18-02-2023, 17:01
Çin koronovirus üzərində qələbə qazandığını bildirdi
Çin hökuməti koronavirusa (Covid-19) qarşı mübarizədə "həlledici qələbə" qazandığını elan edib. Bu barədə Çin lideri Si Cinpinin sədrliyi ilə keçirilən iclasda bildirilib. Pekin rəsmiləri Çinin "bəşər sivilizasiyası tarixində möcüzə" yaratdığını iddia edib. Çin hökuməti 200 milyondan çox insanın koronavirusa qarşı müalicə edildiyini və Çində koronavirusdan ölüm nisbətinin "dünyada ən aşağı səviyyə" olduğunu qeyd edib. Rəsmi Pekinin iddiaları Qərb tərəfindən şübhə ilə qarşılanıb. Qeyd edək ki, Çin ötən ilin sonundan koronavirusa yoluxma sayını açıqlamır.
18-02-2023, 16:47
Ukrayna Dünya Bankından 203 milyon dollar kredit çəkib
Ukrayna Böyük Britaniyanın zəmanəti ilə Dünya Bankından 203 milyon dollar məbləğində kredit alıb. Bu barədə Ukrayna Maliyyə Nazirliyi məlumat yayıb. Bildirilib ki, Dünya Bankından Ukraynanın dövlət büdcəsinə 203 milyon dollarlıq əlavə maliyyələşdirmənin ikinci hissəsi daxil olub. Birinci hissə ilə birlikdə Böyük Britaniya təminatlı kreditin ümumi həcmi 500 milyon dollardır. Məlumata görə, kredit güzəştli şərtlərlə verilib, ödəmə müddəti 5 il, güzəşt dövrü ilə 18,5 il, faiz dərəcəsi illik 0,25 faiz təşkil edir. Qeyd edilib ki, vəsait uşaqlı ailələrə sosial yardımın ödənilməsinə və dövlət ali təhsil müəssisələrində çalışan işçilərin maaşlarının ödənilməsinə sərf olunacaq.
18-02-2023, 16:44
İŞİD Suriyada hücuma keçdi
Suriyanın Homs əyalətində İŞİD terror qruplaşmasının hücumu zamanı 50-dən çox insan həlak olub. Bu barədə Suriyanın Əl-Əxbariyyə telekanalı məlumat yayıb. Bildirilib ki, İŞİD terrorçularının Homs vilayətinin şərqindəki Əl-Suxna şəhərinin cənub-şərqində həyata keçirdikləri hücum nəticəsində 50-dən çox insan ölüb. Suriyanın Radio və Televiziya Baş İdarəsi isə 53 insanın öldürüldüyünü açıqlayıb.
18-02-2023, 00:09
İlham Əliyev Şarl Mişellə bir sıra məsələləri müzakirə etdi
Fevralın 17-də Münxendə Azərbaycan Respublikasının Prezidenti İlham Əliyevin Avropa İttifaqı Şurasının Prezidenti Şarl Mişel ilə görüşü olub. Görüşdə Azərbaycanla Ermənistan arasında münasibətlərin normallaşdırılması, sülh müqaviləsi üzrə danışıqlar və Brüssel sülh prosesi ətrafında müzakirələr aparılıb. Prezident İlham Əliyev Azərbaycanın Brüssel sülh prosesini dəstəklədiyini qeyd edib. Şarl Mişel Avropa İttifaqının Ermənistanla Azərbaycan arasında münasibətlərin normallaşdırılmasında, sülh müqaviləsi üzrə danışıqlarda, Cənubi Qafqazda sabitliyin və təhlükəsizliyin təmin olunmasında səylərini bundan sonra da davam etdirəcəyini bildirib. Söhbət zamanı, həmçinin Avropa İttifaqının Ermənistandakı missiyasının fəaliyyəti barədə fikir mübadiləsi aparılıb.
18-02-2023, 00:04
Nə yaxşı ağsaqqal , ziyalı qonşum var
Bəri başdan deyim ki, müəllim ailəsində böyüsəm də, ali təhsilli mütəxəssis olsam da, ömrümdə bircə dəfə də olsa kiminsə haqqında məqalə yazmamışam.Lakin işimlə bağlı akt, protokol, ərizə və bu kimi digər rəsmi sənədləri çox hazırlamışam. Bu girişi ona görə etdim ki, ağsaqqal ziyalı,82 yaşında qonşum Məmmədağa müəllim (mən ona “dayı” deyə müraciət edirəm) haqqında yazmaq istədiyim məqalə zəif alınsa məni qınamasınlar.
Qırx ildən artıq respublika səviyyəli ictimai təşkilatlarda və dövlət orqanlarında ləyaqətlə işləyəndən sonra bir il olar ki, Məmmədağa Əhmədkərim oğlu Sərdarov təqaüdə çıxmışdır. Mən onun əmək fəaliyyəti dövründə aldığı mükafatlardan,xarici səfərlərindən, müəllifi olduğu kitablardan heç nə yazmayacağam, çünki o təbiətən təvazökar insandır və ünvanına kimsə tərif söyləyəndə xoşlamır.
Qeyd edim ki, uzun illər Bakı şəhərində yaşamış Məmmədağa müəllim övladlarının mənzil şəraitini yaxşılaşdırmaq, onlara müəyyən qədər sərbəstlik vermək məqsədilə özünə iki otaqlı mənzil almış və Xırdalan şəhərinə köçmüşdür. Belə vəziyyət bir yaradıcı şəxsiyyət kimi ona elmi və publisist məqalələr yazıb dərc etdirməyə də imkan verir.
İş elə gətirdi ki, bu ağsaqqal ziyalı ilə biz iki ailə eyni binada, eyni mərtəbədə yaşamalı olduq. Çox keçmədi ki, bizim tanışlığımız ata-oğul münasibətlərinə çevrildi. Hələ üstəlik xəbər tutdum ki, Məmmədağa müəllim əslən Qusar rayonundandlr. O da bildi ki, mənin valideynlərim Quba rayonundandır, sonradan Xaçmaz rayonuna köçüblər.Eyni zonadan olmağımız bizi daha da yaxınlaşdırdı, bayramları, ad günülərini bir yerdə qeyd edirik.
Biz iki qardaş və iki bacı evdə elə tərbiyə görmüşük ki, həmişə böyüklərə hörmət etməyə , onlardan öyrənməyə çalışmışıq. İndi də yaşım qırxı keçsə də özümdən yaşlı insanlardan yaxşı nə varsa onu götürməyə çalışıram.Düz deyirlər ki, əsl məktəb həyatdır. Qaldı ağsaqqal alim , jurnalist qonşum Məmmədağa müəllimə , ondan öyrənməli şeylər çoxdur.Bizim hər söhbətimiz düzlük, zəhmətsevərlilik, ədalətlilik, mənəvi saflıq və digər əxlaqi dəyərlərdən gedir.Əksər hallarda da mövqelərimiz, baxışlarımız üst-üstə düşür. Bunun nəticəsidir ki, biz bir-birimizə inanırıq və etibar edirik.Bu xoş münasibətlər ailələrimiz,övladlarımızın da arasında belə saf münasibətlərin yaranmasına gətirib çıxarır.Mənə belə gəlir ki, insanlar arasında münasibətlər məhs bu cür meyarlar əsasında qurulmalıdır.
Fikirlərimi bir neçə misal ilə təsdiq etmək istəyirəm.Xırdalan şəhər mərkəzi kitabxanasının direktoru Məlahət Yusifqızının təşəbbüsü ilə Məmmədağa Sərdarovla görüş keçirilirdi.Görüşdə AMEA-nın Fəlsəfə və Sosiologiya İnstitunun direktor müavini, tarix elmləri doktoru Eynulla Mədətli və digər alimlər iştirak edirdilər. Həmin görüşdə kitabxananın fəal oxucuları ilə yanaşı Məmmədağa müəllimin dəvəti ilə mən də iştirak etdim və ürək sözlərimi dedim. Görüşdə edilən çıxışlardan , ağsaqqal yazıçı, alimin ünvanına deyilən xoş sözlərdən mən onun insani keyiyyətləri və dövlət qarşısındakı xidmətləri barədə daha geniş məlumat aldım.
Digər bir misal. Xırdalanda Heydər Əliyev parkında Mədəniyyət Nazirliyi tərəfindən kitab sərgi-satışı təşkil edilmişdi. Mən də ağsaqqal qonşumla ora getdik və özümüzə kitab seçib aldıq.Bizi uzaqdan görən sərginin təşkilatçılarından biri olan Məlahət xanım salamlaşandan sonra bizi bir stendə baxmağa dəvət etdi. Həmin stend Ulu öndər haqqında yazılmış kitablardan ibarət idi. Onların arasında Məmmədağa müəllimin “Mahir siyasətçi, müdrik rəhbər” kitabı da vardı.Üçümüz bir yerdə stendin önündə şəkil də çəkdirdik, sonradan həmin şəkil respublika qəzetlərinin birində əksini tapmışdır.Kitabdan söz düşmüşkən qeyd edim ki, onun mənzilindəki kiçik bir otaqda təşkil etdiyi şəxsi kitabxanasından dostları və qonşuları da istifadə edirlər.
Məmmədağa müəllimin insani keyfiyyətlərini göstərən daha iki faktın da üzərində dayanmaq istəyirəm.Birincisi budur ki, o Xaçmazda Şollar qəsəbəsində yaşayan qohumunun evinə hüzr yerinə gəlməli idi. Mən də Bakıdan sərnişin daşıyan kürəkənimiz Azərdən xahiş etdim ki, ağsaqqal qonşuma qayğı göstərib onu Xırdalandakı evindən maşınına mindirib rayona gətirsin, sonra hara lazım olsa özüm apararam. İstirahətdə olan adamam, çox sevinərəm ki, onunla burada görüşəm. Bu iş nəzərdə tutduğum kimi baş tutdu. Məmmədağa müəllimi öz maşınımda Şollardakı qohumunun evinə aparıb sonra da geri qaytardım. Gecəni keçirmək üçün onun özünün təkidi ilə Xaçmaz şəhərindəki qohumu Şakirgilə apardım.Söhbət əsnasında ona dedim ki, ertəsi gün ata-anamın qəbirlərini ziyarət etmək istəyirəm.O bilirdi ki, valideyinlərim eyni vaxtda faciəvi surətdə həyatdan köçmüşlər. Bu geniş ürəkli, qayğıkeş insan mütləq mənə qoşulub qəbirləri ziyarət edəcəyini bildirdi. Qəbiristanlıqda mənimlə bərabər mollaya hörmət etməyi də unutmadı.Allah bütün vəfat edənlərə, o cümlədən Qarabağ uğrunda gedən döyüşlərdə qəhrəmancasına həlak olmuş əsgər və zabitlərimizə rəhmət eləsin!
Qusarda keçirilən ad günü məclisində
Söyləyəcəyim ikinci fakt xoş əhval –ruhiyyə yaradan bir tədbirlə bağlıdır.Ötən ilin iyul ayı idi, mən ailəmlə Qubaya toya getmişdim. Bakıdan mənə xəbər gəldi ki, Qusarda Məmmədağa müəllimin ad günü keçirilir. Bilirdim ki, pandemiya ilə əlaqədar onun 80 illik yubileyi keçirilməmişdir.Mən onunla tez əlaqə saxladım və mütləq gəlib iştirak edəcəyimi bildirdim.O bizi çox səmimi qarşıladı və öz yanında oturtdu. Məclis Qusar şəhərinin səfalı bir yerində təşkil edilmişdi, çox şən keçdi. Maraqlısı budur ki, məclisə nə Bakıdakı dostlarından , nə də rayonda məsul vəzifələrdə çalışan tanışlarından heç kəs dəvət olunmamışdı. İştirak edənlər əsasən Məmmədağa müəllimin doğulub boya-başa çatdığı Gədəzeyxur kəndində və rayon mərkəzində yaşayan qohumları və onların ailələri idi. Kənar adamlar yox idi, bircə mənim ailəmdən başqa. Musiqi çalınanda böyüklü-kiçikli hamı durub rəqs edirdi. Məclis çox xoşuma gəldi. Məmmədağa müəllimin qardaşı oğlu 70 yaşlı Telman müəllimin ( o həm də qudasıdır) gənclərlə bərabər məşhur “ Ləzginka “ rəqsini oynaması əyləşənlərə xüsusi ləzzət verdi. Həqiqətən əgər orada kənardan gəlmiş qonaqlar , vəzifəli şəxslər olsaydı , kənd adamları, xüsusilə ildən,aydan bir dəfə ev işlərindən uzaqlaşıb bəzənib-düzənib gəlmiş xanımlar özlərini sıxıntılı aparar, belə şənlənməzdilər. Bu da ağsaqqal qonşumun uzaqgörənliyi, məclisdə sadə, səmimi atmosfer yaratmaq arzusundan irəli gəlirdi.
Xırdalan Mərkəzi Kitabxanasında
Məclisdə yubiliyarın ünvanına çox xoş sözlər deyildi. Mən bir daha Məmmədağa müəllimin qohum-əqrəba arasında böyük hörmətinin şahidi oldum.Bu nüfuzu o, neçə illər ərzində öz şəxsi keyfiyyətləri ilə qazanmışdır. El arasında tanınmaq , layiqli hörmət qazanmaq hər adama nəsib olmur. Yeri gəlmişkən qeyd edim ki, tədbirdə oturmağa macal tapmayan onun kiçik oğlu Şahin yaxşı təşkilatçı olduğunu nümayiş etdirdi.
Tədbirin sonunda bu torpağın yetişdirməsi və mən deyərdim fəxri , filosof-alim və şair Məmmədağa Sərdarov iştirak edənlərə öz minnətdarlığını bildirdi və şeirlərindən bir neçəsini oxudu. Sevindirici haldır ki, tanınmış bəstəkar Eldar Mansurov tərəfindən Məmmədağa müəllimin sözlərinə bəstələnmiş “ Mən Qusara gələndə “mahnısının səsləndirilməsi şənlikdə iştirak edənlər tərəfindən böyük sevinclə qarşılandı.
Yazımı bitirərək həmişə “dayı” deyə müraciət etdiyim , xətrini şox istədiyim , sözün əsil mənasında müəllim kimi hər yerdə sayılıb seçilən bir insan olan , müdrik dövrünü yaşayan ağsaqqal qonşumuza cansağlığı və könül xoşluğu arzulayıram.
Azad Abidov,
Fövqəladə Hallar Orqanlarında xidmət edən zabit
18-02-2023, 00:03
Paşinyan Makronla Münhendə görüşdü
Ermənistan Baş naziri Nikol Paşinyan Fransa Prezidenti Emmanuel Makronla görüş keçirib. Görüş Münhen Təhlükəsizlik Konfransı çərçivəsində baş tutub. Məlumata görə, dövlət başçıları regional təhlükəsizlik və stabilliklə bağlı müzakirələr aparıblar.
17-02-2023, 23:59
Rusiya məğlub olmayana qədər Ukraynada sülh olmayacaq - Makron
Fransa prezidenti Emmanuel Makron müttəfiqlərini Ukraynaya hərbi dəstəyi artırmağa çağırıb. Bu barədə o, Münhen Təhlükəsizlik Konfransında çıxışı zamanı bildirib. Makronun sözlərinə görə, Rusiya ilə danışıqlar Ukraynanın əks-hücum əməliyyatından sonra ola bilər. O qeyd edib ki, indi Rusiya ilə dialoq vaxtı deyil. Fransa prezidentinin sözlərinə görə, Rusiya məğlub olmayana qədər Ukraynada sülh olmayacaq.
17-02-2023, 23:55
Rusiya Moldovanı işğal etməyi planlaşdırır - Zelenski
Bu gün Münhen Təhlükəsizlik Konfransının açılış mərasimi keçirilib. Konfransı videobağlantı vasitəsilə Ukrayna Prezidenti Volodimir Zelenski açıb. Zelenski çıxışı zamanı bildirib ki, Ukrayna Rusiya Prezidenti Vladimir Putinin son “dayanacağı” olmayacaq və o, daha da irəli – keçmiş SSRİ-nin digər ölkələrinə gedəcək. Ukrayna lideri, həmçinin Rusiyanın Moldovanı işğal etməyi planlaşdırdığını deyib. Bundan əlavə, Zelenski müttəfiq ölkələrin liderlərini Ukraynanı dəstəklə bağlı qərarlarda tələsməyə çağırıb.
17-02-2023, 23:49
Türkiyədən 565 vətəndaşımız təxliyə olunub, 2 nəfər itkin düşüb
Türkiyədə baş vermiş zəlzələdən zərər çəkmiş Azərbaycan Respublikası vətəndaşlarının müəyyən edilməsi və onlara köməklik göstərilməsi istiqamətində işlər davam edir. Bu barədə Azərbaycan XİN-dən məlumat verilib. Bildirilib ki, zəlzələ baş vermiş gündən etibarən 565 nəfər Azərbaycan Respublikası vətəndaşı və onların yaxın ailə üzvləri olan xarici ölkə vətəndaşları zəlzələ bölgəsindən təxliyə olunub. Hazırda təxliyə prosesi davam etməkdədir. Türkiyə Respublikasından təxliyəsi həyata keçirilən vətəndaşlarımız və onların ailə üzvlərinə lazımi tibbi, humanitar və psixoloji yardımın göstərilməsi, zərurət yarandıqda həmin şəxslərin müvəqqəti sığınacaq mərkəzlərinə yerləşdirilməsi istiqamətində müvafiq tədbirlərin görülməsi məqsədilə Azərbaycan Respublikasının aidiyyəti dövlət qurumlarına müvafiq göstəriş verilib. Qaynar xətt nömrələrinə daxil olmuş minlərlə müraciət araşdırılıb, haqqında xəbər alına bilməyən Azərbaycan vətəndaşlarının siyahısı hazırlanaraq, onlar haqqında məlumat əldə etmək məqsədilə, Türkiyənin aidiyyəti qurumları ilə birgə müvafiq iş aparılıb. Nəticədə bir çox Azərbaycan vətəndaşlarının olduğu yer müəyyən edilib və onlarla əlaqə saxlanıb. Hazırda 2 nəfər Azərbaycan vətəndaşı haqqında məlumat yoxdur, onların axtarışları davam etdirilir. Aparılmış axtarış-xilasetmə tədbirləri nəticəsində bu günə qədər 10 Azərbaycan vətəndaşının zəlzələ nəticəsində həlak olduğu müəyyən edilib. Onlardan 1 nəfər Türkiyədə dəfn olunub, 9 nəfərin cənazəsi isə bütün zəruri proseduralar yerinə yetirilməklə, Türkiyədə olan yaxınlarının müşayiəti ilə Azərbaycana yola salınıb. Bu dəhşətli zəlzələdə həlak olan həmvətənlərimizin ailələrinə və yaxınlarına dərin hüznlə başsağlığı veririk. Allah rəhmət eləsin!
17-02-2023, 23:35
Qəhrəman “Proteo”nun anım mərasimi təşkil edildi
Türkiyənin zəlzələ bölgəsində dağıntı altında qalaraq ölən Meksikanın axtarış-xilasetmə qrupuna məxsus "Proteo" adlı itin cəsədi ölkəsinə aparılıb. Türkiyədə fəaliyyətini başa vuran meksikalı xilasedicilər ölkələrinə geri dönərkən "Proteo"nun cəsədini də özləri ilə aparıblar. Meksika Beynəlxalq Hava Limanında "Proteo" üçün xüsusi anım mərasimi təşkil edilib. İtin cəsədinin olduğu tabut Meksika bayrağına sarılaraq torpağa tapşırılıb. Qeyd edək ki, Türkiyənin zəlzələ bölgəsində axtarış-xilasetmə prosesində iştirak edən "Proteo" fevralın 12-də həlak olub. "Proteo" Türkiyə və Meksika ilə yanaşı, Haiti, Ekvador və Qvatemalada təbii fəlakətlər zamanı axtarış-xilasetmə əməliyyatlarında iştirak edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!