Əmək və Əhalinin Sosial Müdafiəsi Nazirliyi 25 xəstə uşağı valideynlərindən birinin müşaiyəti ilə Türkiyə Respublikasına ixtisaslaşmış bərpa müalicəsinə göndərib.
Nazirliyin İctimaiyyətlə əlaqələr şöbəsinin məlumata görə, “Cari ilin aprel ayının əvvəlindən bəri ƏƏSMN tərəfindən 115 nəfərdən çox əlilliyi olan şəxsin və hazırda göndərilən qrup da daxil olmaqla 50 nəfər sağlamlıq imkanları məhdud uşağın Türkiyəyə, Nobel Tibb Mərkəzinə göndərilməsi təmin olunub.
Göndərilən şəxslər həmin mərkəzdə 5 ulduz oteldə yerləşdirilir və Dənizli bölgəsinin müalicəvi təbii potensialından geniş istifadə olunmaqla onlar səmərəli fizioterapevtik müalicə prosedurlarına cəlb edilirlər. Nazirliyin bir nəfər həkim əməkdaşı da qardaş ölkəyə ezam olunur ki, göndərilən əlilliyi olan şəxslərə və sağlamlıq imkanları məhdud uşaqlara orada göstərilən xidmətin təşkilinə nəzarət etsin, eyni zamanda mərkəzin reabilitasiya təcrübəsini öyrənsin. Nobel Tibb Mərkəzində bərpa-müalicə kursunu başa vuraraq geri dönən insanlar orada aparılan müalicə işlərinin səhhətlərində müsbət dəyişikliklər yaratdığını bildirirlər”.
Sağlamlıq imkanları məhdud uşaqların valideynləri övladlarının tibbi-sosial reabilitasiyası, o cümlədən xaricdə ixtisaslaşmış bərpa-müalicəsinin təşkil olunması istiqamətində aparılan məqsədyönlü işlərə görə Azərbaycan Prezidenti İlham Əliyevə minnətdarlıqlarını bildiriblər.