Bu gün Müdafiə Nazirliyində akkreditə olunan jurnalistlərə akkreditə vəsiqələri təqdim olunub.

"Hərbi Mövzular üzrə İxtisaslaşmış Jurnalistlər" İctimai Birliyinin Mətbuat xidmətinin məlumatına görə, tədbirdə çıxış edən nazir müavini, general-leytenant Kərim Vəliyev cəbhəboyu zonada və Silahlı Qüvvələrlə çalışacaq jurnalistlərin akkreditə olunması barədə müvafiq qərarın 2014-cü ilin sonlarında qəbul edildiyini, vəsiqələr verilən jurnalist və yaradıcı heyətin müvafiq prosedurlardan keçdiyini bildirib.
Azərbaycan Silahlı Qüvvələrində son illər həyata keçirilən islahatlar və cəbhə xəttindəki vəziyyət barədə qısa məlumat verən nazir müavini bu istiqamətdə əldə edilən nailiyyətlərdən , düşmənin cəbhədə verdiyi itkilərdən də söhbət açıb:
“Cəbhə xəttində Ermənistan Ordusu çox sayda itkilər verir. Amma onlar bu itkilərini öz ictimaiyyətlərindən gizlətməyə çalışırlar. Onu da biləsiniz ki, düşmənin hər bir itkisi bizə adbaad bəllidir”.
Nazir müavini diqqəti müasir dövrdə fiziki müharibələrlə yanaşı psixoloji müharibələrə böyük önəm verildiyinə, sonuncunun aparılmasında KİV-lərin oynadığı mühüm rola yönəldib: “Bu gün bizə qarşı aparılan psixoloji müharibədə əsas yük Azərbaycan jurnalistlərinin- ictimaiyyətin, hərbçilərin inandığı, etimad göstərdiyi qələm sahiblərinin üzərinə düşür. Ona görə də söz dövlətimizin, millətimizin təhlükəsizliyi məsələsi olunca hamımız Vətənin müsəlləh əsgəri olmalıyıq”.

K. Vəliyev Müdafiə Nazirliyinin mətbuat xidməti ilə qarşılaqlı informasiya mübadiləsi əlaqəsində çalışacaq KİV nümayəndələrinə tövsiyyələrini verdikdən sonra jurnalistlərin fikir və təkliflərini də dinləyib. Nazir müavini KİV ilə əlaqələrin gücləndirilməsi, operativliyin daha da artırılması və qarşıya çıxan problemlərin tezliklə həlli istiqamətində tapşırıqlarını verib.