22-08-2022, 21:35
İkinci mövsümə yekun vurulub
“İrəli” İctimai Birliyinin təşkilatçılığı ilə gənc sosial işçilər üçün həyata keçirilən “Essentials of Social Work” adlı təlim proqramının ikinci mövsümünə yekun vurulub.
Birliyin Mətbuat xidmətindən Butov.az-a verilən məlumata görə, təlim proqramının bağlanış mərasimində çıxış edən “İrəli” İctimai Birliyinin sədri Şahin Rəhmanlı qeyd edib ki, gənclərlə işin ən vacib məsələlərindən biri bu işi peşəkar şəkildə mənimsəmiş kadrların olmasıdır. Təşkilatın “gənclərlə iş üzrə keyfiyyət nişanı”nın təmin edilməsi, gənc təlimçi və fasilitatorların formalaşması istiqamətində daim çalışdığını bildirən Şahin Rəhmanlı gənclərə gələcək fəaliyyətlərində uğurlar arzulayıb.
“İrəli” İctimai Birliyinin Sosial iş üzrə katibi, layihə rəhbəri Günel Abbaszadə vurğulayıb ki, layihə sosial işi praktik cəhətdən aşılamağa, sosial işçilərlə və onların fəaliyyətləri ilə yaxından tanış olmağa, habelə gənclərin bilik və bacarıqlarını möhkəmləndirməyə hesablanıb. 42 saatlıq təlim proqramı çərçivəsində müxtəlif mövzularda qrup işləri aparıldığı, sosial iş üzrə mütəxəssislərlə görüşlərin keçirildiyi də tədbir müddətində diqqətə çatdırılıb.
Qeyd edək ki, gənc sosial işçilər üçün nəzərdə tutulan “Essentials of Social Work” layihəsi çərçivəsində ümumilikdə 100-ə yaxın gənc iştirak edib. Layihənin növbəti mövsümünün sentyabr ayında keçirilməsi nəzərdə tutulur.
22-08-2022, 21:33
Son sutkada vaksin vurulmayıb
Azərbaycanda son sutkada koronavirus əleyhinə vaksin vurulmayıb. Bu barədə Nazirlər Kabineti yanında Operativ Qərargahdan məlumat verilib. Ölkədə vurulan vaksinlərin ümumi sayı 13 848 567, birinci mərhələ üzrə vaksinasiya olunanların ümumi sayı 5 371 683, ikinci mərhələ üzrə vaksinasiya olunanların sayı 4 861 143, üç və daha çox doza vaksin vurduranların sayı 3 357 691, pozitiv nəticədən sonra buster doza üzrə vaksinasiya olunanların sayı isə 258 050 təşkil edir.
22-08-2022, 21:31
Azərbaycanda bir gündə 8 nəfər koronavirusdan öldü
Azərbaycanda koronavirus (COVID-19) infeksiyasına 144 yeni yoluxma faktı qeydə alınıb, 112 nəfər müalicə olunaraq sağalıb. Bu barədə Nazirlər Kabineti yanında Operativ Qərargahdan məlumat verilib. Son sutkad COVID-19 üçün götürülən analiz nümunələri müsbət çıxmış şəxslər arasında 8 nəfər ölüb. İndiyədək ümumilikdə 808 713 nəfər koronavirus infeksiyasına yoluxub. Onlardan 795 222 nəfər müalicə olunaraq sağalıb, 9793 nəfər vəfat edib, aktiv xəstə sayı 3698 nəfərdir. Son sutka ərzində 2280, hazırkı dövrədək isə 7 122 716 test aparılıb.
22-08-2022, 21:27
Ukrayna öz itkilərini elan etdi
Rusiya ilə müharibədə 9 minə yaxın ukraynalı döyüşçü həlak olub. Bu barədə Ukrayna Silahlı Qüvvələrinin Ali Baş Komandanı Valeri Zalujni bildirib. “Müharibədə təkcə hərbi qulluqçular, əlinə silah götürənlər deyil, bizim balaca övladlarımız da iştirak edir. Körpələrin yeganə günahı bu dövrdə doğulmasıdır” - o çıxışında deyib. Qeyd edək ki, Rusiya-Ukrayna müharibəsi bu ilin fevralın 24-dən başlayıb.
22-08-2022, 21:24
Tankçılarımız yarımfinala hazırlaşır
“Beynəlxalq Ordu Oyunları-2022” yarışları çərçivəsində keçirilən “Tank biatlonu” müsabiqəsində iştirak edən hərbi qulluqçularımız yarımfinal mərhələsinə hazırlıqlarını davam etdirirlər. Bu barədə Müdafiə Nazirliyindən məlumat verilib. Tankçılarımız yarımfinalda istifadə olunacaq döyüş maşınlarına baxış keçirib və ştat silahlarından yoxlama atışları icra ediblər. Qeyd edək ki, Rusiya Federasiyasının Moskva şəhərinin Alabino hərbi poliqonunda keçirilən beynəlxalq müsabiqə avqustun 27-dək davam edəcək.
22-08-2022, 21:21
Bolqarıstan Azərbaycandan qaz tədarükünü artırır
Bolqarıstan hökuməti qaz tədarükünü artırmaq üçün Azərbaycanla danışıqları bərpa edəcək. Bunu Bolqarıstanın enerji naziri Rozen Xristov bildirib. “Biz həcmin artırılması və qiymətlə bağlı razılaşma üçün Azərbaycanla intensiv danışıqlara başlamaq niyyətindəyik. Həcmi artırmaq üçün Azərbaycan tərəfi ilə danışıqlar apara bilərik. Onların şərtləri var, məsələ yenə qiymətlə bağlıdır. Biz əlavə həcmlə bağlı razılığa gəlməmişik, buna görə də bazar ertəsindən danışıqlara başlayacağıq”, - deyə nazir vurğulayıb.
22-08-2022, 21:18
Avropa İttifaqı: Ermənistan-Türkiyə danışıqları yeni imkanlar açacaq
Avropa İttifaqı (Aİ) hesab edir ki, Ermənistan-Türkiyə münasibətlərinin normallaşması bu ölkələr üçün yeni imkanlar açacaq. Bu haqda Aİ-nin Ermənistandakı səfiri Andrea Viktorin Armenpress-ə müsahibəsində bildirib. Onun sözlərinə görə, Aİ münasibətlərin normallaşması proseslərinə həmişə fəal dəstək verir. "Ermənistan və Türkiyə arasında birbaşa danışıqlar təşəbbüsünü dəstəklədiyimizi vurğulayan ictimai bəyanatlar var. Ümid edirəm ki, bu, münasibətlərin nizamlanmasına gətirib çıxaracaq", - diplomat bildirib. Onun fikrincə, danışıqlar kontekstində Ermənistanın baş naziri ilə Türkiyə prezidenti arasında telefon danışığı mühüm addım olub. "Biz tərəqqi görmək istəyirik, çünki bunun insanlar üçün faydalı olduğuna və onlar üçün yeni imkanlar açacağına inanırıq", - Andrea Viktorin əlavə edib. Ermənistanla Türkiyə arasında diplomatik əlaqələr yoxdur, iki ölkə arasında sərhəd 1993-cü ildən Ankaranın təşəbbüsü ilə bağlıdır. 2021-ci ilin dekabrında Ermənistan və Türkiyə normallaşma danışıqları üçün xüsusi nümayəndələrini təyin ediblər. Ermənistanı parlamentin vitse-spikeri Ruben Rubinyan, Türkiyəni ABŞ-dakı keçmiş səfir Serdar Kılıç təmsil edir. Diplomatlar artıq dörd raund danışıqlar keçiriblər, birinci görüş Moskvada, digər üç görüş isə Vyanada keçirilib. Bundan əlavə, Ermənistanın baş naziri ilə Türkiyə prezidenti arasında ilk telefon danışığı iyul ayında baş tutub.
22-08-2022, 21:16
Şəkidə yanğının söndürülməsinə 2 helikopter cəlb olundu
Fövqəladə Hallar Nazirliyinin “112” qaynar telefon xəttinə Şəki rayonunun Kiş kəndi yaxınlığında dağlıq ərazidə yanğın baş verməsi barədə məlumat daxil olub. Məlumatla əlaqədar dərhal FHN-in Dövlət Yanğından Mühafizə Xidmətinin yanğından mühafizə bölmələri çağırış üzrə cəlb olunub. Yanğınsöndürmə işlərini sürətləndirmək və daha geniş əraziyə yayılmasının qarşısını almaq məqsədilə, ərazinin mürəkkəb relyef xüsusiyyəti nəzərə alınaraq yanğınla mübarizə tədbirlərinə FHN-in Mülki müdafiə qoşunları, Şimal-qərb Regional Mərkəzinin müvafiq qüvvələri və Aviasiya dəstəsinin iki ədəd helikopteri cəlb olunub. Hazırda yanğınsöndürmə işləri davam etdirilir.
22-08-2022, 21:13
“Aztəminatlı ailələrə yardım edilməsə, vəziyyət pis olacaq” - Deputat
"Unun və digər qida məhsullarının qiymətlərinin qalxması dünyada ümumi problemə çevirilib. Təkcə Azərbaycanda belə deyil, bütün dünyada qiymət artımı hiss olunur. Məsələn, Avropda hazırda 11-12 faiz inflyasiya gedir, bu rəqəm bizdə bir qədər çoxdur. Bu da bizim idxalımızın çoxluğundan irəli gəlir". Bunu açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov deyib. Son günlər unun və çörəyin bahalaşması ilə bağlı əhalinin narazılığına münasibət bildirən deputat Azərbaycanın taxılı əsasən Ukrayna, Rusiya, Qazaxstan və başqa ölkələrdən aldığını xatırladıb: "Onların vəziyyətinin müharibə ilə əlaqədar gərgin olması səbəbilə taxılın bir tonunun qiyməti 365 dollara qaldırılıb. Buna görə də istehsalçılar belə qərara gəlirlər ki, çörəyin qiymətini artırsınlar". V.Əhmədov çörəyin strateji qida məhsulu olduğunu vurğulayıb. Parlamentari hesab edir ki, bahalaşma səbəbindən aztəminatlı ailələrə yardım edilməlidir: "Əlbəttə, çörək strateji qida məhsuludur. Əsasən rayonda, insanların sıx olduğu yerlərdə ondan çox istifadə olunur. Çörək əhalinin birbaşa büdcəsi ilə əlaqədardır. Ona görə də, aztəminatlı ailələr, pensiyaçılar və kifayət qədər vəsaitləri olmayan insanlar nəzərə alınmalıdır. Onlara yardımlar edilməlidir. Əgər yardım edilməsə, vəziyyət çətin olacaq. İnsanların ailə büdcəsində problemlər yarana bilər. Təklif edirəm ki, sosial paket şəklində bu məsələlərə baxılsın. Mən bunu hamıya şamil etmirəm. Ancaq aztəminatlı ailələrə, o cümlədən pensiyası aşağı olan insanlara müəyyən qədər yardımlar edilməlidir ki, qiymət artımı ilə bağlı problem yaşamasınlar. Yay fəsli ilə əlaqədar olaraq kənd təsərrüfatı məhsulları, meyvələr kifayət qədərdir. Buna baxmayaraq, onların da qiyməti yüksəkdir. Faktiki olaraq bütün qida məhsullarının qiyməti artıb. Hesablamaq lazımdır ki, bir insanın dolanması, bir ailənin saxlanması üçün nə qədər artıma gedilməlidir. Hesab edirəm ki, bu məsələyə baxılmalıdır və baxılacaq".
Maaş və pensiyaların yenidən artırılması barədə təkliflərə gəlincə, V.Əhmədov deyib: “Biz büdcəyə yenidən baxdıq. Müəyyən qədər artımlar oldu. O cümlədən, ərzaqla bağlı 193 milyon manat əlavə vəsait ayırdıq ki, taxılın gətirilməsi, qapalı məkanların, xüsusilə də Müdafiə Nazirliyi və digər qurumların ərzaqla bağlı problemləri olmasın. Dövlət büdcəsindən artıq vəsait bölünüb. Ancaq ehtiyyat fondları var. Ondan istifadə etmək olar. Əgər belə qiymət artımları varsa, xüsusi aztəminatlı ailələr, pensiyaçılar, şəhid ailələri maddi yardımla təmin olunmalıdır. Elə insanlar var ki, 350-400 manat penisya alır. Problemi var. Ümumiyyətlə, elə etmək lazımdır ki, çörəklə bağlı problem olmasın. İnsanlar çörək almaqla bağlı problemlə üzləşməsinlər”.
22-08-2022, 21:08
Kərbəlada uçqun oldu - Ölənlər var
İraqın Kərbəla şəhərində uçqun baş verib. Butov.az xəbər verir ki, Qəttarat İmam Əli türbəsinin damı çöküb. Hadisə zamanı ibadət ocağında xeyli sayda ziyarətçi olub. İlkin məlumata görə, uçqun nəticəsində 4 nəfər ölüb, 6 nəfər yaralanıb.Əraziyə xilasetmə briqadaları və təcili tibbi yardım qrupları cəlb olunub. Uçqun altında qalanların olduğu bildirilir. Xilas edilənlər arasında üç uşaq olub. Ölü sayının artması istisna edilmir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!