1-12-2023, 23:19
Terror təşkilatına məxsus 16 hədəf məhv edildi
Türkiyənin təhlükəsizlik qüvvələri tərəfindən İraqın şimalında hava əməliyyatı keçirilib.
Bu barədə Türkiyənin Milli Müdafiə Nazirliyindən bildirilib.
Məlumata əsasən, Türkiyə vətəndaşlarının və sərhədlərinin təhlükəsizliyi, eləcə də terrorçular tərəfindən planlaşdırılan hücumların qarşısının alınması məqsədilə keçirilən əməliyyat zamanı terror təşkilatına məxsus 16 hədəf məhv edilib. Bu hədəflərin içində təşkilatın məsul şəxslərinin olduğu bildirilir.
Əməliyyat zamanı çox sayda terrorçu zərərsizləşdirilib.
1-12-2023, 22:46
Güləşçilərimiz dünya çempionatının üçüncü günündə 5 medal qazandı
Kişi güləşçilərdən ibarət Azərbaycan millisi Bakıda keçirilən hərbçilər arasında dünya çempionatının üçüncü gününü 5 medalla başa vurublar.
63 kiloqram çəki dərəcəsində mübarizə aparan Ziya Babaşov rusiyalı rəqibinə qalib gələrək qızıl medal qazanıb.
Yunan-Roma güləşçisi Ülvi Qənizadə də (72 kiloqram) əlcəzairli Merabet Abdelmalekini üstələyərək fəxri kürsünün ən yüksək pilləsinə qalxıb.
Azərbaycanın digər təmsilçisi Murad Əhmədiyev (92 kiloqram) final görüşündə italiyalı rəqibini məğlubiyyətə uğradaraq birinci yerin sahibi olub.
Fərid Sadıqlı (55 kiloqram) və Azad Əliyev (82 kiloqram) isə bürünc medal uğrunda görüşlərdə rəqiblərindən üstün olaraq üçüncü yerləri tutublar.
Bununla da yığma komandanın dünya çempionatında qazandığı medalların sayı 18-ə çatıb. Yarış dekabrın 3-dək davam edəcək.
1-12-2023, 22:13
Türkiyə bütün böhranlarda ədalət və bərabərlik üçün çalışıb - Ərdoğan
COVID-19 pandemiyası və Rusiya-Ukrayna münaqişəsindən sonra dünyamız indi də İsrail-Fələstin qarşıdurmasının acı nəticələri ilə üz-üzədir. Türkiyə bütün bu böhranlarda sülhün yanında olub, ədalət və bərabərlik üçün çalışıb. Biz iqlim dəyişikliyinə də bu prizmadan yanaşırıq.
Bu fikirləri Türkiyə Prezidenti Rəcəb Tayyib Ərdoğan BMT-nin İqlim Dəyişikliyi üzrə Çərçivə Konvensiyasının Tərəflər Konfransının Dubayda keçirilən 28-ci sessiyasında çıxışı zamanı bildirib.
Türkiyənin 2053-cü ilədək xalis sıfır emissiya hədəfinə nail olmağı nəzərdə tutduğunu deyən Ərdoğan vurğulayıb ki, ölkəsi 2030-cu ilə qədər emissiyaların azaldılması hədəfini iki dəfə artırıb.
Bildirilib ki, bu kontekstdə ilin sonunadək karbon qazı emissiyalarının 66,6 milyon ton azalacağı gözlənilir. Türkiyə bərpa olunan enerji mənbələrinin ümumi elektrik enerjisindəki payını 55 faizə çatdıraraq sahə üzrə Avropada 5-ci, dünyada isə 12-ci yerdə qərarlaşıb.
Qeyd edək ki, səfər çərçivəsində Türkiyə Prezidentinin bir sıra dövlət və hökumət rəhbərləri ilə ikitərəfli görüşləri keçirilib.
1-12-2023, 21:48
Zelenskinin xanımı: “Onun növbəti və ya ikinci müddətə prezident olmasını istəmirəm”
Ukrayna prezidenti Volodimir Zelenskinin xanımı Yelena Zelenskaya həyat yoldaşının yenidən prezident seçilməsini istəmir.
Bu barədə o, "The Economist” jurnalına müsahibəsində bildirib.
“Mən onun növbəti və ya ikinci müddətə prezident olmasını istəmirəm. Bu mümkün deyil. Ola bilsin ki, başqa bir şey edək”, – xanım Zelenskaya Ukraynada hərbi əməliyyatlar başa çatdıqdan sonra ailə planlarını müzakirə edərkən deyib.
Birinci xanımın sözlərinə görə, hərbi qarşıdurma bitdikdən sonra əri onunla və uşaqlarla bir araya gələcək.
1-12-2023, 20:40
Nazir Ermənistanın sülh prosesinə qarşı törətdiyi maneələrdən danışdı
Xarici işlər naziri Ceyhun Bayramov dekabrın 1-də Şimali Makedoniyanın paytaxtı Skopye şəhərində təşkil olunan Azərbaycan tədqiqatları üzrə II Avropa Konfransının xüsusi sessiyasında çıxış edib, Ermənistan tərəfindən sülh prosesinə qarşı törədilən maneələrdən danışıb.
Bu barədə Xarici İşlər Nazirliyindən məlumat verilib.
Bildirilib ki, çıxış zamanı nazir post-münaqişə dövründə Azərbaycanın xarici siyasət prioritetləri, Azərbaycan və Ermənistan arasında münasibətlərin perspektivləri, habelə regional vəziyyət barədə ölkəmizin mövqeyini diqqətə çatdırıb.
Xarici işlər naziri 19 sentyabr tarixində keçirilmiş antiterror tədbirlərini səciyyələndirən amillər barədə məlumat verib.
O, ölkəmizin bölgədə apardığı bərpa və quruculuq işləri barədə məlumat verib. Bununla yanaşı, Ermənistanın ölkəmizə qarşı törətdiyi mina təhdidlərini xüsusi vurğulayıb.
C.Bayramov həmçinin Ermənistanın hərbi potensialını gücləndirməyə və bəzi üçüncü tərəflərin bölgədə destruktiv fəaliyyətinə diqqət çəkib. Bu kimi fəaliyyətin bölgədə sülh və sabitliyə xidmət etmədiyini vurğulayıb.
Antiterror tədbirlərindən sonra ölkəmizə qarşı qərəzli və təxribatçı ittihamların regiona səfər edən, eləcə də Ermənistanda aktiv fəaliyyət göstərən BMT-nin ixtisaslaşmış qurumlarının nümayəndələrinin hesabat və bəyanatları ilə ziddiyyət təşkil etdiyi və ölkəmizə qarşı iddiaların əsassızlığının sübut olunduğu xatırlanıb.
Xarici işlər naziri həmçinin son illər ərzində Azərbaycanın beynəlxalq əhəmiyyətli təşəbbüsləri diqqətə çatdırıb, çoxtərəfli diplomatiya sahəsində ölkəmizin fəal rolundan bəhs edib.
Son dövrlərdə bölgədə və dünyada baş verən hadisələr fonunda enerji təhlükəsizliyinin artan əhəmiyyətindən bəhs edən nazir C.Bayramov, enerji təhlükəsizliyinin təmin edilməsi, alternativ enerji sahəsində səylərə, eləcə də nəqliyyat dəhlizlərinin şaxələndirilməsi istiqamətində çoxtərəfli əməkdaşlığın genişləndirilməsinin vacibliyinə diqqət yönəldib.
Daha sonra o, tədbir iştirakçılarının çoxsaylı suallarını cavablandırıb.
Beynəlxalq Münasibətlərin Təhlili Mərkəzinin (AIR Center) təşkilatçılığı və Xarici İşlər Nazirliyinin dəstəyi ilə keçirilmiş konfransda Avropadan 30-dan çox düşüncə və tədqiqat mərkəzinin nümayəndələri, habelə nüfuzlu mütəxəssislər iştirak edib.
İlk dəfə ötən il Varşavada keçirilmiş Azərbaycan tədqiqatları üzrə Avropa Konfransı ölkəmizlə bağlı siyasi, iqtisadi və mədəni mövzular daxil olmaqla fərqli sahələr üzrə tədqiqatların təşviq edilməsi, eləcə də Azərbaycan barədə məlumatların dünya ictimaiyyətinə düzgün çatdırılması və akademik səviyyədə obyektiv təhlillərin aparılmasına töhfə məqsədini daşıyır.
1-12-2023, 20:10
İsrail ordusu Qəzza zolağına 200-dən çox zərbə endirib
Döyüş əməliyyatlarının bərpasından sonra İsrail ordusu Qəzza zolağına 200-dən çox zərbə endirib.
Bu barədə İsrail ordusunun teleqram kanalında məlumat verilib.
Bildirilir ki, son bir neçə saat ərzində quru, hava və dəniz qüvvələri Qəzza zolağının şimalında və cənubunda Xan Yunis və Rəfah da daxil olmaqla terrorçu hədəflərə zərbələr endirib.
Məlumatda deyilir ki, İsrail ordusu HƏMAS-ın tunel şəbəkəsinə, atış məntəqələrinə və əməliyyat komandanlıq mərkəzlərinə zərbələr vurub.
1-12-2023, 19:44
Sahibə Qafarova Çexiyada rəsmi səfərdədir
Milli Məclisin sədri Sahibə Qafarovanın başçılığı ilə parlament nümayəndə heyəti Çex Respublikasına rəsmi səfərə gəlib.
Bu barədə Milli Məclisin Mətbuat və ictimaiyyətlə əlaqələr şöbəsindən məlumat verilib.
Çex Respublikasının paytaxtı Praqanın Vatslav Havel Beynəlxalq Hava Limanında nümayəndə heyətini Çexiya Parlamentinin Deputatlar Palatasının Azərbaycanla parlamentlərarası əlaqələr üzrə dostluq qrupunun rəhbəri Yan Kubik, Azərbaycanın Çexiyadakı səfiri Adış Məmmədov və digər rəsmi şəxslər qarşılayıblar.
Səfərdə nümayəndə heyətimiz Çexiya Parlamentdə olacaq, keçirilən görüşlərdə ikitərəfli və parlamentlərarası əlaqələrimizin inkişaf perspektivləri, regional təhlükəsizlik və qarşılıqlı maraq doğuran digər məsələlər ətrafında fikir mübadiləsi aparılacaq.
1-12-2023, 19:31
Baş katibin səlahiyyət müddəti uzadıldı
Avropada Təhlükəsizlik və Əməkdaşlıq Təşkilatına (ATƏT) üzv dövlətlər təşkilatın baş katibi Helqa Şmidin səlahiyyət müddətinin uzadılmasına razılıq verib.
Bu barədə ATƏT-in fəaliyyətdə olan sədri Buyar Osmani məlumat verib.
Təşkilatın milli azlıqlar üzrə ali komissarı Kayrat Abdrahmanovun, təşkilatın media azadlığı üzrə nümayəndəsi Tereza Ribeyronun və Demokratik Təsisatlar və İnsan Hüquqları Bürosunun (DTİHB) sədri Matteo Mekkakinin də səlahiyyət müddəti uzadılıb.
ATƏT ölkələri Maltanın 2024-cü il üçün sədrliyini təsdiqləyiblər.
Osmani ATƏT baş katibinin və təşkilatın üç rəsmisinin səlahiyyətlərinin nə qədər müddətə uzadılacağını dəqiqləşdirməyib. Şmidin səlahiyyətləri dekabrın 3-də başa çatıb.
Qeyd edək ki, noyabrın 30-dan dekabrın 1-dək Şimali Makedoniyanın paytaxtı Skopyedə ATƏT ölkələrinin xarici işlər nazirlərinin görüşü keçirilib.
1-12-2023, 16:20
Regionlarda “Qəhrəmanını tanı” layihəsi həyata keçirilib
“Böyük Qayıdış” Gənclər Təşkilatı tərəfindən Vətən müharibəsində iştirak etmiş qəhrəman qazilərimizi cəmiyyətdə, xüsusilə gənclər arasında tanıtmaq məqsədilə regionlarda “Qəhrəmanını tanı” layihəsi icra olunub.
Layihə çərçivəsində Mingəçevir Dövlət Universitetində, Gəncədə Azərbaycan Dövlət Aqrar Universitetində, Azərbaycan Dövlət İqtisad Universitetinin Zaqatala filialında, Milli Qəhrəman Mübariz İbrahimov adına Biləsuvar Bağça-Məktəb-Lisey Kompleksində və Lənkəran Dövlət Universitetində Vətən müharibəsi qaziləri ilə tələbə gənclərin silsilə görüşləri həyata keçirilib.
Azərbaycan Respublikasının Gənclər Fondunun dəstəyi, Gənclərin İnkişaf və Karyera Mərkəzinin (GİKM) tərəfdaşlığı ilə həyata keçirilən görüşlərdə təşkilatın idarə heyətinin üzvləri, tərəfdaş qurumların nümayəndələri, Vətən müharibəsi qaziləri və tələbə gənclər iştirak ediblər.
Çıxış edən natiqlər bu kimi layihələrin keçirilməsində əsas məqsədin qələbənin əldə olunmasında gənc döyüşçülərin rolunun diqqətə çatdırılması, qəhrəmanlıq ənənələrinin qorunması, onların gələcək nəsillərə ötürülməsi, eyni zamanda, gənclərimizin milli-mənəvi dəyərlərə sadiq, hərbi-vətənpərvərlik ruhunda yetişdirilməsi olduğunu vurğulayıblar. Müharibədə zəfərin qazanılmasında hərbi qulluqçuların döyüş qabiliyyətinin və ruh yüksəkliyinin mühüm rol oynadığını diqqətə çatdırıblar.
Qeyd olunub ki, düşmənə qarşı vuruşan döyüşçünün qalibiyyət əzmi onun yenilməzliyinin təməlində dayanan başlıca cəhətdir. Hərb tariximizin şərəfli səhifəsi olan və bizi Qələbə zirvəsinə ucaldan 44 günlük Vətən müharibəsində xalqımızın qeyrətli və vətənpərvər oğulları erməni işğalçılarını məğlub etdilər, torpaqlarımızın düşmən tapdağında qalmasına son qoydular, uzun illər qədəmimizin dəymədiyi, nəfəsimizin toxunmadığı, həsrətini çəkdiyimiz yurdlarımızda üçrəngli bayrağımızı qaldırdılar.
Görüşlərdə qazilərimiz özlərinin keçdiyi döyüş yolu ilə yanaşı, döyüş yoldaşlarının qəhrəmanlıqlarını da gənclərin diqqətinə çatdırıblar. Qazilərin çıxışından sonra görüşlər sual-cavab formatında davam edib, gəncləri maraqlandıran suallar cavablandırılıb.
Qeyd edək ki, təşkilat tərəfindən ötən illərdə bu formatda görüşlər Bakı, Sumqayıt şəhərlərində və Abşeron rayonunda yerləşən ali təhsil və orta ixtisas təhsili müəssisələrində təşkil olunub.
1-12-2023, 16:12
Rusiya Qarabağ ermənilərinə humanitar yardım göndərdi
Rusiya İnsan Hüquqları üzrə Müvəkkilinin ofisi Qarabağdan Ermənistan Respublikasına köçmüş ermənilərə 6 ton humanitar yardım göndərib.
Humanitar yardıma yataq dəstləri, döşəklər, uşaqlar üçün gigiyena dəstləri, avadanlıq, geyim, makaron, bişmiş ət konservləri daxildir.
“Məncə, bütün bunlar bu ağır vəziyyətə düşən insanlara faydalı olacaq”, - Ombudsman Tatyana Moskalkova İnsan Hüquqları Evində baş tutan yükün göndərilməsi mərasimində bildirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!