7-02-2026, 14:01
Müharibənin sonu mümkün deyil - Zelenski
Sülh razılaşmasının əsas şərti təhlükəsizlik zəmanətləridir və bunlar digər sənədlərdən əvvəl imzalanmalıdır.
Bu sözləri Ukrayna Prezidenti Volodimir Zelenski deyib.
Zelenskinin sözlərinə görə təhlükəsizlik zəmanətlərinin imzalanması etibatarlılıq yaradır:
“Bu gələcək siyasi qərarlar üçün baza yaradacaq”.
Zelenski əlavə edib ki, Rusiya Ukraynanın ABŞ-la təhlükəsizlik razılaşması bağlamasını istəmir, amma bu, Kievin mövqeyinə təsir etməyəcək:
“Rusiya bizim ABŞ ilə razılaşmamızı istəmir. Amma biz bunu müzakirə etmirik. Hər halda, Ukrayna təhlükəsizlik zəmanətləri alacaq. Təhlükəsizlik zəmanətləri olmadan müharibənin sonu mümkün deyil”.
7-02-2026, 13:58
Gələcəyə Daşınan
Keçmiş:
“Avey” Qoruğunun
37 İllik Salnaməsi
Qazax rayonunda fəaliyyət göstərən “Avey” Dövlət Tarix-Mədəniyyət qoruğu 1989-cu il 22 fevral tarixində Azərbaycan Nazirlər Sovetinin 99 № li qərarı ilə yaradılıb. Azərbaycan Elmlər Akademiyası, Respublika Mədəniyyət Nazirliyi və Qazax XDS İcraiyyə Komitəsinin 14 saylı iclas protokolu əsasında “Avey” Dövlət qoruğunun əraziləri rəsmiləşdirilmişdir. Qoruğun Nizamnaməsi yazılmış, əsas fəaliyyət növü müəyyən edilmiş, möhürü, ştampı hazırlanmış və qoruğa təqdim edilmişdir.
“Avey” Dövlət Tarix-Mədəniyyət qoruğu zəngin tarixi memarlıq və arxeoloji abidələr diyarı kimi ən qədim daş dövrünün yadigarı olan “Avey” məbədinin adı ilə adlandırılıb. Qoruğun iş prinsipi abidələr haqqında məlumat toplamaq, abidələrin qorunması, toxunulmazlığı və bərpasını təmin etməkdir. Qoruq əsasən tarix, mədəniyyət, memarlıq, bədii və etnoqrafiya və digər folklorşünaslıqla məşğuldur. Qoruğun ərazisində olan: arxeoloji və memarlıq abidələri, daşınan və daşınmaz tarixi və mədəniyyət abidələri qoruğun əsas mülkiyyəti hesab olunur. Bu ərazilərdə yüzlərlə qədim paleolt, mezeolit, eneolit, orta əsr, tunc, mis dövrlərinin və sonrakı tarixi əsrlərin mədəniyyət abidələri mövcuddur.
Qoruq bir müddət Nazirlər Komitəsinin nəzdində “Tarix və Mədəniyyət Abidələrinin Mühafizəsi və Bərpası” adı altında fəaliyyət göstərmiş, hazırda Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tabeçiliyində fəaliyyətini davam etdirir.
“Avey” Dövlət Tarix-Mədəniyyət Qoruğunun ərazisində 56 abidə qeydiyyata alınmışdır. Bu abidələrdən 1-i dünya, 33-ü ölkə, 22-si isə yerli əhəmiyyətlidir. Onların 15-i memarlıq, 36-sı arxeoloji, 5-i dekorativ tətbiqi-sənət nümunəsidir. Abidələrdən 13-ü sərhəd zolağında, 14-ü isə işğal altındadır.
“Avey” Dövlət Tarix-Mədəniyyət Qoruğunun sahəsi 3613 hektardır. Qoruğun 3 filialı mövcuddur.
1.Əskipara filialı. Sahəsi 2783 ha- Əskipara kəndində yerləşir;
2.Damcılı filialı. Sahəsi 800 ha- DaşSalahlı kəndində yerləşir;
3.Göyəzən filialı. Sahəsi 30ha-Abbasbəyli kəndində yerləşir.
Qoruğun ərazisində 56 tarixi abidə qeydiyyata alınmışdır ki, bunlardan 1-i dünya, 33-ü ölkə, 22-si isə yerli əhəmiyyətlidir. Yenə də bunlardan 15-i memarlıq, 36-sı arxeoloji, 5 ədədi isə dekorativ tətbiqi sənət nümunəsinə aiddir.
Abidələrdən 13-ü sərhəd zolağında, 14-ü isə işğal altındadır.
Qeydiyyata alınması üçün qoruq ərazisində yerləşən 18 müxtəlif tarixi abidənin adı Nazirliyə təqdim olunmuşdur ki, bunlardan da ikisi işğal altındadır.
Abidələrdən qoruq ərazisində yerləşən, lakin qeydiyyata götürülməyən “Məmməd Koxa” bulağı Mədəniyyət və Turizm Nazirliyinin layihəsi və dəstəyi ilə tam bərpa olunmuşdur.
Ümumiyyətlə Qazax rayonunda qeydiyyata alınmış 112 arxeoloji və memarlıq abidələri var. Bunlardan 3-ü dünya əhəmiyyətli abidədir;
1. Sınıq körpü;
2.Damcılı mağarası;
3. Baba Dərviş abidəsi.
51-i ölkə əhəmiyyətli; 58-i isə yerli əhəmiyyətli abidədir. Bunların 45-i memarlıq; 56-sı arxeoloji; 6-sı bağ-park monumental; 5-i dekorativ-tətbiqi sənət nümunələridir.
Qoruq əcdadlarımızın bu ərazilərdəki yaşayış məskənlərini, ən qədim insanların, tayfaların həyat tərzini, mədəniyyətinin, inkişaf etmiş dövrlərini, ailə-məişət adətlərini və mənəvi mədəniyyət məsələlərini kompleks şəkildə tədqiq edir və araşdırır, bütövlükdə təbliğat yolu ilə ictimaiyyətə çatdırır. Eyni zamanda qoruq tarixi yerlərə ekskursiyalar təşkil edir. Mühazirə və söhbətlər, “18 aprel beynəlxalq abidələr və tarixi yerlər günü”, “27 sentyabr turizm günü” və digər müxtəlif kütləvi tədbirlər həyata keçirir.
Maddi mədəniyyət abidələri, etnoqrafik materiallar, əşyalar toplanılır, mütəmadi arxeoloji qazıntılar aparılır. Qazax mahalının keçmişi, tarixi, onun zəngin mədəni irsi öyrənilir.
Bu gün “Avey” Dövlət Tarix-Mədəniyyət Qoruğunun yaradılmasının 37-ci ildönümüdür.
Azərbaycanın qədim tarixini, Paleolit dövründən bu günə qədər uzanan mədəni irsimizi özündə yaşadan “Avey” Dövlət Tarix-Mədəniyyət Qoruğunun yaradılmasının 37-ci ildönümü münasibətilə bütün kollektivimizi ürəkdən təbrik edirik! Damcılı mağarasından Göyəzən zirvəsinədək uzanan bu müqəddəs torpaqların qorunması və gələcək nəsillərə ötürülməsi yolundakı fəaliyyətimizdə uğurlar arzulayırıq.
Daşların yaddaşını qoruyan, uca Göyəzənin ətəyində tarixin nəfəsini hiss etdirən “Avey” qoruğu 37 yaşında! Qədim məbədlərin sükutu, Avey dağının əzəməti və ulu babalarımızın izləri bu məkanda birləşir. Milli mənliyimizin aynası olan bu abidələr kompleksini qoruyan hər kəsə təşəkkür edirik. Yeni yaşınız mübarək əziz Avey kollektivi!
Şair Tofiq Saleh “Avey dağının dastanı” poemasında yazır:
Baxdıqca insanı aparır xəyal,
Yatır neçə idrak, neçə min kamal
Daşları lay-laydır, suxuru qumsal,
Allahdan vergidir bu böyük Mahal,
Yol ver, Avey dağı, aç qapıları,
Görüşünə hər yerdən insanlar gəlir!
Elnurə ALIYEVA,
Qazax rayonu Avey Dövlət Tarix Mədəniyyət Qoruğunun Elmi işçisi
7-02-2026, 13:56
Salyanda 17 yaşlı qız qızdırmadan öldü
Salyanda yeniyetmə qız qızdırmadan ölüb.
Salyan sakini 2009-cu il təvəllüdlü Zərifə Əlibala qızı Əhmədova yaşadığı evdə qızdırmadan həyatını itirib.
Faktla bağlı araşdırma aparılır.
7-02-2026, 13:43
BÜTÖV AZƏRBAYCANIN ALİMİ
ELDAR MƏMMƏDBƏYLİ-85
Abunəçisi olduğum “Bütöv Azərbaycan“ qəzetinin səhifələrində vaxtaşırı rast gəldiyim və oxumamış ötə bilmədiyim imzalardan biri də tanınmış mütəfəkkir və alim Eldar Məmmədbəylinin imzasıdır. Onun yazıları və onun haqqında yazılanlar həmişə diqqətimi cəlb edir və məndə xoş təəssüratlar yaradır. Eldar müəllim kimya sahəsi üzrə tanınmış alım olsa da, onun yaradıcılığının çoxcəhətliyi adamda heyranlıq doğurur. Mən onun elmi yardıcılığından söhbət açmaq istəmirəm. Çünki bu sahə mətbuatda, o cümlədən oxucusu olduğum “Bütöv Azərbaycan” qəzetində o dərəcədə ətraflı işıqlandırılıb ki, artıq nə isə yazılsa yersiz alınar. Ancaq yaradıcılığının digər sahələri haqda bir neçə kəlmə yazmağı özümə borc bilirəm. Onun yaradıcılığının mühüm cəhəti ictimai-mənəvi problemlərə həssas yanaşmasıdır. O, cəmiyyətdə baş verən haqsızlıqlara biganə qalmır, sosial ədalət, vicdan, məsuliyyət kimi anlayışları bədii müstəvidə ön plana çəkərək, oxucunu cəmiyyət üçün pozitiv mənəvi mövqe tutmağa çağırır. Nəticə etibarıilə Eldar Məmmədbəyli yaradıcılığı milli ruh, vətənpərvərlik, insanpərvərlik və mənəvi dəyərlərin vəhdəti ilə səciyyələnir.
Eldar müəllimin poeziya aləminə baş vurduqda isə təkcə “Sarıtel“ şeiri və Aşıq Ələsgərin Bakıdakı abidəsinin önündən keçərkən təsirlənib yazdıgı “Qadan alım” qoşması onun, şair, sanballı sənətçi yazar deyil, kimyaçı alim olduğuna inanmaq çətinliyi yaradır.
Məhəbbətin xəncər kimi, baş kəsir,
Gözəlliyin almaz kimi daş kəsir,
Ayaq donub, yarpaq kimi diz əsir,
Axan göz yaşımı sil qadan alım.
Uçub yuvasından bir tərlan gedir,
Dünyadan zavallı bir insan gedir,
Eldara bəxş olmuş bir zaman gedir,
Gəl məni son yola sal qadan alım.
Şükürlər olsun ki, qoşmada deyildiyi kimi Eldar müəllimə bəxş olunmuş zaman boşuna axıb getmir. Bu yaxınlarda AMEA-nın yubileyi ilə əlaqədar olaraq Eldar Məmmədbəylınin Azərbaycan elminin inkişafında xidmətlərinə görə Azərbaycan Respublikasının Prezidenti İlham Əliyevin 5 noyabr 2025-ci il tarixli fərmanı əsasında “Azərbaycan Respublikasının Prezidentinin fəxri diplomu” ilə təltif olunması xəbərini də “Bütöv Azərbaycan” qəzeti vasitəsilə öyrəndim. Sonradan bəlli oldu ki, Eldar müəllim və bu fərman əsasında mükafat alan AMEA-da uzun müddət çalışan digər dəyərli alimlərimiz, hər hansı təqdimat olmadan şəxsən möhtərəm Prezidentimizin göstərişi və nəzarəti ilə yoxlanılmış və ədalətli seçim edilmişdir.
Bu da ona əsas verir ki, mətbuatımız dövlət qürumları tərəfindən diqqətlə izlənilir və onun elmi və yaradıcılıq fəaliyyətinin mətbuatda geniş şəkildə işıqlandırılması öz bəhrəsini vermişdir. Bu sahədə “Bütöv Azərbaycan” qəzetinin də rolu danılmazdır. Məhz buna görə də Azərbaycanımızın bütövlüyü uğrunda əzmlə mübarizə aparan qəzetin təsisçisi Tamxıl Zirəddinoğluna da dərin minnətdarlığımızı bildiririk.
Eldar Məmmədbəyli özünün çoxcəhətli və əhatəli yaradıcılığı sayəsində təkcə Respublikamızda deyil, “Bütöv Azərbaycan” qəzeti vasitəsilə cənublu qardaşlarımız tərəfindən də tanınır və sevilir.
Bu il 85 illik yubileyi qeyd olunan Eldar Məmmədbəylinin 90 illik yubileyinin Bütöv Azərbaycanın alimi kimi Bütöv Azərbaycanımızda qeyd ediləcəyinə inanıram.
Elman RÜSTƏMOV,
Əczaçı, ehtiyatda olan tibb xidməti polkovnik- leytenantı,
yazıçı publisist
05.02.2026
7-02-2026, 13:38
At ətini mal əti adı altında satmaq istəyənlər TUTULDU
Tərtər rayonunda qanunsuz ət kəsimi ilə məşğul olan dəstənin üzvləri saxlanılıb.
Polis əməkdaşlarının Qida Təhlükəsizliyi Agentliyinin mütəxəssislərinin iştirakı ilə keçirdikləri tədbir zamanı qanunsuz ət kəsimi ilə məşğul olan Tural Cəfərov, Seymur Məmmədov, Seyfəddin Quliyev və Həsən Cəfərli saxlanılıblar. T.Cəfərova məxsus yarımtikiliyə baxış zamanı çəkisi 146 kiloqram olan qidaya yararsız at əti aşkarlanıb. Saxlanılanlar yararsız at ətini mal əti adı altında Bakı şəhərinə apararaq orada satmaq niyyətində olduqlarını bildiriblər.
Faktla bağlı Tərtər Rayon Polis Şöbəsində araşdırmalar davam etdirilir.
7-02-2026, 13:31
Teleaparıcı icra başçısı olan ərindən ayrılıb?
Ağstafa Rayon İcra Hakimiyyətinin rəhbəri Seymur Orucovla aparıcı Alidə Mustafayevanın boşanması haqda məlumatlar yayılıb.
Aparıcı iddialarla əlaqədar açıqlama yayıb.
O, yayılan informasiyaları təkzib edib: “Media nümayəndələrini məlumatları paylaşmazdan əvvəl rəsmi mənbələrlə yoxlamağa, peşə etikası və məsuliyyət prinsiplərinə riayət etməyə çağırıram. Dezinformasiyanın yayılması hüquqi və ictimai məsuliyyət yaradır.”
Qeyd edək ki, yayılan xəbərlərdə cütlüyün 6 aydır ayrı yaşadığı bildirilirdi.
Xatırladaq ki, icra başçısı ilə aparıcı 2024-cü ilin fevral ayında ailə həyatı qurub.
7-02-2026, 13:30
Həqiqət ƏLİYEVA,
Binəqədi rayonu, Elşən Sultanov adına 217 saylı tam orta məktəbin Azərbaycan dili və ədəbiyyatı müəllimi.
Hər şey yaxşı olacaq
(Hökümə Əliyevanın xatirəsinə)
Görmüşük göylərdən yerə həmişə,
Gah yağış, gah dolu, gah qar tökülür.
Sən yalan dünyanın işinə bir bax,
Artıq simalardan sözlər tökülür-
Sakit olun, hər şey yaxşı olacaq.
***
Son saatın, son dəqiqən bitirdi,
Çin - çin olan olan arzuların itirdi.
Yaralanmış uçaq yerə yetirdi,
Titrək səsin son vidanı gətirdi.
Sakit olun, hər şey yaxşı olacaq.
***
Son mənzilin əngin səma oldumu?
Diləklərin buludlarda dondumu?
Bu, mərdliyə gedib - gələn yoldumu?
Ümid verən son çağırış buydumu?
Sakit olun, hər şey yaxşı olacaq.
***
Qapında yığışıb dostlar, tanışlar,
Kədərli ürəklər, qəmli baxışlar.
Dolan buludlardan yağan yağışlar
Səmadan asılan səsini nazlar:
Sakit olun, hər şey yaxşı olacaq...
Ana
Sənin şərəfinə sözlər aradım,
Tapmadım adına layiq, ay ana.
Sozlər düzüm-düzüm, sözlər bəzəkli,
Dünyanın ən gözəl kəlməsi – Ana.
***
Məclislər qurulur, sözlər verilir,
Ən gözəl, bahalı libas geyilir.
Qədəhlər toqquşur, sağlıq deyilir,
Dillərin sehrli cümləsi - Ana.
***
Dağların başında şimşəklər çaxır,
Dərədən şırhaşır bulaqlar axır.
Təpələr həsrətlə sulara baxır,
Axan çaylarımın gur səsi - Ana.
***
Sənsizlik üzündən qəmə bataram,
Səsini eşitsəm, bala qataram.
Adını ucadan uca tutaram
Uca dağlarımın zirvəsi - Ana.
***
Sənin ocağından təpər almışam,
Gözüm yollardadır, fikirə dalmışam.
İsti qucağına möhtac qalmışam,
Bütün övladların həsrəti - Ana.
***
Çölün bənövşəsi, düzün laləsi,
Neyin titrəməsi, tütəyin səsi.
Zərif çiçəklərin xoş rayihəsi,
Səni xatırladır mənə, ay Ana.
***
Ürəyim doludur, bitməmiş sətir,
Qərib xatirələr qarışıb itir.
Nə olur, uzağı yaxına gətir,
Qəlbimin ən şirin guşəsi - Ana.
Bəsimdir
Naşükür deyiləm, bədxah deyiləm,
Bir ovuc xoşbəxtlik belə bəsimdir.
Demirəm, dünyanı versinlər mənə,
Bir otaq səadət elə bəsimdir.
***
Səhərlər yuxudan sevinclə durum,
Hər günə gözəllik çələngi qurum,
İlləri qayğıyla mən başa vurum,
Övladım üzümə gulə, bəsimdir.
***
Qəmli xatirələr qəfil coşanda,
Qəlbimin həsrəti aşıb- daşanda.
Ana, bacı dərdi qoşalaşanda
Qapıma qardaşım gələ, bəsimdir.
***
Ömür vəfasızdır, olubdur yarı,
Həyat, gəl üstümə yağdırma qarı.
Demirəm, yaramı sən möhkəm sarı,
Deyirəm, eləcə belə bəsimdir.
***
Həyatdır, ağrı da, acı da olur,
Yanan ocaq varsa, sacı da olur.
Bəzən bir şirin söz əlacı olur,
Dərdimə təsəlli elə, bəsimdir.
Xatirələr
Xatirələr cığırı məni götürüb qaçır.
Fikrin qırışlarında gizlənən anlarımın
Üstunə sığal çəkir, sehirli süfrə açır.
Orda uşaqlığıma gül - çiçək ətri saçır.
Orda gənclik payıma günəş göydən nur saçır.
***
İllərin arxasından gizli - gizli boylanan,
Sevincindən gah gülən, kədərlənib ağlayan,
Qəlbi ümidlə dolu arzularla çırpınan,
Bir şıltaq uşaqlığım, bir də coşub çağlayan,
Ömrümün bahar çağı - cavanlığım dil açır.
***
Üzümdə bir təbəssüm, gözümdə sevinc yaşı
Yaşanmış günlərimin artıq bəllidir yaşı.
Şirin şirin olur, acısını gəl daşı.
Daha vidalaşıram,ay ömrümün sirdaşı.
Bu anda xatirələr qaçıb mənə əl açır.
7-02-2026, 13:27
Borc istədiyi tanışını talayan şəxs SAXLANILDI
Bakının Nəsimi rayonunda borc istədiyi tanışını sonradan talamaqda şübhəli bilinən şəxs saxlanılıb.
Bu barədə Daxili İşlər Nazirliyindən məlumat verilib.
Bildirilib ki, bir nəfər polisə müraciət edərək parkların birində tanışı tərəfindən ona fiziki zor tətbiq edilərək 106 manat və mobil telefonunun talandığını bildirib.
Keçirilən tədbirlərlə əməli törətməkdə şübhəli bilinən, əvvəllər məhkum olunmuş 37 yaşlı Z.Tağıyev müəyyən olunaraq saxlanılıb. Araşdırma zamanı Z.Tağıyevin zərərçəkəndən əvvəlcə borc pul istədiyi, sonuncunun bundan imtina etməsindən sonra isə qeyd edilən hadisəni törətdiyi məlum olub.
Araşdırma aparılır.
7-02-2026, 13:18
Nəsimidə 3 kiloqramdan çox narkotik aşkarlandı - VİDEO
Nəsimi Rayon Polis İdarəsi 20-ci Polis Şöbəsinin əməkdaşları tərəfindən narkotik vasitələrin satışı və qanunsuz dövriyyəsinə qarşı keçirilən növbəti əməliyyat zamanı əvvəllər məhkum olunmuş 48 yaşlı Rizvan Fərəcov saxlanılıb.
Daxili İşlər Nazirliyindən verilən məlumata görə, ondan 2 kiloqram 430 qram marixuana və 1 kiloqram 117 qram heroin (cəmi 3 kq 547 qr) aşkarlanıb.
Saxlanılan şəxs ifadəsində narkotik vasitələri satış məqsədilə əldə etdiyini bildirib.
Faktla bağlı cinayət işləri başlanılıb. R.Fərəcov barəsində məhkəmənin qərarı ilə həbs qətimkan tədbiri seçilib.
7-02-2026, 13:17
İnsanı həyata bağlayan
ən gözəl hiss
(SƏDRƏDDİN MÜƏLLİM, 65-İN MÜBARƏK!)
Hamımız yaxşı bilirik ki, insan ömrü xatirələrlə zəngindir. İnstitut illəri də ömrümüzün ən şirin anlarıdır. İnsanın yaşadığı anlar yaddan çıxsa da, bəzi həqiqətlər yaddaşa möhür vurur. İnstitut illəri kimi. Biz o illəri xoş duyğu kimi dadırıq. Çünki ömrümüzün ən titrək, ən kövrək çağları məhz həmin illərə təsadüf edir. Hərənin taleyində bir səhifə açılır o illərdən sonra...
Dostlar da ulduzlar kimidir, onları hər zaman görə bilməzsən, amma bilirsən ki, onlar həmişə sənin yanındadırlar və səni düşünürlər...
Əziz Sədrəddin müəllim! Bu gün məni görə bilməsən də, bil ki, mən səninləyəm… Sənin kimi dostum olduğu üçün özümü çox xoşbəxt hiss edirəm. Qoy bütün pisliklər həyatınızdan uzaq olsun! Yaxşı dostsan! Ad günün - 65 illik yubileyin mübarək, qardaş! Özünüzü tənha hiss etdiyiniz zaman, sizi düşünən və ürəyində sizin üçün yer ayıran bir dostunuz olduğunu unutmayın.
Həyat dediyin bu qısa səfərdə çox insan tanıyırsan, amma dost dediyin adamlar barmaqla sayılır. Sən barmaqla göstəriləsi dostsan. Sənə həyatda qarşılaşacağın çətinliklərdə həmişə qalib olmağını və yeni yaşda ümidini itirməməyi arzulayıram. Sağlam, xoşbəxt və dinc günlər həmişə səninlə olsun.
Sədrəddin müəllim, sən də bilirsən, əsl dostluğun olmadığı həyat səhnələri notsuz, ya da notu pozulmuş musiqi kimidir. Qulaq asmağa cəhd edərsən, ancaq bir şey anlamazsan. Mən çox şadam ki, sənin kimi dostum, qardaşım olub və bu gün də var, aramızdakı o dostluq-qardaşlıq nə xoş ki, bu gün də davam edir. Çətin günlərimdə həmişə yanımda oldun, dəstəyini gördüm. Allah da daim səninlə olsun!
Məsafə əsl dostluğa mane ola bilməz. Bu xoşbəxt gündə sənin yanında ola biləcəm, ya yox, onu dəqiq deyə bilmirəm, ancaq əmin ol ki, hər zaman qəlbimdəsən. Doğum günün mübarək, əziz qardaşım. Sağlamlıq, müvəffəqiyyət, sevgi, xoşbəxtlik, bir sözlə, layiq olduğun hər şey yeni yaşında sənə yoldaşlıq etsin. Həyatın sürətlə getdiyinə üzülməyək.
Deyirlər, ən yaxşı illər tez keçən illərdir. Səninlə tanış olduğumuz 1983- cü ili xatırlayanda həmin gün dünən kimi görünür. Hər saniyəsini yaxşı xatırladığım o anlarda dərdlərimi bölüşdüyün üçün sənə təşəkkür edirəm.
365 günü səbrsizliklə gözləyirəm, əminəm ki, aramızdakı əsl dostluq bağları daha da artacaq, yaxşı gündə də, pis gündə də yenidən birlikdə olacağıq. 65 yaş, yubiley təbrikləri ilə qarşındayam.
Yaşa dolduqca doğum günlərini bir çox insan sevmir. Çünki qocaldığının fərqinə varır. Lakin hər yaşın öz gözəlliyi var. Bunu unutmamalıyıq. 65 yaş da bu qəlibə daxildir. Özünü daim cavan, gümrah və xoşbəxt hiss etsən, heç bir yaş səni qocalda bilməz.
Bir xatirə köçüdü institut illəri,
İllər bizi dost edir, sonra uzaq oluruq.
Eh, o illər çox şirin, çox acıdı bəlkə də,
Biz ömür qatarında qəmə tuzaq oluruq.
Gör, nə qədər il ötüb o işıqlı həyatdan,
Yenə xatirələrdə imisti izlər qalıb.
Hərəmizin qəlbində bircə yığın xatirə,
Sabaha şövqlə baxan qıyqacı gözlər qalıb.
İnstitut dostlarımızı harda görsək, bir anlıq
Susuruq, bizdən qabaq gözlər dinir eləcə.
Düz beş il çiynimizdə yük olan şirin çağlar
Gah parıltılı olur, gah da sönür eləcə.
Tələbə olmaq necə xoşbəxt olmaqdır düzü,
O illər xatirətək hey düşdükcə eh, yada.
Bir xatirə köçüdü əziz institut illəri,
Beş il sakin oluruq o sehirli «adada».
Əziz qardaşımı - Biləsuvar şəhəri Xanlar Qafarov adına İsmətli kənd tam orta məktəbinin Azərbaycan dili və ədəbiyyat müəllimi, gözəl insan, səmimi dost, qaygıkeş və təcrübəli pedaqoq, gənc nəslin təlim-tərbiyəsində xüsusi xidmətləri olan tələbə yoldaşım Sədrəddin Əhməd oğlu Əliyevi 65 illik yubileyi münasibətilə təbrik etmək mənim üçün bir şərəfdir.
Sənə möhkəm can sağlığı arzulayıram, unudulmaz dost!
Dərin hörmətlə:
Hüseyn İsaoğlu,
tələbə yoldaşın
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!