Prezident və birinci xanım idmançılarla görüşdü

Avqustun 22-də Azərbaycan Respublikasının Prezidenti İlham Əliyev və birinci xanım Mehriban Əliyeva V İslam Həmrəyliyi Oyunlarında nəticə əldə etmiş idmançılarla görüşüblər. Butov.az xəbər verir ki, dövlətimizin başçısı görüşdə çıxış edib. Prezident İlham Əliyevin çıxışı:
- Əziz dostlar, əziz idmançılar. Siz bir neçə gün bundan əvvəl Konyadan Vətənə qayıtmısınız, böyük qələbə ilə qayıtmısınız. Ölkəmizin idman şöhrətini bir daha yüksəklərə qaldırmısınız. Bu münasibətlə sizi ürəkdən təbrik edirəm və əldə edilmiş nailiyyətlərlə bağlı sizə öz təşəkkürümü bildirmək istəyirəm. Əminəm ki, Azərbaycan xalqı sizinlə fəxr edir. Çünki bütün dünyaya bir daha göstərmisiniz ki, Azərbaycan idman ölkəsidir, Azərbaycan idmançıları öz gücü ilə seçilən idmançılardır. V İslam Həmrəyliyi Oyunlarında dördüncü yerə layiq görülmək çox böyük nailiyyətdir. Bu nailiyyət onu göstərir ki, bizim əvvəlki uğurlarımız təsadüfi xarakter daşımırdı. Bildiyiniz kimi, beş il bundan əvvəl Bakıda IV İslam Həmrəyliyi Oyunlarında komandamız birinci yerə layiq görülmüşdür. Bu da təbiidir. Çünki öz doğma divarları həmişə idmançılara əlavə kömək göstərir. Bu dəfə isə çox gərgin mübarizə nəticəsində biz dördüncü yerə layiq görüldük. Onu da bildirməliyəm ki, Oyunlarda ölkələrin ən güclü idmançıları iştirak edirdilər. Bizim idmançılarımız 99 medal qazanaraq, - onlardan 29-u qızıl medaldır, - bir daha ölkəmizin gücünü göstərmişlər. Onu da deməliyəm, bu da çox sevindirici haldır ki, idmançılarımız 19 idman növündə medallar qazanmışlar. Bu onu göstərir ki, idmanın bir çox növləri ölkəmizdə uğurla inkişaf edir. Əlbəttə ki, birinci yerdə, - əgər belə demək mümkündürsə, - güləşçilərdir, 23 medal qazanmışlar, onlardan 8-i qızıl medaldır. Bu da təbiidir. Çünki güləş bizim milli idman növümüzdür və biz güləşdə ənənəvi olaraq uğurlar qazanmışıq. İkinci yerdə gimnastikanın nümayəndələridir. Üç növ gimnastikada idmançılarımız 17 medal qazanmışlar, onlardan 8-i qızıl medal olmuşdur. Üçüncü yerdə qeyri-Olimpiya idman növü – kikboksinq idmançılarıdır. Onların qazandıqları medalların sayı 15-dir. Onlardan 3-ü qızıl medaldır. Yəni, bu, doğrudan da böyük nailiyyətdir. Çünki bu Oyunlarda 50-dən çox ölkə iştirak edirdi və yenə də deyirəm, mübarizə çox gərgin keçib. Mən sizinlə Oyunların açılış günündə Konyada görüş əsnasında əmin olduğumu bildirmişdim ki, siz ölkəmizi ləyaqətlə təmsil edəcəksiniz. Şadam ki, belə də oldu. Bir daha nəinki bütün müsəlman aləmi, bütün dünya idmançılarımızın gücünü gördü. Hər dəfə Bayrağımız qaldırılanda, Himnimiz səslənəndə hər bir Azərbaycan vətəndaşı haqlı olaraq qürur hissi keçirir və hər qələbə bir daha bizim şöhrətimizi artırır. Mən sizinlə Konyada görüş zamanı demişdim ki, sizin üzərinizə əlavə məsuliyyət düşür. Çünki siz bu Oyunlarda qalib ölkəni təmsil edəcəksiniz. Bu, həm çox qürurverici amildir, eyni zamanda, böyük məsuliyyətdir. Bu məsuliyyəti dərk edərək siz ölkəmizi ləyaqətlə təmsil etmisiniz. Baxmayaraq ki, əfsuslar olsun, bəzi hallarda hakimlər sizə qarşı ədalətsiz olmuşdular, qərəzli olmuşdular. Mən imkan daxilində yarışları izləyirdim və görürdüm ki, bizim idmançılarımıza qarşı nə qədər böyük ədalətsizlik göstərilir. Amma buna baxmayaraq, siz təmkinlə, həm özünüz, həm də ki, məşqçiləriniz çox düzgün addımlar ataraq öz gücünüzü sübut etməyə çalışmısınız və buna nail olmusunuz. Bu Oyunlar qardaş ölkədə keçirilmişdir və əlbəttə ki, bizim idmançılar özlərini çox rahat hiss edirdilər. Hər bir idmançı özünü öz evindəki kimi hiss edirdi. Biz açılış mərasimində onun da şahidi olduq ki, Azərbaycan komandası stadiona daxil olanda bizim türk qardaşlarımız necə səmimi və hərarətlə idmançılarımızı qarşılamışlar. Elə bil ki, bizim komandamız Bakıda stadiona çıxıb. Bu, doğrudan da bir daha bizim xalqlarımızın nə qədər bir-birinə bağlı olduğunu göstərir. Onu göstərir ki, təkcə prezidentlər bir-birinə qardaş deyil, eyni zamanda, xalqlarımız, idmançılarımız qardaşdırlar. Orada - stadionda on minlərlə tamaşaçı Azərbaycan komandasını öz doğma komandası kimi qarşılamışdır. Fürsətdən istifadə edərək Türkiyəni, onun idmançılarını həm Oyunların yüksək səviyyədə təşkil olunması, həm də ki, Oyunlarda birinci yer tutması münasibətilə ürəkdən təbrik etmək istəyirəm. Onu da bildirməliyəm ki, bu Oyunların keçirilməsi, əlbəttə, böyük təşkilatçılıq məsələlərini də əhatə edir. Xatırlayıram, biz 2017-ci ildə o Oyunları hazırlayarkən bir çox təşkilati məsələləri həll etdik. Hər bir ölkə bu səviyyədə Oyunları keçirə bilməz. Konya Oyunları rəsmən Beşinci İslam Həmrəyliyi Oyunları sayılsa da, əslində, bu Oyunlar cəmi dörd dəfə keçirilib. Birinci Oyunlar Səudiyyə Ərəbistanında, ikinci İndoneziyada, üçüncü Azərbaycanda, dördüncü isə Türkiyədə. Amma rəsmən bu, beşinci Həmrəylik Oyunları sayılır. Yəni, demək istəyirəm ki, Oyunları keçirmək o qədər də asan məsələ deyil və burada Türkiyə tərəfi əlbəttə, çox yüksək qiymətə layiqdir. Oyunlar artıq tarixdir. İdmançılarımız bu medalları əminəm ki, qürur hissi ilə daşıyacaqlar. Ancaq indi biz gələcəyə baxmalıyıq, bundan sonra Azərbaycan idmanının inkişafı ilə bağlı hansısa addımlar atılmalıdır. Siz də yaxşı bilirsiniz ki, son vaxtlar bir neçə federasiyada dəyişikliklər baş verdi. Bu, təbiidir, bu, qaçılmaz idi. Çünki bəzi federasiyalarda mən görürdüm ki, artıq durğunluq hökm sürür, nəticələr əldə edilmir, bəzi idmançılarımız, ümumiyyətlə, beynəlxalq yarışlardan məhrum edilmişlər. Müvafiq beynəlxalq idman qurumları onları, bütövlükdə federasiyaları cəzalandırırdılar, bəzi hallarda əsaslı, bəzi hallarda əsassız. Amma əfsuslar olsun, bu hallar baş verib və görürdük ki, artıq yeni təkana ehtiyac var. Bu yaxınlarda federasiyalarda və eyni zamanda, Gənclər və İdman Nazirliyində baş vermiş dəyişikliklər əminəm ki, həm idmançılar, həm də idman ictimaiyyəti tərəfindən yüksək qiymətləndirilir, çünki nəticələr göz qabağındadır. Çünki idmana cavabdehlik daşıyan qurumlar idmançılarla daim bir yerdə olmalıdırlar, hər bir idmançını tanımalıdırlar, onun problemləri ilə məşğul olmalıdırlar. Mən görürəm ki edilmiş dəyişikliklər nəticəsində hazırda nəticələr də var və olacaq. Əsas odur ki, Azərbaycanın idman ictimaiyyəti belə mütəşəkkil qüvvə kimi bir nöqtəyə vursun. Hər zaman bu, diqqət mərkəzində olan məsələ idi ki, Milli Olimpiya Komitəsi, Gənclər və İdman Nazirliyi, federasiyalar, klublar, idman cəmiyyətləri bir nöqtəyə vursunlar, komanda şəklində fəaliyyət göstərsinlər və birlik olsun. Çünki mən 1997-ci ildən Milli Olimpiya Komitəsinin prezidentiyəm və bilirəm, hansı ölkələrdə hansı proseslər baş verir. Bir çox hallarda idmana cavabdehlik daşıyan qurumlar arasında birlik yoxdur, əksinə, ziddiyyətlər var. Bizdə isə bu birlik var və bu, hesab edirəm ki, uğurlarımızın əsas şərtlərindən biridir. Əlbəttə ki, peşəkar idmançıları yetişdirmək asan məsələ deyil və məşqçilər, idman mütəxəssisləri çox böyük əmək sərf edirlər, seleksiya işləri çox düzgün aparılmalıdır. Bizim bölgələrimizdə çox böyük istedadlar var, uşaqlar, yeniyetmələr, sadəcə olaraq, onları seçib tapmaq, idmana cəlb etmək lazımdır. Azərbaycanda, dördüncü isə Türkiyədə. Amma rəsmən bu, beşinci Həmrəylik Oyunları sayılır. Yəni, demək istəyirəm ki, Oyunları keçirmək o qədər də asan məsələ deyil və burada Türkiyə tərəfi əlbəttə, çox yüksək qiymətə layiqdir. Oyunlar artıq tarixdir. İdmançılarımız bu medalları əminəm ki, qürur hissi ilə daşıyacaqlar. Ancaq indi biz gələcəyə baxmalıyıq, bundan sonra Azərbaycan idmanının inkişafı ilə bağlı hansısa addımlar atılmalıdır. Siz də yaxşı bilirsiniz ki, son vaxtlar bir neçə federasiyada dəyişikliklər baş verdi. Bu, təbiidir, bu, qaçılmaz idi. Çünki bəzi federasiyalarda mən görürdüm ki, artıq durğunluq hökm sürür, nəticələr əldə edilmir, bəzi idmançılarımız, ümumiyyətlə, beynəlxalq yarışlardan məhrum edilmişlər. Müvafiq beynəlxalq idman qurumları onları, bütövlükdə federasiyaları cəzalandırırdılar, bəzi hallarda əsaslı, bəzi hallarda əsassız. Amma əfsuslar olsun, bu hallar baş verib və görürdük ki, artıq yeni təkana ehtiyac var. Bu yaxınlarda federasiyalarda və eyni zamanda, Gənclər və İdman Nazirliyində baş vermiş dəyişikliklər əminəm ki, həm idmançılar, həm də idman ictimaiyyəti tərəfindən yüksək qiymətləndirilir, çünki nəticələr göz qabağındadır. Çünki idmana cavabdehlik daşıyan qurumlar idmançılarla daim bir yerdə olmalıdırlar, hər bir idmançını tanımalıdırlar, onun problemləri ilə məşğul olmalıdırlar. Mən görürəm ki edilmiş dəyişikliklər nəticəsində hazırda nəticələr də var və olacaq. Əsas odur ki, Azərbaycanın idman ictimaiyyəti belə mütəşəkkil qüvvə kimi bir nöqtəyə vursun. Hər zaman bu, diqqət mərkəzində olan məsələ idi ki, Milli Olimpiya Komitəsi, Gənclər və İdman Nazirliyi, federasiyalar, klublar, idman cəmiyyətləri bir nöqtəyə vursunlar, komanda şəklində fəaliyyət göstərsinlər və birlik olsun. Çünki mən 1997-ci ildən Milli Olimpiya Komitəsinin prezidentiyəm və bilirəm, hansı ölkələrdə hansı proseslər baş verir. Bir çox hallarda idmana cavabdehlik daşıyan qurumlar arasında birlik yoxdur, əksinə, ziddiyyətlər var. Bizdə isə bu birlik var və bu, hesab edirəm ki, uğurlarımızın əsas şərtlərindən biridir. Əlbəttə ki, peşəkar idmançıları yetişdirmək asan məsələ deyil və məşqçilər, idman mütəxəssisləri çox böyük əmək sərf edirlər, seleksiya işləri çox düzgün aparılmalıdır. Bizim bölgələrimizdə çox böyük istedadlar var, uşaqlar, yeniyetmələr, sadəcə olaraq, onları seçib tapmaq, idmana cəlb etmək lazımdır. Bu gün Azərbaycanda idmana və xüsusilə idmançılara olan münasibət əminəm ki, gəncləri, uşaqları da idman bölmələrinə gətirəcək. Çünki həm idmanla məşğul olmaq üçün şərait var,- təkcə bölgələrdə 50-yə yaxın olimpiya idman kompleksi fəaliyyət göstərir,- biz Bakıda Avropa Oyunlarını, dünya çempionatlarını keçirmişik. Yəni, bütün imkanlar var və idman bölmələrinə gələn uşaqları seçib onları yetişdirmək lazımdır, həm güclü idmançı kimi, həm ləyaqətli vətəndaş kimi. Bu da çox vacib məsələdir. Mən çox şadam, çox sevinirəm ki, bizim idmançılarımız, ölkəmizi dünyada ləyaqətlə təmsil edən idmançılar məişətdə də nümunəvi davranışla fərqlənirlər. Bu, çox vacibdir. Həm təvazökarlıq, həm Vətənə bağlılıq, milli dəyərlərə bağlılıq, fiziki güc, mənəvi güc. Çünki fiziki güc, necə deyərlər, mənəvi gücü də gücləndirir. Oyunlardan sonra isə əlbəttə ki, istirahət dövrü olmalıdır, amma çox çəkməməlidir, çünki qarşıda Yay Olimpiya Oyunları durur, o qədər də çox vaxt qalmayıb, cəmi 2 il qalıb. Ona görə yaxın aylarda artıq hazırlığa başlamaq lazımdır, ondan sonra təsnifat turnirləri başlayacaq, komandamız formalaşacaq. Hesab edirəm ki, indi bütün idman qurumlarının əsas məqsədi Yay Olimpiya Oyunlarına hazırlıq olmalıdır. Mən əminəm ki, bütün idman qurumları burada da öz vəzifə borclarını bilirlər, yaxşı dərk edirlər və beləliklə, Yay Olimpiya Oyunlarında biz ölkəmizi ləyaqətlə təmsil edəcəyik. Bir daha sizi ürəkdən təbrik edirəm - bütün komanda üzvlərini, medal qazanmış idmançıları, medal qazana bilməyən idmançıları. Mən onlara da deyirəm ki, peşman olmasınlar, hələ gələcəkdə bir çox yarışlar var. Sadəcə olaraq, Vətənə sevgi, öz peşəsinə sədaqət, yorulmaz fəaliyyət, hazırlıq lazımdır. Çünki hazırlıq olmadan heç bir nəticə olmur, nə siyasətdə, nə idmanda, nə həyatda. Siz artıq bir daha Azərbaycanın şöhrətini ucaltmısınız və necə ki, bu gün bayrağımız Qarabağda, Zəngəzurda dalğalanır, idman arenalarında da dalğalanır, əminəm ki, əbədi dalğalanacaq. Bir daha sizi təbrik edirəm.
Gənclər və İdman Nazirliyinin idman şöbəsinin müdiri, V İslam Həmrəyliyi Oyunlarında Azərbaycan nümayəndə heyətinin rəhbəri Elnur Məmmədov çıxış edərək dedi:
- Hörmətli cənab Prezident. Hörmətli Mehriban xanım. İlk olaraq, vaxt ayırıb bizi qəbul etdiyiniz üçün Sizə təşəkkürümüzü bildiririk. Məlumat üçün bildirmək istəyirik ki, Azərbaycan nümayəndə heyəti bu Oyunlarda ən böyük nümayəndə heyəti ilə - 282 idmançıdan əlavə, məşqçi, texniki, idman heyəti ilə yanaşı, media və rəsmi nümayəndələrlə birlikdə 484 nəfərlə təmsil olunurdu. Sizin avqustun 9-da Konyada Atletlər kəndində bizim idmançılarla görüşünüz idmançılarımıza əlavə stimul oldu və nəticədə 99 medal qazandılar. Onlardan 29-u qızıl, 36 gümüş, 34 bürünc olmaqla, 55 ölkə arasında 4-cü yerdə qərarlaşdıq. Cənab Ali Baş Komandan, açılış mərasimində Azərbaycan nümayəndə heyəti stadiondan keçərkən, bayrağımız açılarkən 42 minlik insanın coşqu ilə bayrağımızı alqışlaması qardaş ölkənin qalib ölkənin bayrağını alqışlamağı idi. Bu hissləri bizə yaşatdığınız üçün Sizə təşəkkürümüzü bildiririk. Nümayəndə heyətimiz böyük olduğu üçün bizə ayrıca bina ayrılmışdı. Ancaq o da kifayət etməmişdi və digər binanın bir hissəsi də bizə ayrılmışdı. Bizim idmançılar 150-dən çox otaqda yerləşmişdi. Çox xoş haldır ki, təhvil-təslim vaxtı bizim 150 otaqdan heç birində ən kiçik problem belə olmamışdır. Bu isə bir daha bizim idmançıların intizamının göstəricisidir. Fürsətdən istifadə edib onlara da təşəkkürümüzü bildirmək istəyirik. Çox sağ olun, cənab Prezident. Təşəkkürümü bildirirəm. Prezident İlham Əliyev: Sağ olun.
Üzgüçülük üzrə milli komandanın baş məşqçisi Rəşad Əbdürrəhmanov dedi:
- Hörmətli Prezident. Hörmətli Mehriban xanım. Mən də İslam Oyunlarında iştirak edən bütün məşqçilər adından Sizə dərin təşəkkürümü bildirirəm. Çünki bilirsiniz ki, idmançı medal qazananda bütün alqışlar idmançının, hər hansı bir uğursuzluq olanda isə ən böyük günahkar məşqçilər olur. Amma buna baxmayaraq, biz öz işimizi həmişə vüqarla, qürurla davam etdiririk. Çox sağ olun ki, bizə belə şərait yaratmısınız. Çünki məşqçinin ən böyük şəraiti onun idman bazasıdır. Siz gənclərlə görüş keçirəndə Sizə sual verildi ki, hansı idmanı xoşlayırsınız? Siz üzgüçülük dediniz. Mən də indi ən dəbdə olan bir idman növünün nümayəndəsi kimi demək istəyirəm ki, 2015-ci ildə keçirilən Avropa Oyunlarında bizim üçün yaratdığınız böyük Su İdman Sarayına görə Sizə şəxsən təşəkkürümü bildirirəm. Bütün üzgüçü idmançılar ailəsi adından Sizə təşəkkür edirəm. Çünki həmin o idman bazasının sayəsində artıq Azərbaycanda üzgüçülük doğrudan da sürətlə inkişaf etmişdir. Bunun göstəricisi olaraq, 2017-ci ildə biz dəvət edilmiş idmançılarla medal qazanmışdıqsa, 2015-ci ildə tikilmiş hovuza ilk qədəmlərini qoyan idmançılar - öz idmançılarımız artıq bu yarışda uğurlarımıza öz töhfələrini verdilər. İyun ayında Rumıniyanın Buxarest şəhərində keçirilən Avropa çempionatında bizim idmançımız Ramil Vəlizadə bürünc mükafata layiq görüldü. Bu da tarixi bir hadisədir. Bütün bunlara görə öz adımdan və bütün məşqçilər adından Sizə dərin təşəkkürümü bildirirəm. Çox sağ olun.
Voleybol üzrə beynəlxalq dərəcəli hakim Eldar Zülfüqarov dedi:
- Cənab Prezident. Hörmətli Mehriban xanım. Bizimlə görüşünüz biz hakimlərə Sizin ən dəyərli hədiyyənizdir. Sizin yaratdığınız şərait sayəsində bu gün bizim beynəlxalq dərəcəli hakimlərimiz Azərbaycan Respublikasını beynəlxalq arenada, Avropa, dünya çempionatlarında, Olimpiya Oyunlarında, həmçinin müxtəlif miqyaslı yarışlarda layiqincə təmsil edirlər. Eyni zamanda, gənc nəsildən ölkəmizi beynəlxalq miqyasda təmsil edən hakimlər yetişdiririk. Bütün bu nailiyyətlərin qazanılmasına səbəb Sizin rəhbərliyinizlə biz idmançılara, məşqçilərə, hakimlərə, bütün idman ictimaiyyətinə göstərilən diqqət və qayğıdır. Mən bütün hakimlərin adından Sizə təşəkkürümü bildirmək istəyirəm. Diqqətinizə görə çox sağ olun.
V İslamiadanın sərbəst güləş yarışlarının qızıl medalçısı Hacı Əliyev çıxış edərək dedi:
- Cənab Prezident, mən də öz adımdan və bütün idmançılar adından Sizi salamlayıram. Bizi qəbul etdiyinizə görə Sizə təşəkkür edirəm. Bildiyiniz kimi, V İslam Həmrəyliyi Oyunlarında Azərbaycan idmançıları uğurlu nəticə əldə etdilər. Bayaq qeyd etdiyiniz kimi, 29 qızıl, 36 gümüş və 34 bürünc medal qazandıq. Ümumilikdə isə biz 99 medal qazandıq. Mən bir güləşçi kimi qeyd etmək istərdim ki, güləşçilərimiz bu Oyunlarda öz güclərini bir daha sübut etdilər. Beş il əvvəl Bakıda keçirilən İslamiadada qazandığımız nəticəni, belə deyək ki, təkrarladıq və biz 23 medal əldə etdik. Bunlardan 8-i qızıl, 8-i gümüş və 7-si bürünc medal idi. Ümumilikdə sərbəst güləşçilərimiz ikinci, yunan-Roma və qadınlardan ibarət yığma komandalarımız isə birinci oldular. Cənab Prezident, hər dəfə böyük yarışlardan gəldikdən sonra bizi qəbul etməyiniz, nəticələrimizlə yaxından maraqlanmağınız doğrudan da bizi sevindirir. Bu, bizə böyük stimul verir. Biz bu diqqət və qayğı nəticəsində hər zaman çalışırıq ki, uğurlar əldə edək. Bizi qarşıda böyük yarışlar gözləyir. Ən böyük hədəfimiz isə bayaq dediyiniz kimi, Parisdə keçiriləcək Yay Olimpiya Oyunlarıdır. Mənə elə gəlir ki, idmançılarımız Oyunlara yaxşı hazırlaşırlar və inşallah, yaxşı nəticələr göstərəcəklər. Cənab Prezident, gələcək işlərinizdə Sizə uğurlar arzulayıram. Allahdan Sizə və ailənizə cansağlığı diləyirəm. İnşallah, hər zaman Azərbaycan belə böyük qələbələr qazanar. Diqqətinizə görə təşəkkür edirəm.
Prezident İlham Əliyev: Sağ ol.
Bədii gimnastika üzrə milli komandamızın üzvü, İslamiadanın qızıl və gümüş medalçısı Güllü Ağalarzadə çıxış edərək dedi:
- Hörmətli cənab Prezident. Hörmətli Mehriban xanım. Sizi və bütün iştirakçıları salamlayıram. Mən bədii gimnastika üzrə milli komandanın üzvüyəm. Bildiyiniz kimi, V İslam Həmrəyliyi Oyunlarında Azərbaycan Gimnastika Federasiyasının idmançıları 8 qızıl, 7 gümüş və 2 bürünc medal qazanmışdır. Biz bu qələbəyə görə çox sevinirik. Əlbəttə ki, əldə etdiyimiz bütün bu nailiyyətlər, cənab Prezident, Sizin və Mehriban xanımın dəstəyi sayəsindədir. Bu dəstəyə görə Sizə dərin təşəkkürümüzü bildiririk. Onu da qeyd etmək istərdim ki, avqustun 26-sı Mehriban xanımın ad günüdür. Mən bütün idmançılar adından Mehriban xanımı ürəkdən təbrik edirəm. Vurğulamaq istəyirəm ki, V İslam Həmrəyliyi Oyunlarında məşqçilər, hakimlər, tibb işçiləri, həmçinin idmançılar - hər kəs bir-birinə daim dəstək oldular. Müstəqil bir ölkənin idmançıları kimi, cənab Prezident, Sizin yürütdüyünüz düzgün siyasət bizi daim qələbə qazanmağa ruhlandırdı. Əlbəttə, ümid edirəm ki, gələn İslam Həmrəyliyi Oyunlarında məhz bu yolla gedərək, daha gözəl qələbələrə imza atacağıq. Biz fəxr edirik ki, belə ölkənin vətəndaşlarıyıq. Çox sağ olun.
Prezident İlham Əliyev: Sağ olun, əziz dostlar, əziz idmançılar, idman mütəxəssisləri. Bir daha sizi ürəkdən təbrik edirəm və yeni qələbələrə doğru irəli!
Sonda xatirə şəkli çəkdirildi.

Avropada qaz kəskin bahalaşdı

Avropada təbii qazın qiyməti rekord həddə çatıb. Butov.az xəbər verir ki, martın 8-dən bəri ilk dəfə min kubmetr qazın dəyəri 3 min dolları ötüb. Hazırda qazın sentyabr fyuçersləri 3024 dollara təklif olunur. Ümumilikdə qiymətlər son sutka ərzində təxminən 20 faiz artıb.

Sentyabrda karantin sərtləşdiriləcək?

Son günlər koronavirusa yoluxma hallarının artması fonunda karantin rejiminin sərtləşdirilməsi məsələsi yenidən gündəmə gəlib. İddia olunur ki, payızda yoluxma kəskin artacaq, bu səbəbdən gələn aydan - sentyabrdan etibarən sərt karantin qaydalarının tətbiqinə start veriləcək. İndiki durumda qapanmaların olması real görünürmü? Bu barədə danışan Tibbi Ərazi Bölmələrini İdarəetmə Birliyinin (TƏBİB) infeksion xəstəliklər üzrə işçi qrupunun rəhbəri, infeksionist Vasif Əliyev bildirib ki, yoluxma hallarının sayında artım göz qabağındadır. Payıza doğru getdikcə yoluxmaların artması ehtimalı yüksəkdir. Lakin həkim hesab edir ki, virusa yoluxanların sayının çox olması, qapanmalara əsas vermir. “Hazırda istər maska, istərsə də əlavə vaksin qəbul olunması könüllüdür. Yəni tövsiyə xarakterlidir. Hər bir insana könüllü şəkildə qapalı və insanların çox olduğu məkanlarda xəstəliyin yayılmasının qarşısını almaq üçün maskadan istifadəni tövsiyə edirik. Əgər vaksinin qəbulundan 6 ay keçibsə, hər bir şəxs könüllü olaraq, təkrar vaksin qəbul edə bilər. Bunların məcburi olmasına isə əvvəlki günləri analiz etməklə qərar vermək olar. Təbii ki, qaydalar Opertiv Qərargah tərəfindən müəyyənləşdirilir. Ancaq yoluxma hallarının artması qapanmalar və məhdudiyyətlər üçün əsas vermir. Yoluxma halları artıq bir müddətdir ki, artır. Ancaq əvvəlki dalğalarla müqayisədə xəstəxanalara yerləşdirilənlərin sayı çox deyil. İnsanlar xəstəliyi ev şəraitində, yüngül formada keçirdiyinə görə, əlavə məhdudiyyətlərin tətbiq edilməsini real saymıram. Ancaq önümüzdəki günlərdə yoluxmaların sayı və xəstəliyin ağırlıq dərəcəsi artarsa, bəzi məhdudiyyətlər bərpa edilə bilər”, - deyə TƏBİB nümayəndəsi vurğulayıb.

Azərbaycan Premyer Liqasında nadir hadisə

Azərbaycan Premyer Liqasının 3-cü turu nadir təsadüf olunan hadisə ilə əlamətdar olub. Peşəkar Futbol Liqasının məlumatına görə, “Sabah” – “Neftçi” oyununda bir komandanın qapısına üç penalti zərbəsi təyin olunub. Meydan sahibləri bu üç imkandan ikisindən yararlana bilib.
Qeyd edək ki, “Sabah” – “Neftçi” oyunu 2:1 hesabı ilə başa çatıb. Azərbaycan çempionatları tarixində sonuncu belə hadisə 17 il əvvəl yaşanıb. 2005/06 mövsümünün “Gənclərbirliyi” – “Şahdağ” görüşündə də qonaqlar cəzalanıb. 2005-ci il dekabrın 10-dakı görüşdə hər üç penaltini Pathe Banqura yerinə yetirib. Sumqayıt təmsilçisinin hücumçusu bu imkanlardan ikisindən istifadə edib. Həmin qarşılaşmada meydan sahibləri 3:2 hesablı qələbə qazanıb.

Qərb liderlərindən Ukraynaya dəstək

Almaniya kansleri Olaf Şolts, ABŞ prezidenti Co Bayden, Fransa lideri Emmanuel Makron və Böyük Britaniyanın baş naziri Boris Conson arasında telefon danışığı baş tutub. Bu barədə "Reuters" agentliyi məlumat yayıb. Telefon danışığı zamanı Zaporojye atom elektrik stansiyasındakı vəziyyət müzakirə edilib. Söhbət zamanı Qərb liderləri stansiyanın təhlükəsizliyinin təmin edilməsinə, həmçinin Beynəlxalq Atom Enerjisi Agentliyinin (MAQATE) əməkdaşlarının AES-ə səfər etməsinə çağırıblar. Dörd ölkənin liderləri növbəti dəfə Ukraynaya dəstək nümayiş etdiriblər. Liderlər, həmçinin Yaxın Şərq regionunda tərəfdaşlara dəstəyin gücləndirilməsinin zəruriliyini və İranın sabitliyi pozan regional fəaliyyətlərini məhdudlaşdırmaq üçün birgə səyləri müzakirə ediblər.

Ermənilərin çoxu Laçından çıxıb

Laçın rayonunun Zabux və Sus kəndlərində, eləcə də Laçın şəhərində qanunsuz məskunlaşan ermənilərin əksəriyyəti ərazini tərk edib. Bu barədə “Kavkazskiy uzel” nəşri yazıb. Bildirilir ki, Rusiya sülhməramlılarının nəzarəti altında olan bölgələrdə cəmi bir neçə ailə qalıb. Ermənilərin bəziləri Xankəndinə, qalanı Ermənistana gedib. Nəşr yazır ki, qondarma qurumun Laçındakı "nümayəndəsi" ermənilərə yaşayış məntəqələrini tərk etməyi tapşırıb. Bəzi ailələrə əlavə 5 gün vaxt verilib. Məlumata görə, hər üç yaşayış məntəqəsində artıq elektrik enerjisi və rabitə xətti kəsilib. Laçında yerləşən mağazalardan birinin sahibi Aida Balikyan qeyd edib ki, şəhərdə işğal illərində məskunlaşıb. “Ermənistan hökuməti eksperiment olaraq bizi Laçına yerləşdirdiklərini söylədi. Biz də hökumətə inandıq və bu yerlərə gəldik. Məlum oldu ki, verdikləri vədlərin hamısı yalandır”, - deyə o qeyd edib.

Lənkəranda həkim intihar edib

Lənkəranda tanınmış stomatoloq intihar edib. Butov.az xəbər verir ki, hadisə şəhərin Raypo adlanan ərazisində baş verib. 1986-cı il təvəllüdlü Müşfiq Zaman oğlu Bağırov yarımçıq tikilidə özünü asaraq intihar edib. Lənkəran rayon prokurorluğunun əməkdaşları hadisə yerinə baxış keçiriblər. Meyit müayinə olunması üçün aidiyyatı üzrə təhvil verilib. Ölümün səbəbləri araşdırılır. Faktla bağlı araşdırmalar davam edir.

Kipr Türkiyəyə qarşı İsraildən “Dəmir günbəz” alır

Kipr İsraildən "Dəmir günbəz" hava hücumundan müdafiə sistemləri almaq istəyir. Bu barədə Yunanıstanın "Kathimerini" qəzəti məlumat yayıb. Bildirilir ki, Kiprin Müdafiə Nazirliyi "Dəmir günbəz"in alınması ilə bağlı hökumətin qərarını həyata keçirməyə başlayıb və artıq İsraillə müqavilələr imzalanıb. İsrail Müdafiə Nazirliyi məlumatı şərh etmək istəməyib. Nəşrin məlumatına görə, sistem Kipr tərəfindən Türkiyəyə qarşı istifadə ediləcək.

“Qəbələ” liderliyə yüksəldi

Futbol üzrə Azərbaycan Premyer Liqasının III turunda "Kəpəz" klubu "Qəbələ" ilə üz-üzə gəlib. Butov.az xəbər verir ki, görüş "Qəbələ"nin 3:0 hesablı üstünlüyü ilə yekunlaşıb. Bu nəticədən sonra xallarının sayını 9-a çatdıran "Qəbələ" liderliyə yüksəlib. İkinci sırada yer alan "Sabah" da eyni xala malikdir. 3 görüşün hamısında uduzan "Kəpəz" isə 9-cu sıradadır.

BƏƏ səfiri 6 ildən sonra İrana qayıdır

Birləşmiş Ərəb Əmirliklərinin (BƏƏ) İrandakı səfiri Seyf Məhəmməd əl-Zaabi yaxın günlərdə Tehrandakı vəzifəsini bərpa edəcək. Bu barədə “Reuters” BƏƏ Xarici İşlər Nazirliyinə istinadən məlumat yayıb. BƏƏ səfirinin İrana qayıtması Əbu-Dabinin diplomatik nümayəndəlik səviyyəsini səfir səviyyəsinə yüksəltmək barədə əvvəlki qərarı çərçivəsində baş tutub. Ölkənin İrandakı səfiri 2016-cı ilin yanvarında geri çağırılıb. BƏƏ hakimiyyəti İranın nüvə proqramına qarşı çıxıb və ABŞ-ın Tehrana qarşı məhdudiyyətlərini dəstəkləyib.