O, ayağının üstündə yatırdığı körpəsinə cənnəti bəxş edən əvəzsiz varlıqdır. O, məhəbbəti qarşılıqsız olan tək sevgilidir. Ona ithaf edilən saysız şeirlər, bəstələr məhz ünvanının böyüklüyündən xəbər verir. Bu gün mənim üçün ən müqəddəs varlıq olan o şəxsin - anamın doğum günüdür. Mənə görə bayramların ən gözəli onun dünyaya göz açdığı gündür.

Anamla bağlı uşaqlıqdan ən çox yadımda qalan bir nüansı tez-tez xatırlayıram. Mağazada gördüyüm sarı rəngli bir paltarı həmin gün almadığı üçün ona bir az haqsızlıq edib, səhərə qədər öz otağımda sakitcə ağlamışdım. Görünür, ağladığımdan xəbər tutub, səhər mən oyanmadan paltarı alıb, başımın üstündən asmışdı. Mənim isə o əlbisədən başqa düşündüyüm nəsə yox idi. Həmin dəqiqə geyinib sevincək olmuşdum. Amma o paltarı ya maddi, ya mənəvi çətinlik çəkərək alıbmı, deyə düşünməmişdim. İndi hadisələrə bu günki baxışımla nəzər edəndə çox utanıram. Onun mərhəmət dolu qəlbinə acı sözlər və etdiyim nadincliklərlə toxunduğumu yaxşı dərk edirəm. Əslində bu günə qədər həmin hadisədən peşmançılıq çəkdiyimi ona deməmişdim. Bəlkə də sonsuz məhəbbətinin bütün səhvlərimdən keçməyə qadir olduğunu bilirdim. Mən o məhəbbətə bütün həyatımı borcluyam. Hər nə qədər şablon olsa da bu ömrümün axırına qədər qaytara bilməyəcəyim bir borcdur.

Bəlkə bu sətirləri oxuyanda ağlayacaqsan, amma bəzi şeyləri ancaq bu cür dilə gətirə bilərdim. Həm də nə vaxtsa qələmindən mənə pay düşmədi deməməyin üçün ömrümü həsr etdiyim varlığına bu dəfə cümlələri həsr etdim.

Mənə heç vaxt başqa analara baxıb "kaş ki..." dedirtmədiyin üçün sənə minnətdaram.
Özüm kiməsə dayaq olanda belə sənin isti nəfəsinə hər zaman ehtiyacım olacaq. Hər zaman yanımızda olman diləyilə ad günün mübarək, Anam!..

Günel Abbas