11-01-2022, 11:36
Türkiyə Prezident Rəcəb Tayyib Ərdoğan Türkiyə Energetika və Təbii Sərvətlər Nazirliyi ilə Azərbaycan Respublikası Energetika Nazirliyi arasında təbii qazın tədarükünə dair anlaşma memorandumunu təsdiq edib.
Bununla bağlı “Resmi Gazete” məlumat yayıb.
Qeyd edək ki, sənəd 2021-ci ilin dekabrın 22-də Bakı şəhərində imzalanıb.
Mənbə: Resmigazete.gov.tr
Bütöv.az
11-01-2022, 10:09
“Bizimlə olmayan bizə qarşıdır” ifadəsi müxtəlif zamanlarda Rusiya və ABŞ hakimiyyətləri tərəfindən neytral mövqe sərgiləyən dövlətlərə qarşı təhdid kimi səsləndirilib.
Bu barədə “Caliber” layihəsinin “YouTube” kanalında yayımlanan yeni süjetdə məlumat verilir.
“Neytrallıq yalnız dünya nəhənglərinin pullarını özündə saxlayan İsveçrə üçün keçərlidir. Digər dövlətlər ya ABŞ, ya da Rusiyanın yanında qərar tutmalıdır. Bu, xüsusilə də post-sovet məkanındakı ölkələrə aiddir”, - deyə süjetdə bildirlir.
Daha ətraflı “Caliber”in yeni videomaterialında:
Bütöv.az
10-01-2022, 21:06
Keçmiş deputat Cəlal Əliyevin jurnalistlərə qarşı çoxsaylı məhkəmə çəkişmələrində vəkili olmuş Sümbülə Əliyeva yarım ildən çoxdur ki, mühakimə olunur. Ondan şikayətçi olanlar isə elə özünün keçmiş işçiləridir. O, vaxtilə rəhbərlik etdiyi 1 saylı Hüquq Məsləhətxanasında (indiki "Mərkəz" vəkil bürosu) fəaliyyət göstərən vəkillərin ümumilikdə təxminən 200 min manat pulunu mənimsəməkdə suçlanır. Söhbət vəkillərin müştərilərlə müqavilələrdən əldə etdikləri vəsaitlərin yeyintisindən gedir.
Sözügedən vəkillər şahid qismində tanınsalar da, onlar bundan narazıdır. Deyirlər ki, prokurorluq istintaqı düzgün aparmayıb, əslində, onlar zərərçəkmiş kimi tanınmalıydılar.
"O pul elə belə qazanılmayıb"
Vəkil Mehman Abbasov deyir ki, Əliyevanın rəhbərliyi dövründə onun kassada toplanmış təxminən 19 min manata yaxın vəsaiti mənimsənilib. Onun sözlərinə görə, bu vəsaitin bir hissəsini vergi, sosial sığorta və başqa xərclərə çıxsa belə, özünə çatası, azı, 12 min manatlıq yeyinti var: "Mənim pulumu versin, o pul elə belə qazanılmayıb. Hər işə görə nə qədər əziyyət çəkirik. Biz əziyyət çəkmişik ki, bu da pullarımızı yığıb Britaniyaya göndərsin?".
Təqsirləndirilən Əliyevanın qızının Böyük Britaniyada təhsil aldığı bildirilir. Məhkəmədə şahidin Böyük Britaniya haqda dedikləri onunla Əliyeva arasında mübahisəyə səbəb olub.
Abbasov vurğulayıb ki, hər dəfə hüquq məsləhətxanasının xəzinəsindən özünə çatası vəsaiti almaq istəyəndə məsləhətxananın rəhbəri bir bəhanə ilə imkan vermirdi: "Gah deyirdi ki, mühasib yoxdur, gah deyirdi ki, bankda problem var...".
"İttiham son üç ilə görə verilib"
Əliyevadan şikayətçi olanlardan biri də vəkil Məzahir Şahmarovdur. Ona 16 min manat ziyan vurulduğunu deyən vəkil zərərçəkmiş qismində tanınmamasından narazıdır. O hesab edir ki, məhkəmə bu işi təkrar araşdırma üçün istintaqa qaytarmalıydı: "Mənimsəmə faktları 2013-2019 illəri əhatə edir, amma ittiham son üç ilə görə verilib. Bu əməllər qrup şəklində həyata keçirilib".
Şahmarov vurğulayıb ki, zərərçəkmiş kimi tanınması və bu işdəki başqa pozuntularla əlaqədar müxtəlif dövlət orqanlarına şikayətlər edib, hələlik, nəticə yoxdur.
"Özüm özümdən oğurluq eləmişəm?"
Əliyeva isə özünü təqsirli bilmir. Deyir ki, ona qarşı irəli sürülən ittihamların heç bir əsası yoxdur: "İttihamda yazılanlar yalandır. Mən vəkiləm, terrorçu deyiləm. Bir neçə ölkədə Vəkillər Kollegiyasını təmsil etmişəm. Hazırda mənim vəkillik fəaliyyətimin üstündən qara xətt çəkilib".
İstintaqdan gileylənən Əliyeva bildirib ki, heç bir vəsatəti təmin olunmayıb. Təqsirləndirilən şəxsin sözlərinə görə, indi ondan şikayətçi olan Şahmarov özü ona xəsarət yetirib.
"Mən burada çox şeyi demək istəmirəm. Məqsədim işin ədalətli aparılmasıdır. Necə ola bilər bu - mən özüm özümdən oğurluq eləmişəm? Bir daha deyirəm, mən bu işi eləməmişəm. Ədalətə inanıram...", – Əliyevanın sözləridir.
Əliyeva kimdir
Əliyevanın işiylə bağlı məhkəmə araşdırmaları davam edir. O, CM-in 179.3.2 (külli miqdarda mənimsəmə) ilə yanaşı, 213-cü (vergiləri, məcburi dövlət sosial sığorta haqlarını ödəməkdən yayınma) maddəsi ilə də ittiham olunur. Cinayət işinin materiallarında yazılıb ki, vəkillər vergi və sosial sığorta haqlarını hüquq məsləhətxanasına ödəsələr də, həmin vəsaitlər təyinatı üzrə köçürülməyib. Ona görə Dövlət Vergi Xidməti və Dövlət Sosial Sığorta Fondu bu cinayət işi üzrə zərərçəkmiş qismində tanınıb. Əliyevaya qarşı ittiham maddələrində 10 ilə qədər azadlıqdan məhrumetmə cəzası nəzərdə tutulub.
Əliyeva hüquq məsləhətxanasının rəhbəri olmaqdan əlavə, həm də uzun müddət Vəkillər Kollegiyası Rəyasət Heyətinin üzvü olub. O, ictimai-siyasi fəalların hüquqlarını müdafiə edən bir sıra vəkillərin fəaliyyətinin dayandırılması üçün səs verənlərdən biri olmuşdu. Onların arasında Yalçın İmanov, Əlayif Həsənov və digərləri var.
Prezident İlham Əliyevin mərhum deputat əmisi Cəlal Əliyevin vəkili kimi, Sümbülə Əliyevanın çıxdığı bir neçə məhkəmə işində jurnalistlər ya cərimələnib, yaxud da həbs edilib. "Müxalifət" qəzetinin baş redaktoru Rövşən Kəbirli və qəzetin əməkdaşı Yaşar Ağazadə də sözügedən məhkəmələrin yekununda prezidentin əmisi haqda yazılarına görə həbs olunanlar sırasındadır.
(AzadlıqRadiosu)
Bütöv.az
10-01-2022, 20:44
Azərbaycan Respublikasının Prezidenti İlham Əliyev yanvarın 10-da Koreya Respublikasının ölkəmizdə yeni təyin olunmuş fövqəladə və səlahiyyətli səfiri Li İn-Yonqun etimadnaməsini qəbul edib.
Bütöv.az xəbər verir ki, səfir Li İn-Yonq etimadnaməsini Prezident İlham Əliyevə təqdim edib.
Sonra Azərbaycan Prezidenti İlham Əliyev səfirlə söhbət edib.
Prezident İlham Əliyev ölkələrimiz arasında əlaqələrin möhkəm təməllər üzərində qurulduğunu bildirərək, müstəqillik illərində münasibətlərimizin çox uğurla inkişaf etdiyini vurğulayıb. Dövlətimizin başçısı Azərbaycanla Koreya Respublikası arasında uzun illər müxtəlif sahələrdə fəal əməkdaşlığın həyata keçirildiyini bildirib, siyasi əlaqələrin inkişafından məmnunluğunu ifadə edib. Bu baxımdan Koreyanın yüksək səviyyəli rəsmilərinin Azərbaycana səfərlərinin münasibətlərimizin inkişafına töhfə verdiyini bildirib. Prezident İlham Əliyev iqtisadi sahədə əməkdaşlığa toxunaraq, Koreyanın bir çox şirkətinin ölkəmizdə müxtəlif sahələrdə, o cümlədən infrasktrur və inşaat layihələrində uğurla iştirak etdiklərini vurğulayıb. Dövlətimizin başçısı birgə investisiya sahələrinin, ixrac-idxal əməliyyatlarının artırılmasının, insanlar arasında təmasların genişlənmədirilməsinin əhəmiyyətinə toxunub. Prezident İlham Əliyev əlaqələrimizin bundan sonra da inkişaf edəcəyinə əminliyini ifadə edib.
Səfir Li İn-Yonq son 30 il ərzində Azərbaycan Respublikası ilə Koreya Respublikası arasında əlaqələrin inkişaf etdiyini vurğluyaraq, iqtisadi əməkdaşlığın və insanlar arasında əlaqələrin ölkələrimizin potensialına uyğun olaraq daha da möhkəmləndirilməsinin vacibliyini bildirib və səfir fəaliyyəti dövründə bu istiqamətdə səylərini əsirgəməyəcini qeyd edib.
Görüşdə Azərbaycanın işğaldan azad olunmuş ərazilərində həyata keçirilən bərpa və yenidənqurma işlərində Koreya şirkətlərinin mümkün iştirakı ilə bağlı fikir mübadiləsi aparılıb.
10-01-2022, 11:43
Döyüş hazırlığı planına əsasən, Quru Qoşunlarının Əməliyyat (Komando) hərbi hissəsində 2022-ci tədris ilinin ilk təlim-məşqləri keçirilib.
Bu barədə Müdafiə Nazirliyi məlumat yayıb.
Bildirilib ki, plana uyğun olaraq kəşfiyyat məlumatı əsasında şərti düşmənin diversiya qrupunun təxribat törədəcəyi ehtimal olunan ərazi müəyyən edilib. Şəxsi heyət mümkün təxribatların qarşısını almaq məqsədilə daimi dislokasiya məntəqəsini tərk edərək əməliyyat rayonu istiqamətində irəliləyib.
Komandolar tərəfindən şərti düşmənin təxribat-diversiya qrupunun mühasirəyə alınaraq zərərsizləşdirilməsi və tapşırıqların icrası zamanı saxlanılan şəxslərlə bağlı beynəlxalq humanitar hüquq norma və prinsipləri çərçivəsində tədbirlərin görülməsi üzrə fəaliyyətlər icra olunub.
Şəxsi heyətin çətin iqlim şəraitində və kəskin relyefli ərazilərdə taktiki vərdişlərinin təkmilləşdirilməsi, həmçinin komando bölmələrinin döyüş qabiliyyətinin daha da yüksəldilməsi məqsədilə keçirilən təlimlərdə qarşıya qoyulan tapşırıqlar müvəffəqiyyətlə yerinə yetirilib.
Bütöv.az
7-01-2022, 15:09
Azərbaycanın sabiq prezidenti Ayaz Mütəllibov nitq qabiliyyətini itirib.
Bütöv.az modern.az-a istinadən xəbər verir ki, uzun müddətdir səhhətində problem yaşayan siyasətçinin adından mətbuata verilən açıqlamalar köməkçisi tərəfindən hazırlanır.
Bildirilir ki, 84 yaşlı A.Mütəllibov dəfələrlə edilən zənglərə belə, cavab vermək iqtidarında deyil.
7-01-2022, 10:42
Xəbər verdiyimiz kimi, özünü FHN polkovniki kimi təqdim edərək Türkiyədə Marmaris Bələdiyyəsinin sədri Mehmet Oktayla görüşən Rasim Əhmədli ötən ilin noyabrından beynəlxalq axtarışa verilib.
“Qafqazinfo”nun məlumatına görə, özünü ötən il Türkiyədə baş vermiş yanğınların söndürülməsində böyük şücaət göstərmiş kimi qələmə verən Rasimin qardaş ölkədə daha bir məmuru aldatdığı üzə çıxıb.
Belə ki, əvvəllər Cinayət Məcəlləsinin 178 (dələduzluq), 221 (Xuliqanlıq) 29.120 (qəsdən adam öldürməyə cəhd) maddələri ilə məhkum olunmuş Rasim Əhmədli, ötən ilin avqust ayında Bursa Böyükşəhər Bələdiyyəsinin başqanı Alinur Aktaşla görüşüb və özünü yenə FHN-in polkovniki kimi təqdim edərək, ona hədiyyə də verib. Axtarışda olan Rasim, bələdiyyənin kanalına müsahibəsində yanğınların söndürülməsi zamanı dronları idarə etdiyini bildirərək yalan danışıb.
Bu arada DİN Mətbuat xidmətinin şöbə rəisi, polis mayoru Elşad Hacıyev Rasimin əməlləri ilə bağlı maraqlı şərhi ilə diqqət çəkib.
“Ona kim salam veribsə, aldadıb. Kim inanıbsa, zərər çəkib. Dələduzlara xas olan bütün ritual qaydalara da ciddi əməl edib” - deyə qurum rəsmisi bildirib.
Qeyd edək ki, FHN də həmin şəxsin nazirlikdə işləmədiyini açıqlayıb.
Bütöv.az
6-01-2022, 21:09
Rusiyanın Dövlət Dumasının Təhlükəsizlik və korrupsiyaya qarşı mübarizə komitəsinin üzvü Sultan Həmzəyev Qazaxıstanı Rusiya Federasiyasına birləşdirməyə çağırıb.
Bütöv.az xəbər verir ki, deputat bu barədə öz feysbuk hesabında yazıb.
Onun sözlərinə görə, Rusiya Qazaxıstanın tarixi vətənidir.
Millət vəkili vurğulayıb ki, bu məsələnin müzakirəsini referenduma çıxarmaq lazımdır.
S.Həmzəyev, həmçinin, Mərkəzi Asiyanı “Rusiya torpağı” adlandıraraq bildirib ki, sosial şəbəkələrdə artıq Qazaxıstanın Rusiyaya mümkün ilhaqı müzakirə edilir.
O, öz fikirlərinə bəraət qazandırmaq məqsədilə Qazaxıstan Prezidenti Kasım-Jomart Tokayevin rus dilində danışdığını bildirib.
Millət vəkilinin bu açıqlamaları birmənalı qarşılanmayıb və sosial şəbəkələrdə kəskin tənqid olunub. İnsanlar onu başqa ölkənin işinə qarışmamağa çağırıb.
6-01-2022, 15:04
Sanki kimsə bizim topluma “Sizi ağsaqqalsız qalasınız”, deyə qarğış edib. Həmin qarğış da deyəsən babatca tutub. Əgər belə olmasaydı, Eldar Quliyev kimi “dahi ictimai xadim” Azərbaycan Ağsaqqallar Şurasının sədri olmazdı...
“Vətəndaşlar bəzən lazım olmadığı halda 2-3 çörək alır, amma istifadə etmirlər. Yəqin ki, hər kəs şahidi olub: səhərlər qapılardan yarım və yaxud da bütöv dünəndən, srağagündən qalmış çörək qurusu asılır. Yəni ehtiyac olan qədər çörək almaq lazımdır, israfçılıqdan qaçmalıyıq. Dünya o dünya deyil, sudan da ehtiyatla istifadə edilməlidir. Atmosfer dəyişir, kənd təsərrüfatı həm də iqlimdən, təbiətdən asılıdır. Ona görə də təbiəti qorumaq, ehtiyatlı istifadəyə meyillənmək lazımdır. Gəlin çörəkdən, qidadan artıq alıb sonra xarab olduğu üçün heyvanlara verməyək”.
Bu deyilənlərdə həqiqət payı var. Ancaq görəsən, Eldar Quliyev nədən bu məsləhətini un, çörək bahalaşmadan öncə vermirdi?...
Bəlkə də bunu özü ortabab dolanan, tez-tez üzdə də olsa camaatın halına yanan, kasıb-kusubu müdafiə edən, xalqın sayıb-seçdiyi birisi çıxıb desəydi, camaatda bu qədər kəskin reaksiya, qəzəb doğurmazdı. Ancaq bu “məsləhəti” “bir əli yağda, bir əli balda” yaşayan, 5 dəfə(!) deputat “seçilən”, eyni zamanda da Azərbaycan Kooperasiya Universiteti başda olmaqla, xeyli “obyektin”, mülklərin, var-dövlətin sahibi olan, özü uzun illərdir bəlkə də “zavod çörəyi”ni bəyənmədiyindən yaxına da buraxmayan, onun qiymətini belə bilməyən birisi verəndə, kasıb əhalinin bunu ağsaqqal məsləhəti yox, az qala söyüş kimi qəbul etməsi təbiidir...
Xatırladaq ki, Azərbaycan ağsaqqallarının rəsmi “lideri” olan bu şəxs dördcə ay əvvəl benzin bahalaşanda da öz “ağsaqqal məsləhəti”ni xalqdan əsirgəməmişdi: "Şanlı Azərbaycan kifayət qədər iqtisadi gücə malikdir, amma bizim ABŞ-da olduğu qədər milyardlarımız yoxdur. Nəzərə almaq lazımdır ki, 15 qəpiklə heç kim kasıblamaz..."
Məntiqlə indi də durub deməliydi ki, “unun kisəsi 10 manat, çörək isə 15 qəpik bahalaşmaqla, kimsə kasıblamaz”.
Ancaq görünür, keçən dəfəki “şedevr” fikrindən sonra ünvanına yağan “minnətdarlıq mesajları” bu dəfə onu bir qədər fərqli danışmağa vadar edib...
Onu da qeyd edək ki, son fikirlərilə xalqı təkcə israfçılıqda yox, həm də acgözlükdə, görməmişlikdə günahlandırmış olan bu şəxsin açıqlamaları erməni mətbuatında da tirajlanmaqda, ələ salınmaqdadır. Özünü də lağ obyektinə çevirib, bizi də - düşmən sevindirən “el ağsaqqalı”!...
Xatırladaq ki, elə də uzaq olmayan keçmişdə Fransa fahişəxanasındakı qadınla söhbətlərindən sitat gətirməsilə tanınan həmin bu deputatımız(!) həm də iqtisad elmləri doktoru və professordur. Və Norveç Nobel Komitəsinin böyük haqsızlıq edərək unutduğu və hələ də ödülləndirmədiyi bu “misilsiz” iqtisadçı-alimin az qala unun qiymətinin qalxmasını əhalinin "çörək israfçılığı", vəziyyətdən çıxış yolunu isə çörəyə qənaətdə görməsi də başqa bir aləmdir...
Söhbət Fransadan düşmüşkən, orta əsrlərdə xalqdan, onun dolanışığından, real həyatından uzaq düşmüş Fransa kraliçası Mariya Antuanetta ilə bağlı bir rəvayət var. Ona xalqın yeməyə çörək tapmadığını deyəndə, “Çörək tapa bilmirlərsə, tort yesinlər” deyibmiş.
Eldar Quliyev kimi kefinə kef çatmayanların kasıb camaata çörəklə bağlı məsləhət verməsi də buna bənzəyir.
Doğrudur, Mariya Antuanetta ağbirçək yaşına çatmamış həyatla vidalaşmalı olmuşdu, onu edam etmişdilər. Ancaq yaradanın bizə “lütfüdür” ki, Eldar müəllim kimi ağsaqqalımız yaşayır, yaşayacaq və öz “ağsaqqal məsləhətləri”ni hələ uzun müddət bizdən əsirgəməyəcək...
(“AzPolitika.info”)
Bütöv.az
6-01-2022, 10:58
Bakı Hərbi Məhkəməsində 2015-ci ildə ləğv edilmiş Milli Təhlükəsizlik Nazirliyi (MTN) İstintaq Baş İdarəsinin rəisi Mövlam Şıxəliyev, istintaq idarəsinin rəis müavini, 1-ci şöbənin rəisi Yasin Məmmədov, istintaq idarəsinin 2-ci şöbənin rəisi, polkovnik Vüsal Ələkbərov və istintaq idarəsinin metodiki yardım və kriminalistika şöbəsinin rəis müavini Sahib Ələkbərovun cinayət işi üzrə proses davam edir.
İş üzrə Baş Prokurorluğun İstintaq İdarəsində 5 ilə yaxın istintaq aparılıb, 32 zərərçəkən müəyyən olunub, dünyasını dəyişən 4 zərərçəkənin hüquqi varisi müəyyən olunaraq tanınıb.
İttiham aktına görə istintaq zamanı 36 zərərçəkənə 20 milyon manatdan artıq ziyan vurulduğu təsbit olunub. 4 təqsirləndirilən şəxsdən ikisinin - Mövlam Şıxəliyevlə Yasin Məmmədovun əmlaklarının üzərinə həbs qoyulub.
İstintaqın digər 2 təqsirləndirilən şəxsin əmlaklarının üzərinə həbs qoymamasının səbəbi bilinmir.
Mövlam Şıxəliyevin 7 milyon 738 minlik, Yasin Məmmədovun 278 minlik əmlakına həbs qoyulub
Mövlam Şıxəliyevin ümumi dəyəri 7 milyon 738 min 170 manatlıq, Yasin Məmmədovun isə 278 min 600 manatlıq əmlakları xüsusi müsadirəyə təklif olunub.
Bəs zərərçəkənlərə 12 milyon manat hansı mənbədən ödəniləcək?
Bu o deməkdir ki, zərərçəkənlərə dəyən ziyanın 12 milyonluq hissəsinin hansı mənbədən ödənəcəyi aydın deyil. Bu baxımdan zərərçəkənlərin təqsirləndirilən şəxslərin əmlaklarının tam olaraq müəyyənləşdirilməsi tələbləri haqlı görünür. Onlar xüsusilə Mövlam Şıxəliyevin əmlaklarının müəyyən olunmasına çalışır, müstəqil şəkildə araşdırma aparırlar.
Zərərçəkənlər araşdırma apardı, Mövlam Şıxəliyevin gizli qalan əmlaklarının siyahısını hazırladılar
Həbsdəki general Türkiyədəki və Dubaydakı biznesini zərərçəkənlərə bağışlayır FOTO VİDEO - Istiqamet
Bütöv.az-ın məlumatına görə, zərərçəkənlərdən Hüseyn Səfərov “Yeni Müsavat”a deyib ki, artıq bu istiqamətdə atdıqları addımların nəticəsi var.
Hüseyn Səfərov digər zərərçəkənlərlə bərabər bir çox ünvanlarda Mövlam Şıxəliyevin əmlaklarını müəyyən etdiklərini deyib.
O bildirib ki, istintaq onlara vurulan ziyanı ödəmək üçün tədbir görməlidir: “Bu gün Mövlam Şixəliyevin ailəsi 3 nəfərdən ibarətdir. Özü də, ailə üzvləri də Ağdaşda anadan olublar. Gəlin baxaq, bu adamın özünün, arvadının, oğlunun, qızının adına nələr var və nə vaxt alıblar? Eldar Mahmudov vəzifəyə gələndən sonra Mövlam Şıxəliyevi də özü ilə MTN-ə gətirdi. Bundan sonra Mövlam Şıxəliyev oldu böyük bir əmlak sahibi. MTN biznes strukturu idi? Mövlam Şıxəliyev adlı biznesmen tanıyan var bu ölkədə? Aybəniz Knyaz qızı Şıxəliyeva adlı biznesmen qadını necə, tanıyan var?
Hələ bu harasıdır?
Samirə, Elgün Şıxəliyevləri iş adamı, sahibkar kimi tanıyan neçə nəfər var bu ölkədə?
Yoxdur, ola da bilməz. Çünki bütün əmlaklar mənim kimi iş adamlarının talanmasından əldə olunan gəlirlər hesabına əldə edilib. İstintaq isə əmlakların müəyyən edilməsinə başdansovdu yanaşıb. Deyirəm, qoy hamı da bilsin! Araşdırsınlar, biz zərərçəkənlərin zərərini ödəyəcək qədər əmlakları var bunların, ortaya çıxarsınlar. Mövlam Şıxəliyev rayonda bazarda “uçastkovı” işləyib. Bakıdakı bazarda işləsəydi belə, o qədər var-dövlət yığa bilməzdi. Bir “uçastkovı” göstərin ki, bunun sərvəti qədər sərvəti olsun! Bunun biznesinin sorağı Dubaydan, Praqadan, Türkiyədən gəlir. Bakının göbəyində, “Tarqovı”da hara baxırsan bunun evi, bunun obyektləridir.
Özü, Mövlam Məmmədismayıl oğlu Şıxəliyev 7 oktyabr 1958-ci ildə Ağdaşda anadan olub. 2004-cü ildə baş quldur Eldar Mahmudov vəzifəyə gələndə bunu da yedəyində MTN-ə gətirib. 2008-ci ilin martında da MTN-in İstintaq Baş İdarəsinə rəis təyin edib. Elə həmin ilin sentyabrında artıq Vüsal Ələkbərovla əlbir olub sahibkarlara hücuma keçiblər. Haradan başlayıblar? Əlbəttə ki, banklardan! Başlayıblar “Texnikabank”dan, konkret olaraq Bakı filialından. Filialda kimin əmanəti vardısa, onun, ailə üzvlərinin başına oyun açdılar, pullarını da aldılar, filialdakı əmanətlərindən də imtinaya imza atdırıb ələ keçirdilər.
Belə hərəkətləri bir deyil, iki deyil.
Onun adına olan əmlaklar bunlardır:
Səbayel rayonu, Nizami küçəsi, ev 78 ünvanında yerləşən qeyri-yaşayış sahəsi;
Səbayel rayonu, Bülbül prospekti, ev 7, mənzil 39 ünvanında yerləşən 198.1 kv.m sahəsi olan daşınmaz əmlak;
Səbayel rayonu, Bülbül prospekti, ev 7 ünvanında yerləşən 35 kv.m sahəsi olan zirzəmi;
Nizami rayonu, Qara Qarayev prospekti, 39 a ünvanında yerləşən daşınmaz əmlak;
Nəsimi rayonu, Nizami küçəsi, ev 78, mənzil 6 ünvanında yerləşən daşınmaz əmlak;
Binəqədi rayonu, 7-ci mikrorayon, ev 9/25, mənzil 63 ünvanında yerləşən daşınmaz əmlak;
Binəqədi rayonu, Goradil kəndi, 690 a ünvanında yerləşən daşınmaz əmlak;
İsmayıllı rayonu, İstisu kəndində yerləşən daşınmaz əmlak.
Onun arvadı Aybəniz Knyaz qızı Şıxəliyeva da 7 oktyabr 1961-ci ildə Ağdaşda anadan olub.
Onun adına olan əmlaklar bunlardır:
Ağdaş şəhəri, 20 Yanvar küçəsi, ev 7 a ünvanında yerləşən 74,97 kv.m sahəsi olan daşınmaz əmlak;
Ağdaş şəhəri, H.Hacıyev küçəsi, ev 26 ünvanında yerləşən 197 kv.m əmlak;
Bakı şəhəri, Binəqədi rayonu, Novxanı kəndi, 686 k ünvanında yerləşən daşınmaz əmlak;
Nəsimi rayonu, Nizami küçəsi, ev 93, mənzil 21 ünvanında yerləşən daşınmaz əmlak;
Nərimanov rayonu, M.Əlizadə küçəsi, ev 134 a ünvanında yerləşən 403.3 kv.m sahəsi olan daşınmaz əmlak;
Səbayel rayonu, Bülbül prospekti, ev 7, mənzil 10 ünvanında yerləşən 137.7 kv.m sahəsi olan daşınmaz əmlak;
Bakı şəhəri, Səbayel rayonu, Bülbül prospekti, ev 7, mənzil 40 ünvanında yerləşən 137.7 kv.m sahəsi olan daşınmaz əmlak;
Onun qızı, Samirə Şıxəliyeva (Əliyeva) da 1 yanvar 1986-cı ildə Ağdaşda anadan olub.
Onun adına olan əmlaklar bunlardır:
Bakı şəhəri, Səbayel rayonu, Bülbül prospekti, ev 7, mənzil 72 ünvanında yerləşən 167.3 kv.m sahəsi olan daşınmaz əmlak;
Bakı şəhəri, Binəqədi rayonu, Novxanı kəndi, 686 ünvanında yerləşən 214.3 kv.m sahəsi olan daşınmaz əmlak;
Bakı şəhəri, Binəqədi rayonu, Novxanı kəndi, 685 V ünvanında yerləşən 1087.7 kv. m sahəsi olan daşınmaz əmlak;
Onun oğlu Elgün Mövlam oğlu Şıxəliyev də 9 may 1984-cü ildə Ağdaşda anadan olub.
Onun adına olan əmlaklar bunlardır:
Bakı şəhəri, Səbayel rayonu, Nizami küçəsi, ev 96, mənzil 37 ünvanında yerləşən daşınmaz əmlak;
Bakı şəhəri, Səbayel rayonu, Bülbül prospekti, ev 7 ünvanında yerləşən daşınmaz əmlak.
“Sahil” metrosunun üstündəki dəbdəbəli binada istintaqın diqqətindən yayınan hansı əmlaklar olub?
Biz zərərçəkənlər “Sahil” metrosunun üstündəki dəbdəbəli binada istintaqın diqqətindən yayınan 2 obyekti, 3 mənzilini ortaya çıxarmışıq. Novxanıda 2 imarətini, “Torqovı”da obyektlərini, mənzillərini də müəyyən etmişik. Bakıdakı məşhur “Praqa” restoranı, onun altındakı market də bunundur. Metronun “Qara Qarayev”, “Neftçilər”, “Xalqlar Dostluğu” stansiyalarının ətrafında bunun mebel mağazaları şəbəkəsi var. Hamısı da bacısı oğlunun adına “oformit” eləyib.
Bu hələ tam siyahı deyil. Onun rayonlarda, ölkənin xaricində də xeyli əmlakları var və bizlər araşdırma aparırıq. Mövlam Şıxəliyev biz zərərçəkənlərə vurduğu maddi və mənəvi ziyanı axırıncı qəpiyinə qədər ödəməlidir. Bu işdə bizlər Azərbaycan dövlətinə arxalanırıq, istəyimiz də budur ki, baş prokuror Kamran Əliyev bizlərə qarşı baş verən cinayətlərin tam olaraq araşdırılmasına maraqlı olsun. Cinayəti və cinayətkarları məsuliyyətdən kənar qoymasınlar. Nəhayət ki, haqq-ədalət bərqərar olmalıdır”.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!