinin (RSXM) məlumatında bildirilib.
Məlumata görə, üç fazada qeydə alınan püskürmənin birinci fazası yerli vaxtla saat 08:27-də başlayıb və 08:37-ə qədər 10 dəqiqə davam edib.
İkinci faza püskürmə yerli vaxtla saat 08:39-da başlayıb və 08:51-ə qədər 12 dəqiqə davam edib.
Üçüncü faza püskürmə yerli vaxtla saat 09:02-də başlayıb və 09:06-ə qədər 4 dəqiqə davam edib.
Püskürmənin dərinliyi 4 kilometr, ümumi ayrılan enerji 2.19*10^7 coul olub.
Vulkan püskürməsi AMEA nəzdində RSXM-nin palçıq vulkanları ətrafında quraşdırılmış seysmik stansiyaları tərəfindən qeydə alınıb.
11-10-2025, 16:37
Ermənistanda kilsədə qətl hadisəsi
Ermənistanda Kotayk rayonunun Çarentsavan şəhərində yerləşən kilsədə qətl hadisəsi yaşanıb.
Bıçaqlanan şəxs xəstəxanaya çatdırılsa da, özünə gəlmədən ölüb.
Onun niyə qətlə yetirildiyi ilə bağlı məlumat verilməyib. Araşdırma aparılır.
11-10-2025, 16:11
Türkiyə Qəzzaya əsgər göndərir - Parlament məsələyə baxacaq
Türk əsgərlərinin “Qəzzanın güc bölmələri”ndə iştirakını nəzərdə tutan prezidentin qərar layihəsi ekspert qiymətləndirmələri başa çatdıqdan sonra Türkiyə parlamentinə təqdim olunacaq.
Bu barədə “TRT Haber” məlumat yayıb.
Ədalət və İnkişaf Partiyasının fraksiya sədri Abdulla Gülər bildirib ki, artıq Xarici İşlər Nazirliyi, Milli Müdafiə Nazirliyi və Milli Kəşfiyyat Xidməti məsələnin təfərrüatları üzərində işləyir.
O qeyd edib ki, əvvəlcə çərçivə və şərtlər hazırlanacaq - məsələn, qətnamənin müddəti, səlahiyyətlərinin xüsusiyyətləri və Qəzzadakı vəziyyətin xüsusiyyətləri.
Gülər əlavə edib ki, bu ay müddəti bitən digər qətnamələr də (Suriya-İraq, Livan, Mərkəzi Afrika və Mali ilə bağlı) parlamentə təqdim olunacaq. Bütün şöbələr təhlillərini başa vurduqdan sonra sənəd parlament rəhbərliyinə göndəriləcək.
Bundan əlavə, Gülər Türkiyənin “Fələstin xalqının tərəfində qaldığını” və bu istiqamətdə tələb olunan bütün lazımi təşəbbüslərin parlamentə gətiriləcəyini vurğulayıb.
11-10-2025, 15:52
Çox şadam ki, mən də azad olunmuş ərazilərə gəldim - İran səfiri
"3 aydan artıqdır ki, Bakıya gəlib missiyama başlamışam. Həqiqətən bu, çox önəmli məsələdir ki, münaqişə nəticəsində itkin düşmüş şəxslərin vəziyyəti dəqiqləşsin və ailələri bilsinlər ki, onlara nə olub. Ailələr gözləyirlər ki, əzizlərinin taleyindən məlumat alsınlar".
Bu sözləri İran İslam Respublikasının Azərbaycandakı fövqəladə və səlahiyyətli səfiri Müctəba Dəmirçilu İtkin düşmüş şəxslər üzrə Bakı Dialoqu çərçivəsində keçirilən beynəlxalq konfrans iştirakçılarının Zəngilan səfəri zamanı deyib.
Səfir Azərbaycanı qələbə münasibətilə təbrik edib:
"Mən bu fürsətdən də istifadə edib bütün Azərbaycan xalqını təbrik edirəm ki, nəhayət 30 ildən sonra işğal olunmuş torpaqlar azad olundu və ölkənin suverenliyi bərpa olundu. Mən keçmişdə də Bakıda işləmişəm. 27 il öncə Göygöldə Qarabağa baxırdım. Belə fikirləşirdim ki, görəsən nə vaxtsa yenidən bu - indi azad olunan yerlərdə olacağam? Çox şadam ki, mənim bu arzum həyata keçib. Bir daha Azərbaycan xalqını və dövlətini bu böyük nailiyyətə görə təbrik edirəm".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!