23-09-2024, 23:18
Ərdoğanın Pezeşkianla ilk görüşü
Türkiyə Prezidenti Rəcəb Tayyib Ərdoğan iranlı həmkarı Məsud Pəzeşkianla görüşüb.
Dövlət başçıları arasında ilk görüş Nyu-Yorkda baş tutub.
Türkiyə ilə İran arasında ikitərəfli münasibətlər, eləcə də Yaxın Şərqdə gərginliyin artması müzakirə edilib.
Ərdoğan Türkiyə ilə İran arasındakı tarixi və mədəni əlaqələrin əməkdaşlığına töhfə verdiyini vurğulayıb. O, bütün sahələrdə əlaqələrin bundan sonra da inkişaf edəcəyinə əminliyini ifadə edib.
23-09-2024, 23:16
Azərbaycan bu ölkə ilə memorandum imzaladı
Azərbaycan Respublikasının xarici işlər naziri Ceyhun Bayramov BMT Baş Assambleyasının 79-cu sessiyasının yüksək səviyyəli həftəsi çərçivəsində Keniya Respublikasının baş naziri, xarici işlər və diaspor naziri Musalia Mudavadi ilə görüşüb.
Bu barədə Xarici İşlər Nazirliyindən bildirilib.
Görüş zamanı Azərbaycan və Keniya arasında ikitərəfli əməkdaşlığın perspektivləri, habelə çoxtərəfli əməkdaşlıq məsələləri müzakirə edilib.
C.Bayramov iki ölkə arasında beynəlxaq təşkilatlar, xüsusilə BMT və Qoşulmama Hərəkatı çərçivəsində mövcud əməkdaşlığın səviyyəsindən məmnunluq ifadə edib, o cümlədən Qoşulmama Hərəkatına sədrlik dövründə ölkəmizin təşəbbüslərinə göstərdiyi dəstəyə görə Keniya tərəfinə təşəkkür edib.
Görüş zamanı, iki ölkə arasında siyasi, iqtisadi və humanitar sahədə münasibətlərin inkişaf perspektivləri nəzərdən keçirilib. Ölkəmizin Keniyada səfirliyinin fəaliyyətə başlamasının münasibətlərin inkişafına mühüm töhfə verdiyi diqqətə çatdırılıb.
C.Bayramov, həmçinin iqlim dəyişikliyi ilə mübarizə sahəsində əməkdaşlığın inkişaf etdirilməsi perspektivlərinə toxunaraq, bu il ölkəmizin ev sahibliyi etdiyi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) hazırlıq işləri, bu çərçivədə əməkdaşlıq perspektivlərindən ətraflı bəhs edib.
Görüş zamanı tərəflər, həmçinin qarşılıqlı maraq doğuran digər regional və beynəlxalq məsələləri müzakirə ediblər.
Daha sonra, nazirlər arasında Azərbaycan və Keniya arasında siyasi məsləhətləşmələrin keçirilməsinə dair Anlaşma Memorandumunun imzalanma mərasimi keçirilib.
23-09-2024, 22:25
İsrail Livana hücum əmri verdi - Müharibə başlayır?
İsrailin müdafiə naziri Yoav Qalant ordunun bütün Livan ərazisinə zərbələr endirəcəyini açıqlayıb.
Hücum əməliyyatı çərçivəsində İsrail ordusu Hizbullahın hərbi infrastrukturuna, o cümlədən silah anbarlarına hücum etmək niyyətindədir.
"Yüksək rütbəli komanda heyəti və raket anbarları da daxil olmaqla Livan boyu Hizbullah hədəflərinə qarşı zərbələri genişləndiririk", - nazir sosial media hesabında yazıb.
İsrail Müdafiə Qüvvələrinin Baş Qərargah rəisi, general-leytenant Herzi Halevi bildirib ki, İsrail ordusu sentyabrın 23-də “önləyici hücum əməliyyatı”na başlayıb, məqsədi Hizbullahın son 20 ildə tikilmiş hərbi infrastrukturuna hücum etməkdir.
İsrail ordusunun nin məlumatına görə, sentyabrın 23-də hərbçilər Livanda Hizbullahın 1100-dən çox obyektinə hücum edib.
Benyamin Netanyahu videomüraciətində bildirib ki, uzun müddət Hizbullah mülki şəxslərdən qalxan kimi istifadə edib, evlərə və zirzəmilərə raketlər yerləşdirib.
“Bu raketlər birbaşa şəhərlərimizə, vətəndaşlarımıza yönəlib. Xalqımızı Hizbullah hücumlarından qorumaq üçün bu silahları məhv etməliyik. Bu səhərdən etibarən İsrail ordusu sizi təhlükə zonasını tərk etməyiniz barədə xəbərdar edir. Sizi bu xəbərdarlığı ciddi qəbul etməyə çağırıram”, - baş nazir özünün Telegram kanalında yayımlanan videoda bildirib.
N12 telekanalının məlumatına görə, sentyabrın 23-də İsrail hökuməti 48 saatlıq “xüsusi vəziyyət”in tətbiqinə qərar verib.
23-09-2024, 21:36
Ceyhun Bayramov həmkarı ilə sülhdən danışdı
Azərbaycanın xarici işlər naziri Ceyhun Bayramov BMT Baş Assambleyasının 79-cu sessiyası çərçivəsində Portuqaliyanın xarici ilər naziri Paulo Rangel ilə görüşüb.
Bu barədə XİN-in rəsmi "X" hesabında paylaşım edilib.
Görüş zamanı ikitərəfli və çoxtərəfli əməkdaşlıq gündəliyinin məsələləri, həmçinin iqtisadiyyat, investisiyalar, enerji təhlükəsizliyi, bərpa olunan enerji, nəqliyyat və rabitə sahələrində əməkdaşlıq perspektivləri nəzərdən keçirilib.
Portuqaliyanın xarici işlər nazirinə Azərbaycanın regionda münaqişədən sonrakı reallıqlar, yenidənqurma və sülh təşəbbüsləri barədə məlumat verilib.
23-09-2024, 20:52
Milli Məclisin bugünkü iclasında nələr müzakirə edildi
Sentyabrın 23-də Yeddinci çağırış Azərbaycan Respublikası Milli Məclisinin ilk iclası keçirilib.
Milli Məclisin Mətbuat və ictimaiyyətlə əlaqələr şöbəsindən verilən məlumata görə, Azərbaycan Respublikasının Prezidenti İlham Əliyev iclasda iştirak edib.
İclasın əvvəlində Azərbaycan Respublikasının Dövlət Himni səslənib.
Sonra Prezident İlham Əliyev geniş nitq söyləyib. Prezident Milli Məclisin üzvlərini Yeddinci çağırış Milli Məclisin fəaliyyətə başlaması münasibəti ilə təbrik edib, onlara uğurlar arzulayıb.
Sonra Milli Məclisin ən qocaman deputatı kimi iclasa sədrlik edən Ziyad Səmədzadə Yeddinci çağırış Milli Məclisin ilk iclasını açıq elan edib.
Ziyad Səmədzadə Milli Məclisə üzv seçildiklərinə görə deputatları təbrik edib və Yeddinci çağırış Milli Məclisə seçilmiş deputatların siyahısını oxuyub.
Sonra deputat Ziyad Səmədzadə bildirib ki, Milli Məclisin Daxili Nizamnaməsinin müvafiq maddələrinə əsasən, iclasın gündəliyinə 9 məsələ daxildir. Bunlar – Milli Məclisin Hesablayıcı komissiyasının yaradılması, Milli Məclisin sədrinin və sədr müavinlərinin seçilməsi, İntizam komissiyasının yaradılması, Milli Məclisin komitə sədrlərinin və sədr müavinlərinin seçilməsi ilə bağlı məsələlərdir.
İclasın gündəliyi təsdiq olunub.
Sahibə Qafarova gizli səsvermə nəticəsində Milli Məclisin sədri vəzifəsinə seçilib.
Milli Məclisin sədri Sahibə Qafarova iclasda çıxış edib.
Daha sonra Milli Məclis sədrinin birinci müavini və müavinlərinin seçilməsi məsələsinə baxılıb. Sahibə Qafarova Milli Məclis sədrinin birinci müavini vəzifəsinə deputat Əli Əhmədovun namizədliyini təklif edib. Açıq səsvermə yolu ilə Əli Əhmədov Milli Məclis sədrinin birinci müavini seçilib.
Bunun ardınca Milli Məclis sədrinin müavinlərinin seçilməsi məsələsinə baxılıb. Səsvermə nəticəsində Ziyafət Əsgərov, Musa Qasımlı və Rafael Hüseynov spikerin müavinləri seçiliblər.
Parlamentin sədri Sahibə Qafarova gündəliyin növbəti məsələsinin Milli Məclisin İntizam Komissiyasının yaradılması olduğunu bildirib. O, İntizam komissiyasının tərkibinə deputatlar Kamal Cəfərov, Afət Həsənova, Məlahət İbrahimqızı, Eldar İbrahimov, Kamaləddin Qafarov, Nəsib Məhəməliyev, Hikmət Məmmədov, Məşhur Məmmədov, Asim Mollazadə, Səttar Möhbalıyev və Nizami Səfərovun namizədliklərini təklif edib. Komissiyanın tərkibi səsə qoyularaq qəbul edilib.
İclasda deputat Əli Hüseynli Milli Məclisin Hüquq siyasəti və dövlət quruculuğu komitəsinin, Arzu Nağıyev Müdafiə, təhlükəsizlik və korrupsiya ilə mübarizə komitəsinin, Zahid Oruc İnsan hüquqları komitəsinin, Sadiq Qurbanov Təbii ehtiyatlar, energetika və ekologiya komitəsinin, Azər Əmiraslanov İqtisadi siyasət, sənaye və sahibkarlıq komitəsinin, Tahir Rzayev Aqrar siyasət komitəsinin, Musa Quliyev Əmək və sosial siyasət komitəsinin, Əhliman Əmiraslanov Səhiyyə komitəsinin, Hicran Hüseynova Ailə, qadın və uşaq məsələləri komitəsinin, Şahin İsmayılov Gənclər və idman komitəsinin, Fazil Mustafa İctimai birliklər və dini qurumlar komitəsinin, Siyavuş Novruzov Regional məsələlər komitəsinin, Anar İsgəndərov Elm və təhsil komitəsinin, Polad Bülbüloğlu Mədəniyyət komitəsinin, Səməd Seyidov Beynəlxalq münasibətlər və parlamentlərarası əlaqələr komitəsinin sədrləri təsdiq ediliblər.
Sahibə Qafarova gündəliyin sonuncu məsələsinin Milli Məclisin komitələrinin sədr müavinlərinin seçilməsi haqqında olduğunu söyləyib.
Sonra Deputat Elşən Musayev Milli Məclisin Hüquq siyasəti və dövlət quruculuğu komitəsinin, Qüdrət Həsənquliyev Müdafiə, təhlükəsizlik və korrupsiya ilə mübarizə komitəsinin, Arzuxan Əlizadə İnsan hüquqları komitəsinin, Fatma Yıldırım Təbii ehtiyatlar, energetika və ekologiya komitəsinin, Azər Badamov İqtisadi siyasət, sənaye və sahibkarlıq komitəsinin, Razi Nurullayev Aqrar siyasət komitəsinin, Elşad Musayev Əmək və sosial siyasət komitəsinin, Rəşad Mahmudov Səhiyyə komitəsinin, Jalə Əliyeva Ailə, qadın və uşaq məsələləri komitəsinin, Könül Nurullayeva Gənclər və idman komitəsinin, Sahib Alıyev İctimai birliklər və dini qurumlar komitəsinin, Nurlan Həsənov Regional məsələlər komitəsinin, Fariz İsmayılzadə Elm və təhsil komitəsinin, Günay Əfəndiyeva Mədəniyyət komitəsinin, Nigar Arpadarai Beynəlxalq münasibətlər və parlamentlərarası əlaqələr komitəsinin sədr müavinləri təsdiq ediliblər.
23-09-2024, 20:20
Mehriban Əliyeva ağacəkmə aksiyasında - FOTO
Sentyabrın 23-də Bakının Xətai rayonundakı “Gənclik” parkında ağacəkmə aksiyası keçirilib.
Heydər Əliyev Fondunun prezidenti Mehriban Əliyeva, Fondun vitse-prezidenti Leyla Əliyeva və ailə üzvləri tədbirdə iştirak ediblər.
Heydər Əliyev Fondunun “Regional İnkişaf” İctimai Birliyinin və COP29 könüllülərinin qatıldığı aksiyada 1000 ədəd Eldar şamı ağacı əkilib.
Qeyd edək ki, “Gənclik” parkı Heydər Əliyev Fondunun təşəbbüsü ilə salınıb. Ərazisi 43 hektar olan parkda yaşıllıq zolaqları ilə yanaşı, əyləncə və istirahət sahələri yaradılıb.
Xatırladaq ki, 2019-cu il noyabrın 11-də “Gənclik” parkı yeni salınarkən Azərbaycan Respublikası Prezidenti İlham Əliyev və birinci xanım Mehriban Əliyeva Heydər Əliyev Fondunun “Regional İnkişaf” İctimai Birliyinin “Təbiət naminə birləş, Həyat naminə birləş!” layihəsi çərçivəsində ağacəkmə aksiyasında iştirak etmişlər. Dövlətimizin başçısı bir zamanlar baxımsız olan bu ərazidə abadlaşdırma işlərinin aparılması ilə bağlı müvafiq tapşırıqlar vermişdi.
2021-ci il avqustun 26-da istifadəyə verilən “Gənclik” parkı insanların rahat istirahət ünvanı olmaqla yanaşı, eyni zamanda, paytaxtın ekoloji mühitinə öz töhfəsini verir.
Onu da qeyd edək ki, Azərbaycanda ekoloji vəziyyətin yaxşılaşdırılması üçün dövlət səviyyəsində həyata keçirilən layihələrə birinci xanım Mehriban Əliyevanın rəhbərlik etdiyi Heydər Əliyev Fondu da xüsusi diqqət yetirir. Fond ölkəmizdə yeni yaşıllıqların salınması və mövcud yaşıllıq sahələrinin qorunması üzrə müxtəlif layihələr icra edir. “Gənclik” parkı ərazisindəki budəfəki ağacəkmə aksiyası isə ekoloji tarazlığa daha bir töhfə oldu.
23-09-2024, 20:11
Ceyhun Bayramov BMT-nin iclasında
Azərbaycanın xarici işlər naziri Ceyhun Bayramov BMT Baş Assambleyasının 79-cu sessiyasının yüksək səviyyəli həftəsi çərçivəsində Uqandanın sədrliyi ilə "Silahlı münaqişələr zamanı mülki əhalinin müdafiəsi: Fələstin xalqı ilə həmrəylik" mövzusunda təşkil olunmuş Qoşulmama Hərəkatının Nazirlər iclasında iştirak edib.
Bu barədə XİN-in rəsmi "X" hesabında paylaşım edilib. İclasda Qoşulmama Hərəkatının beynəlxalq münasibətlərdə ədalətin və qanunun aliliyinin həqiqi müdafiəçisi kimi rolu vurğulanıb.
"Azərbaycan 2019-2023-cü illərdə Qoşulmama Hərəkatına sədrliyi, habelə Hərəkatın səmərəliliyinin artırılması istiqamətində davamlı səyləri və təşəbbüsləri ilə yanaşı, Qoşulmama Hərəkatı Troykasının fəal üzvü kimi Hərəkatın rolunun və əhəmiyyətinin daha da artırılmasına sadiq qalır. Azərbaycan hesab edir ki, Fələstin məsələsinin bütün aspektlərdə ədalətli və davamlı həlli BMT-nin müvafiq qətnamələrinə, beynəlxalq hüququn norma və prinsiplərinə uyğun olaraq həll edilənə qədər Hərəkatın gündəliyində prioritet olaraq qalmalıdır", - deyə paylaşımda qeyd edilib.
23-09-2024, 19:33
Mehriban Əliyeva və ailə üzvləri Əhmədli məscidində - FOTO
Əhmədli qəsəbəsindəki 120 yaşlı məscid əsaslı təmirdən sonra istifadəyə verilib. 1904-cü ildə inşa olunmuş məsciddə təmir və bərpa işləri Heydər Əliyev Fondunun təşəbbüsü ilə həyata keçirilib.
Heydər Əliyev Fondunun prezidenti Mehriban Əliyeva, Fondun vitse-prezidenti Leyla Əliyeva və ailə üzvləri sentyabrın 23-də Əhmədli qəsəbə məscidində olublar.
Bildirilib ki, qəsəbə sakinlərinin müraciətinə dərhal reaksiya verən Heydər Əliyev Fondunun təşəbbüsü ilə məscidin fasadında və ətrafında təmir-bərpa işləri aparılıb. Burada kişi və qadınlar üçün nəzərdə tutulmuş ibadət yerləri, dəstəmaz otaqları, mərasim evi əsaslı təmir olunub, məscidin ətrafı abadlaşdırılıb.
Eyni zamanda, Əhmədli qəsəbəsinin əsas girişində və qəsəbənin bir sıra mərkəzi küçələrində tarixi görkəm qorunmaqla abadlaşdırma işləri görülüb, qənbər daşları düzülüb, yaşıllıq zolaqları salınıb. Təmir olunan küçələrdə yeni kanalizasiya xətləri də çəkilib. Bir sıra fərdi evin dam örtüyü, darvazaları dəyişdirilib.
Qəsəbədə yerləşən abidə kompleksi və ətrafındakı park yenidən qurulub, yaşıllıq sahələri salınıb. Görülmüş işlərdə qəsəbənin özünəməxsus memarlığı qorunub saxlanılıb.
23-09-2024, 19:18
Polislərə yeni maşınlar verildi
Prezident İlham Əliyevin tapşırığına uyğun olaraq, Azərbaycan Respublikası Daxili İşlər Nazirliyi tərəfindən Naxçıvan Muxtar Respublikası daxili işlər orqanlarının maddi-texniki bazasının gücləndirilməsi məqsədilə tədbirlər həyata keçirilir.
Bu barədə Naxçıvan Muxtar Respublikası Daxili İşlər Nazirliyinin mətbuat xidmətindən bildirilib.
Qeyd olunub ki, bu istiqamətdə görülən işlər çərçivəsində "Kia Sportage" markalı avtomobillər ictimai təhlükəsizliyin daha da etibarlı qorunması üçün şəxsi heyətin xidməti istifadəsinə verilib.
23-09-2024, 17:42
Parlamentin Hesablayıcı Komissiyasının yeni üzvləri - SİYAHI
Azərbaycan Respublikası Milli Məclisi Daxili Nizamnaməsinin 40-cı maddəsinə uyğun olaraq, Azərbaycan Respublikası Milli Məclisinin Hesablayıcı komissiyası yaradılıb. Komissiyanın tərkibinə aşağıdakı deputatlar əlavə edilib.
1. Həmzəyev Naqif Ələşrəf oğlu,
2. Hüseynova Sevinc Əmirəhməd qızı,
3. Quliyev Eldar Allahyar oğlu,
4. Məmmədov Soltan Teymur oğlu,
5. Muradov Rövşən Şahbaz oğlu,
6. Salmanova Səbinə Qədir qızı,
7. Zabelin Mixail Yuryeviç.
Qeyd edək ki, ötən çağırışdan fərqli olaraq sözügedən komissiyada Naqif Həmzəyev, Soltan Məmmədov, Rövşən Muradov, Səbinə Salmanova təmsil olunur.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!