Klassik Xalq Cəbhəsi Partiyasının sədri Mirmahmud Mirəlioğlu Dünya Azərbaycanlılarının Həmrəylik Günü münasibəti ilə Azərbaycan xalqını təbrik edib.

Təbrikdə deyilir:
"Əziz Azərbaycan xalqı. Sizi, Dünya Azərbaycanlılarının Həmrəyliyi Günü münasibəti ilə təbrik edirəm.
Elçibəyin öndərliyində Azərbaycan Xalq Cəbhəsində təşkilatlanmış xalqımız, uzun illər yaşadığı ayrılığa son vermək üçün 1989-cu ilin 31 dekabrında tikanlı sərhəd məftillərini sökərək birliyə doğru möhtəşəm addım atdı. İçində yaşatdığı nisgildən qurtarmaq, böyük xəyallarını gerçəkləşdirmək, Azərbaycanın quzeyində dövlət müstəqilliyini bərpa etmək, parçalanmış vətənimizi bütövləşdirmək üçün dünyanın ən böyük və qəddar imperiyasının sərhədlərini dağıtdı.
Həmin gün Azərbaycanımızın bütövlüyünə aparacaq milli həmrəyliyin əsası yaradıldı. Səttarxanın başladığı, Rəsuzadənin, Xiyabanin, Pişəvərinin yaşatdığı azadlıq, müstəqillik, bütövlük mücadiləsini Elçibəy davam etdirdi və bu gün dünyanının hər bir yerində yaşayan azərbaycanlının bayram etdiyi həmrəyliyin əsası qoyuldu.
Əziz Azərbaycan xalqı!
Azərbaycanın quzeyində dövlət müstəqilliyimizi bərpa etdik. Azərbaycanın güneyində bu gün milli dövlətimizin yaranması və vətənimizi bütövləşməsi üçün Azərbaycan gənci bu müqəddəs işi davam etdirir. Nəinki Fars şovinizmi, hətta dünyanın heç biri gücü gün-gündən artan bu möhtəşəm hərəkatın qarşısında dura bilməz.
Əziz Azərbaycan xalqı!
Sizi, yaxın gələcəkdə vətənimizin bütövlüyünə, xalqımızın birliyinə çevriləcək Dünya Azərbaycanlılarının Həmrəyliyi münasibəti ilə bir daha təbrik edir və 25 il əvvəl başlamış bu müqəddəs işdə xalqımıza uğurlar arzulayıram."