“Sözügedən dərsliyin istifadə müddəti 2022-2023-cü tədris ilində bitəcək. Bundan sonra həmin səhifənin yenilənmiş versiyası dərsliyə əlavə edilməsi üçün çap olunaraq məktəb kitabxanalarına göndəriləcək”.

Bu iki cümləlik açıqlama Təhsil Nazirliyinin 4-cü siniflərin rus dili dərsliyindəki 20 yanvar faciəsinin saxtalaşdırılmasına verdiyi reaksiyadır. Dərsliyin hazırlanmasında iştirak edən Təhsil Nazirliyi, “Şərq-Qərb” nəşriyyatı və müəlliflər heç nə olmamış kimi, cəmiyyətin haqlı etirazına məhəl qoymurlar.

Xatırladaq ki, həmin kitabın 20 yanvar hadisələrinə aid hissəsində Sovet ordusunun Bakını işğal etməsi real işğal, təcavüz faktı yox, Azərbaycan Xalq Cəbhəsinin “dağıdılması” əməliyyatı kimi qələmə verilib.

Şəhidlərinsə guya Sovet əsgərləri ilə AXC “döyüşçüləri” arasında gedən atışma nəticəsində həlak olduğu göstərilir: “Sovet ordusu Xalq Cəbhəsini dağıtmaq və hakim partiyanın hakimiyyətini xilas etmək üçün Bakıya hücum edib. Əsgərlərlə Xalq Cəbhəsinin döyüşçüləri arasındakı küçə döyüşlərinin gedişində dinc vətəndaşlar həlak olub…”

Hazırda ölkədə 340 rus məktəbində 130 minə yaxın şagird təhsil alır. Hər il 15 minə yaxın uşaq bu məktəblərdə 1-ci sinfə gedir. Kiçik bir hesablama nəticəsində bu kitabdakı saxta informasiyanın nə qədər şagird tərəfindən oxunduğunu bilmək olar.

Haqqında bəhs olunan kitab 2019-cu ildən tədris edilir. Hər il təqribən 15 min şagirdin 4-cü sinifdə təhsil aldığını nəzərə alsaq, 3 il ərzində 50 minə yaxın şagirdə 20 yanvar faciəsi ilə bağlı saxta, yalan bilgi verildiyi məlum olar. Təcrübədə sübut olunub ki, insanların uşaq vaxtlarında oxuduqları kitablar onların yaddaşına həkk olunur və həqiqət olaraq qəbul edilir.

Qeyd edək ki, təhsil müəssisələri üçün dərsliklərin hazırlanması, təsdiqlənməsi və nəşri qaydaları Nazirlər Kabinetinin 2020-ci il 25 fevral tarixli qərarı ilə təsdiq olunub. Bu qərara əsasən, hazırlanan dərsliklər inkişafyönümlü, dəyəryönümlü, tərbiyəyönümlü olmalı və Azərbaycan Respublikası qanunvericiliyinin tələblərini qarşılamalıdır.

Dərsliklərin ümumi təhsil müəssisələrində istifadə edilməsi üçün Təhsil Nazirliyi tərəfindən qrif verilməli, yəni təsdiqlənməlidir. Təhsil Nazirliyi dərsliyi yoxlamaq və qiymətləndirməni həyata keçirmək üçün bu sahədə ən azı 10 ildən artıq pedaqoji təcrübəsi və ya elmi dərəcəsi olan 3 nəfər mütəxəssis cəlb edir. Dərslik 2 ay ərzində yoxlanılır və 100 ballıq şkala əsasında, müxtəlif meyarlar üzrə qiymətləndirilir. Daha sonra Nazirlik tərəfindən təsdiq olunmuş dərsliklər 5 tədris ili ərzində istifadəyə yararlı hesab olunaraq təhsil müəssisələrinə göndərilir.

Burdan aydın olur ki, dərsliyi yoxlayan və təsdiqləyən Təhsil Nazirliyi olduğundan, əsas məsuliyyət də bu qurumun üzərinə düşür. Belə çıxır ki, bu 3 mütəxəssis ya dərsliyi oxumadan təsdiqləyiblər, ya da bu rüsvayçı nöqsana bilərəkdən göz yumublar.

“Şərq-Qərb” nəşriyyatına gəlincə, bu qurumun AMEA prezidenti Ramiz Mehdiyevə məxsus olduğu bildirilir. Burada Təhsil Nazirliyinin rus dilində dərsliyin hazırlanması üçün bu nəşriyyatı seçməsi də olduqca maraqlı faktdır.

Qeyd edək ki, dərsliklərdəki nöqsanlarla bağlı qanunvericilikdə heç bir cəza tədbiri, sanksiya nəzərdə tutulmayıb.

Hüquqşünas Ceyhun Yusifov “AzPolitika.info”-ya bildirib ki, burada əsas cəzalandırma mexanizmi ictimai qınaqdır: "Hesab edirəm ki, dərsliklər hazırlanan zaman xüsusi komissiya yaradılmalı və bu işə nəzarət olunmalıdır. Komissiyanın müsbət rəy vermədiyi dərslik nəşr edilməməlidir. Digər bir məqam odur ki, dərsiyi yazanların da gərək vətəndaşlıq mövqeyi, milli ənənələrə bağlılığı yüksək səviyyədə olsun”.

Dərsliyin müəlliflərinə gəlincə, Bela Nuriyeva və Nigar Mustafazadə Nəsimi rayonu T.Həsənov adına 23 nömrəli orta məktəbin ibtidai sinif müəllimləridir. Hər iki müəllim Təhsil Nazirliyinin böyük diqqət göstərdiyi, “əl üstündə tutduğu” müəlimlərdəndir.

1968-ci ildə Bakı şəhərində anadan olan Bela Nuriyeva 1994-cü ildə Rusiyanın Omsk şəhərindəki OMSK dövlət universitetinin ibtidai təhsilin metodikası fakultəsini bitirib.

O, 2008-2013-cü illərdə Təhsil Nazirliyinin keçirdiyi “Ən yaxşı müəllim” müsabiqəsinin qalibi olub. 2009-cu ildə isə Azərbaycan Respublikasının “Qabaqcıl təhsil işçisi” döş nişanı ilə təltif olunub.

Nigar Mustafazadə də Təhsil Nazirliyi tərəfindən müxtəlif vaxtlarda mükafatlar, təşəkkürnamələr və hədiyyələr alıb. N.Mustafazadə 2013-2014-cü illərdə keçirilmiş “Ən yaxşı müəllim”müsabiqəsinin qaliblərindən olub və 5 min manat mükafat alıb.

Qeyd edək ki, Bela Nuriyeva və Nigar Mustafazadə 2021-ci ilin iyunun 24-də adlarının ilk iki hərflərini birləşdirərək, “BENİ” tədris mərkəzi təsis ediblər. Bu mərkəzdə müəyyən məbləğ qarşılığında 5-7 və 8-11 yaşlı uşaqlara rus dili dərsindən hazırlıqlar keçirilir. Görəsən, dərslikdə ciddi nöqsana yol verən bu müəllimlər, tədris mərkəzində də 20 yanvar faciəsini uşaqlara təhrif edilmiş formada çatdırırlar?

Problemlə bağlı Təhsil Nazirliyinə bir daha müraciət edərək konkret suallar ünvanladıq: “Dərsliyin nəşri üçün müsbət rəy verən ekspertiza qrupu ilə səhvin necə baş verdiyi araşdırılıbmı? Pedaqoji qurum bu kitabı neçə balla qiymətləndirib?”

Qurumdan aldığımız cavab həmişəki kimi iki cümlədən ibarət oldu: "Dərsliklər nəşriyyatlar tərəfindən hazırlanır və bir neçə mərhələdən ibarət ekspertizadan keçir. Bu zaman dərsliyə mütəxəssislər, müvafiq elmi-pedaqoji qurumlar qiymət verir. Dərslik layihələri ictimaiyyətin müzakirəsi üçün tims.edu.az saytında yerləşdirilir. Sözügedən dərsliyin istifadə müddəti 2022-2023-cü tədris ilində bitəcək. Həmin səhifənin yenilənmiş versiyası dərsliyə əlavə edilməsi üçün çap olunaraq məktəb kitabxanalarına göndəriləcək”.

Bütöv.az

Sosial şəbəkələrdə Fəlsəfə İnstitunun əməkdaşı Yasəmən Qaraqoyunlunun adından bir yazı yayılıb. Yazını oxuyan da, oxumayan da onu bəyənib, paylaşır. Əvvəllər bu xanımın milli ruhlu bəzi yazılarını oxuyub ona rəğbətlə yanaşmışdım. Ancaq bu dəfəki yazısı (bəlkə də özünün xəbəri yoxdu) başdan ayağa məntiqsiz, əsassız və isterikaya qapılmış bir adamın hirsi, hikkəsidir. Bu xanım Akademiya əməkdaşlarının 80 faizini Türkiyə düşməni adlandırır. Şəxsən bizim İnstitumuzda belə bir insan olduğunu mən ağlıma belə sıxışdırmıram. Nə qədər məsuliyyətsiz olasan ki, ömrünü elmə həsr etmiş, millətin kimliyini özünə tanıtmış yüzlərlə insana bu qədar həqarət edəsən, böhtan yağdırasan. Görünür Akademiya əməkdaşlarının çoxu abırına qısıldığından əli baltalı da, əli yalın da Akademiyanın üstünə yüyürür. Belə olmaz ağalar, xanımlar! Öz çəkinizi bilin, yerinizi tanıyın. Azərbaycan tarixinin, ədəbiyyatının... ən şərəfli səhifələrini yazanlar və bu yolu davam etdirənlər Akademiyanın yetirmələridir. Ziya Bünyadovdan bu günümüzə və sabahımıza qədər... Özünüzə gəlin, toxtayın, cığallığınızı dayandırın.

Əvvəlki yazılarımızda qeyd etmişdik ki, Naxçıvan MR DİN-in gedər-gəlməz məzuniyyətə göndərilən legitim naziri Fazil Ələkbərovdan sonra bu posta ən uyğun namizəd axtarışına başlanılıb və hazırda əsasən 4 namizəd üzərində durulur:


1. De-yure nazir Fazil Ələkbərov;

2. De-fakto nazir Rəşad İsmayılov;

3. Naxçıvan Mühafizə Polisi Şöbəsinin rəisi, polis polkovnik-leytenantı Gündüz Qədimov;

4. Naxçıvan Şəhər Polis İdarəsinin rəisi, polis polkovnik leytenantı Zahid Gözəlov.

Bütöv.az xəbər verir ki, ovqat.com-un Naxçıvan MR-dəki yüksək dairələrindəki adının çəkilməsini istəməyən qaynaqlardan əldə etdiyi məlumata görə, son zamanlar 5-ci namizəd də peyda olub. Üstəlik, bu namizəd heç də digərləri kimi “arabanın 5-ci təkəri” sayılacaq şəxslərdən deyil. Böyük ehtimalla, Muxtar Respublika rəhbərliyi çox düşünəndən sonra məhz həmin namizədin üzərində dayanacaq.

Yəqin, bu şəxsin kim olduğunu, türklər demişkən, maraq etdiniz? Səbrli olun, yazının sonlarında bu şəxs barədə geniş məlumat veriləcək. Hələlik isə onu deməklə kifayətlənmək istərdik ki, Naxçıvan MR Daxili İşlər naziri vəzifəsinə sayca 5-ci namizəd tapılsa da, bu gün rəhbərliyin masası üzərindəki dosyaların sayı dəyişilməyib. Yəni, Naxçıvan həqiqətləri riyaziyyat elminin bütün qızıl qaydalarını alt-üst edərək maraqlı bir formul ortaya çıxarıb:

4+1=4.

Axı bu, necə mümkün, deməyin. Məsələ burasındadır ki, əvvəla, burada söhbət Naxçıvandan gedir və əgər Cənab Sədr istəsə 4+1=3 də ola bilər. İkincisi, əvvəlki 4 namizəddən biri Naxçıvan Şəhər Polis İdarəsinin rəisi, polis polkovnik leytenantı Zahid Gözəlov ona gətirilən nazirlik təklifini geri çevirib. Cavabı isə nə olsa yaxşıdır? – “Sizi and verirəm Həzrət Abbasın qələm olmuş qollarına, xətanızı məndən uzaq edin”.

Qeyd edək ki, Zahid Gözəlov bir vaxtlar Azərbaycan DİN-nin informasiya şöbəsinin rəhbəri Sadıq Gözəlovun yaxın qohumudur. Yəni kifayət qədər informasiyalı adamdır. O, Naxçıvan MR Daxili İşlər naziri vəzifəsinə təyin olunmağı “xətalı” və təhlükəli addım sayırsa, deməli, bildiyi bir şeylər var.

Bununla belə, Zahid Gözəlovun nazirlik vəzifəsindən imtina qərarının Naxçıvanın polis əməkdaşları tərəfindən üzüntü ilə qarşılandığı da gələn bilgilər arasındadır. Söhbətləşdiyimiz bir sıra keçmiş polis əməkdaşları birmənalı olaraq Zahid müəllim barədə xoş sözlər söylədilər. Onun xaraktercə yaxşı insan, iş qabiliyyəti baxımından peşəkar polis olduğu vurğulanır. Bütün hallarda Z.Gözəlov kimi ləyaqətli kadrın bəlkə də öz işgüzar karyerasında qarşılaşacağı ən yüksək postdan imtina etməsi həqiqətən üzücüdür. Başqa yerlərdə nazir olmaqdan yana kadrlar az qala dəridən-qabıqdan çıxırlarsa, Naxçıvanda öz ayağı ilə hüzuruna gələn xoşbəxtlikdən özün imtina edirsən. Analoqsuz məmləkət ancaq belə olar, zənnimizcə. Bir də bəzi ağzıgöyçəklər iqtidar təbliğatçılarının tez-tez dilə gətirdiyi bu əsrarəngiz söz birləşməsinə rüşxənd edib dodaq büzürlər.

İndisə gəlin, keçək digər namizədlərə.

İnformasiya mənbəmizin bildirdiyinə görə, namizədlərdən digərinin – de-yure nazir Fazil Ələkbərovun da şansı gedərək tükənir. Xatırladaq ki, o, 01.11.2021-ci il tarixdə öz hesabına ödənişsiz məzuniyyət göndərilmişdi. Məzuniyyət vaxtı bitsə də hələ də de-yure nazir işə çıxmır. Cənab Vasif Talıbov artıq 3-cü aydır ki, Fazil Ələkbərovu vəzifəsindən azad edə bilmir, ya da azad etmək istəmir.

Amma son vaxtlar Naxçıvan MR DİN-dəki bəzi təyinatlar Fazil Ələkbərovun yenidən öz postuna qayıda biləcəyi ehtimalını tam istisna etməyə də imkan vermir. Belə ki, bir neçə gün bundan əvvəl Fazil Ələkbərovun adamı hesab olunan iki polis məmuru sözügedən strukturda məsul vəzifəyə gətirilib. Onlardan biri polis kapitanı Şahin Qasımov, digəri isə polis polkovnik-leytenantı Məmmədəli Məmmədovdur. Bu şəxslərin kimliyi barədə ətraflı məlumat almaq istəyənlər aşağıdakı linkə tıklaya bilərlər.

https://ovqat.com/olke/53645-naxcvan-dn-d-yeni-kadr-tyinatlar-olub.html

Yeni təyinatların səbəbi bir sıra amillərlə izah olunsa da, versiyalar arasında Fazil Ələkbərovun yenidən öz vəzifəsinə qaytarılması ehtimalı da yer alır. Baxmayaraq ki, bu versiyaya Naxçıvanın polis orqanlarında inananlar yox səviyyəsindədir. Amma o da var ki, Naxçıvanda bəzən inanılmaz möcuzələr peyda olur.

Digər namizəd, sözsüz ki, de-fakto nazir polis polkovniki Rəşad İsmayılovdur. 2021-ci ilin əvvələrində Naxçıvan DİN-ə nazir müavini təyin olunan Rəşad İsmayılovun əsas missiyası Fazil Ələkbərovu “vurmaq” idi. İddialara inansaq, bu təlimatı Naxçıvanın “boz kardinalı” ləqəbi ilə tanınan Azər Zeynalov və el arasında “Cənab Sədrin qara mələyi” kimi ün qazanan Cəlil Rüstəmov tərəfindən verilmişdi. Bildirilir ki, de-fakto nazir Rəşad İsmayılov Cəlil Rüstəmovla kirvədir və bu vəzifəyə təyin olunmasını peyğəmbər sünnətinə borcludur.

Bildirilir ki, öz üzərinə götürdüyü vəzifəni xüsusi məharətlə yerinə yetirən Rəşad İsmayılov “keçmiş quda”nın kitabı bağlandıqdan təxminən 1 ay sonra, daha dəqiqi, 15.12.2021-ci il tarixində Naxçıvan MR Ali Məclisi Sədrinin 168-06/S nömrəli sərəncamı ilə “nazir səlahiyyətlərini icra edən” şəxs vəzifəsinə təyin olundu. Belə bir vəzifənin mövcud olmadığını nəzərə alan bir çox polis əməkdaşları yaxınlarda Rəşad müəllimin həqiqi nazir olacağını gözləyirdilər. Lakin zaman uzandıqca, peyğəmbər sünnətinin hər yerdə, xüsusilə də “ala qarğanın bala çıxara bilmədiyi” Naxçıvanda o qədər də işə yaramadığı faktı inandırıcılıq qazanmağa başlayır.

İnformasiya mənbəmiz bunu olduqca normal hesab edir və Cənab Sədrin uzaqgörənliyinə bağlayır: “Rəşad İsmayılov düzgün seçim deyildi. Çünki cənab İsmayılov səriştəsiz, idarəetmə qabiliyyəti olmayan və düzgün kadr seçə bilməyən şəxsdir. Rəşad İsmayılovun səriştəsizliyinin nəticəsidir ki, artıq Naxçıvan DİN-də bir çox şəxs onunla işləmək istəmir. Əlbəttə ki, haqlıdırlar da. Çünki, cənab İsmayılov, məntiqsiz göstərişlər verərək, camaatı boğaza yığıb. İsmayılovu bu vəzifəyə təqdim edərkən, bəzi şəxslər cənab Vasif Talıbovu həqiqətən də aldatdılar. Etiraf edək ki, Vasif Talıbov ağıllı və uzaqgörən siyasətçidir, gec də olsa Rəşad İsmayılovun sərişətisizliyini gördü” (Görünür, informasiya qaynağımız “uzaqgörənlik”lə “gec görməkliyi” iki ayrı kateqoriyaya şamil edir – Ovqat.com).

Dördüncü namizəd Gündüz Qədimovun təklifinin Cahan Holdinqin sədri və Naxçıvan MR Ali Məclisinin deputatı Vüqar Abbasov tərəfindən verildiyini bildirən mənbəmizin dediklərinə görə, haqqında danışdığımız bu şəxs təqaüddə olan polis mayoru idi: “O, təqaüdə çıxdıqdan dərhal sonra Cahan Holdinqinin təhlükəsizlik şöbəsinin rəisi təyin olundu. Naxçıvana Daxili İşlər naziri axtarışına başlandıqdan sonra isə təqüddən geri çağırılan Gündüz müəllim Naxçıvan DİN-in Mühafizə Polisi Şöbəsinə rəis göndərildi. Gündüz müəllim hal-hazırda özünü Naxçıvan DİN-in naziri kimi aparır. Lakin təəssüflər olusun ki, Gündüz Qədimovda düzgün kadr deyil. Bunun səbəblərini burda yazmaq düzgün deyil. Cənab Vasif Talıbov Gündüz Qədimovun keçmişini ətraflı araşdırsa nə demək istədiyimizi anlayacaq. Həqiqətən istəmərik ki, cənab Talıbovun ətrafında olan işbazlar onu növbəti dəfə aldatsınlar. Çünki, Daxili İşlər Nazirliyi dövlətin daxili onurğasıdır. Onurğanın üstünə isə hər yoldan keçəni baş qoymaq olmaz”.

Hə, indi gəldik əsas məsələyə. Mənbəmizin iddiasına görə, Naxçıvan Daxili İşlər naziri postuna 5-ci namizədin adı Qasım Həsənov adlı şəxsdir.

Qasım Həsənovun hətta Naxçıvan MR DİN-də belə olmayan tərcümeyi halına gəlincə, o, 02.09.1966-cı ildə Culfa rayonunda anadan olub. Azərbaycan DİN-in Polis Akademiyasını bitirib. Naxçıvan DİN-də mühüm vəzifələrdə çalışıb. Uzun müddət Naxçıvan DİN-in İnsan Alverinə Qarşı Mübarizə İdarəsinin rəisi vəzifəsində xidmət edib. Hazırda isə Naxçıvan DİN-in Cinayət Axtarışı İdarəsinin rəisidir. Qasım Həsənov faktiki olaraq Naxçıvan DİN-in əməliyyat aparatının rəhbəridir. Rütbəsi polis polkovnikidir.

2021-ci ildə 55 yaşı tamam olduğu və daxili işlər orqanlarında son yaş həddinə çatdığı üçün təqaüdə göndərilməsi üçün ərizə belə yazıbmış. Ancaq Naxçıvan MR Ali Məclisinin sədri, cənab Vasif Talıbov Qasım Həsənovun təqaüdə göndərilməsinə razılıq verməyib”.

Mənbəmiz Cənab Sədrin bu hərəkətini də onun “uzaqgörənliyi” ilə izah edir: “Cənab Vasif müəllim də bilir ki, Qasım Həsənovsuz Naxçıvan DİN olmaz. Real vəziyyəti təhlil etsək, hazırda Qasım Həsənov Naxçıvan DİN-in yükünü təkbaşına öz çiyinlərində daşıyır. Qasım Həsənov çox ləyaqətli, bacarıqlı, idarəetmə qabiliyyəti yüksək olan, heç kimə qarşı haqsızlıq və ədalətsizliyə yol verməyən, şərəfli, polis peşəsinin və tutduğu mövqeyin ağırlığını düşünərək hərəkət edən, həm vətəndaşlar, həm də bütün polis əməkdaşları tərəfindən sevilən, dövlətinə, vətəninə sədaqətli olan, bir şəxsiyyətdir. Həqiqətən Qasım Həsənov kimi bir şəxs Naxçıvan DİN-ə gəlməyib və bundan sonra da çətin gələr.

Əslində cənab Vasif Talıbov Qasım Həsənovu təqaüdə göndərməməklə çox düzgün addım atıb. Qasım Həsənov təqaüdə getsəydi, Naxçıvan DİN-in bu günkü vəziyyətini düşünmək belə çətin idi. Naxçıvan Daxili işlər naziri vəzifəsinə, bütün hər kəs tərəfindən sevilən və Muxtar Respublikanın polis orqanlarında ağsaqqal kimi hörməti saxlanılan Qasım Həsənovdan layiqli kadr gələ bilməz. Qasım Həsənovun xidməti keçmişinə diqqət yetirsək, onun nə qədər mühüm bir şəxs olduğunu görə bilərik. Bu gün bataqlığa batmış Naxçıvan DİN-i o durumdan yalnız Qasım Həsənov çıxara bilər. Cənab Vasif Talıbov, işbilməz və bacarıqsız kadrlara etimad göstərib vaxt itirməkdənsə, Qasım Həsənova etimad göstərməsi ən düzgün qərar ola bilər”.

Təbii ki, bütün bunlar Naxçıvandakı mənbələrimizin mülahizələridir. O da istisna deyil ki, Naxçıvan MR Daxili İşlər Nazirliyinin ən yüksək postuna təyinat Bakı tərəfindən verilsin və bu, heç kimin gözləmədiyi sürpriz şəxs olsun. Zənnimizcə, Naxçıvan DİN-dəki hərc-mərcliyə son qoymağın ən qısa yolu da məhz budur: Heç kimi tanımayan və heç kimin tanımadığı, dolayısıyla hər kəsə eyni gözlə baxan nazir. O nazir ki, yeri gələndə paytaxtın sözünü daha üstün tuta və sosial şəbəkələrdə ölkə rəhbərliyini tanımadığını açıq-aşkar bəyan etməkdən çəkinməyən istənilən zabiti cəzalandırmağı bacara.

Bayramzadə İlqar Səməd oğlu da babası Zülfəli kişi kimi xalqının fədaisidir...
O, 3 iyun 1982-ci il tarixində Bakı şəhərində anadan olmuşdur.
Orta təhsilini 1989-1999-cu illərdə Bakının Nizami rayonunun 201 saylı (1-5-ci siniflər), Xətai rayonunun 88 saylı (5-6-cı siniflər) məktəblərində, Tehran şəhərinin Səadətabad Beynəlxalq məktəbindә (7-ci sinif, valideynlərinin diplomatik fəaliyyəti ilə bağlı), Bakının Nərimanov rayonunun 43 saylı bağça-məktəb-lisey kompleksində (8-11-ci sinifllər) almışdır.
1999-2003-cü ildə Bakıda “Qərb” universitetinin qərb dilləri fakültəsində ali təhsil almış və tərcüməçi ixtisasına, 2003-2006-cı illərdə isə Azərbaycan Dövlət Kooperasiya universitetinin idarəetmə fakültəsində qiyabi olaraq ikinci ali təhsil alaraq “Gömrük işinin təşkili” ixtisasına yiyələnmişdir.
Ana dilindən başqa ingilis və rus dillərində sərbəst danışır.
Azərbaycan Respublikasının ordu sıralarında xidmət etmiş və hərbi mükəlləfiyyətlidir.
2005-2010-cu illərə özəl sektorda - “Pakan MMC”-də satış üzrə müdir, “İrşad” oteldə inzibatçı, “Torlon Holdings İnc.” Şirkətinin Qazaxıstan Respublikasındakı nümayəndəliyinin direktoru vəzifələrində çalışmışdır.
2010-cu ildən ARDNŞ “Azəriqaz” İstehsalat Birliyinin Səbail və 2019-cu ildən indiyə kimi isə Xətai rayon qaz idarəsində çilingər-nəzarətçi vəzifəsində çalışmaqdadır.
İlqar ziyalı ailəsində böyüyüb tərbiyə almışdır.
ARDNŞ “Azəriqaz” İstehlalat Birliyinin Səbail və Xətai rayonlarında işlədiyi illərdə daim xalqın arasında və mindən yuxarı insanların mənzilində qaz sistemi ilə bağlı problemlərin həlli ilə məşğul olmaqla, gecə və gündüz onların xidmətində dayanmaqla sadə insanlar, ziyalılar, siyasətçilər, dövlət qulluqçuları, mədəniyyət işçiləri, deputatlar və cəmiyyətimizin sair qruplarının nümayəndələri ilə səmimi münasibətlər qura bilmişdir. Yalnız qaz sisteminə baxış və ya ondakı problemlərlə bağlı deyil, hətta abonentlərdən birinin səhhəti ilə bağlı bir problem yarandığı təqdirdə əlindən gələn köməyi əsirgəməmiş, lazım olan bütün vasitələrdən istifadə etməklə ilk yardım göstərmişdir. Onu tanıyan abonentləri gecə də zəng edib mənzilində qaz sistemində yaranmış bir problemlə bağlı məlumat verib kömək istəyəndə belə ona “növbətçiyə xəbər verin” deyil, “narahat olmayın, indi gəlib həll edərik” cavabını verər və dediyinə də əməl edər. Bu isə insanlarda, onların qəlbində həmişə bir məmnunluq hissi yaradır, dövlətə, onun xalqa xidmətinə inam və gələcəyə ümid verir.
İlqar həmişə xalqın, xüsusilə də onun sadə nümayəndələrinin arasındadır. O üzdən də insanların mövcüd sosial problemlərinə, istəklərinə daha yaxından bələddir, imkanları daxilində də onların həllində əlindən gələni heç vaxt əsirgəməmişdir.

Butov.az

Rusiya ilə Ukrayna arasında ziddiyətlər getdikcə artmaqdadır. Qərb rəsmiləri bu barədə tez-tez açıqlamalar verir, Moskvaya xəbərdarlıqlar edirlər. Kremlin geri çekilmək fikri yoxdur. Kiyev isə hələ də qətiyyətlidir. Əslində zəfərlə bitən İkinci Qarabağ müharibəsindən sonra separatizmdən əziyyət çəkən digər dövlətlərin, o cümlədən Ukraynanın da torpaqlarının azadığı uğrunda hərəkətə keçəcəyi gözlənilən idi. Ancaq ssenari, həqiqətən, sonadək eynimi olacaq? Bunu şübhə altına salan obyektiv və subyektiv səbəblər var. Fakt isə ondan ibarətdir ki, tərəflər arasındakı təzyiq getdikcə artmaqdadır.
Proseslərin gələcək inkişafına dair BDU professor, politoloq Əlimusa İbrahimovla söhbətləşdik:
- Bir neçə aydır davam edən Rusiya- Ukrayna qarşıdurmasının müharibə ilə nəticələnmək ehtimalı nə qədərdir?
- Bu, indi çoxlarını düşündürən əsas sualdır. Yüz ildən bəridir ki, belə vəziyyət yaranmamışdı. Həm Rusiya, həm də Ukrayna indiyədək heç vaxt bu qədər qarşı-qarşıya gəlməmişdi.
- ABŞ niyə bu qədər canfəşanlıq edir?

- Çünki ABŞ və onun Avropa üzrə müttəfiqləri Rusiyanın SSRİ-ni bərpa edəcəyindən narahatdır. Əslində Rusiyanın son davranışları da buna əsas verir. Kreml ən azından öz nüfuzunu da da artırmaq istiqamətində addımlar atır. Və bu, dediyim kimi, bütün dünyada SSRİ-ni bərpa etmək səyləri kimi qiymətləndirilir. Yəni əslində Qərbi narahat edən Rusiyanın Ukraynanı işğal edəcəyi yox, keçmiş imperiyanı bərpa etmək cəhdləridir.
- Qərbin xəbərdarlıqları nə qədər səmimidir?
- Əslində ABŞ “Rusiyanın Ukraynaya hücuma keçəcəyi təqdirdə necə davranacağı” sualına hələ də cavab tapa bilmir. Amma Vaşinqton müharibəyə başlamayacaq. Çünki əks halda Moskva çıxılmaz vəziyyətdə qalıb nüvə silahından istifadə etməli olacaq. Bu, Qərbi qorxudur. Ümumiyyətlə, Avropa Ukraynaya görə Rusiya ilə münasibətləri pisləşdirmək istəmir. Çünki Avropa Rusiya qazından asılıdır. Bu mənada Qərbin Kremlə qarşı sanksiya tətbiqindən başqa görəcəyi tədbir yoxdur. Hərçənd sözügedən sanksiyaların da getdikcə təsiri azalacaq. Müəyyən müddətdən sonra Vaşinqtonun əlində Moskvaya qarşı tətbiq edə biləcəyi vasitəsi qalmayacaq. Bu nöqteyi-nəzərdən Qərbin Rusiyaya münasibəti dəyişməsə, ABŞ kəşfiyyatının dediyi kimi, fevralda olmasa belə, yaxın gələcəkdə Ukraynanın işğalı gözləniləndir. Ancaq məsələ ondan ibarətdir ki, Rusiya müharibə istəmədiyini deyir.
- Şimal qonşumuz, həqiqətən, müharibə istəmirsə, nə üçün savaş fonu yaradır?
- Rəsmi Moskva hazırda tərəddüd edir. Onun bundan sonrakı davranışı ABŞ-ın və Avropanın mövqeyindən asılıdır. Əgər Qərb güzəştə getsə, Kremlin işğalının qarşısını ala bilərlər. Halbuki hər iki tərəf geri çəkilməyəcəyini deyir. Hadisələrin necə inkişaf edəcəyini isə yaxın gələcək göstərəcək. Amma əgər ABŞ və Rusiya dünyaya sülhlə bağlı mesajlar verirlərsə, deməli, öz aralarında da razılığa gəlməyi bacarmalı, nümunə olmalıdırlar.
- Nə Vaşinqton, nə də Moskva geri çəkilirsə, razılıq necə əldə oluna bilər?
- Bildiyiniz kimi, Türkiyə son vaxtlar proseslərdə fəal iştirakçıdır. Qardaş ölkənin həm Rusiya, həm Ukrayna, həm də ABŞ-la münasibətləri normaldır. Bu mənada Ankaranın vasitəçiliyi gözləniləndir. Fikrimcə, Türkiyə yaxın vaxtlarda vasitəçi kimi “oyuna daxil olacaq”. Hətta, ehtimal var ki, həmin tərəflər özləri bu barədə Ankaraya müraciət edəcəklər.
- Ola bilərmi, Rusiyanı müharibədən çəkindirən amillərdən biri də Gürcüstan faktorudur?
- Bu, həmin məqamlardan biridir. Rusiyada çox yaxşı başa düşürlər ki, Ukrayna ilə vəziyyət daha da gərginləşsə, təkcə Gürcüstanda deyil, həm də Moldovada, Belarusda durum dəyişəcək. Moskvada bunu nəzərə alırlar. Ona görə də Kreml Ukraynanı digər vasitələrlə özünə tabe etməyə çalışacaq və son ana qədər hərbi əməliyyatlardan çəkinəcək. Ümumiyyətlə, müharibə Rusiya üçün ağır nəticələrə səbəb ola, hətta onun dağılmasına gətirib çıxara bilər. Xüsusilə nəzərə almaq lazımdır ki, Kremlin ətrafındakı bir çox dövlətlə problem var. Bu, onun işini bir az da çətinləşdirəcək. Daha konkret desək, müharibə başlayacağı təqdirdə Rusiyanın yanında kimin olacağı sual altındadır.
- Potensial hərbi toqquşmada Çinin mövqeyi necə olacaq?
- Adını çəkdiyiniz dövlət adətən toqquşma vəziyyətlərində neytrallığını qorumağa çalışır. Bu ritorika potensial Rusiya- Ukrayna toqquşması üçün də istisna deyil. Pekinin həm Moskva, həm də Kiyevlə münasibətləri yaxşıdır. Rusiya ilə ABŞ arasında müharibə başlasa idi, Çin, çox güman, birincinin yanında olardı. Lakin dediyim kimi, indiki situasiyada Pekinin tərəf tutacağı gözlənilmir.
- İndiki gərgin vəziyyətdə Azərbaycan Prezidenti İlham Əliyevin Ukraynaya səfəri nəyə hesablannışdı?
- Bu, hər şeydən əvvəl Azərbaycanın müstəqil xarici siyasət yeritdiyinin, kimsədən asılı olmadığını göstərir. Bir il bundan əvvəl- İkinci Qarabağ müharibəsi zamanı Kiyev bizim yanımızda idi. İndi biz də, şübhəsiz, vəfa borcumuzu ödəməliyik. Səfərin əsas məqsədi iqtisadi çətinliklər yaranacağı təqdirdə, həmrəy olduğumuzu, Ukraynaya dəstək verəcəyimizi bildirmək idi. Düşünürəm ki, indi Ukraynaya da bizim iqtisadi sahədə dəstəyimiz daha çox lazımdır, nəinki hərbi istiqamətdə. Çünki NATO Kiyevi silah-sursat baxımından kifayət qədər təmin edir. Əlbəttə, səfər təkcə Ukrayna üçün deyil, həm də bizim üçün maraqlı və faydalı idi. Bu, xüsusilə ərzaq təminatı və təhlükəsizliyi məsələsində özünü göstərəcək. Ümumiyyətlə, zənnimcə, gələcəkdə Azərbaycan- Türkiyə- Ukrayna triosu ciddi işlər görə bilər. Ankara- Kiyev əlaqələri isə bizim hərbi sənayəmiz üçün ciddi perspektivlər vəd edir.
- Bu yaxınlaşmalar, sizcə, Rusiyanı qıcıqlandırmır?
- Əlbəttə, əlaqələr Moskvanın narazılığına səbəb olacaq və bəlkə də, artıq olur. Amma Kreml indi buna biruzə verə biləcək, əks addımlar ata biləcək vəziyyətdə deyil. Rusiya bu ittifaqdan öz mənafeyi naminə istifadə etməyə çalışacaq. Necə ki, Türkiyə Cənubi Qafqaza gələndə bunu etdi. Nəzərinizə çatdırım ki, qardaş ölkə bölgəyə girməsə idi, şimal qonşumuzun işi çox çətin olacaqdı.
- Müharibə başlamasa, proseslər səngiyən templə inkişaf etsə, bu, Prezident Vladimir Zelenski əleyhinə narazılığa səbəb olmaz? Axı xalq artıq savaşa, torpaqların azadlığına köklənib…
- Bəli, etirazlar gözləniləndir. Əlbəttə, kimsə hakimiyyətini təhlükəyə atmaq istəməz. Amma bu o demək deyil ki, o, müharibədə maraqlı olmalıdır. Savaş bütün hakimiyyətlər, siyasi liderlər üçün itki deməkdir. Düşünün, hərbi əməliyyatlar başlasa, nə qədər insan həlak olacaq…Üstəgəl, nə ABŞ, nə də onun Avropadakı müttəfiqləri Ukraynanı müdafiə etməyəcək, tərəflər təkbətək qalacaq. Bununla belə, güman edirəm ki, bundan sonra Ukraynada hakimiyyət dəyişilsə belə, Qərbə meyil daha da güclənəcək, nəinki Rusiyaya.
- Bəs Krım, Donetsk və Luqanskın müharibəsiz azad olması mümkündür?
- Bunun üçün NATO Rusiyanın tələblərini yerinə yetirməlidir. Bu isə ağlabatan deyil. Ümumiyyətlə, o ərazilərin nəinki müharibəsiz, heç müharibə ilə də Ukraynaya qaytarılması mümkün görünmür

Kənan Novruzov

Bütöv.az

Məryəm İmanova,
BDU Jurnalistika fakültəsinin II kurs tələbəsi

Ramiyə İmranqızı (İskəndərzadə Ramiyə İmran qızı) 1952-ci ildə Goranboy rayonunun Sarov kəndində anadan olub. 1982-ci ildə Bakı Dövlət Universitetini (BDU) bitirib. Elm və mədəniyyətə çox böyük dəyər verən Ramiyə İmranqızı 2003-cü ildə "Azərbaycanın qadın aşıqları" mövzusunda dissertasiya işini müvəffəqiyyətlə müdafiə edərək Filologiya üzrə fəlsəfə doktoru elmi dərəcəsi almışdır. Ramiyə xanım bir tədqiqatçı kimi apardığı dəyərli elmi araşdırmaları qadın aşıqlarımıza verilən ən böyük dəyərdir. Digər tərəfdən, Ramiyə xanımın özünün də satirik istedadı bu elmi tədqiqat işinin yüksək səviyyədə ərsəyə gəlməsinə təkan vermişdir. "Ömür bir karvandır" seçilmiş şeirlər kitabı ədibin yaradıcılığının bir hissəsini təşkil edir. Oxuculara təqdim olunan bu kitabda müəllifin qəlbləri oxşayan gözəl şeirlərlə birlikdə, onun topladığı və dahilərin dediyi müdrik kəlamlara da yer verilir.
Filoloqun şeirlərinin böyük hissəsini bizi dünyaya gətirən müqəddəs varlığa- anaya həsr edib.

Onun "Ana" şeirindən:

"Gəl, öpüm mən sənin o ağ saçından,
Mənə pay vermisən sən öz yaşından.
Gecələr yatmayıb böyütdün məni,
Gözlərim rəng aldı qara saçından"
O, öz anasının timsalında digər anaların övladları uğrunda çəkdiyi əziyyəti vurğulayır. Saçlarını övladı yolunda ağardan, öz varlığı ilə ümid olan, ömrünü ona həsr edən analar...
Onun "Anamı düşünərkən" şeirindən:
"Yəqin, görüşərik səninlə bir gün,
Sənsizlik ürəyimi üzdü büsbütün!
Onda sarılarıq bir-birimizə,
Allah da son qoyar həsrəti bizə!"
Hər misrası ürək ağrıdır. Xanım bu şeirləri ilə oxucuları valideynlərinə elə sağ vaxtı hörmət bəsləməyə çağırır. Bizi onların qədrini dünyadan getmədən bilməyə səsləyir. Çünki bu zalım zaman onları bizdən alanda insanın lap canından can ayrılır.
Özü kimi yetişdirdiyi övladları da ziyalı, öz sözünü demiş insanlardır. O, bütün əsgər analarının səsi kimi çıxış edərək mükəmməl şeirlər ərsəyə gətirmişdir.
"Oğul" şeirinə nəzər salaq:

''Tökülsə də, qanın o yurd yerinə,
Qoyma, Vətən oğlu, qəddin əyilə!
Düşmən məğlub olub məhv olan günə,
Ağ qoçu qurbanlıq bağlaram, oğul!"
Ramiyə xanımın bu misralarından aydın olur ki, sonu ölüm belə olsa, düşmən məhv edilməlidir.
"Namusun, qeyrətin qoy coşsun sənin,
Düşmən əlindədir neçə qız, gəlin.
Qanını almasan, sən şəhidlərin,
Axirət evində yanaram, oğul!"
Yuxarıda gətirdiyimiz nümunələrdən yola çıxaraq deyə bilərik ki, Ramiyə xanım bu gün müasir Azərbaycan ədəbiyyatında özünün orijinal üslubu ilə fərqlənən ədiblərdəndir. Düşünmək olar ki, müəllif gələcəkdə Azərbaycanda ədəbiyyatına daha böyük töhfələr verəcək.
Vətənpərvərlik mövzulu şeirləri ilə ictimai şüuru formalaşdıracaq.

Bütöv.az

Jurnalist, şair, müəllimə Zəminə Cavadlının 60 illik yubileyinə

Jurnalist, şair, müəllimə Zəminə Cavadlının yanvarın 21-i doğum günü və 60 illik yubileyidir. Zəminə xanımı sakit təbiətli, ədalətli, gözəl rəftarlı bir insan kimi çox sevirəm. Düşünürəm, bu əziz gündə ona nə hədiyyə etsəm könlünə fərəh, gözlərinə gülüş qonar. Zəminə xanım şeiri çox sevir. Onun belə bir şeiri var, “Bir nəğmə oxu mənə!”

Bir nəğmə oxu mənə,

Qaytar keçmişə məni.

Bir sevgi dastanı de,

Yenidən sevim səni.

Elə bir söz söylə ki,

Xəyanəti unudum.

Elə bir söz söylə ki,

Bir də, sənə vurulum.

Odur ki, onun şeirlərindəki o hisslər, duyğular mənə bu misraları yazdırdı. Necə hədiyyədi, bəyənərmi görəsən?

Sənə nə hədiyyə edim, əzizim,

Qəbində bir ağrı, acı qalmasın?

Sənə nə hədiyyə edim, birdənəm,

Gözündə, könlündə heç vaxt solmasın.

Sən sınıq qəlbimin ağ çiçəyisən,

Səni düşünürəm gözlərimdə nəm.

Bağışla, o xoşbəxt günlərimizə,

Bağışla, qəlbini sındırmışam mən.

Beləliklə, bu günlərdə Zəminə xanımla etdiyimiz kiçik bir müsahibəni Sizə təqdim edirəm.

-Zəminə xanım, Sizi yubileyiniz münasibətilə ürəkdən təbrik edirik. Uşaqlıq arzularınızdan danışarsınızmı?

- Çox sağ olun. Mən Agdam rayonunun, Əliagalı kəndində dogulmuşam. Beşinci sinifdə oxuyanda, Əlfi Qasımovun “Adilənin taleyi” əsərini oxumuşdum. Oradakı qız jurnalist idi. O obraz mənə elə xoş təsir bagışlamışdı ki, jurnalist olacağıma qərar vermişdim. Məktəbdə bütün müəllim və şagirdlər bilirdilər ki, arzum jurnalist olmaqdı. Jurnalist olmaqdan qeyri bir sənət sahibi olacağımı heç vaxt düşünməmişdim. O zaman ancaq fəhlə balası olmalıydın ki, sənədlərini elə yerlərə verə biləsən. Birinci il bəzi səbəblərdən sənədlərimi götürmədilər. İkinci il 1980-ci ildə Bakı Dövlət Universitetinin jurnalistika fakültəsinə qəbul olundum.

-Bir jurnalist kimi harada çalışmağa başladınız?

-Mən ilk dəfə, 1990-cı ildə “Qarabag” qəzetində müxbir kimi işə qəbul olunmuşam. 1998-99-cu illərdə “Ədalət”, 2006-2008-ci illərdə isə “Respublika” qəzetində çalışmışam. 2008-ci ildə özüm “Saglamlıq və Rifah” adlı qəzet nəşr etdirməyə başlamışam. 3 ildir qəzetin nəşri dayanıb. “İdeal qadın” adlı jurnal da, təsis etmişdim. Pandemiya dövründə jurnalın fəaliyyətini dayandırdım. İnşallah, bu ildən yenidən jurnalın çapına başlamagı düşünürəm.

-Siz həm də, müəllimsiniz...

-Mən həm müəlliməm, həm də, jurnalistika ilə məşgulam. 2009-2012-ci illərdə Cəlilabad rayon Cəlayir Kənd Tam Orta Məktəbində direktor kimi fəaliyyət göstərmişəm. 10 ilə yaxındır ki, Agdam 33 saylı məktəbdə dil-ədəbiyyat müəllimi işləyirəm.

-Qələbəmizi, böyük Zəfəri necə qarşıladınız?

-Şəhər mühitində yaşamagı sevməmişəm. Bütün varlığımla kəndimə, elimə baglıyam. Qələbə xəbərini eşidəndə sevincdən öləcəyimi hiss etdim. Sonra birtəhər özümə gəldim. Mən bu möhtəşəm xəbərdən indi də özümə gəlməmişəm...

-Bir az da, kitablarınızdan danışarsınızmı?

-Mənim 5 kitabım işıq üzü görüb: “Üşüməsin əllərin”, “Bir ömrün acı xatirəsi”, “Məhəbbətdən doğulanlar”, “Minlərdən iki şəhid” və “Oxşar taleli yeddi igid”.

-Daha çox nəylə məşğul olmağı sevirsiniz, xüsusi bir hobbiniz varmı?

-Mənim hobbim şeir yazmaq, şeir oxumaqdır. Poeziya mənim həyatımdır desəm, inanın... Şeirə, poeziyaya böyük maragım oldugundan yazılarımda şeirə daha çox üstünlük verirdim. Publisistik yazılar yazsam da, daha çox şeir yazmışam. Kitablarıımın çoxu demək olar ki, şeirdir.

-Bizi ailənizlə qiyabi olsa da, tanış edərsinizmi?

-Bir qızım, iki ogul nəvəm var. Ən böyük arzum odur ki uşaqlarımız azad, firəvan bir həyatda yaşasınlar. Öz-özümə həmişə belə bir sualla müraciət edirəm: yenidən dünyaya gəlməyini istəyərsənmi? Deyirəm, yox. Bu həyatda lazımi qədər yaşamışam. Bəs edər. Allahımdan çox razıyam. Həyatda çoxlu dostlarım var, yaxşı qohumlarım var, Allah mənə gözü-könlü tox övlad verib, iki nəvəm var. İtkilərim çox olsa da, səbr edib dözmüşəm. Qalanlarıma şükür edirəm. Fəxr elədiyim qardaşım, güvəndiyim bacım var.

-Sizə həyatda cansağlığı, işlərinizdə uğurlar arzulayırıq.

-Mən də, diqqətinizə görə, qəzetinizə və Sizə təşəkkür edirəm.

Söhbətləşdi: Mina Rəşid

Bütöv.az

3 qat dünya cempionu Şəhid İlkin Məmmədovun evində, guşəsində olduq. Ofelya xanım min bir nemətlə süfrə açıb 3 Şəhid anasını da dəvət etmişdi və biz bacıları gözləyirdi. Məlahət Yusifqızı, Şamama Şeyda, Lətifə Rəşid və mən Rəna Mərzili. “Xan qızı Natəvan” ədəbi məclisinin “Şəhidlərə şahid misraları” kitabını aparmışdıq. Rahidin anası Sənubər xanımla tanış olub, fevralın 13-ü Rahidin ad günü olduğunu öyrəndik. “Toy etməmişəm, ad günün eləyəm” söylədi bə bizi də dəvət etdi. Ad gününə həsr olan bu şeirlər ruhunu şad etsin, Şəhidim!

Sadıxov Rahid Vahid oğlu 13 fevral 2001-ci ildə Rusiya Federasiyasının Saratov şəhərində anadan olmuşdur. Orta təhsilinə 2007-ci ildə Abşeron rayonu, Saray qəsəbəsi M.Ələkbərov adına 1 nömrəli tam orta məktəbində başlamışdır. 2016-cı ildə Sumqayıt şəhər 6-cı mikrorayon ərazisində yerləşən Cümə məscidinin mədrəsəsində 6 ay dini təhsil almışdır. Bundan sonra bir il müddətində Maştağa qəsəbəsində yerləşən İmam Cəfəri Sadiq (ə.s) adına məscidin mədrəsəsində dini təhsilini davam etdirmiş, daha sonra Cəlilabad rayon mədrəsəsində 6 ay oxumaqla təhsilini başa vurmuşdur.

2019-cu il aprel ayının 1-də Masallı rayonundan hərbi xidmətə yollanmışdır. Aprel ayının 2-dən 3 ay müddətində “N” saylı hərbi hissədə xidmət etmiş. iyul ayında başqa bölükdə xidmətini davam etdirmişdir. 2020-ci il 28 sentyabrda Talış kəndi və Suqovuşan qəsəbəsində gedən döyüşlərdə qəhrəmancasına şəhid olmuşdur. 2020-ci il 29 oktyabr tarixində Abşeron rayonunun Saray qəsəbəsində yerləşən Səhidlər Xivabanında dəfn olunmusdur.

Rahid

Ananın ürəyi parça-parçadır,

Əxlaqın, namusun bəhəri Rahid.

O soyuq məzarın güllü bağçadır,

Atanın nisgili, qəhəri Rahid.

Mələk bir ananın İmam balası,

Getsə də tarixdə izi qalası.

Atanı, ananı dərdə salası,

Elinin qeyrəti, hünəri Rahid.

Oxudun “Quran”ı, sən vurdun başa,

İmamlarla adın çəkilir qoşa.

Sən özün könüllü getdin savaşa,

Vətən torpağının sipəri Rahid.

Vətən torpağının qeyrətin çəkdin,

Qarabağa qanınla lalələr əkdin.

Ox olub düşmənin gözünü tökdün,

Qoşa bacıların kədəri Rahid.

Dilinin kəlməsi “Quran” ayəsi,

Peyğəmbər övladı, imam nəvəsi.

Yolunu gözləyir İslam kəbəsi,

Müqəddəs Kərbəla şəhəri, Rahid.

“Ana can” kəlməni gözləyir anan,

Dərdinlə alışıb odunla yanan.

Qardaşın itirmiş o qoşa sonan,

Dərdli ürəklərin qubarı Rahid.

Tökdün neçə düşməninin qanını,

Vətəninə sipər etdin canını.

Atan da qoymuşdu qoç qurbanını,

Müqəddəs Şuşanın zəvvarı Rahid.

Şeyda çəkir dünyanın dərd-sərini,

Haqq-ədalət qoy tapsın öz yerini.

Tamı yox eləsin şərin cəmini,

Ananın dilinin qabarı Rahid.

Şamama Şeyda

Rahid

Hər səhəri şirin salam verərdin,

Anan yenə səni duyaydı, Rahid.

Pərişan saçları bir haray çəkir,

Kaş ki, toy xınası qoyaydı, Rahid.

Anan xonça bağlar, gülü qaralı,
Layla deyir, sızıldayır yaralı.

Mələkləri kövrəldibdir bu halı,

Toyunda oynayıb doyaydı, Rahid.

Həyalı, imanlı halal böyüdün,

Ata nəsihətin, ana öyüdün.

Qayıt bala, sən vəfasız deyildin,

Göylərə ucalan haraydı, Rahid.

Toy etmədim deyib, ad günü edər,

Müjdələr, dualar ruhuna gedər.

Zülüm ərşə dayanıbdır bu qədər,

Dünya bir xaraba saraydır, Rahid.

Əzbər bildin “Quran”ı cümlə-cümlə,

Şəhid oldun, ucaldın öz gücünlə.

Məkkə, Mədinə gəzdin öz səcdənlə,

Şəhid adın Allahdan paydır, Rahid.

Rəna deyər, müqqəddəsim, Şəhidim,

Ey sədalı səsim, sən ey Şəhidim.

Andım, əziz kəsim, sən ey Şəhidim,

Sənsiz sənə olan bu toydur, Rahid!

Rəna Mərzili

Bütöv.az

Müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev Hərbi Hava Qüvvələrinin hərbi hissələrindən birində olub.

Bu barədə Ordum.az-a Müdafiə Nazirliyindən məlumat verilib.
HHQ-nin şəxsi heyəti ilə görüşən Baş Qərargah rəisi hava hücumundan müdafiə rəisləri, zenit-raket divizionlarının komandirləri ilə keçirilən təlim-metodiki toplanışda iştirak edib.
General-polkovnik K.Vəliyev döyüş qabiliyyətinin daha da artırılması və döyüşə hazır olma vəziyyətinin yüksək səviyyədə saxlanılması, hava məkanımızın etibarlı qorunması, döyüş növbətçiliyinin keyfiyyətli təşkili və aparılması ilə bağlı tapşırıqlar verib.
Sonda Baş Qərargah rəisi şəxsi heyətin qayğıları ilə maraqlanıb və Müdafiə nazirinin müvafiq tapşırıqlarını aidiyyəti üzrə vəzifəli şəxslərə çatdırıb.

Bütöv.az

Qazaxıstanın rus qışı, Rusiyanın qazax xofu
1990 cı ilin Qanlı Yanvarının anım günündə bütün şəhidlərimizə bir daha Allahdan rəhmət diləyir və bu yaxınlarda qardaş Qazaxıstanda baş vermiş daha bir qanlı yanvarı da düşünməli oluruq. On beş gündən artıqdır dünya mətbuatında qardaş ölkədə baş verənlər təhlil edilir, bu faciəli olayların təşkilatçıları və səbəbləri haqqında yazılar yazılır. Hər qəzetin də öz variantı, öz yanaşması...
Nəhayət, internet açılıb, əlaqələr bərpa olunub. Narahatlıq və sual dolu yazılarımız qazax dostlarımıza çatıb və onlar da bəzisi ehtiyatla, bəzisi açıq şəkildə cavablar yazır, həmin günlərdə görüb- izlədikləri haqqında fikirlərini bölüşürlər. Otuz il əvvəl Sovet ordusunun Azərbaycanda törətdiyi vəhşiliklərdən sonra bizim göz yaşı ilə dolu yazılarımız, dünyanın eşitmək istəmədiyi harayımız yada düşür. O vaxt Sovet Ordusu Bakı işğalını bir müddət gizli saxlada bilmişdi, lakin Qazaxstan hadisələri gizli qalmadı.
Bir qazax ziyalısının yazısında oxuyuram:
“Tokayev ölkəyə ordu yeritdi və biz dünənki gündən Rusiyanın işğalı altındayıq.Tokayevin apardığı iyrənc təbliğata aldanmayın.. Yağmaçılar, vəhşilik törədib evləri yandıranlar hakimiyyətin öz adamlarıydı. Xalqın dinc mitinqini gözdən salıb boğmaq üçün.”
Başqa bir akademik dostum qazax xalqına müraciət edir ki, adını dəyişmək istəyiriksə, Nursultan şəhərinə türklərin böyük sərkərdəsi Çingiz xan adını verək...Üstəlik, türk dünyasının və Qazaxıstanın ağsaqqalı N.Nazarbayev də bir çoxlarının sevincinə, marağına, narahatlığına son qoyub mətbuatda açıqlama ilə çixiş edib, baş verən olaylarda düşmən əli olduğunu bildirib, xalqı yekdilliyə çağrıb və Tokayevin qiyamı yatırmaq üçün atdığı addımları bəyəndiyini bəyan edib…
Görünən budur ki, Kollektiv Təhlükəsizlik müqaviləsinə üzv ölkələrin ordusunu Qazaxıstana soxmaqla qazax xalqının iradəsini qıracaqlarını, xalqın türklük sevdasını söndürəcəklərini düşünənlər yanıldılar...Bu baxımdan da Qazaxıstandakı durum bizdə 20 Yanvardan sonrakı vəziyyətə çox bənzərdir.
Şübhəsiz, bu hadisələr haqqında əsl həqiqəti müəyyən vaxt keçəndən sonra öyrənəcəyik. Bu arada Rusiya mətbuatında on beş gündür “Qazax qiyamının texnologiyası”na həsr edilmiş məqalələr uc-uca calanıb. Məşhur qəzetlərdən birində oxuyuruq:
“Artıq məlumdur-Qazaxıstandakı proqram klassik “rəngli inqilablara” bənzəmirdi. Qazax qiyamı bir şəhərdəki dinc etirazdan ildırım sürəti ilə bütün ölkəni bürüyən xaos alovlanmasına çevrildi.” Bu qiyamı “kim və necə təşkil edib?” sualına cavab gəzən icmalçılar və siyasətçilər təxminən eyni mövqeyi bölüşürlər. Onlar hesab edirlər ki, bir çox ölkələrdə olduğu kimi, Qazaxıstanda da hakimiyyət orqanları sosial tələblərlə küçəyə çıxan narazı insanlarla vaxtında dil tapa bilmədi və buna görə də vəziyyətdən kimliyi bəlli olmayan dağıdıcı qüvvələr, “düşmənlər, hakimiyyət hərisləri” bacarıqla istufadə etdirlər. Əhalinin bir bölgədə başlanan dinc mitinqlərinə hakimiyyətin cavabı gecikəndə, görünür, öncədən yüksək səviyyədə hazırlanmış qüvvələr təşəbbüsü ələ aldılar. Ya Qazaxıstanı parçalamaq, ya da hakimiyyəti zəbt etmək məqsədilə...
Dinc mitinqləri qanlı toqquşmalara çevirənlər arasında prezident Tokayevin də adı çəkilir, təqaüddə olan N. Nazarbayevin də, xarici qüvvələrin də...Hətta Moskvanın “Versiya” qəzeti “inqilabı küçələrdə yox, saraylarda edirlər” hökmü ilə öz ehtimalını aksiom kimi, qəzetin üz qabığını dolduran iri hərflərlə verməkdən də çəkinməmişdir:
“Qazaxıstanda Maydanın rejissoru (tərtibçisi) prezident aparatında idi.” Demək olar ki, bütün təhlilçilər küçələrə axan insanların arasında qonşu ölkələrdən gəlmiş və xüsusi hazırlanmış silahlı dəstələrin olduğunu vurğulayırlar. Maraqlıdır ki, hələ bir il əvvəl Nazarbayevin nəvəsi, Aysultan (Londonda naməlum şəkildə dünyasını dəyişib) feysbukda məlumat yaymışdı ki, babasını aradan götürmək üçün Qazaxıstanda cələfilərdən ibarət 400 nəfərlik xüsusu gizli dəstə var.
Rusiya mətbuatı xüsusi bir arxayınçılıqla köhnə illə bərabər Nazarbayevin də yola salındığını vurğulayaraq, onun və ailəsinin xaricdəki əmlaklarının suyahısını dərc edərkən, Qazaxıstana gələn “rus qışı”nın “ərəb baharı”na bənzəmədiyini də unutmur; çünki bu qışın Rusiyada “qazax sindromu”na cevrilmək qorxusu var.. ( Bu yaxınlarda məlumat yayılmışdı ki, dünyanın milyarder ölkə başçıları arasında V.Putin birinci yerdədir)
Bəzi Moskva şərhçiləri Rusiyanın bu hadisədən dərs çıxarmalı olduğunu da dönə-dönə vurğulayır. Dimitri Papov adlı müəllif “Qazıxstanın rus qışı” adlı məqaləsində yazır:
“ Qazaxıstan inqilabından bir neçə dərs almaq olar. Qazaxıstanda da, bizdəki kimi, ... işlər plana uyğun gedir: əhali kasıblaşır, oliqarxlar zənginləşir, sənaye dağılıb. Qazaxıstan hakimiyyti Rusiyanın təcrübəsini nəzərə almamaqla ciddi səhv buraxıb. Vəhşi oliqarx kapitalizmində sabitliyi saxlamaq üçün əhalini tam dilənçiyə çevirmədən kasıblıq həddində saxlayır, həm də böyüyüb orta təbəqəyə çevrilməsinə, dirçəlməsinə, özünü arxayın hiss edib siyasi tələblər irəli sürməsinə imkan vermirlər... (Bunlar hamısı bizim də keçdiyimiz yollardır).
Başqa müəlliflər, deputatların, beynəlxalq əlaqələr üzrə mütəxəsislərin yazılarında xoruzun quyruğu daha aydın görünür; əllərinə bəhanə düşüb: Qazaxıstanda rus əhalisinin demoqrafik vəziyyəti üzrə statistikalar aşkarlanır, rusofobiyanın güclənməsi, rus dilinin dövlət dili olmaması və hətta 1986-cı ilin Kolbin hadisələri xatırlanır...
Sanki bunları demək üçün susub bu günü gözləyirmişlər. Qazaxıstanın gələcəyi ilə bağlı suallara verilən cavablarda isə belə bir arxayınçılıq var ki, bu qiyamdan sonra ölkədə Rusiyanın təsiri artacaq, Tokayev Putindən daha çox asılı olacaq; neft-qaz istehsalında İngiltərə-ABŞ- ın təsiri məhdudlaşacaq, “latınlaşma”(yəqin əlifbanı nəzərdə tuturlar) və “millətçilik” meyllərinin qarşısı alınacaq... Onu da açııq-aşkar, yazırlar ki, bu hadisələrin Rusiyaya sıçramaq qorxusu da var.
Yadımdadır, 1990 cı ildə sovet ordusunun Azəraycana yeridilməsinin bir bəhanəsi də burda güya millətçiliyin güclənməsi idi. Yəni rus, ingilis, fransız millətini sevə bilər, biz yox!
Maraqlıdır ki, ilk mitinqlərə çıxanlar neftin, qazın qiymətinin artırılmasına etiraz edir, sosial tələblər irəli sürürdülərsə Rusiya mətbuatının maraq və istəkləri qazaxların bu tələblərini kölgədə qoyur və daha aqressivdir: rus dilinin rəsmi status alması, siyasi hakimiyyətə ruspərəst qüvvələrin gətiriləsinə yardım, rusların köçünün qarşısının alınması və hətta Kollektiv Təhlükəsizlik müqaviləsinə qoşulmuş ölkələrin SSRİ-dən qopmuş başqa ölkələrdə də belə hadisələrin ola biləcəyini nəzərə alması və hazır olması. Anlamaq olmur, bu təşkilat ölkələrin daxili işlərinə hansı haqla qarışa bilərlər...
Bəli, Qazaxstan faciəsindən “dərs almaq” lazımdır. Ən birincisi milli birliyi, vətəndaş həmrəyliyini qorumaq dərsi; ikincisi milləti aclıqla, bahalıqla imtahana çəkməmək dərsi; üçüncüsü oliqarx vəhşiliyi və saymazlığına və ölkənin sərvətinin kənara axmasına yol verməmək dərsi, dördüncüsü, ölkədə qarşılıqlı sayqı, dialoq mühitinin qorunması, siyasi mübarizələrin yalnız Konstitutsiyaya və qanunlara uyğun şəkildə aparılması dərsi , nəhayət, Milli kimliyin təməli olan Ana dilinin qorunması, dilimizin naşıların əliylə elmi don geyindirilərək korlanmasının qarşısını almaq və ölkədə təhsilin birmənalı olaraq dövlət dilinə keçirilməsi dərsi və s.
Sabir Rüstəmxanlı
19.01.2022