18-09-2025, 16:55
Bu il Xocəvəndə 1552 ailə köçürüləcək - Xüsusi nümayəndə
Ağdam, Füzuli və Xocavənd rayonlarında bərpa-quruculuq işləri sürətlə davam edir. Bu yaxınlarda Prezidentin növbəti səfəri zamanı Füzuli rayonunda Qaraxanbəyli kəndinin təməli qoyuldu. Xocavənd rayonunda isə ilk əhali qrupunun köçürülməsinə başlanılıb. Hadrut, Qırmızı Bazar qəsəbələrinin və Sos kəndinin hər birində 10 ailənin ilk bərpa olunmuş yaşayış evlərinə köçü təmin edilib. Bu yaşayış məntəqələrindən başqa, ilin sonunadək Xocavənd rayonuna ətraf kəndlər və Xocavənd şəhəri də daxil olmaqla, ümumilikdə, 1552 ailənin köçürülməsi nəzərdə tutulub. Bu proses gələn il də davam edəcək.
Bunu Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsi Emin Hüseynov Ağdamda jurnalistlərə müsahibəsində deyib.
E.Hüseynov bildirib ki, Ağdam və Füzulidə “Böyük Qayıdış” Proqramında nəzərdə tutulmuş layihələrin icrası qrafikə uyğun davam etdirilir: “Ağdam şəhərinə bu ilin oktyabr-noyabr-dekabr ayılarında ilk köçün reallaşacağını gözləyirik. 2-ci yaşayış kompleksinin tikintisi yekunlaşmaq üzrədir. 4-cü və 5-ci yaşayış komplekslərinin də tikintisinə başlanılıb. Eyni zamanda, sentyabr-oktyabr aylarında 3-cü yaşayış kompleksinin və ilin sonuna doğru 1-ci yaşayış kompleksinin tikintisinə başlanılacaq. Füzuli şəhərində 2-ci yaşayış kompleksində şaquli planlama işlərinə bu ay start verilməsi planlaşdırılır. İlin sonunda isə tikinti işlərinə başlanılacaq. Gələn ilin əvvəllərində 3-cü yaşayış kompleksinin icrasına başlanılması nəzərdə tutulur.
O qeyd edib ki, indiyədək Ağdamın Xıdırlı, Kəngərli və Sarıcalı kəndlərində də yaşayış təmin olunub. Sentyabr ayında Eyvazxanbəyli və Baş Qərvənd kəndlərinin tikintisinə start verilib. Baş Qərvənd kəndinin inşası Slovakiyadan olan mütəxəssislər tərəfindən həyata keçiriləcək. Hər iki kəndin inşasının 2026-cı ilin sonunadək yekunlaşması nəzərdə tutulur.
Füzuli rayonunda Dövlətyarlı kəndinin də tikintisinə başlanılıb. Sentyabr ayında Yal Pirəhmədli kəndinin tikintisinə start veriləcək. Qaraxanbəyli kəndinin tikinti layihəsi də yekunlaşmaq üzrədir. İlin sonunadək onun da tikintisinə başlanılacaq. Beləliklə, Füzulidə 3, Ağdamda isə 5 kənddə tikinti işləri 2026-cı ilin sonunadək tamamlanacaq.
18-09-2025, 16:48
Qeyri-sabit hava bu tarixədək davam edəcək
Növbəti iki gün ərzində Bakıda və rayonlarda leysan yağacağı gözlənilir.
Bu barədə Milli Hidrometeorologiya Xidməti məlumat yayıb.
Bakıda və Abşeron yarımadasında sentyabrın 18-dən 19-na keçən gecə və 19-u axşam, 20-si gün ərzində bəzi yerlərdə fasilələrlə yağış yağacağı gözlənilir. 19-u axşamdan 20-si səhərədək isə yarımadanın ayrı-ayrı yerlərində yağışın qısamüddətli leysan xarakterli olacağı, şimşək çaxacağı ehtimalı var.
Azərbaycanın rayonlarında müşahidə olunan qeyri-sabit hava şəraitinin sentyabrın 21-i axşamadək davam edəcəyi, fasilələrlə yağış yağacağı, şimşək çaxacağı gözlənilir. Ayrı-ayrı yerlərdə yağıntıların leysan xarakterli intensiv və güclü olacağı, dolu düşəcəyi, dağlıq ərazilərdə qara keçəcəyi ehtimal olunur.
Çaylarda sululuğun artacağı, bəzi dağ çaylarından qısamüddətli sel keçəcəyi gözlənilir.
18-09-2025, 16:46
Eyfel qülləsi bağlandı
Parisin əsas turizm obyekti olan Eyfel qülləsi tətillər səbəbindən bu gün ziyarətçilər üçün bağlanıb.
Bu barədə abidənin rəsmi saytında dərc edilmiş bildirişdə deyilir.
"Sentyabrın 18-də ümummilli tətillə əlaqədar olaraq Eyfel qülləsi bağlıdır", - məlumatda qeyd olunur.
Eyni zamanda, qüllənin altındakı meydan ziyarətçilər üçün saat 21:00-dək açıq qalacaq.
18-09-2025, 16:34
Spiker AİPA-nın 46-cı Baş Assambleyasında çıxış etdi
Malayziyanın Kuala Lumpur şəhərində səfərdə olan Milli Məclisin sədri Sahibə Qafarova sentyabrın 18-də Cənub-Şərqi Asiya Dövlətləri Assosiasiyasının Parlamentlərarası Assambleyasının (AİPA) 46-cı Baş Assambleyasının açılış mərasimində iştirak edib.
Bu barədə Milli Məclisin Mətbuat və ictimaiyyətlə əlaqələr şöbəsindən xəbər verilib.
Sahibə Qafarova Baş Assambleyanın plenar iclasında çıxışında deyib ki, parlament diplomatiyasının əhəmiyyətinin artması ilə AİPA artıq parlamentləri bir araya gətirən, daha sıx əməkdaşlıq üçün yeni ideyalar və imkanlar yaradan əhəmiyyətli və uğurlu platformaya çevrilib. 2022-ci ildən Azərbaycan Respublikası Milli Məclisinin AİPA-nın işində müşahidəçi statusunda iştirak etdiyini xatırladan spiker bunun Azərbaycanın Cənub-Şərqi Asiya ölkələri ilə çoxşaxəli əlaqələrini daha da inkişaf etdirmək niyyətini əks etdirdiyini, parlamentlərarası əməkdaşlığın isə bu əlaqələrin mühüm istiqaməti kimi qiymətləndirildiyini söyləyib. Sahibə Qafarova tədbir iştirakçılarının diqqətinə çatdırıb ki, Azərbaycan Prezidenti İlham Əliyevin təşəbbüsü ilə yaradılmış və hazırda Milli Məclisin sədrlik etdiyi Qoşulmama Hərəkatının Parlament Şəbəkəsi 2023-cü ilin mart ayında AİPA ilə Əməkdaşlıq Memorandumu imzalayıb.
Çıxışında Azərbaycanın işğaldan azad olunmuş Qarabağ və Şərqi Zəngəzur regionlarında həyata keçirdiyi nəhəng quruculuq və yenidənqurma işləri haqqında da danışan Milli Məclisin sədri deyib ki, bu ərazilərin dirçəldilməsi Azərbaycan hökumətinin inklüziv inkişafa və dayanıqlılığa yanaşmasının mühüm tərkib hissəsini təşkil edir.
18-09-2025, 16:29
Memar Əcəminin abidəsi ucaldılacaq - SƏRƏNCAM
Prezident İlham Əliyev Naxçıvanda Memar Əcəminin adibəsinin ucaldılması ilə bağlı Sərəncam imzalayıb.
Dövlət başçısnın imzaladığı sənədə əsasən, Naxçıvan Muxtar Respublikasının Nazirlər Kabineti Azərbaycan Respublikasının Mədəniyyət Nazirliyi ilə birlikdə Əcəmi Naxçıvaninin abidəsinin ucaldılması ilə bağlı tədbirlərin həyata keçirilməsini təmin etməlidir.
18-09-2025, 16:24
İlham Əliyev Bp şirkətinin regional prezidentini təltif etdi
BP şirkətinin Azərbaycan, Gürcüstan və Türkiyə üzrə regional prezidenti Counz Robert Qəri "Şöhrət" ordeni ilə təltif edilib.
Prezident İlham Əliyev bununla bağlı Sərəncam imzalayıb.
Sərəncamla o, bu mükafata Azərbaycan neft sənayesinin inkişafında xüsusi xidmətlərinə görə layiq görülüb.
18-09-2025, 16:18
Teymur Rəcəbov "Formula 1" pilotları ilə şahmat oynadı
Azərbaycan şahmatçısı Teymur Rəcəbov Bakıda "Formula 1" pilotları Lyuis Hemilton və Şarl Leklerlə görüşüb.
Təcrübəli qrossmeyster "Ferrari" komandasının üzvləri ilə şahmat da oynayıb.
T.Rəcəbov onlara şahmat təsviri olan xalça hədiyyə edib.
Qeyd edək ki, Azərbaycan Qran-prisi sentyabrın 19-21-i aralığında təşkil olunacaq.
17-09-2025, 21:06
Ərdoğandan dost ölkələrlə bağlı mühüm açıqlama
Ankaranın xarici siyasətində prioritet sabitliyə töhfə vermək, sülhü təmin etmək və qardaşlıq bağlarını möhkəmləndirməkdir. Türkiyə öz ssenarilərini bölgədə həyata keçirir, türk xalqının gücünə arxalanaraq hədəflərinə qətiyyətlə irəliləyir.
Bu sözləri Prezident Rəcəb Tayyib Ərdoğan Ankarada Türkiyə Xarici İşlər Nazirliyinin yeni kompleksinin təməlqoyma mərasimində söyləyib.
Onun sözlərinə görə, Türkiyə dost və qardaş ölkələrə yardım əlini uzadır, onların müdafiə potensialının güclənməsinə dəstək verir, hüquq və maraqlarını müxtəlif platformalarda müdafiə edir.
Prezident Ərdoğan vurğulayıb ki, Ankaranın bəyan etdiyi məqsədlərə çatmaq iradəsinə heç bir qüvvə təsir göstərə bilməz. Dövlət başçısı Xarici İşlər Nazirliyini “Türkiyənin qürur mənbəyi” və “Respublikanın dünyaya açılan pəncərəsi” adlandıraraq onun beynəlxalq arenada ölkəni layiqincə təmsil etdiyini diqqətə çatdırıb.
Ərdoğan diplomatiyanın təsirli mexanizmlərinin əhəmiyyətinə toxunaraq qeyd edib ki, beynəlxalq siyasət getdikcə mürəkkəbləşir. Türkiyənin yerləşdiyi regionda isə münaqişələr və ixtilaflar davam edir: “Türk xalqının maraqları naminə böhranlı vəziyyətləri uğurla tənzimləmək, lazım gəldikdə isə Türkiyənin səsini ucaltmaq çox vacibdir. Ankaranın diplomatik səyləri ziddiyyətlərin həllinə və ölkənin maraqlarının qorunmasına yönəlib”.
Türkiyə Prezidenti əlavə edib ki, ölkəsi “haqq kimdədirsə, güc ondadır” prinsipinə inanır və “güc kimdədirsə, haqq ondadır” yanaşmasına qarşı çıxır.
Prezident Ərdoğan BMT-nin strukturunun islahatına ehtiyac olduğunu da vurğulayıb. Qeyd edib ki, Təhlükəsizlik Şurasının beş daimi üzvünün bütün bəşəriyyətin taleyini həll etməyə haqqı yoxdur.
Rəcəb Tayyib Ərdoğan Ankaranın yerli hərbi müdafiə sənayesinin inkişafına yönəlmiş səylərinə də diqqət çəkib: “Türkiyənin seçdiyi yol güclü dövlətin atdığı addımları əks etdirir. Ankara regionun qanlı toqquşmalar və qeyri-sabitlik zonasına çevrilməsinə imkan verməyəcək”.
Yaxın Şərqdəki vəziyyətə toxunan Prezident Ərdoğan qeyd edib ki, Türkiyə Fələstin–İsrail münaqişəsinin “iki dövlət, iki xalq” prinsipi əsasında həllini dəstəkləyir.
O, həmçinin Xarici İşlər Nazirliyinin yeni binasının əhəmiyyətinə diqqət çəkib: “1988-ci ildə istifadəyə verilmiş mövcud bina nazirliyin artan tələblərinə cavab vermir. Müvəqqəti olaraq bəzi personal paytaxtın digər ərazilərinə köçürülüb. Lakin problemin tam həlli yalnız 6 min nəfərlik müasir XİN kompleksinin istifadəyə verilməsi ilə mümkündür”, – deyə siyasətçi vurğulayıb.
17-09-2025, 20:30
Müəllimlərin nəzərinə!
Müəllimlərin sertifikatlaşdırılması prosesinin müsahibə mərhələsinin keçiriləcəyi tarix və məkan barədə məlumatlar müəllimlərin şəxsi kabinetlərinə göndərilib.
Bu barədə Təhsil İnstitutunun nəzdində İnsan Resursları Mərkəzindən bildirilib.
Qeyd edilib ki, müəllimlər portal.edu.az platformasında yerləşən "Sertifikatlaşdırma" bölməsinə daxil olmaqla müsahibə məlumatları ilə tanış ola bilərlər.
Vurğulanıb ki, müsahibə mərhələsi barədə məlumatlar müəllimlərin şəxsi kabinetlərinə hissə-hissə göndərilir.
Xatırladaq ki, test imtahanlarında keçid balını toplayan şəxslərin əməkhaqqına 10 %, 51 bal və daha yüksək nəticə əldə etmiş şəxslərin əməkhaqqına isə 35 % əlavə veriləcək. Əlavələr müsahibə mərhələsində uğur qazanan müəllimlərin əməkhaqqına tətbiq olunacaq.
17-09-2025, 19:42
"Green card"da iştirak ödənişli oldu
ABŞ Dövlət Departamenti insanların ölkədə daimi yaşayış icazəsi - "qrin kart" ("green card") əldə etməsinə imkan verən illik lotereya üçün 1 dollarlıq qeydiyyat rüsumunun tətbiqini təklif edib.
Bu barədə ABŞ Federal Reyestri məlumat yayıb.
Qeyd olunur ki, bu addım lotereyada iştirak edən hər kəsin üzərinə bərabər maliyyə yükünün düşməsini təmin etmək məqsədi daşıyır.
Yeni qayda oktyabrın əvvəlində başlayacaq proqram mövsümündən əvvəl qüvvəyə minəcək (Dəqiq tarixlər daha sonra açıqlanacaq).
Seçilmiş namizədlər üçün nəzərdə tutulan 330 dollar rüsum isə dəyişməz qalır.
Qeyd edək ki, 1990-cı ildən tətbiq edilən proqram çərçivəsində hər il 50 min nəfərə təsadüfi seçim əsasında ABŞ-də daimi yaşayış icazəsi - "qrin-kart" verilir. Əvvəllər lotereyada iştirak tamamilə pulsuz idi.
2023-cü ildə "qrin-kart" qazanmaq üçün 22.1 milyon nəfər müraciət edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!