21-06-2023, 21:21
Fransada güclü partlayış - 16 nəfər xəsarət aldı, 7 nəfər ağır vəziyyətdədir
Fransanın paytaxtı Paris şəhərində güclü partlayış olub. Bu barədə "Le monde" qəzeti məlumat yayıb. Yerli polis bildirib ki, partlayışdan sonra binalardan birinin fasadı uçub, yanğın başlayıb. BMF kanalı qeyd edib ki, ilkin məlumatlara görə, 16 nəfər xəsarət alıb, 7 nəfərin vəziyyəti ağırdır. Partlayış "Paris Amerika Akademiyası" dizayn məktəbində baş verib.
21-06-2023, 20:55
Ceyhun Bayramov kralla görüşdü
Azərbaycanın xarici işlər naziri Ceyhun Bayramov Böyük Britaniya və Şimali İrlandiyanın kralı III Çarlzla görüşüb. Bu barədə XİN məlumat yayıb. Görüş nazirin Birləşmiş Krallığa səfəri çərçivəsində baş tutub.
Xatırladaq ki, Ceyhun Bayramov Birləşmiş Krallıqda keçirilən Ukraynanın Bərpası Konfransında iştirak edir.
21-06-2023, 20:35
Türk nazir Blinkenlə Azərbaycan-Ermənistan münasibətlərindən danışdı
Türkiyənin xarici işlər naziri Hakan Fidanın amerikalı həmkarı Entoni Blinkenlə görüşündə müzakirə olunan mövzular açıqlanıb. Bu barədə TRT kanalı məlumat yayıb. Görüşdə Ukraynadakı vəziyyət, Türkiyənin təşəbbüsü ilə həyata keçirilən İstanbul Taxıl Sazişi, NATO-nun genişlənməsi, Cənubi Qafqazda baş verən proseslər kontekstində Azərbaycan-Ermənistanın normallaşması və ikitərəfli münasibətlər müzakirə olunub.
21-06-2023, 20:30
Reznikov ilk dəfə israilli həmkarıyla danışdı
Ukraynanın müdafiə naziri Aleksiy Reznikov israilli həmkarı Yoav Qalantla ilk dəfə telefon danışığı aparıb. Bu barədə Reznikov “Twitter” səhifəsində yazıb. Reznikov bildirib ki, tərəflər çox məhsuldar danışıq aparıblar. "Biz mövcud vəziyyəti və ölkəni havadan gələn təhdidlərdən qorumaq layihəsinin perspektivlərini müzakirə etdik. İranın pilotsuz uçuş aparatı hər iki ölkə üçün təhlükəsizlik təhdididir. Biz buna qarşı çıxmaqda İsrailin köməyinə ümid edirik", - İsrailin müdafiə naziri yazıb.
21-06-2023, 20:16
Azərbaycan-Birləşmiş Krallıq nümayəndələri bir sıra məsələləri müzakirə etdi
20 iyunda Birləşmiş Krallığa işgüzar səfər çərçivəsində Azərbaycan Respublikasının xarici işlər naziri Ceyhun Bayramov və Birləşmiş Krallığın Avropa regionu üzrə dövlət naziri Leo Dokertinin iştirakı ilə iki ölkə arasında Strateji Dialoqun iclası keçirilib. Xarici İşlər Nazirliyindən verilən xəbərə görə, iclasda Azərbaycan-Birləşmiş Krallıq arasında strateji dialoq məsələlərini özündə ehtiva edən siyasi məsləhətləşmələrin bir çox aspektlərinə dair ətraflı fikir mübadiləsi aparılıb, regional və beynəlxalq gündəliyin qarşılıqlı maraq doğuran məsələləri müzakirə edilib. Azərbaycan və Birləşmiş Krallıq arasında bütün sahələrdə qarşılıqlı faydalı əməkdaşlığın olduğu, Azərbaycanın mühüm ticarət tərəfdaşı kimi xüsusi əhəmiyyəti vurğulanıb. Birləşmiş Krallıq şirkətlərinin Azərbaycan iqtisadiyyatının istər neft, istərsə də qeyri-neft sektorunda uğurla fəaliyyət göstərdiyini, iqtisadi əməkdaşlığın daha da dərinləşməsi üçün geniş imkanların mövcudluğu bildirilib. Nazir Ceyhun Bayramov bölgədə mövcud olan cari vəziyyət, o cümlədən sülh prosesi ilə bağlı Azərbaycan tərəfindən atılan addımlar, Azərbaycanın iki ölkə arasında münasibətlərin normallaşması ilə bağlı mövqeyi, azad olunmuş ərazilərdə həyata keçirilən bərpa və yenidənqurma işləri ilə bağlı məlumat verib. Ermənistan tərəfindən üçtərəfli bəyanatın müddəalarının pozulmasının bölgədə sülh quruculuğuna əngəl olduğu qarşı tərəfin diqqətinə çatdırılıb. İclasda Azərbaycanda həyata keçirilən humanitar minatəmizləmə fəaliyyəti barədə fikir mübadiləsi aparılıb. Birləşmiş Krallığın Azərbaycanın işğaldan azad edilmiş ərazilərinin minalardan təmizlənməsinə verdiyi töhfə, bu ərazilərin yenidən qurulması və bərpası işlərində onların yaxından iştirak niyyətləri təqdir olunub. Həmçinin tərəflər, çoxtərəfli formatda, beynəlxalq təşkilatlar çərçivəsində əməkdaşlıq, o cümlədən Avropa İttifaqı ilə əlaqələr, eləcə də Ukraynadakı vəziyyəti müzakirə ediblər. Strateji Dialoqun davamı olaraq, 21 iyun tarixində nazir Ceyhun Bayramovun Birləşmiş Krallığın xarici işlər, birlik və inkişaf məsələləri üzrə dövlət katibi Ceyms Kleverli ilə ikitərəfli görüşü keçirilib. Tərəflər, Azərbaycan-Birləşmiş Krallıq arasında Strateji Dialoqun gündəliyində duran məsələləri, siyasi, iqtisadi, enerji və humanitar sahələrdə, o cümlədən beynəlxalq təşkilatlar çərçivəsində əməkdaşlığın hazırkı vəziyyəti və inkişaf perspektivləri, ölkəmizin təşəbbüsü ilə həyata keçirilən strateji enerji və nəqliyyat layihələri, habelə regional təhlükəsizlik və post-münaqişə vəziyyəti ilə bağlı müzakirələr aparıblar. Nazir Ceyhun Bayramov həmkarına Ermənistan-Azərbaycan münasibətlərinin normallaşdırılması istiqamətində danışıqların aparılması və Cənubi Qafqazda təhlükəsizliyin təmin olunmasına dair ölkəmizin baxışları haqqında məlumat verib. Görüş zamanı tərəflər iki ölkə arasında mövcud dialoq, qarşılıqlı səfərlər və təmasların, o cümlədən siyasi məsləhətləşmələrin münasibətlərin inkişafına mühüm töhfə verdiyini bildiriblər. Görüşdə, həmçinin qarşılıqlı maraq doğuran digər məsələlər üzrə fikir mübadiləsi aparılıb.
21-06-2023, 19:32
Azərbaycan və Türkiyə “Alpan-2023” təliminə start verdi
Təsdiq olunmuş plana əsasən Azərbaycan Hərbi Hava Qüvvələri və Türkiyə Silahlı Qüvvələrinin hərbi qulluqçularının iştirakı ilə "Alpan-2023" birgə təlimi keçirilir. Bu barədə Azərbaycan Müdafiə Nazirliyindən məlumat verilib. Bildirilib ki, ölkəmizdə keçirilən təlimin ssenarisinə əsasən aviasiya vasitələri bazalanma aerodromlarından uçuşlar həyata keçirərək şərti düşmənin hava hücumundan müdafiə, komanda idarəetmə məntəqəsi və cəmləşmə obyektlərinin uzaq və yaxın məsafədən məhvetmə tapşırıqlarını və digər epizodları icra ediblər. Təlimin keçirilməsində əsas məqsəd şəxsi heyətin nəzəri və praktiki vərdişlərinin təkmilləşdirilməsi, eləcə də bölmələrin qarşılıqlı əlaqədə fəaliyyətinin təmin edilməsi və döyüş qabiliyyətinin artırılmasıdır.
21-06-2023, 19:32
XİN Başçısı britaniyalı həmkarı ilə görüşdü
Azərbaycan xarici işlər naziri Ceyhun Bayramov Londonda keçirilən Ukraynanın Bərpası Konfransı çərçivəsində Böyük Britaniyanın xarici işlər naziri Ceyms Kleverli ilə görüşüb. Bu barədə Azərbaycan XİN-in "Twitter" hesabında məlumat verilib. "Tərəflər Azərbaycan və Britaniya arasında dostluq münasibətlərini vurğulayıblar və onun genişləndirilməsi üçün birgə addımları müzakirə ediblər. Regionda sabitliyin və sülhün təmin edilməsinə yönəlmiş əməkdaşlığın daha da gücləndirilməsi vurğulanıb", - Azərbaycan XİN bildirib.
21-06-2023, 18:41
Rusiya XİN Türkiyənin Şuşada konsulluq açmasına münasibət bildirdi
Rusiya Xarici İşlər Nazirliyinin mətbuat katibi Mariya Zaxarova Türkiyənin Şuşada konsulluq açması ilə bağlı planlarına münasibət bildirib. Bu barədə o, gündəlik brifinq zamanı danışıb. Zaxarova deyib ki, Şuşada Türkiyə konsulluğunun açılması Bakı ilə Ankaranın ikitərəfli əlaqələrinin mövzusudur. "Konsulluğun açılması məsələləri, harada olur olsun, xüsusən Şuşada, Bakı ilə Ankaranın ikitərəfli əlaqələrinin mövzusu olaraq qalır. Bu, iki suveren dövlətin səlahiyyətində olan məsələdir", - deyə Rusiya XİN sözçüsü bildirib.
21-06-2023, 17:27
Putin və Zelenski əks-hücumla bağlı açıqlama verdi
Ukrayna silahlı qüvvələrinin əks-hücum bölgələrində müəyyən sakitlik müşahidə edilir. Bunu Rusiya prezidenti Vladimir Putin “Rossiya” telekanalının efirində deyib. O iddia edib ki, bu sakitlik Ukrayna ordusunun şəxsi heyəti və texnika itkiləri ilə bağlıdır. “Hazırda biz sakitlik müşahidə edirik, çünki düşmən ciddi itkilər verir. Lakin Ukrayna Silahlı Qüvvələrinin hücum potensialı hələ tükənməyib", - Putin bildirib. Ukrayna Prezidenti Volodimir Zelenskinin sözlərinə görə, Rusiya ordusu 200 min kvadratkilometr ərazini minaladığı üçün Ukrayna Silahlı Qüvvələrinin əks-hücum əməliyyatı çətinləşib. O, "insanların həyatı təhlükə altında olduğunu", buna görə döyüş meydanında "lazım bildikləri kimi" irəliləyəcəklərini qeyd edib.
21-06-2023, 17:12
Şəhid anası 59 balla rekord nəticəyə imza atdı
Müəllimlərin sertifikatlaşdırılma prosesinin test imtahan mərhələsinin ikinci günü başa çatıb. Şəhid, Vətən Müharibəsi Qəhrəmanı Valeh Bədəlovun anası Südabə Qaziyeva sertifikatlaşdırma imtahanında rekord nəticəyə imza atıb. Belə ki, Zaqatala rayonunun Aşağı Tala kəndindəki 3 nömrəli məktəbdə ibtidai sinif müəllimi işləyən Südabə Qazıyeva 67 dəqiqədə 59 bal toplayıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!