9-04-2026, 17:16
Hansı partiyaya nə qədər maliyyə yardımı ayrılıb?
"Siyasi partiyalar haqqında" qanuna əsasən partiyalar illik maliyyə hesabatlarını auditor rəyi ilə birlikdə hər il aprel ayının 1-dən gec olmayaraq, MSK-ya təqdim etməlidir.
Artıq partiyalar hesabatlarını MSK-ya təqdim ediblər. Partiyaların əsas maliyyə mənbələrinə üzvlük haqqı, ianələrdən əlavə dövlətdən ayrılan maliyyə yardımları da aiddir.
Yeni Azərbaycan Partiyası(YAP)
2025-ci ildə YAP-a verilən dövlət maliyyə yardımının məbləği 3 milyon 004 min 615 manat olub. Əvvəlki dövrlə müqayisədə maliyyə yardımının məbləği 405 753 manat artıq olub. Belə ki, 2024-cü ildə YAP-a 2 598 862 manat dövlət yardımı edilib.
Müsavat Partiyası
Partiyanın təqdim etdiyi hesabatdan görünür ki, 2025-ci ildə dövlət tərəfindən 40 586 manat maliyyə yardımı göstərilib. 2024-cü ildə isə dövlət yardımının məbləği 9207 manat təşkil edib.
Haqq Ədalət Partiyası (HƏP)
HƏP-ə dövlət tərəfindən verilən 2090 manat təşkil edib.
Demokratik İslahatlar Partiyası (DİP)
DİP-ə 2025-ci ildə dövlət tərəfindən göstərilən maliyyə dəstəyinin məbləği 304 min 946 manat təşkil edib. 2024-cü ildə isə partiya dövlətdən 274 min 278 manat maliyyə dəstəyi alıb.
Vətəndaş Həmrəyliyi Partiyası (VHP)
Dövlət 2025-ci ildə VHP-yə 379 min 185 manat maliyyə dəstəyi göstərib. 2024-cü ildə isə partiyaya verilən maliyyə dəstəyinin məbləği 336 min 838 manat olub.
Ağ Partiyası (AğP)
AğP-yə ötən il dövlət tərəfindən göstərilən maliyyə dəstəyinin məbləği 2024-cü illə müqayisədə xeyli aşağı olub. Belə ki, 2024-cü ildə partiyaya 4 699 manat maliyyə yardımı edildiyi halda 2025-ci ildə bu rəqəm 1 175 manat olub.
Ədalət, Hüquq, Demokratiya (ƏHD) Partiyası
ƏHD Partiyasına göstərilən dövlət maliyyə yardımı 2024-cü illə müqayisədə artıb. Belə ki, 2024-cü ildə dövlətdən verilən maliyyə yardımı 284 min 898 manat olduğu halda, 2025-ci ildə bu rəqəm 338 min 724 manat təşkil edib.
Böyük Quruluş Partiyası (BQP)
Böyük Quruluş Partiyasına 2025-ci ildə 304 min 946 manat maliyyə yardımı edilib. 2024-cü il partiyanın dövlətdən aldığı maliyyə yardımının göstəricisi isə 274 min 278 manat olub.
Azərbaycan Demokratik Maarifçilik Partiyası (ADMP)
ADMP-yə 2025-ci ildə 304 min 946 manat maliyyə yardımı edilib. 2024-cü il partiyanın dövlətdən aldığı maliyyə yardımının göstəricisi isə 274 min 278 manat olub.
Milli Dirçəliş Hərəkatı Partiyası (MDHP)
Milli Dirçəliş Hərəkatı Partiyasına nə 2024, nə də 2025-ci ildə dövlət tərəfindən maliyyə yardımı edilməyib.
Azərbaycan Xalq Partiyası (AXP)
Partiyanın MSK-yə təqdim etdiyi maliyyə hesabatında dövlət tərəfindən ayrılan yardımın məbləği cəmi 850 manat olub. 2024-cü ildə isə bu rəqəm 3400 manat təşkil edib.
Klassik Xalq Cəbhəsi Partiyası (KXCP)
Partiyanın təqdim etdiyi hesabatda 2025-ci ildə dövlət tərəfindən ayrılan maliyyə yardımının məbləği 50 manat olub. 2024-cü illə müqayisədə bu 4 dəfə aşağı göstəricidir. Belə ki, 2024-cü ildə patiyanın dövlətdən aldığı maliyyə yardımının məbləği 200 manat təşkil edib.
Respublikaçı Alternativ (REAL) Partiyası
Partiyanın MSK-yə təqdim etdiyi sənəddə 2025-ci ildə dövlətin ayırdığı maliyyə yardımının məbləği 304 min 946 manat göstərilib. 2024-cü ildə isə bu rəqəm 274 min 278 manat olub.
Azad Vətən Partiyası (Azad Vətən)
Partiyaya dövlət tərəfindən 2025-ci ildə 7000 manat yardım edilib. 2024-cü ildə isə heç bir yardım olmayıb.
“Ana Vətən” Partiyası (AVP)
Partiyaya 2025-ci ildə 304 min 946, 2024-cü ildə isə 274 min 278 manat dövlət maliyyə yardımı verilib.
Ədalət Partiyası
Ədalət Partiyası isə 2025-ci ildə 1012 manat, 2024-cü ildə isə 3495 manat yardım alıb.
Böyük Azərbaycan Partiyasının (BAP)
Böyük Azərbaycan Partiyasının (BAP) dövlətdən 2025-ci ildə aldığı dövlət maliyyə dəstəyinin məbləği 304 min 946 manat 2024-cü ildə isə 274 min 278 manat təşkil edib.
Yeni Zaman Partiyası (YZP)
Partiyaya 2025-ci ildə 1140, 2024-cü ildə isə 1455 manat dövlət maliyyə yardımı göstərilib.
Azərbaycan Milli İstiqlal Partiyası (AMİP)
Azərbaycan Milli İstiqlal Partiyası (AMİP) 2025-ci ildə 304 946 manat maliyyə yardımı aldığı halda, 2024-cü ildə bu göstərici 65 804 manat təşkil edib.
Vəhdət Partiyası
Vəhdət Partiyasına (VP) 2025-ci ildə dövlət maliyyə yardımı verilməyib. 2024-cü ildə isə partiyaya dövlət tərəfindən 195 660 manat maliyyə vəsaiti yardım kimi verilib.
Milli Cəbhə Partiyası (MCP)
Partiyaya 2024-cü ildə 274 min 278 manat, 2025-ci ildə isə 304 min 946 manat maliyyə vəsaiti ayrılıb.
Qeyd edək ki, Azərbaycan Demokrat Partiyası (ADP), Müasir Müsavat Partiyası, Ümid Partiyası, Gələcək Azərbaycan Partiyası və Azərbaycan Xalq Cəbhəsi Partiyası isə Maliyyə vəziyyəti haqqında hesabat üzrə mövcud qalıqların istifadəsinin və maliyyə-təsərrüfat fəaliyyətinin nəticələri haqqında hesabat üzrə dəyişikliyin olmaması barədə Arayış təqdim ediblər. Yəni bu partiyaların maliyyə fəaliyyətlərinin göstəricisi sıfır olub.
9-04-2026, 17:07
Rusiyada pioner və komsomollar bərpa olunur
Rusiyada sovet dövrünə aid uşaq və gənclər təşkilatlarının bərpası təklif olunur.
Rusiya Dövlət Dumasının regional siyasət komitəsi sədrinin müavini Mixail Matveyev sovet tərbiyə sisteminin – oktyabryatlar, pionerlər və komsomolun yenidən tətbiqini təklif edib.
Onun sözlərinə görə, bu model gənclərdə dəyərlərin formalaşdırılması baxımından kompleks və faydalı sistem olub.
“Bu sistemi geri qaytarardım. Əgər kimsə onu tam əvvəlki formada – məsələn, Lenin təsvirli oktyabryat nişanı ilə bərpa etmək istəmirsə, alternativ variant düşünmək olar. Pioner təşkilatı isə artıq formalaşmış hərəkatdır. Onu adı və qırmızı qalstuku ilə birlikdə tam şəkildə bərpa etmək mümkündür”, – deyə Matveyev bildirib.
9-04-2026, 17:03
Dövlət Xidmətinin əməkdaşı faciəvi şəkildə öldü
Bakıda 31 yaşlı kişi çoxmərtəbəli binadan yıxılıb.
Hadisə Xətai rayonu Lütfi Zadə küçəsində baş verib.
Belə ki, Müzəffər İlham oğlu Aydınlı binanın 15-ci mərtəbəsindən yıxılaraq ölüb.
Faktla bağlı araşdırma aparılır.
Qeyd edək ki, M.Aydınlı Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) əməkdaşı olub.
Onun ölümü ilə bağlı Xətai Rayon Prokurorluğunda araşdırma aparılır.
9-04-2026, 16:59
Ceyhun Bayramov pakistanlı həmkarı ilə danışdı
Pakistanın baş nazirinin müavini və xarici işlər naziri Məhəmməd İshaq Dar regionda baş verənlərlə bağlı Azərbaycanın xarici işlər naziri Ceyhun Bayramovla telefon danışığı aparıb.
Pakistanlı nazir bununla bağlı “X” hesabında paylaşım edib.
Ceyhun Bayramov Pakistanın ilkin atəşkəsin təmin olunmasında və sülhün təşviqində rolunu yüksək qiymətləndirib.
Məhəmməd İshaq Dar isə Pakistanın bu istiqamətdə səylərini davam etdirməkdə qətiyyətli olduğunu bildirib və bu addımların uzunmüddətli sülhə töhfə verəcəyinə ümid etdiyini vurğulayıb.
Tərəflər gələcəkdə də əlaqələrin davam etdirilməsi barədə razılığa gəliblər.
9-04-2026, 16:55
Gecə paytaxtın əsas prospektləri bağlı olacaq
Vətəndaşların rahat və təhlükəsiz hərəkətinin təmin olunması, həmçinin Ümumdünya Şəhərsalma Forumu XIII Sessiyası (WUF13) ilə əlaqədar hazırlıq işləri çərçivəsində Bakı şəhərinin bəzi yollarında təmir işləri həyata keçiriləcək.
Bu barədə Azərbaycan Avtomobil Yolları Dövlət Agentliyinə istinadən xəbər verir.
Bu istiqamətdə yol örtüyünün istismar vəziyyəti nəzərə alınaraq aşağıdakı ərazilərdə təmir işlərinin aparılması planlaşdırılır:
- Heydər Əliyev prospektindən Babək prospektinə gedən yolötürücü üzərində;
- Ziya Bünyadov prospektində (“Koroğlu” metro stansiyası istiqamətində).
İşlərin icra tarixi və müddəti:
* 09 aprel saat 23:00-dan 10 aprel saat 07:00-dək
* 10 aprel saat 23:00-dan 11 aprel saat 07:00-dək
Göstərilən tarixlərdə Heydər Əliyev prospektindən Babək prospektinə gedən yolötürücü üzərində nəqliyyat vasitələrinin hərəkəti tam, Ziya Bünyadov prospektində isə (“Koroğlu” metro stansiyası istiqamətində) nəqliyyat vasitələrinin hərəkəti qismən məhdudlaşdırılacaq.
"Sürücülərdən aparılan işlərə anlayışla yanaşmaları və əvvəlcədən hərəkət istiqamətlərinə uyğun alternativ yollardan istifadə etmələri xahiş olunur", - məlumatda qeyd olunur.
9-04-2026, 09:56
Təbrik edirik!
Bu gün qardaşım Əlövsətin 70 yaşı tamam olur. 70 illik ağrı-acılı, acılı-şirinli günlər yaşamış hər kəs mütləqdir ki, o zirvədən geri boylanır. Özündən sonra qoyduğu izə, qazandığı ad-sana, ətrafındakıların nəzərində tutduğu mövqeyə bir nəzər yetirir. Bəri başdan qeyd edək ki, Əlövsət bəy istiqanlı, od-ocağa, yurda bağlı, dostluqda sədaqətli, ailəcanlı, işinə məsuliyyətli, vətənini sevən qürurlu bir vətəndaşdır. Gəlin daha yaxından tanış olaq:
Xalıqverdiyev Əlövsət Məmmədəli oğlu 1956-cı il aprelin 9-da Qərbi Azərbaycanın Zəngəzur mahalının Qafan rayonunun Yuxarı Gödəkli kəndində- kəndin bünövrəsini qoyan Eyvazxanlı tayfasının nüfuzlu bir ailəsində dünyaya göz açıb. 5 uşaqlı ailənin ilk övladıdır. Əlövsət dünyaya göz açandan həyətlərindəki azman palıd ağacını görüb. Uşaqlıq çağlarını onun dövrəsində oynamaqla, başına dırmanmaqla keçirib. Demək olar ki, elə məğrurluğu da o qocaman palıd ağacından, gəzdiyi Zəngəzur dağlarından götürüb.
Əlövsət Xalıqverdiyev 8-ci sinfi əla qiymətlərlə Yuxarı Gödəklidə, 10-cu sinfi isə 1973-cü ildə Qafan şəhər 4 №-li Azərbaycan orta məktəbində bitirib. Elə həmin il də Azərbaycan Neft Kimya (inst.) Akademiyasına qəbul olaraq ali təhsili uğurla başa vurub. 1975-1977-ci illərdə Sovet Ordusu sıralarında hərbi xidmətdə olub.
O, hələ tələbəlik illərindən əmək fəaliyyətinə başlayıb.
1977-ci ildən 2012-ci ilə kimi Azəbaycan Zərgərlik Sənaye İstehsalat Birliyində fəaliyyət göstərib. İstehsalatda işgüzarlığı, məsuliyyəti, təşkilatçılıq qabiliyyəti ilə həmişə seçilib. Ona görə də xarakterindəki bu yüksək keyfiyyətlər nəzərə alınaraq 1990- ildə SSRİ dağılanda müstəqil Azərbaycan Respublikasının milli atributlarının dəyişdirilməsi, (milli pulun eskizinin hazırlanması) Azərbaycan Dövlət mükafatlarının- orden və medalların ərsəyə gəlməsi kimi məsuliyyət tələb edən şərəfli bir iş ona etibar edilib.
Onun həyat yolunun narahat günləri, yuxusuz gecələri doğma yurdu Zəngəzurun itkisi ilə başlayıb. Azərbaycanın dörd bir yanına səpələnmiş qaçqın və köçkünlərimizi axtarıb tapmağı, uyğun bir yerdə məskunlaşdırmağı, maddi kömək etməyi, onlara mənəvi dayaq olmağı bu ağır tarixi məqamda özünə borc bilib.
Hələ 1990- ildə eşidəndə ki, Zəngəzurda kənddə və diğər yerlərdə ermənilər qəbiristanlıqları dağıdıblar, o buna dözməyib. Heç nəyə məhəl qoymadan həyatı bir riskə gedib dağıdılmış qəbirlərin şəklini çəkib gətirmişdir. Erməni vandallarının törətdikləri barədə gördüklərini yazaraq “Vətən səsi” qəzetində “Yurd çağrışı" sərlövhəli məqalə ilə çıxış edib. Yurd həsrəti Əlövsət Xalıqverdiyevi heç vaxt rahat buraxmayıb. O, Vətən dərdini qələmi ilə ovutmağa çalışıb. Azərbaycan Radiosunda dəfələrlə çıxış edib. Müəllifi olduğu “Zəngəzurda keçən günlər" və “Qayıt anam qayıt gəl" verilişləri Azərbaycan Teleradiosunun “Qızıl fond”unda saxlanılır.
Əlövsət Xalıqverdiyev peşə fəaliyyəti ilə bərabər ictimai-siyasi fəaliyyətlə də məşğul olur. Beləki 2004-cü ildən “DAYAQ" İctimai Birliyini təsis edib. Bu yolla qaçqınlara və deportasiyaya məruz qalanlara yardım edir.
O, həmyerlisi, ixtisasca həkim olan İsbiyeva Rəqibə Qabil qızı ilə ailə qurub. Birlikdə üç övlad böyüdüblər. İki nəvənin qayğıkeş babasıdır. Övladlarının ikisi Rəqibə xanımın peşəsinə yiyələniblər. Günel göz həkimi- cərrahdır. Elnur Xalıqverdiyev də həkimdir. Kamil isə Bakı Biznes Universitetinin məzunudur.
Mənə dogma olan bu ailənin başçısı Əlövsət Məmmədəli oğlu Xalıqverdiyevi 70 illik yubileyi münasibəti ilə ürəkdən təbrik edirəm, ona sağlam-uzun ömür və Zəngəzurlu günlər arzulayıram!
Sevgi və sayğılarla:
Tamxil Ziyəddinoğlu
8-04-2026, 18:05
Şiviloğulları ocağının yurd həsrətli
İsgəndər İsmayıl oğlu
Daha bir yurd həsrətli ziyalımız dünyadan köçdü. Bu gün haqqında söhbət açacağımız ziyalımız Qərbi Azərbaycanın Ağbaba elinin Kiçik Təpəköy kəndində dünyaya göz açmış Şiviloğulları nəslinin dəyərli övladı İsgəndər İsmayıl oğludur. Onun mənsub olduğu Şiviloğulları nəsli Qarapapaq türk boyunun bir qoludur.
Kimdir Şiviloğulları?
Bu nəsli 16-cı əsrdə Qanuni Sultan Süleyman dönəmində Bahadır bəyin başçılığı ilə Qarabağdan Qazağa, oradan Borçalıya, Ahıskaya, nəhayət, Anadoluya köç ediblər.
Hərbi keçmişə malik olan Şiviloğulları Çıldır bölgəsində məskunlaşaraq ərazinin rus və ermənilərə qarşı müdafiəsinə mühüm töhvələr vermişlər.
Zamanla Ağrı, Muş, Vakfıkebir, Sivas, Ərzurum, Reyhanlı bölgələrinə dağılaraq Ağrıda Şiviloğulları Bahadır, Bağatır və Baltaçı soyadlarını, Çıldırda isə Koca soyadını daşıyıblar.
Türkiyədə hərbi sahədən başqa millət vəkili və bələdiyyə başqanı kimi mühüm postlar da tutublar. Belə ki, Qəhrəman bəyin oğlu Mehmet Rüstəm Bahadır Qars millət vəkili və bir müddət Qars bələdiyyə başqanı vəzifələrində çalışıb.
İsgəndər İsmayıl oğlu isə Şiviloğullarının Qərbi Azərbaycanın Ağbaba mahalında yaşayan nümayəndələrindəndir. Şiviloğullarının ata-baba ocağı olan Kiçik Təpəköy kəndi Qars vilayətinin Qars qəzasının Ağbaba nahiyəsində yerləşsə də sonrada Ermənistan (Qərbi Azərbaycan) sərhədləri daxilində qalmışdır.
Toponim Azərbaycan dilində “kiçik dağ, dağ” mənasında işlənən təpə sözü ilə müasir türk dilində “kənd” mənasında işlənən “köy” sözlərinin birləşməsindən əmələ gəlmişdir. “Böyük” fərqləndirici əlamət bildirir. Sonralar Böyük Təpəköylə yaxınlığındakı Kiçik Təpəköy kəndləri birləşdirilmiş və Təpəkənd adlandırılmışdır.
Ermənistan prezidentinin 3 aprel 1991-ci il tarixli fərmanı ilə kəndin adı dəyişdirilərək “Berdaşen” qoyulmuşdur. “Ermənistan Respublikasının inzibati-ərazi bölgüsü haqqında” 7 noyabr 1995-ci il tarixli Qanuna əsasən Şirak vilayətinin inzibati ərazisinə daxil edilmişdir.
Ağbaba elinin dəyərli övladı İsgəndər İsmayıloğlu bütün həyatını xalqın maariflənməsinə həsr etmiş bir ziyalıdır. O, 12 yanvar 1938-ci ildə Ağbaba elinin Kiçik Təpəköy kəndində anadan olmuşdur. Atası İsmayıl Mikayıl oğlu 1941-ci ilin payızında İkinci Dünya müharibəsinə yola düşmüş 28.09.1942-ci ildə Şimali-Qafqazda gedən döyüşlərdə həlak olmuşdur. Onu da qeyd edək ki, İsmayıl Mikayıl oğlunun özündən başqa 3 qardaşıda II Dünya müharibəsinin qurbanı olmuşlar. İsmayıl kişinin tək yadigarı olan İsgəndər müəllim anası Qızlarbəyi xanım və ata nənəsi Güləbatın xanımın himayəsində böyümüşdür. O, Kiçikç Təpəköy kənd 7 illik məktəbini bitirəndən sonra Güllücə kənd orta məktəbində təhsilini davam etdirərək 1956-cı ildə orta təhsil başa vurmuşdur. 1957–1960-cı illərdə Sovet Ordusunda hərbi xidmətdə olmuşdur. 1960–1968-ci illərdə kolxozda tabelçi və ilk partiya təşkilatının katibi vəzifəsində işləmişdir.
Müəllim olmaq arzusu ilə hazırlaşıb sənədlərini 1962-ci ildə ADPU-nun (keçmiş APİ) ibtidai təhsil fakültəsinin qiyabi şöbəsinə təqdim etmiş və qəbul olunmuşdur. 1966-cı ildə oranı bitirib, ali pedaqoji təhsil almışdır. Elə ali məktəbə qəbul olduğu ildən yeni istifadəyə verilmiş Kiçik Təpəköy kənd orta məktəbində ibtidai sinif müəllimi kimi pedaqoji fəaliyyətə başlamış və 1988-ci ilədək orada çalışmışdır. İsgəndər müəllim rayonun adlı-sanlı ibtidai sinif müəllimlərindən olmuşdur. Anadan olmasının 50 illiyi ilə əlaqədar olaraq 1988-ci ildə RXMŞ tərəfindən fəxri fərmanla təltif edilmişdir. Valideynlər və şagirdlər arasında dərin nüfuzu vardı. Onun vaxtı ilə dərs dediyi şagirdlərin bir çoxu təhsillərini davam etdirib savadlı və bacarıqlı mütəxəssislər oldular. Onların arasında özlərini elmə həsr edən şəxslər və digər peşə sahibləri də var.
1988-ci ildə məlum hadisələrlə bağlı olaraq onun ailəsi də Bakı şəhərinin Zabrat qəsəbəsində məskunlaşmış və o, pedaqoji fəaliyyətini 81, 22 saylı tam orta məktəblərdə davam etdirmişdir. 2013-cü ildən təqaüdə çıxmışdır. O, 8 mart 2026-cı ildə Bakı şəhərində dünyasını dəyişmişdir.
İsgəndər müəllim respublikanın hörmətli hüquqşünaslarından olan Əziz Hüseynovun qızı Savad xanımla ailə həyatı qurub. Onların bu nikahdan 8 övladı dünyaya gəlib. Övladlarının hamısı ali təhsillidir. Oğlanları Alxas mühəndis, Sabir bank işçisi qızları Rəsmiyə şairədir (iki şeir kitabı çap olunub). İsgəndər müəllimin oğlu Zakir İsmayılov vaxtıilə Amasiyada dövlət orqanlarında çalışmış, Azərbaycanda kitabxanaçılıq işini dərindən bilən azsaylı mütəxəssilərdəndir. Müxtəlif istiqamətlərdə bir sıra elmi məqalələrin müəllifi və dövlət qulluğunun baş müşaviridir.
İsgəndər müəllimin kiçik oğlu Mənsur İsmayılov Türk dünyasının tanınmış riyaziyatçılarındandır.O, uzun illərdi Türkiyənin Qəbzə Universitetinin professor kimi çalışır.
2002-ci ilin noyabr ayından Qəbzə Texniki Universidetinin dəvəti ilə burada çıalışmağa başlamışıdir. 2013-cü ildən professor elmi tituli almlşdır. 2017-ci ildən indiyədək həmin universitetdə riyaziyyat bölümünün başqanıdır.
Elmi fəaliyyəti dövründə əsasən xarici - ingilisdilli elmi jurnallarda məqalələri dərc edilməkdədir. 150-dən artıq elmi məqalənin və 3 kitabın müəllifidir. Mütəmadi olaraq elmi konfranslarda (Moskva, Sankt-Peterburq, Kiyev, Almatı, Tibilisi, Strasburq, Brüssel) iştirak edir və elmi məruzələrlə çıxış edir.
Şiviloğulları ocağının dəyərli övladı İsgəndər müəllimə həsr edilmiş bu yazı onun həyat hekayəsinin az bir hissəsini əhatə etməklə parlaq ruhuna kiçik bir töhvədir. Ruhun şad olsun İsgəndər müəllim!
Səməd Vəkilov,
Tədqiqatçı-hüquqşünas
8-04-2026, 17:55
Özbəkistandan gətirilən arı ailələri təhlükəlidir - XƏBƏRDARLIQ
Hazırda Qarabağ və Şərqi Zəngəzur iqtisadi rayonlarında ildə təxminən 1 500 ton bal istehsal olunur.
Bunu "Azərbaycan Arıçılar Assosiasiyası" İctimai Birliyinin sədri Bədrəddin Həsrətov bildirib.
Onun sözlərinə görə, bu il işğaldan azad edilmiş ərazilərə 200 000-dən çox arı ailəsinin köçürülməsi gözlənilir.
Bundan başqa, Assosiasiya sədri qeyd edib ki, hazırda daxili bazarda yerli balın payı 80 % təşkil edir: "Qalan pay qiyməti nisbətən ucuz olan və bu baxımdan yerli istehsal üçün ciddi rəqib sayılan idxal balına məxsusdur. Bəzən isə xaricdən gətirilən bal siropu bazarda bal adı ilə satışa çıxarılır. Ümumilikdə yerli fermerlərin satışla bağlı çətinlikləri var. Azərbaycan xaricdən bal almaqla yanaşı həm də bu məhsulu az miqdarda körfəz ölkələrinə ixrac edir. İxrac həcminin artması üçün məhsulumuzun tanıdılmasına ehtiyac var. Bizim balımız adi bal deyil, "premium" kateqoriyalı məhsul kimi yüksək qiymətə satıla bilər".
Assosiasiya sədri arıçıları narahat edən məqamları da diqqətə çatdırıb: "Hazırda əsas problemlərimiz arı xəstəlikləri, ölkədə arıçılıq üzrə mütəxəssis və ixtisaslaşdırılmış arı xəstəlikləri laboratoriyasının olmamasıdır. Bundan əlavə, Özbəkistandan gətirilən arı ailələrinin gələcəkdə xəstəlik yaymaq riski var".
2025-ci ildə Azərbaycanda arıçılıqla məşğul olan 29 456 təsərrüfatdakı 545,1 min arı ailəsindən 4 757 ton bal, 122,9 ton mum, 7,5 ton vərəmum, 14,9 ton güləm və 254 kq arı südü əldə edilib.
İstehsalçılar üzrə balın 1 kiloqramının orta satış qiyməti 28,5 manat, mumun - 17,7 manat, vərəmumun - 135,3 manat, güləmin - 154,6 manat təşkil etmiş, arı südünün 1 qramının orta satış qiyməti isə 6,8 manat olub.
2024-cü illə müqayisədə arı ailələrinin sayı 5,9 %, arıçılıqla məşğul olan təsərrüfatların hər birinə orta hesabla düşən arı ailələrinin sayı 2,1 %, bal istehsalı 7,9 %, mum istehsalı 6,9 %, vərəmum istehsalı 12,2 %, güləm istehsalı 11,2 % azalıb, arı südü istehsalı isə 6,2 % artıb.
8-04-2026, 17:52
Rusiya Azərbaycan XİN-ə cavab hazırlayır
Rusiya Xarici İşlər Nazirliyinin sözçüsü Mariya Zaxarova Azərbaycan XİN-nin açıqlaması ilə bağlı suala cavab olaraq bildirib ki, Moskva öz cavabını diplomatik kanallar vasitəsilə Bakıya çatdıracaq.
Zaxarova bu barədə suala bir müddət əvvəl Azərbaycan tərəfinin Paşinyan-Putin görüşündə Qarabağ məsələsinin müzakirəsi ilə bağlı Rusiyaya etirazını bildirməsinə görə münasibət bildirib.
Bu arada, Zaxarova xatırladıb ki, Rusiya və onun lideri Putin münaqişənin həllində əsas rol oynayıblar.
"Rusiya 1990-cı illərdən bəri davam edən bu həssas məsələnin həlli üçün şərait yaratmağa çalışıb. Son illərdə İrəvan və Bakı vasitəçilər olmadan dialoq aparmaq qərarına gəliblər və bu qərar Rusiyanın da başa düşdüyü bir qərardır. Eyni zamanda, normallaşma prosesini dönməz hala gətirmək üçün hələ çox iş görülməlidir".
O xatırladıb ki, münaqişənin həlli Moskvanın dəstəklədiyi ATƏT-in Minsk Qrupunun ləğvi qərarı ilə rəsmiləşdirilib.
8-04-2026, 17:44
Prezident və birinci xanım Beynəlxalq Təlim Mərkəzinin açılışında - FOTO
Prezident İlham Əliyev və birinci xanım Mehriban Əliyeva aprelin 8-də Milli Aviasiya Akademiyasında Beynəlxalq Təlim Mərkəzinin açılışında iştirak ediblər.
Milli Aviasiya Akademiyasının rektoru, akademik Arif Paşayev, Rəqəmsal inkişaf və nəqliyyat naziri Rəşad Nəbiyev və "Azərbaycan Hava Yolları" Qapalı Səhmdar Cəmiyyətinin İdarə Heyətinin sədri Samir Rzayev dövlətimizin başçısına və birinci xanıma mərkəzin fəaliyyəti barədə məlumat veriblər.
Bildirildi ki, Beynəlxalq Təlim Mərkəzi "Azərbaycan Hava Yolları" QSC-nin təşəbbüsü ilə Milli Aviasiya Akademiyasının ərazisində yaradılıb. Mərkəz uçuş heyətinin fövqəladə vəziyyətlər üzrə hazırlığı, həmçinin hava hərəkətini idarəetmə dispetçerlərinin nəzəri və praktiki təlimi üçün nəzərdə tutulub.
Yeni kompleksdə Beynəlxalq Mülki Aviasiya Təşkilatının (ICAO) və Avropa İttifaqı Aviasiya Təhlükəsizliyi Agentliyinin (EASA) tələblərinə uyğun olaraq "Azəraeronaviqasiya" Hava Hərəkəti İdarəsinin dispetçerləri hazırlanacaq. Bunun üçün bu sahədə dünyanın qabaqcıl aeronaviqasiya təhsil mərkəzlərindən olan Alman Aeronaviqasiya Akademiyasının (DFS) təhsil proqramı əsasında Aeronaviqasiya Təlim Mərkəzi fəaliyyət göstərəcək.
Burada Heydər Əliyev Beynəlxalq Hava Limanının 360 dərəcə panoramını əks etdirən TWR qüllə simulyatoru, həmçinin hava məkanının idarə edilməsi üzrə radar simulyator kompleksi quraşdırılıb. Bu sistemlər dispetçerlərin real əməliyyat şəraitində hazırlanması üçün imkan yaradır.
Mərkəzdə, həmçinin hava limanlarında real iş şəraitinə uyğun müxtəlif xüsusi avtonəqliyyat vasitələri sürücülərinin bacarıqlarının təkmilləşdirilməsinə imkan verən müasir təlim trenajoru kompleksi quraşdırılıb.
Beynəlxalq Təlim Mərkəzində hər il hava hərəkətini idarəetmə üzrə təxminən 30 dispetçerin və 3 min hava gəmisi heyətinin hazırlanması planlaşdırılır.
Bundan başqa, Mərkəz fövqəladə vəziyyətlərdə və müxtəlif qəza hallarında hava gəmisi kabininin daxilində təhlükəsizlik tədbirlərinin səmərəli icrası üçün Türkiyənin bu sahədə ixtisaslaşmış və beynəlxalq səviyyədə tanınmış şirkəti olan "SkyArt" tərəfindən "A320/A321 NEO CEET" tipli yeni nəsil hava gəmisi simulyatoru ilə təchiz edilib. Simulyatora "Boeing 787" təyyarəsi üzrə Qapı Təlim Qurğuları (Door Trainers), həmçinin real yanğın şəraitini simulyasiya edən yeni nəsil Yanğınsöndürmə Təlim Qurğuları (RFFT) daxildir.
Yeni təlim infrastrukturu regionda aviasiya sahəsində kadr hazırlığının, həmçinin beynəlxalq standartlara uyğun tədris imkanlarının gücləndirilməsinə, bu sahədə rəqabətqabiliyyətli milli kadr potensialının formalaşmasına mühüm töhfə verəcək.
Mərkəz müasir aviasiya sahəsinin tələblərinə uyğun olaraq kadr hazırlığını həyata keçirən ixtisaslaşmış tədris strukturu kimi aviasiya mütəxəssislərinin nəzəri biliklərlə yanaşı, praktiki bacarıqlarının formalaşdırılmasında mühüm rol oynayacaq.
Mərkəzin müasir texnologiyalarla təchiz olunması, burada son model uçuş simulyatorlarının quraşdırılması real uçuş şəraitinə yaxın mühitdə təcrübə qazanmağa imkan yaradır ki, bu da ümumilikdə uçuşların təhlükəsizliyinin təmin edilməsində müstəsna əhəmiyyət daşıyır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!