25-06-2023, 17:01
SOCAR “Şahdəniz” qaz yatağındakı payını satıb
SOCAR Hasilatın Pay Bölgüsü Sazişi çərçivəsində "Şahdəniz" qaz-kondensat yatağında iştirak payını satıb. Bu barədə SOCAR-dan bildirib. Məlumata görə, bu il martın 31-də SOCAR yataqdakı 14,35%-lik payını CQD Upstream MMC-yə satıb. Həmin tarixdə Qrup, CQBK və CQBK Hold Co-da 14.35 faizlik iştirak payını CQD Midstream MMC-yə ötürüb.
25-06-2023, 16:33
İranda toz fırtınası səbəbiylə 330 nəfər xəstəxanaya yerləşdirildi
İranın Sistan-Bəlucistan əyalətində son üç gün ərzində toz fırtınası səbəbindən 330 nəfər xəstəxanaya yerləşdirilib. Bu barədə Sistan-Bəlucistan Böhran İdarəetmə idarəsinin baş direktoru Məcid Mohibbi bildirib. Onun sözlərinə görə, xəstəxanalara aparılan 273 nəfər ilkin müayinədən sonra evə buraxılıb, 57 nəfərin müalicəsi davam etdirilir. Sistan-Bəlucistan Meteoroloji Proqnoz və Xəbərdarlıq Mərkəzinin rəhbəri Əli Mollaşahi isə mətbuata açıqlamasında vilayətin şimal bölgələrində toz fırtınasının bazar ertəsi gününə qədər davam edəcəyini və küləyin sürətinin saatda 100 kilometrə çatacağını proqnozlaşdırdıqlarını bildirib. O, səhhətində problem olan insanlara küçəyə çıxmamaq barədə xəbərdarlıq edib.
25-06-2023, 16:02
Gürcüstanın sabiq prezidentindən Putinlə bağlı paylaşım
Rusiyada dünən baş verən hadisələr Putini xeyli zəiflədib. Bunu Gürcüstanın sabiq prezidenti Mixeil Saakaşvili özünün "Twitter" hesabında yazıb. O qeyd edib ki, Rusiyada yaşanan hadisələr Ukraynanın müharibədə qələbəsini daha da yaxınlaşdırıb.
Xatırladaq ki, "Vaqner" muzdluları Rusiyada hərbi qiyam qaldırıb. Prezident Vladimir Putin xalqa müraciəti zamanı "Vaqner" rəhbərinin hərəkətlərini xəyanət adlandırıb. O, qiyamın yatırılması üçün müvafiq tapşırıqların verildiyini bildirib. "Vaqner" döyüşçüləri gün ərzində Rostov və Voronej şəhərlərini, eləcə də Lipetsk vilayətini ələ keçirib. Daha sonra Priqojin qan tökülməsinin qarşısını almaq üçün "Vaqner"in geri çəkiləcəyini bildirib. Belarus Prezidenti Aleksandr Lukaşenko Rusiya hakimiyyəti ilə Priqojin arasında danışıqlara vasitəçilik edib. Kremlin sözçüsü Dmitri Peskov bildirib ki, Priqojin Belarusa köçəcək.
25-06-2023, 15:49
Türkiyə və Azərbaycan hərbiçilərinin iştirakı ilə sürü dronlar sınaqdan keçirildi
Qars şəhərində Türkiyə və Azərbaycan hərbçilərinin iştirakı ilə keçirilən "Heydər Əliyev-2023" hərbi təlimləri zamanı STM müdafiə şirkəti tərəfindən hazırlanan sürü dronlar sınaqdan keçirilib. Bu barədə Türkiyənin "SavunmaSanayiST" hərbi portalı məlumat yayıb. Təlim zamanı əvvəlcədən təqdim edilən plana uyğun olaraq 6 pilotsuz uçuş aparatı (PUA) havaya qalxıb. Şirkət tərəfindən hazırlanan xüsusi sistem vasitəsilə PUA-lar bir-birilə avtomatik əlaqə quraraq birlikdə tapşırıqları icra ediblər. Dronlar verilən tapşırıqları aralarında bölüşdürərək hədəfləri müəyyən edib və onları izləyiblər. Sınaq zamanı "Kargu", "Togan" və "Boyga" model PUA-lardan istifadə edilib. Şirkətin təqdim etdiyi sürü dron layihəsi "Bumin" adlandırılıb. Bu ad Göytürk xaqanlığının qurucusu olan Bumin xaqanın adından götürülüb.
Xatırladaq ki, "Heydər Əliyev-2023" hərbi təlimləri may ayında keçirilib. Təlimin ssenarisinə əsasən, xüsusi təyinatlı bölmələr şərti düşmənin terror qruplaşmasının yerləşdiyi mağaraya basqın fəaliyyətini yerinə yetiriblər. Tankların, piyada döyüş maşınlarının, artilleriya və tank əleyhinə bölmələrin heyətləri helikopterlərin dəstəyi ilə şərti düşmən mövqelərini tam dəqiqliklə məhv ediblər. Təlimə cəlb edilmiş snayperlər müxtəlif məsafədən praktiki atışları yerinə yetiriblər.
25-06-2023, 15:40
İranla münasibətlərimizin ən aşağı səviyyəsindəyik - Səfir
“Biz hər bir ölkə ilə, xüsusən də qonşularımızla yaxşı münasibətlərdə maraqlıyıq”. Bunu Azərbaycanın İsraildəki səfiri Muxtar Məmmədov İsrailin "Globes" qəzetinə müsahibəsində deyib. “İranla enerji və nəqliyyat sahələrində ticarət əlaqələrimiz, əməkdaşlığımız var. Azərbaycan heç vaxt heç bir ölkə ilə münasibətlərinə xələl gətirən olmayıb. Təəssüf ki, müstəqilliyimizi əldə etdikdən sonra İranla münasibətlərimizin ən aşağı səviyyəsindəyik. Münasibətləri indiki vəziyyətə gətirən Azərbaycan deyil. Biz İranla yaxşı münasibətlərin olmasını istəyirik, amma səfirliyə hücumun araşdırılması üçün heç bir nəticə görməmişik”,- deyə səfir bildirib.
Xatırladaq ki, yanvarın 27-də Bakı vaxtı ilə səhər saat 8:30 radələrində Azərbaycanın İrandakı səfirliyinə silahlı hücum olub. Məlumata görə, hücum edən şəxs "Kalaşnikov" markalı avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar. Terror aktını törədən İran vətəndaşı Yasin Hüseynzadə saxlanılıb. İran hakimiyyəti terror aktını ört-basdır etmək üçün hadisənin guya ailə münaqişəsi zəminində baş verdiyini açıqlayıb. Lakin əldə olunan faktlar Tehranın saxta iddialarını tamamilə ifşa edib.
25-06-2023, 15:16
Ukrayna müharibəsiylə bağlı vəziyyətə sutka boyu nəzarət edirəm - Putin
Rusiya prezidenti Vladimir Putin Ukrayna müharibəsi ilə bağlı vəziyyətə sutka boyu nəzarət etdiyini bildirib. Putin bu barədə “Rossiya-1” telekanalının efirində danışıb. O, jurnalist Pavel Zarubinin müharibənin gedişatına nə qədər vaxt ayırması ilə bağlı sualına da cavab verib. “Əlbəttə, ilk növbədə bu məsələyə diqqət yetirirəm. Səhər gün bununla başlayır və axşam da bununla bitir", - Putin vurğulayıb. O, son vaxtlar gecələr az yatdığını bildirib.
Xatırladaq ki, ötən ilin 24 fevralında Rusiyanın Ukraynaya hücumu nəticəsində başlayan müharibə davam edir. Rusiya Ukraynanın Xerson və Zaporojye vilayətlərini, habelə qondarma "Donetsk XR" və "Luqansk XR" separatçı qurumlarını birtərəfli qaydada ilhaq etdiyini açıqlayıb.
25-06-2023, 14:38
Şimali Koreyadan Rusiyaya dəstək təklifi gəldi
Şimali Koreya "Vaqner" üsyanına qarşı mübarizədə Rusiyaya dəstək təklif edib. Bu barədə KXDR-nin rəsmi Mərkəzi Xəbər Agentliyi (KCNA) məlumat yayıb. Belə ki, Şimali Koreyanın xarici işlər nazirinin müavini İm Conq İl Rusiyanın Pxenyandakı səfiri Aleksandr Matseqora ilə görüşdə Rusiyadakı son silahlı üsyanın uğurla yatırılacağına qəti inandığını bildirib. "Güclü Rusiya ordusu və xalqı sınaqlardan mütləq qalib çıxacaq və Ukraynaya qəhrəmancasına qalib gələcək”, - o əlavə edib. Bu, Pxenyanın Rusiyanı məhv etmək üçün "ABŞ-ın kukla müharibəsi” adlandırdığı Ukraynada müharibə başlayandan bəri Moskvaya son dəstək mesajıdır. BMT Təhlükəsizlik Şurasının daimi üzvü kimi Rusiya uzun müddətdir ki, nüvə və raket proqramlarına görə BMT və Qərbin geniş sanksiyaları altında olan Şimali Koreyaya artan təzyiqlərə qarşı çıxıb.
25-06-2023, 14:11
Suriyanın İdlib şəhəri bombalandı
Rusiya döyüş təyyarələri Suriyanın İdlib şəhərini bombalayıb. Bu barədə TRT kanalı məlumat yayıb. Bildirilir ki, İdlibin Cisir əş-Şuğur rayon mərkəzində tərəvəz bazarına hücum edilib. İlkin məlumata görə, 9 mülki şəxs ölüb, 30 nəfər yaralanıb.
25-06-2023, 14:07
Ukrayna hücumun ilk 2 həftəsinin təcrübəsindən istifadə edir
Ukrayna ordusu taktikanı təkmilləşdirmək və əsas sahələrdə sabit irəliləyiş əldə etmək üçün əks-hücumun ilk 2 həftəsinin təcrübəsindən istifadə edir. Bu barədə "Ukrinform" məlumat yayıb. Bildirilib ki, Tavriya istiqamətində son sutka ərzində Ukrayna hərbçilərinin hücum əməliyyatlarında qismən uğur və müdafiədə taktiki mövqedə təkmilləşmə həyata keçirilir. Xatırladaq ki, ötən ilin 24 fevralında Rusiyanın Ukraynaya hücumu nəticəsində başlayan müharibə davam edir. Rusiya Ukraynanın Xerson və Zaporojye vilayətlərini, habelə qondarma "Donetsk XR" və "Luqansk XR" separatçı qurumlarını birtərəfli qaydada ilhaq etdiyini açıqlayıb.
25-06-2023, 13:58
İranda həbs edilən tələbənin anası danışdı
“Fəridlə ikinci dəfə danışdıq. Həm də bu dəfə daha çox söhbətləşə bildik. Hal-əhval tutduqdan sonra birdən soruşdum: o qız sənin əleyhinə ifadə veribmi? - Nə qız, - dedi. Söylədim ki, Fərid, İrana niyə getdiyini bilirəm”. Bunu 2023-cü ilin martında İranda casusluq ittihamı ilə həbs olunan Azərbaycan vətəndaşı Fərid Səfərlinin anası Dilarə Əsgərova deyib. O, oğlu ilə danışığının ardını belə təsvir edib: “Fərid bir az duruxdu və dedi: “Ana, o mənim əleyhimə dünya dağılsa da, ifadə verməz. Bu günə qədər mənim əleyhimə nə ifadə verən var, nə də ortada sübut var. Sadəcə, hər dəfə istintaqda sual belə olur: bir neçə dil bilən, Avropada təhsil alan adam, vəziyyətin pis vaxtında niyə İrana gəlib, nə səbəbə? Həm də ana, o qızı da mənimlə bərabər tutdular”. Qayınana damarım tutdu, dedim ki, sən onun dərdini çəkmə, onu buraxıblar, ata-anasının yanındadır, olan bizə oldu, özünü düşün. Bu sözümü eşidəndə Fəridin səsindən necə sevindiyini hiss etməmək mümkün deyildi.
- Ana, nə yaxşı ki, onu azad ediblər, - deyən oğlumun sevincdən parlayan gözəl gözlərini xəyal etdim və kövrəldim. Fərid bir anlıq taleyi başqalarının əlində olan çarəsiz məhkumdan dönüb oldu xoşbəxtlikdən göyün yeddinci qatında uçan sevgiliyə. O, bu vəziyyətdə belə özünü unudub qızı düşünürdü”. Dilarə Əsgərovanın sözlərinə görə, oğlundan iranlı sevgilisinin onun həmin ölkəyə gedişini niyə əngəlləmədiyini soruşub. “Axı o qız İrandakı vəziyyəti bilirdi. Fərid dedi ki, “ana qərarı özüm vermişəm. Qız mənə demişdi İrana gəlmə”…. Çox kövrəldim, ondakı bu saf sevgiyə heyran oldum. Mövzunu dəyişməyə çalışdım. Dedim ki, Fərid, məsələ ictimailəşib, hamı sənin İrana niyə geldiyini bilir…Yəqin ki, Azərbaycana qayıdanda səni qınayacaqlar… Bir qədər susdu və soruşdu: - Ana, səncə, burdan çıxa biləcəm? Qəfil verilən bu sual dünyanı başıma uçurdu. Bu, artıq ilk danışığımızda mənə “möhkəm ol!” deyən yetkin Fərid deyildi. Uşaq vaxtı özündən böyüklərin haqsızlığına məruz qalanda yanıma qaçıb kömək istəyən balaca Fəridim idi. Yenə “böyüklərin" haqsızlığına məruz qalıb”. D.Əsgərova deyir ki, oğlunu sakitləşdirmək üçün dövlət rəsmilərinin onun işi ilə məşğul olduğunu söyləyib. Ana iki ölkə arasındakı vəziyyətin pis olmasından narahatlığını ifadə edədərk, oğlunun durumunun onu çox üzdüyünü vurğulayıb.
Xatırladaq ki, Almaniyadakı Yena Universitetində təhsil alan 27 yaşlı Fərid Səfərli bu il fevralın 20-də eyni universitetdə oxuduğu iranlı qızın ardınca Tehrana gedib. Martın 4-dən onunla əlaqə kəsilib və o, Almaniyaya qayıtmayıb. Daha sonra İranda ona qarşı casusluq ittihamı ilə cinayət işi açıldığı bildirilib. İran tərəfi azərbaycanlı tələbəni hazırda həbsdə saxlayır. İndiyə kimi İranda Fərid Səfərliyə 3 dəfə məhkəmə qurulub. Birinci məhkəmədə tərcüməçi ilə təmin olunsa da, son iki prosesdə fars dilini bildiyinə görə, ona tərcüməçi verilməyib. F.Səfərli anasına bildirib ki, yaxın günlərdə ona hökm oxunacağı gözlənilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!