22-11-2025, 15:16
Türk dünyası QHT-lərinin ortaq platforması yaradılacaq
Türk Dövlətləri Təşkilatına üzv ölkələrin vətəndaş cəmiyyətlərinin nümayəndələrinin forumu keçiriləcək.
Forumla bağlı “Ortaq Dəyərlər” İctimai Birliyinin sədri, "Türküstan" Media Qrupun baş redaktoru Aqil Camal bildirib ki, ümumilikdə 300 Qeyri-Hökumət Təşkilatı üzvünün iştirakı gözlənilir:
O qeyd edib ki, Forumda Türk Dövlətləri Təşkilatına üzv olan dövlətlərdən, eyni zamanda müşahidəçi üzvlər-Macarıstan, Türkmənistan və Şimali Kipr Türk Cümhuriyyətindən olan QHT-lər dəvət edilib.
"Ayın 25-də Bakıda Gülüstan sarayında forum öz işinə başlayacaq. Burada daha çox Türk dünyasının ortaq məsələləri, problemləri, gələcək işbirliyi, əməkdaşlıqla bağlı panellər təşkil olunacaq. Eyni zamanda Forumun gedişində ayrıca olaraq Azərbaycan və Qazaxıstan Qeyri-hökumət təşkilatlarının birinci forumu təşkil olunacaq”.
Aqil Camal qeyd edib ki, Naxçıvanda Türk Dövlətlərinin Qeyri-Hökumət Təşkilatlarının platformasının yaradılması gözlənilir:
“Noyabrın 26-da Naxçıvan şəhərində Qeyri-hökumət Təşkilatlarının panel müzakirələri davam etdiriləcək. Məlumdur ki, hazırki Türk Dövlətləri Təşkilatının yaradılmasının əsası 2009-cu ildəNaxçıvanda qoyulmuş, Türk Ölkələrinin Əməkdaşlıq Şurası təşkil olunmuşdu. Ona görə də bu tədbirin Naxçıvanda keçirilməsi rəmzi məna daşıyır. Yenə də Naxçıvanda Türk Dövlətlərinin Qeyri-Hökumət Təşkilatlarının platformasının yaradılması gözlənilir”.
22-11-2025, 14:48
Qoyunu qamçı ilə döyən çoban cəzalandırıldı
Samuxda heyvanla rəhmsiz davranan şəxs barəsində qanunamüvafiq tədbir görülüb.
Polis əməkdaşlarının keçirdikləri müvafiq tədbirlər nəticəsində heyvanla rəhimsiz davranan şəxsin Samux rayon sakini V. Bayramquliyev olması müəyyən edilib.
Şəxs saxlanılaraq polis şöbəsinə gətirilib və barəsində qanunamüvafiq tədbir görülüb.
Faktla bağlı araşdırma aparılır.
Qeyd edək ki, sosial şəbəkələrdə Samuxda çobanın bir qoyunu qamçı ilə döyməsini əks etdirən görüntülər yayılıb.
22-11-2025, 14:40
Bakıda keçmiş məhkumdan 10 kq narkotik aşkarlandı
Daxili İşlər Nazirliyinin Baş Narkotiklərlə Mübarizə İdarəsinin əməkdaşları narkotik vasitələrin ölkə ərazisində qanunsuz dövriyyəsinin qarşısını almaq üçün mübarizə tədbirlərini davam etdirirlər.
Nazirlikdən verilən məlumata görə, paytaxtın Yasamal rayonunda keçirilən əməliyyatla əvvəllər də analoji cinayətə görə məhkum olunmuş 1991-ci il təvəllüdlü Vasif İsmayılov saxlanılıb.
Onun sərnişin qismində əyləşdiyi avtomobilə baxış zamanı 10 kiloqram 65 qram marixuana aşkarlanıb.
V.İsmayılov ifadəsində narkotik vasitələri şəxsiyyəti araşdırılan İran vətəndaşından aldığını və hissələrə ayırmaqla sataraq qazanc əldə etmək niyyətində olduğunu etiraf edib.
Saxlanılan şəxs barəsində Cinayət Məcəlləsinin müvafiq maddəsi ilə cinayət işi başlanılıb, araşdırmalar davam etdirilir.
Polis bütün ölkəboyu narkotiklərlə əlaqəli əməliyyat və nəzarət-profilaktik tədbirləri bundan sonra da qətiyyətlə davam etdirəcək.
22-11-2025, 14:26
Ortaq türk əlifbası ilə bağlı məqamlar razılaşdırılıb - Binəli Yıldırım
Zəngəzur Dəhlizi Orta Dəhlizin tərkib hissəsi olaraq, Türk dünyasının inkişafına verilən töhfənin mühüm amilidir.
Bu barədə Türk Dövlətləri Təşkilatının (TDT) Ağsaqqallar Şurasının rəhbəri Binəli Yıldırım Türkiyənin Səlcuq Universitetində keçirilən simpoziumda çıxışı zamanı bildirib.
Onun sözlərinə görə, Azərbaycanın qərb bölgələri ilə Naxçıvan Muxtar Respublikası arasında marşrutun açılması Türk dünyasının potensialını daha da açacaq, onun resursları və sərvətləri türk xalqlarının rifahı naminə istifadə ediləcək. “Zəngəzur Dəhlizi Türk dünyasının gələcəyi üçün xüsusi əhəmiyyət kəsb edir”, - deyə Binəli Yıldırım bildirib.
O, TDT ölkələri arasındakı ticarət göstəricilərinə toxunaraq bildirib ki, hazırda türk dövlətləri arasında 1,1 trilyon dollarlıq ümumi xarici ticarət dövriyyəsinə baxmayaraq, bunun cəmi 70 milyard dolları qarşılıqlı ticarətin payına düşür.
TDT Ağsaqqallar Şurasının rəhbəri, həmçinin 34 hərfdən ibarət ortaq türk əlifbasının tam istifadəsinin zəruriliyini də qeyd edib. “Ortaq türk əlifbası ilə bağlı iş məqamları razılaşdırılıb. Bu gün bu əlifbanın faktiki olaraq tətbiqi vacibdir. Hər şey ayrı-ayrı ölkələrin siyasi iradəsindən və onu tətbiq etmək səyindən asılıdır. Buna vaxt lazımdır”, - deyən B.Yıldırım yeni əlifba sayəsində TDT ölkələri sakinlərinin istənilən türk dilində oxuya biləcəyini qeyd edib.
TDT Ağsaqqallar Şurasının rəhbəri, eyni zamanda, Türk dünyasının ortaq tarixi üzrə dərsliklərin hazırlanması, gömrük prosedurlarının sadələşdirilməsi və infrastrukturun inkişafı kimi məsələləri də türk dövlətlərinin inteqrasiyasının gündəmində duran vacib məsələlər kimi diqqətə çatdırıb.
22-11-2025, 14:17
İranda su böhranı - Cənubi Azərbaycanlıları nə gözləyir?
İranda illərdir davam edən təbii resurs problemi, xüsusilə də, su mənbələrindəki ciddi azalma ölkənin sosial və siyasi balansını təhdid səviyyəsinə çatdırıb. Son illərdə quraqlıq, düzgün aparılmayan su idarəçiliyi və iqlim dəyişikliyi səbəbilə İranda ciddi su qıtlığı yaşanır. Problemin ən ciddi müşahidə edildiyi ərazi paytaxt Tehrandır.
“Su problemi belə davam edərsə, Tehranın tamamilə boşaldılmasına ehtiyac yarana bilər”, - İran Prezidenti Məsud Pezeşkian bir neçə gün əvvəl belə deyib. Onun açıqlaması ölkə ərazisində ciddi narahatlığa səbəb olub. Tehran kimi 15 milyon əhalisi olan metropolun boşaldılması sadəcə ekoloji böhran deyil, çox ciddi humanitar, iqtisadi və siyasi problem deməkdir.
40 milyon Cənubi Azərbaycanlı: “Bu böhranın nəticələri bizə nə gətirəcək?"
İrandakı bu qeyri-müəyyənlik, xüsusilə ölkənin şimal qərbində yaşayan təqribən 40 milyon Cənubi Azərbaycanlı arasında yeni sualları gündəmə gətirib. Su qıtlığının və mümkün köçün regional balansı dəyişdirə biləcəyindən bəhs edilir.
“MediaTürk TV"yə danışan Azərbaycan vətəndaşları, mümkün böyük bir böhran zamanı güneyli soydaşlarımızın necə bir yol izləməli olduğu sualına diqqətçəkən cavablar verib.
İki fərqli baxış
Vətəndaşlar arasında sorğu zamanı əsas iki baxış önə çıxıb. Bir çox Azərbaycan vətəndaşı İranın daxili qarışıqlılqlarının daha da dərinləşməsi halında Cənubi Azərbaycanın öz siyasi iradəsini formalaşdırmalı olduğunu düşünür. Belə düşünənlərə görə, İranın daxildən “ərimə” ehtimalı artarsa, Cənubi Azərbaycan öz müqəddaratını təyin etməlidir. İnsanlar düşünür ki, 40 milyonluq əhali tarixi və mədəni bağlarla güclü bir dövlət qura bilər. Eyni zamanda İrandakı xaosun regiona sıçramaması üçün müstəqillik daha təhlükəsiz bir seçim ola bilər.
Respondentlərin kiçik bir qismi: “Cənubi Azərbaycan Azərbaycan Respublikasına daxil olmalıdır”
Bu fikri ifadə edənlər, ortaq dil, mədəniyyət və milli kimliyin birləşməyi dəstəklədiyini, Azərbaycanın iqtisadi stabilliyini və dövlət təşkilatının daha güclü olduğunu, İrandakı qeyri-sabitliyin Türk dünyası üçün tarixi bir birləşmə fürsəti yarada biləcəyini müdafiə edirlər.
Analiz: Su böhranı yalnız ekologiya problemi deyil
Ekspertlərə görə, İrandakı su böhranı sadəcə ekologiya problemi deyil. Ölkənin gələcəyini müəyyən edəcək, sosio-politik qırılma nöqtəsidir.
İranda su böhranı niyə dərinləşir?
Yeraltı su rezervlərinin 70%-dən çoxu tükənib. Böyük şəhərlərdə əhali sayı olduqca çoxdur. Sənaye və kənd təsərrüfatında sudan istifadənin planlamaları illərdir, yaxşı aparılmır.
Eyni zamanda, iqlim dəyişikliyi isti hava şəraitinin atmasına, yağışların azalmasına səbəb olub.
Tehranın boşaldılmasının hansı təsirləri olacaq?
Bu senari həyata keçirilərsə, ölkə daxilində böyük bir köç dalğası yaranacaq, iqtisadi çöküş yaşanacaq, İran hakimiyyəti üzərində siyasi təzyiq artacaq.
22-11-2025, 14:02
Lukaşenko ukraynalıları əfv etdi
Belarus prezidenti Aleksandr Lukaşenko həbsdə olan 31 Ukrayna vətəndaşını əfv edib.
Bildirilir ki, əfv sərəncamı Lukaşenko və ABŞ lideri Donald Tramp arasında əldə olunan razılaşmaların davamı olaraq imzalanıb.
"Aleksand Lukaşenko Ukrayna tərəfinin müraciəti əsasında, qonşu ölkədə silahlı münaqişənin həll olunması şəraitini təmin etmək məqsədilə, xoşməram və humanizm prinsiplərini rəhbər tutaraq prezident Belarusda cinayət törətmiş 31 Ukrayna vətəndaşını əfv edib”, - Lukaşenkonun mətbuat katibi Natalya Eismont bildirib.
22-11-2025, 13:59
Prezidentdən Vahid Əzizlə bağlı SƏRƏNCAM
Vahid Cəfərov (Vahid Əziz) "Şərəf" ordeni ilə təltif edilib.
Bununla bağlı Prezident İlham Əliyev Sərəncam imzalayıb.
Sərəncamla V.Əziz bu mükafata Azərbaycan ədəbiyyatının inkişafında uzunmüddətli səmərəli fəaliyyətinə görə layiq görülüb.
Qeyd edək ki, sabah Xalq şairi Vahid Əzizin 80 yaşı tamam olur.
22-11-2025, 13:24
3 nəfərin öldüyü yanğına görə kim məsuliyyət daşıyır?
Bakıda ötən gün baş verən yanğında 3 nəfər həyatını itirib. 27 nəfər tüstüdən zəhərlənmə diaqnozu ilə hospitalizasiya olunub. Hazırda 7 nəfərin müalicəsi davam etdirilir.
Faktla bağlı Baş Prokurorluqda Azərbaycan Respublikasının Cinayət Məcəlləsinin müvafiq maddəsi ilə cinayət işi başlanaraq ibtidai istintaq aparılır.
Məsələ ilə bağlı hüquqşünas Əkrəm Həsənov bildirib ki, yanğın və ya qəza nəticəsində ölüm hallarının araşdırılamsında iki cür yanaşma ola bilər.
Hüquqşünasın fikrinə görə, heç bir qayda və ya qanun pozuntusu olmayıbsa, sırf bədbəxt hadisə baş veribsə, kimisə məsuliyyətə cəlb etmək düzgün deyil:
"İkinci məsələ texniki təhlükəsizlik qaydalarının pozulması ilə bağlıdır. Hər bir binanın təhlükəsizliyinə baxan şəxs olmalıdır. Bütün qurğulara daimi nəzarət etməli, onlarla işləmək qaydalarını digər şəxslərə öyrətməli, eyni zamanda kənar şəxslərin qadağan olunmuş zonaya keçməsinin qarşısını almalıdır".
Ə.Həsənov deyib ki, cavabdeh orqan Fövqəladə Hallar Nazirliyidir:
"Nazirliyin aidiyyəti şöbəsi obyektlərdə daimi yoxlama və təlim təşkil etməlidir. Obyektin təhlükəsizliyinə cavabdeh şəxslə əməkdaşlıq mütləqdir".
22-11-2025, 13:16
Ankarada qalmaqal - Mansur Yavaş barəsində istintaq qərarı verildi
Türkiyənin Daxili İşlər Nazirliyi Ankara Böyükşəhər Bələdiyyəsinin (ABB) rəhbəri Mansur Yavaş və onun yaxın Nevzat Uzunoğlu barəsində istintaq aparılmasına razılıq verib.
İstintaq Ankara Böyükşəhər Bələdiyyəsinin konsert xərclərində yeyinti və prosedur pozuntuları ilə bağlı irəli sürülən iddialarla əlaqədardır.
Ankara Respublika Baş Prokurorluğu konsert xidmətlərinin satın alınması ilə bağlı araşdırma zamanı ittiham aktı tərtib edildikdən sonra Yavaş və Uzunoğlu haqqında “vəzifə səlahiyyətlərindən sui-istifadə” və “nəzarət vəzifəsini yerinə yetirməmək” maddələri ilə bağlı istintaq icazəsi tələb etmişdi. Nazirliyin həmin tələbi təsdiqlədiyi bildirilib.
Baş Prokurorluğun araşdırmasına əsasən Daxili İşlər Nazirliyinin Mülki İnspektorları tərəfindən hazırlanan təhvil-təslim hesabatı, Maliyyə Monitorinqi İdarəsinin (MASAK) araşdırması, Hesablama Palatasının yoxlaması və müstəqil ekspert rəyləri ABB-də keçirilmiş 32 konsert xidmətinin satın alınması zamanı bələdiyyənin ümumilikdə 154 milyon 453 min 221 lirə məbləğində ziyana uğradıldığını ortaya çıxarıb.
23 sentyabrda keçirilmiş əməliyyat zamanı aralarında sabiq bələdiyyə vəzifəliləri və şirkət nümayəndələrinin də olduğu 14 nəfər saxlanılıb. Onlara “vəzifə səlahiyyətlərindən sui-istifadə” və “tenderə müdaxilə” ittihamları irəli sürülüb.
Onlardan 5 nəfəri məhkəmənin qərarı ilə həbs olunmuş, 9 nəfər isə məhkətin nəzarəti altında sərbəst buraxılmışdı.
Hazırlanan 59 səhifəlik ittiham aktı Ankara 34-cü Ağır Cəza Məhkəməsi tərəfindən qəbul edilib. İttiham olunan 14 şəxs barəsində 7 il 6 aydan 31 il 6 aya qədər həbs cəzası tələb olunur.
22-11-2025, 12:45
Pezeşkian istefaya göndərilir? - TEHRANDAN CAVAB
İran mətbuatında Prezident Məsud Pezeşkianın istefası ilə bağlı xəbərlər yayılıb.
İranın vitse-prezidenti Məhəmməd Cəfər Qaimpənah iddiaları təkzib edib.
“Biz İranı sevirik və onun üçün çalışırıq. Təhqirlər eşidirik, amma geri çəkilmirik. İran bütün iranlılara aiddir və doktor Pezeşkian da buna görə dayanır. Bizə imtiyaz və ya vəzifə lazım deyil, hər şeyimizi İrana vermişik və yenə də verəcəyik. Çoxsaylı problemlərə baxmayaraq, bütün səyimiz xalq və hökumət tərəfdarlarının qarşısında utanc yaşamamaqdır”, - o bildirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!