14-11-2021, 14:15
Konfliktoloq Elxan Mehdiyevin Şuşa ətrafında baş verən terror hadisəsinə münasibətini təqdim edirik:
- Biz bu cür terror və diversiya hadisələrinə hazır olmalıyıq, çünki ermənilərin terror kültürünə xas olması belə halların gələcəkdə daha çox olacağına arqument verir. Üstəlik, son bir il ərzində Ermənistanda və xüsusən erməni nəzarəti altında olan Xankəndidə aparılan nasist təbliğatı bu cür hadısələrin baş verməsi üçün münbit baza yaradır. İkinci bir tərəfdən, həm Ermənistanda və həm də bizim Qarabağda müxtəlif dərnəklər altında indidən terror qurplarının hazırlanması istiqamətində mətbuata da xəbər verilən proseslər gedir. Burada həm oğlanlar və həm də qızlar terror və diversion əməliyyatları aparmaq, silah və qumbara ilə işləmək, gecə şəraitində əməliyyatlar aparmaq, dözümlülük və kəşfiyyat sahəsində təlimlər keçirlər. Yəni bu təlimlərə bu işlərlə məşğul olmaq istəyən könüllü gənclər gəlir və məqsəd də azərbaycanlılar yaşayan ərazilərə girib qətllər törətməklə qisas almaqdır. Bir müddətdən sonra onlar artıq daha münbit şəraitdə fəaliyyətə keçməyə də can atacaqlar.
Üçüncüsü, siz əgər fikir versəniz bu dəqiqə Qarabağda yaşayan hər bir erməninin evində ən azı bir neçə silah və qumbara var. Müharibənin gedişi zamanı o qədər silah və qumbaralar çöllərdə qalmışdı ki, silah əldə etmək problem daşımırdı. Həm də özünü müdafiə adı ilə hər bir ailə silah əldə etmişdi. Bir də fikir verin ki, rəsmi olaraq ermənilər 10 mindən çox fərari olduğunu söyləyir . Və bu fərarilər silahları ilə yox, silahlarını ataraq və bu kəndlərdə və Xankəndidə yaşayanların evlərində qoyaraq qaçmışlar. Xarici TV -lərin Martunidən verdiyi reportajda ermənilərin çarpayılarının altında hər birinin avtomat silahı olduğunu özləri göstərirdilər. Yəqin ki bir neçə bu faktlar nə qədər silah olduğu haqqında müəyyən təsəvvür üçün kifayət edər.
Digər tərəfdən, Azərbaycan öz sərhədinə nəzarət edə bilmir . Laçın yolu açıqdır. Və erməni terrorçu dəstələrinin yüngül silahla ordan gəlməsinə və ya geri getməsinə heç bir maneə yoxdur. Rus qüvvləri onları dedektor ilə yoxlamır. Uzağı onların pasportuna baxır və ya ən yaxşı halda maşının baqajına baxır. Heç kim də baqajda silah gətirmir. Silah gərirməyə də heç bir ehtiyac da yoxdur. Çünki bu cür işlər üçün Qarabağda hər türlü silah və sursat N qədərdir.
İndi bizim anti-terror qüvvələrə da ehtiyacımız olacaq. Biz indi İsraildən daha çox öyrənməliyik. Onlar bu cür Qarabağda baş verən terror halları ilə çox üzləşiblər və ona görə onların təcrübəsi də böyükdur. İlk növbədə onların praktikası terrorçunu yerindəcə məhv etməkdir. Bunu indi Azərbaycan xüsusi qüvvələri də etmək qabiliyyətindədir. Amma, bilavasitə xüsusi anti terror birliklərinin yaradılmasına yaxın gələcəkdə ehtiyac olacaq. Çünki ermənilər bizim kimi 28 il səbrli qalmayacaq, onlar yuxarıda dediyim kimi Azərbaycana qarşı terror və diversiya hərəkətləri ilə qisas almağa çalışacaq. Erməni terroru qisas üzərində qurulub.
14-11-2021, 13:48
İlham İsmayıl
Qarabağ münaqişəsi yeni mərhələyə qədəm qoydu. Bu mərhələnin adı terrordur. Terror mərhələsinin icraçıları ermənilər, təşkilatçısı isə Rusiyadır! Rusiya sülhməramlıları Azərbaycanda yerləşməyə başladığı gündən vəziyyətin getdikcə yenidən gərginləşəcəyini deyəndə ağzıgöyçəklər dörd bir tərəfdən- “qələbəmizə kölgə salırlar” şüarları ilə üstümüzə düşürdülər. Rusiyanı və erməniləri yaxşı tanıdığımızdan vəziyyətin gərginləşəcəyi, saysız-hesabsız təxribatlar olacağı və terrora keçəcəyi dəfələrlə proqnozlaşdırıldı. Kimi qınayaq son Şuşa terrorunda? Ermənini? Düşmənin adı dəyişməyib, düşmənin adı üstündədir, düşmənin iddiası yerindədir və biz bunu bilirik, elə isə düşmənin düşmənçiliyi niyə təəccüb yaradır?
Elə bil 1988 – 1991-ci illərin Qarabağıdır. Sanki Moskvanın o zamankı Volski idarəetməsi sülhməramlı simasında peyda olub. Ermənilər hər gün bizə qarşı terror törədirdi, biz də Volskiyə şikayət edirdik. Sonralar məlum oldu ki, bu terror hadisələrinin təşkilatçıları, idarə edənləri çox vaxt elə ruslar olub. Kulminasiyası Xocalı qətliamı oldu. Rusiyanın 366-cı alayı ilə birlikdə ermənilər mülki əhaliyə qarşı soyqırımı törətdi. Son Şuşa terroru məşhur QRU ssenarisini xatırladır. Sən hadisəni törədəcəksən, biz səni görüntü üçün tutacağıq, sonra özününkülərə təhvil verəcəyik. Çox tanış ssenaridir. Salatın Əsgərovanı qətl edənləri təhvil verib, sonra geri almaq kimi.
Və indi də Norayr Mirzoyan olur milli qəhrəman. Artıq erməni teleqram kanalları, mediası Mirzoyanı Tələt paşanın qatili Soqomon Teyleryanla, bu yaxınlarda Türkiyə səfirini qətlə yetirən və Kaliforniya həbsxanasından buraxılan Ambik Sasunyanla müqayisə edirlər. Bütün bunlar məğlub erməninin dirçəlməsinə yardım edən faktorlardır. Bu gün posta qumbara atan sabah Şuşanın özündə terror törədəcək. Ona görə ki, cəza almayacağına əmindir. Terrorçu bilir ki, Rusiya sülhməramlısı onu Azərbaycana yox, terror planını cızana, təşkil edənə təhvil verəcək. Balasanyan kimi bir qatilin təşkilatına verəcək. Sabah Norayr Mirzoyanların sayı sürətlə artacaq və hər birinin hədəfində Azərbaycan Ordusu, Azərbaycan əhalisi olacaq.
Biz müharibədən sonrakı bir il ərzində niyə Xankəndi və ətrafı ilə bağlı rəsmi mövqe bildirməmişik? Niyə rəsmi səlahiyyətlilər bu il ərzində bir dəfə demədilər ki, tezliklə Xocalıya qayıdacağıq? Buna görə də həm sülhməramlılar, həm də separatçı rejim əmin oldu ki, Azərbaycan Qarabağın bu hissəsinə dönmək üçün, bu yerlərdə dövlət nəzarətini bərpa etmək üçün heç bir rəsmi mövqe qoymur. Ona görə də Rusiya Aleksandr Nevski başda olmaqla məlum büstləri və provaslav kilsəni məhz Xocalıda ucaltdı. Büst ucaltmaq, kilsə tikmək nə vaxtdan sülhə xidmət edir? Əgər Rusiya sülhməramlısı orada bir azərbaycanlı yazıçının, bir erməni yazıçısının, bir də rus şairinin büstünü ucaltsaydı deyərdik ki, bu addım millətlərarası sülhə xidmət edir. Yalnız Rusiyaya aid olan məşhur adamların büstlərinin qoyulması isə Rusiyanın imperiya siyasətinin tərkib hissəsi olaraq qəsbkar xarakter daşıdığı kimi dəyərləndirilməlidir.
Sülhməramlılar qarşısında bu terrorçunun təhvil verilməsi ilə bağlı ilk dəqiqədən ciddi danışıqlar aparılmalı idi, təəssüf ki, nə belə bir danışıqlar aparıldığının, nə də rəsmi etirazın şahidi olduq. Sabah da belə bir terror hadisəsinin olacağına şübhəniz qalmasın. Bu terrora qarşı Azərbaycan Ordusu 10 qat artıq cavab verməsə, Xarici işlər nazirliyi terroru himayə etdiyinə görə Rusiya Federasiyasına açıq etiraz edib, sülhməramlı qüvvələrə etirazını bildirməsə, ( bu, bizə üç il yarımdan sonra Rusiya sülhməramlılarından narazılığımızı bildirmək üçün hüquqi əsas verəcək) təhlükəsizlik qüvvələri antiterror əməliyyat keçirib növbəti terrora hazırlaşanları məhv etməsə, düşmən yenə də sülhməramlılarla birlikdə zəncirvari terror hadisələri törədəcəklər.
Bu hadisə göstərdi ki, Türkiyənin Qarabağdakı fəaliyyətini yalnız absurd monitorinq mərkəzi ilə məhdudlaşdırmaqla Rusiya əl-qolunu geniş açaraq erməni terrorçularına sərbəst meydan verməyə müvəffəq olub. Yaranmış situasiya ölkənin Təhlükəsizlik Şurasında müzakirə olunmalı və uyğun qərarlar qəbul olunmalıdır. Məsələyə ciddi və sərt yanaşmadıqca düşmən azğınlaşacaq və növbəti terrora məruz qalacağıq.
14-11-2021, 13:02
Türkiyənin İstanbul Yeni Yüzil Universitetinin rektoru, professor Yaşar Hacısalehoğlunun müsahibəsini təqdim edirik:
- Yaşar bəy, ABŞ-da “Demokratiya sammiti” keçirilir. Ancaq bu tədbirə nə Azərbaycan, nə Türkiyə, nə də Macarıstan dəvət edilib. Ancaq işğalçı Ermənistan tədbirdə iştirak edir. Sizcə bunun səbəbi nədir?
- Çox açıq şəkildə qeyd etmək lazımdır ki, “insan haqları”, “demokratiya” və “sülh” kimi anlayışlar hazırda hansısa ölkələrin maraq və mənfəətləri üçün istifadə olunur. Bu baxımdan Amerika əgər maraqlarına uyğun deyilsə, dünyanın heç bir yerində nə demokratiyanı, nə də insan haqlarını öz sərhədləri daxilində olduğu kimi müdafiə edir. ABŞ-ın keçirdiyi “Demokratiya sammiti”nin yalan olduğu açıq şəkildə ortadadır. Soyuq müharibədən sonra dünyada qüvvələr balansı tam şəkildə təmin olunmayıb. Beynəlxalq təşkilatlar dünyadakı problemləri həll etməkdən uzaqlaşıb, məzlumlar sürətlə artır, zalımlar isə “demokratiya” və “insan hüquqları” pərdəsi altında öz maraqlarını həyata keçirirlər. Təəssüf ki, dünya belə bir ədalətsiz beynəlxalq düzənə doğru sürüklənir. Əgər bəşəriyyətin gələcəyini xilas etmək istəyiriksə, dünyada ədalət hakim olmalıdır. 30 ildir Ermənistan tərəfindən Azərbaycandakı soydaşlarımıza zülm edilməsini, torpaqların işğal olunmasını görməzdən gələn, “üç meymun”u oynayan yenə bu aktorlardır. Görməzdən gəlməyi bir tərəfə buraxın, Ermənistan bunların qarnizon dövləti idi. İşğalçıya illərlə silah-sursat verdilər, ona strategiya və taktika məsələlərində kömək etdilər və öz məqsədlərini onun vasitəsilə həyata keçirdilər. Ancaq Azərbaycan bu məsələyə illərlə həssas yanaşdı, sonda isə Türkiyənin də siyasi dəstəyi ilə haqq-ədalət müharibəsi apararaq torpaqlarını işğaldan qurtardı. Bəs 30 il boyunca bu insan haqlarını müdafiə edənlər, demoktariya nəğməsi oxuyanlar harda idi?
- Türkiyə ABŞ-ın, o cümlədən bir çox Qərb ölkəsinin NATO-da müttəfiqidir və beynəlxalq terrorizmə qarşı mübarizə aparan ən aktiv dövlətlər sırasındadır. Digər tərəfdən də üç milyondan artıq suriyalı qaçqına ev sahibliyi edir. Bəs ABŞ-ın və ümumiyyətlə Qərbin Türkiyəyə qarşı bu siyasətinin arxasında nə dayanır?
- Türkiyə illərdən bəri terrorizmə qarşı mübarizə aparır. Terrorun arxasında olanlar yenə bunlardır. Türkiyədən nə istəyirlər? Türkiyə bugünədək kimin haqqını qəsb edib, hansı ölkənin sərhədlərini pozub? Amerikanın Türkiyəyə qarşı bu düşməncəsinə davranışının səbəbi nədir? Cavab çox sadədir. Çünki Türkiyə dünyadakı bütün məzlum millətlərin ön cəbhəsidir. Türkiyə yerləşdiyi məzlumlar coğrafiyasında özünün təsir dairəsini genişləndirdikcə, ABŞ başda olmaqla, bir çox dövlətlərin buradakı müstəmləkə sahələri kiçilir. Narahatlıqlarının da səbəbi budur. Bunu artıq konkret şəkildə deməliyik. Türkiyəni qlobal şəkildə mühasirəyə almaq cəhdlərinin də səbəbi budur. Hazırda dünyada Qərb imperializminin istifadə etdiyi bir neçə qarnizon dövləti var. Bunlardan biri Yunanıstan, digəri Ermənistandır. Üçüncüsünü isə PKK-nın əli ilə Suriyanın şimalında qurmaq istəyirlər. Bəs bu qarnizon dövlətləri nəyə və kimə lazımdır? Qərb imperializmi bu dövlətlərdən dünyanın müxtəlif yerlərində ziddiyyətlər yaratmaq, xalqları bir-birinə düşmən etmək və bütün bunlardan mənfəət qazanmaq, özlərinin qurduqları müstəmləkə sistemini qorumaq üçün istifadə edirlər. Yeri gəlmişkən, sizə qısa bir örnək vermək istəyirəm. İraqın işğal edildiyi illərdə Bəsrədə ailəsi ilə birlikdə yaşayan Ömər adlı uşağın Asiya, Afrika və Orta Şərqdə yerləşən 25-dən artıq ABŞ hərbi bazasına komandanlıq edən general Tomi Frenksə məşhur bir məktubu var. Bu məktubda ABŞ “demokratiyasının” gerçək üzünü açıq şəkildə göstərir. Məktubu qısa şəkildə nəzərinizə çatdırmaq istəyirəm: “Mən Bəsrədən Ömər. Bəlkə xəbərin yoxdur deyə, yazıram Frenks... Demokratiya bizim evə də dəydi. Bir gün sonra ayaqlarımın qopduğunu anladım. Atamın vücudunda on səkkiz dənə insan hüquqlarının izi var. Anam onsuz da yox idi, mən doğularkən dərman olmadığına görə ölüb. Embarqo-filan dedilər, ancaq başa düşmədim... Sən daha yaxşı bilirsən... Sizdə də sülh belədirmi, Frenks? İnsan haqları orada da uşaqları yetim və ayaqsız qoyurmu?”
Hazırda yüksək texnologiyaların, süni intellektin olduğu və inkişaf etdiyi bir əsrdə yaşayırıq. Ancaq əfsuslar olsun ki, nə orta əsrlərdən qalma müstəmləkə sistemi, nə də özündən olmayanları özgələşdirmək refleksləri tam aradan götürülüb. Sözügedən səbəblərə görə Türkiyə və Azərbaycanın “Demokratiya sammiti”nə dəvət edilməməsi haqqa və ədalətə tərəfdar olanların dəvət edilməməsi kimi qiymətləndirilməlidir. Nə BMT, nə də digər beynəlxalq və regional təşkilatların heç biri hazırda dünyada haqqın və ədalətin, insan hüquqlarının qorunması baxımından öz vəzifələrini yerinə yetirir.
- Sizcə, biz nə etməli və hansı addımları atmalıyıq?
- Əslində 12 noyabrda İstanbulda böyük bir addım atıldı və artıq Türk Dövlətləri Təşkilatı var. Bu həm də türk dünyasının təşkilatlanması deməkdir. Türk Dövlətləri Təşkilatları yalnız türklərin deyil, bütün məzlum xalqların təşkilatı olacaq. Təşkilat öz fəaliyyəti ilə həqiqi mənada haqqın və ədalətin, insan hüquqlarının qorunmasını, səmimi əməkdaşlığı, sülhün necə təsis ediləcəyini, əsl demokratiyanı yaxın gələcəkdə bütün dünyaya göstərəcək. Fikrimcə, ABŞ-dakı sammitə və bənzər toplantılara kimin dəvət edilib-edilməməsinin arxa planına baxmaq lazımdır. Yalnız üzdə görünənlərlə qərar verənlərin atdıqları addımlar da heç vaxt doğru ola bilməz. Başqalarının haqqında və hüququnda gözü olan dövlətlərin hər zaman gizli gündəlikləri, planları olur. Dünyanın bütün ölkələrində, ABŞ-ın özündə də qəlbi və zehni arasında əlaqəsi qopmayan milyonlarla insan var. Onlar artıq demokratiya pərdəsi altında müstəmləkəçiliyə qarşı çıxırlar. Vaxt gələcək bəşəriyyət müstəmləkəçiliyə, işğalçılığa və ədalətsizliyə qarşı bir yerə toplanacaq. Əsl zirvə bu zirvə olacaq. Türk Dövlətləri Təşkilatı da insanlığın ümid yerinə çevriləcək.
14-11-2021, 09:35
Erməni rejissor Arşak Zakaryanın rəhbərlik etdiyi “Ermənistan milli qvardiyası” adlı təşkilat Şuşa şəhəri yaxınlığında azərbaycanlı hərbçilərə qumbara atan Norayr Mirzoyana 1000 dollar yardım edəcək.
Bu barədə adı çəkilən təşkilatın Facebook səhifəsində bildirilib.
“Ermənistan milli qvardiyası Norayr Mirzoyana (ailəsinə) 1000 dollar verəcək və əlavə təşəbbüslə çıxış edəcək”, deyə erməni rejissorun təşkilatı bəyan edib. Qurum Norayr Mirzoyanı “mübarizə lideri” adlandıraraq “onu tək qoymamaq hamımızın borcudur”, - deyə Ermənistana çağırış edib.
Arşak Zakaryanın QHT kimi fəaliyyət göstərən “Ermənistan milli qvardiyası” təşkilatının əslində Ermənistan Təhlükəsizlik Xidmətinə bağlı olduğuna dair məlumatlar var. Terrorçu Mirzoyana yardım edən və onun timsalında terroru qəhrəmanlaşdıran bu qurum öz çağırışı ilə digər erməniləri Azərbaycana qarşı terrora təşviq edib.
Qeyd edək ki, bu o Arşak Zakaryandır ki, ötən il Vətən Müharibəsindən öncə Azərbaycanı təhdid edərək, işğalçı ambisiyasını ortaya qoymuş və Bakının belə zəbt olunacağı ilə bağlı sərsəm açıqlamalar vermişdi.
Birinci Qarabağ müharibəsində Azərbaycana qarşı döyüşmüş Arşak Zakaryanın Kəlbəcər işğal altında olanda orada müəyyən biznesi, restoranı vardı. Arşak Zakaryan 2016-cı ildə baş verən "Aprel döyüşləri" zamanı video çəkərək Azərbaycanı hədələmiş, bir də müharibəyə başlayacağı təqdirdə erməni ordusunun Bakıyadək gedib çıxacağını bildirmişdi.
Xatırladaq ki, noyabrın 13-də erməni terrorçu Norayr Mirzoyan Şuşa yaxınlığında təxribat törədib. Rəsmi məlumata əsasən, avtomobillə Laçın şəhəri istiqamətində hərəkətdə olan N.Mirzoyan Şuşa şəhərinin Daşaltı kəndinin yaxınlığında maşından düşüb və orada xidmət aparan Azərbaycan Silahlı Qüvvələrinin əsgərlərinə doğru əl qumbarası atıb.
Hadisə nəticəsində üç azərbaycanlı hərbçi xəsarət alıb.
A.Qorxmaz
13-11-2021, 15:51
Yevlax rayonunun Ərəş kəndində məskunlaşmış, Kəlbəcər rayonundan məcburi köçkün, Bakı Dövlət Universitetinin Şəki filialının I kurs tələbəsi yetkinlik yaşına çatmamış Təhməzli Rəvanə Məmməd qızı 12 noyabr 2021-ci il tarixində Allahverdiyev Elgiz Təbriz oğlu və dostları tərəfindən oğurlanıb. Valideynlərinin verdiyi məlumata görə onlar qızı Oğuz rayonunun Söyüdlü kəndinə aparıblar.
Bir sutkaya yaxındır ki, qızın yaxınları Yevlax rayon Polis İdarəsinin qarşısında naçar durumda qalıblar. Onlar Yevlax polisinin hadisəyə çox biganə yanaşdığını, hətta onlara polis tərəfindən təzyiqlər olduğunu bildiriblər. Arada valideynlərinə söz veriblər ki, tezliklə qızı tapacaqlar. Ancaq sonradan qızın yaxınları anlayıblar ki, polis onları “yola verir”. Arada qız anası ilə telefon əlaqəsi saxlayıb və ağlayaraq onu tezliklə quldurların əlindən qurtarmalarını istəyib, yoxsa özünə qəsd edəcəyini söyləyib. Görəsən elmi-texniki tərəqqinin bu qədər inkişaf etdiyi bir dövrdə Yevlax polisi adam oğrularını niyə “tapa bilmir?” Yaxud onların cinayətkarlara qarşı bu qədər humanist davranmaları nədən qaynaqlanır? Yəqin ki bu sula Azərbaycan Respublikasının Daxili İşlər Nazirliyi açıq və aydın cavab verəcək.
13-11-2021, 11:06
12-11-2021, 21:10
SEHRAN ALLAHVERDİ – 60
Yaza bilmədiklərimi çəkən rəssam
Mən bir rəssam tanıyıram – Sehran Allahverdi. Soyadının Allahverdi olması da diqqəti çəkir (Bizim də soyadımız Tanrıverdiyevlərdir). Bəli, onu Allah özündən sonra təbiəti, insanları yaratmaq üçün bizə bəxş edib. Hər şəxs bu qüdrətə, bu fitri istedada malik deyil. Seçilən insanlar sırasındadır Sehran Allahverdi. Həm çəkdiyi əsərləri, həm də şeirləri ilə. Çəkə bilmədiklərini şeirlərində, yaza bilmədiklərini rəsmlərində deyir.
Gec tanıdıq rəssamı amma sanki çoxdan tanıyırıq. Ailəvi dost olmaq da varmış qismətimizdə. Və heç bilməzdim ki, bir gün Giya ilə məni də öz politrasının köməkliyi ilə əbədiləşdirəcək. Ən sevdiyim əsəri isə tanınmış yazıçı Meyxoş Abdullahın “Saçlarından asılan qız” hekayəsinə çəkdiyi rəsm idi. Çox əsərlərinə, əsasən də insan portretlərinə daha çox rast gəlirik. İnsanların duyğularını, düşüncələrini, iç dünyasını öz əsərlərində daha dolğun ifadə etmək bacarığı aydın görünür rəsmlərdə. Belə əsərlərdən biri də atamın ildönümünə kətan üzərində çəkdiyi rəsmdir. Rəssam atamı cəmi bir dəfə görmüşdü və öz könül diqtəsi ilə onu rəsmdə əbədiləşdirməyə söz verdi. Təsadüflər zərurətdən doğur deyirlər. Çünki Givi atam haqında bir illiyinə kitab çap etməyin vacib olduğunu mənə demişdi. Yazmadım, ona görə yox ki, yaza bilmədim. 70 illik bir ömrün kədərini, sevincini bir kitaba sığışdırmaq sözün əsl mənasında mənə çətin gəlirdi. Atamın keşməkeşli günləri yadıma düşəndə gözlərim dolurdu. Ağlamağımı isə Givi görsə bunu mənə yazdırdığına görə peşman olacaqdı. Əlbəttə, Givi də öz qaynatasının ölümünə biganə qala bilmirdi. Məhz bu səbəbdən onu kitabda əbədiləşdirmək istəyirdi. Bir övlad kimi atamın ruhu qarşısında borcluyam. Yazını onsuzda yazacam – gücümü, qüvvəmi toplayıb. Ancaq bu gün atam haqqında kağız üzərində yaza bilmədiklərimi rəssam öz kətanı üzərində yazdı – özü də necə yazdı! Bu isə zərurətdən doğan bir təsadüf idi. Atamın gözlərində əzab, üz cizgilərində 16 yaşından ailənin yükünü daşıdığı çətinlikləri ifadə olunmuşdu. Buna baxmayaraq atam bu halından razı idi çünki rəssam onu çətinliklərdən qurtarmaq üçün cənnətdə yaratmışdı – sanki məkanı cənnət idi...elə cənnət oldu da. Bu isə mənim fikirlərimlə üst-üstə düşürdü. Çünki dünyasını dəyişən günü içimdə bir hiss yarandı – atam dünya əzabından qurtardı.
Ruhu şad olsun, ATA!
Bu gün Sehran Allahverdi imzası çoxlarına tanışdır. Hətta Türkiyədə əsərlərinin sərgisi keçirilib. Buna da sevinirik. Axı onun buna haqqı var. Nəinki 44 günlük müharibədə hətta birinci Qarabağ döyüşlərində də o susmayıb. Necə deyərlər fırçasını silaha çevirib. İlk çəksiyi əsərlərdən biri də Birinci Qarabağ döyüşlərində Şuşa uğrunda qəhrəmancasına savaşan və hələ də sağ və ya şəhid olduğu bilinməyən itkin qardaşının rəsmi, oğul həsrəti çəkən gözüyaşlı anasının portreti olub. İkinci Qarabağ döyüşlərində də belə əsərlərin sayı çoxalmaqda davam edib. “30 il yol gələn avtobus” əsərini qələbə müjdəçisi hesab etmək olar. Rəssam heç kimi görə bilmədiyi bir avtobusun Bakıdan Şuşaya doğru yol getdiyini görürdü. 30 il yol gələn avtobus baharın müjdəsini gətirən qaranquşa bənzəyirdi. Şuşada qələbə sevincini bölüşmək istəyən insanlar vardır avtobusda. Rəssam bu xoş müjdəli avtobusun Şuşaya getdiyini də fırçasının köməkliyi ilə insanlara xəbər verdi...
Çox insanlar getdi Şuşaya. Bu dəfə növbə elə rəssamın özünündür.
Sehran Allahverdi əsərlərinin Şuşada sərgilənməsinə qərarlıdır ki, itkin qardaşının izini orada hiss etsin.
Rəsmlərin sonunda yazdığı “Sehr An” imzası... An içərisində yaratdığı fikirləri ilə sanki insan sehrli bir aləmə düşür. Bu isə onun digər əsərlərində daha aydın görünür.
Artıq Sehran Allahverdi imzası Səttar Bəhlulzadə, Tahir Salahov, Nəzai Mətin və digər imzalar sırasında özünəməxsus yer tutmaqdadır. Rəsmləri haqqında rəssam gözü ilə fikir bildirən İnsan isə Azərbaycanın Əməkdar Rəssamı Rais Rəsulzadə olmuşdur.
Yazımın qəhrəmanı 60 illik yubileyinin sevincini yaşamaqdadır. Çox istərdim ki, bu sevincə bir sevinc də əlavə olunsun – ona rəssamlığın Ali Mükafatı olan “Tahir Salahov” Mükafatı verilsin.
Xatirə Mikayılqızı
12-11-2021, 17:56
“Türk Dünyasının Ali Ordeninin sədrliyin Türkiyəyə təhvil verildiyi bir gündə mənə verilməsi xüsusilə önəmlidir. Bu, sədr kimi ötən iki ildə sərf etdiyimiz səylərin də eyni zamanda müvəffəqiyyətlə istənilən nəticələrə gətirib çıxardığını təsdiqləmiş olur”.
Bunu bu gün Azərbaycan Prezident İlham Əliyev Türkdilli Dövlətlərin Əməkdaşlıq Şurasının VIII Zirvə görüşündə bildirib.
Prezident İlham Əliyev qeyd edib ki, Türkdilli Dövlətlərin Əməkdaşlıq Şurasına sədrliyi Türkiyə Prezidenti Rəcəb Tayyib Ərdoğana təhvil verir:
“Ölkələrimiz arasında həmrəylik, qarşılıqlı hörmət sayəsində Türkiyə sədrliyi böyük bir uğurla həyata keçirəcək. Türk dünyasının lideri olaraq hörmətli qardaşım bu istiqamətdə yalnız və yalnız uğur qazanacaq. Çünki böyük baxışı sayəsində Türkiyə çox böyük yol qət edib və qlobal mənada gücə çevrilib.
Tək bölgəmizdə deyil, bütün dünyada Türkiyənin gücü tanınır. Həm iqtisadi, həm siyasi, həm hərbi gücdən danışırıq. Dünyada elə bir ölkə yoxdur ki, Türkiyənin vacibliyinin fərqində olmasın. Əziz qardaşımın baxışı sayəsində Türkiyənin qət etmiş olduğu yol, inkişafı hamımız üçün əslində nümunə olacaq bir yoldur. Çünki biz türk dünyasının qəlbinin burada atdığını bilirik.
Bu da hamımıza əlavə olaraq güc və güvən verir. Azərbaycan xalqı adından əziz qardaşıma bir daha təşəkkür edirəm. Ona olan dərin hörmətimizi bir daha dilə gətirmək istəyirəm. Azərbaycanda hər kəs Rəcəb Tayyib Ərdoğanı böyük hörmət və sevgi ilə anır. Türkiyə Prezidenti Azərbaycanda çox önəmli bir şəxsiyyət olaraq qəbul edilir”.
Butov.az
12-11-2021, 17:53
Suriya prezidenti Bəşər Əsədin iranlı general Cavad Gaffarini ölkədən qovması bəzi iddiaların ortaya çıxmasına səbəb olub.
Butov.az xəbər verir ki, hadisə 10 ildən sonra Suriya ilə münasibətləri düzəldən Birləşmiş Ərəb Əmirliklərinin Xarici İşlər naziri Abdullah bin Zayedin Dəməşqə səfərindən 1 gün əvvəl baş verib. “Al Arabiya” televiziyasının iddiasına görə, Əsəd bu addımı ilə ərəb ölkələrinə jest edib. Həmçinin iddia edilir ki, iranlı generalın Suriyadan İsraili təhdid etməsi Əsədi narahat edib.
Bəşər Əsəd Suriyanın İran və İsrail arasında döyüş meydanına çevrilməsindən artıq yorulub. Ekspertlər hesab edir ki, Əsədin bu addımı, Suriya və Birləşmiş Ərəb Əmirlikləri münasibətlərin normallaşması İran-Dəməşq əlaqələrini pozacaq.
12-11-2021, 17:48
Türkiyənin Qaziantep Bələdiyyəsi şəhərdəki bir məktəbdə təşkil edilən mərasimdə müəllimin söylədiyi şeirlə bağlı araşdırma başladıb.
Butov.az xəbər verir ki, adı çəkilməyən müəllim şeiri 10 Noyabr Atatürkü Anma Günü fəaliyyətləri çərçivəsində oxuyub.
Prokurorluqdan verilən açıqlamaya görə, 10 Noyabr Atatürkü Anma Mərasimində müəllimlərdən birinin oxuduğu şeirin görüntüləri bəzi sosial media kanallarında paylaşılıb:
"Hadisə ilə bağlı Valiliyimiz tərəfindən araşdırma başladılıb".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!