Biz niyə beləyik və ya niyə belə olduq, bilmirəm. Hər bir xalq öz yaxşısı və pisi ilə dünya xalqları arasında özünə görə bir xalqdır. Hələ lap uşaq yaşlarımızdan bizə örnək kimi tanıdılan xalq qəhrəmanlarımız, sərkərdələrimiz, şairlərimiz nədən bu gün gözdən, könüldən salınır? Babək, Şah İsmayıl Xətayi, Qacar, Nizami və XX əsrdə yazıb yaratmış neçə-neçə şair və yazıçılarımız, ümumiyyətlə bütün tarix boyu olan şəxsiyyətlərimiz nədən hörmətdən salınırlar? Əgər kimsə, hansısa "qələm sahibi" və ya "siyasətbaz" bununla özünü ucaltmaq istəyirsə vay onun halına.

İxtisasca jurnalist olduğumdan yaxşı bilirəm ki, jurnalist, Jurnalist etikasının təməl prinsiplərinə - obyektivlik, vicdanlılıq və qərəzsizliyə mütləq riayət etməlidir. Yəni "düzü-düz, əyrini-əyri" yazmalıdır.

Baxın, əsgər xidmətə başlayanda hərbi and, həkim diplom alanda Hippokrat andı, ölkə prezidentləri seçkidən sonra Konstitusiyaya və müqəddəs kitablara and içdikləri halda, amma peşəkar jurnalistlər Jurnalist etikasına and içmədən ona sadiq olacaqlarını özlərinə ən müqəddəs borc hesab edirlər. Amma burada bir məqamı unutmaq olmaz; əgər söhbət milli mənafedən gedirsə, bu zaman jurnalistin vətəndaşlıq mövqeyi etikadan bir pillə yuxarıda dayanır və dayanmalıdır!

Əgər özünü dünyaya demokratiya atasıtək təqdim edən Amerikanın CNN kimi dünyaca məşhur bir telekanalı istədiyi zaman dövlət mənafeyindən çıxış edə bilirsə, burda heç kimi günahlandırmaq olmaz.

Sosial şəbəkədə dostluğumda Ozan Yozman (Rüstəm Kəsəmənli) adlı bir ziyalı var. Allah onu həmişə də var etsin... Mən, bu insanın video söhbətlərinə dəfələrlə qulaq asmışam. Hər dəfə də baxanda ondan nə isə yeni bir şey öyrənmişəm. Həqiqətən də adam bu ziyalını dinləyəndə elə bilir bizimlə eyni vaxtda - müasir dövrdə yaşayan yox, adı ruhumuza hopmuş tarixi ozanlardan biri, yəni təsəvvürümüzdə olan əsl bir ozan danışır...



Ürəyə yatımlı səs tembri, mövzuya uyğun temp, seçilmiş mənzərə - axar su, ətrafdakı yaşıllıq, əynindəki sadə libas, bir sözlə bütün bunlar bir-birini tamamlayır.

Ozan Yozmanın məntiqinin güclü olması, poeziyanı duymaq, onu incələmək, obrazları xırdalığına qədər təhlil etmək bacarığı bu hörmətli ziyalının bu dünyada olan ən böyük varı, dövləti, mülkü, imarətidir desəm, bəlkə də yanılmaram. Ona qulaq asdıqca düzü adam istəyir ki, elə o, danışdıqca danışsın...

https://www.youtube.com/watch?v=hWJyUFxQ8d0


Mübariz Azərbaycanlı, müstəqil jurnalist