6-11-2024, 14:40
COP29 qonaqları üçün xüsusi taksilər olacaq
COP29 konfransında iştirak etmək üçün ölkəmizə səfər edən nümayəndə heyətləri, eləcə də yerli iştirakçılar üçün sərnişindaşıma xidmətlərinin əlçatanlığının təmin edilməsi məqsədilə “Bolt” və “Yango” taksi şirkətlərinin mobil tətbiqlərində “COP29” kateqoriyası yaradılıb.
Bu barədə COP29 Azərbaycan Əməliyyat Şirkətindən bildirilib.
COP29 Azərbaycan Əməliyyat Şirkəti və Rəqəmsal İnkişaf və Nəqliyyat Nazirliyi tərəfindən bu ilin 11-22 noyabr tarixlərində Bakıda keçiriləcək COP29-a qatılacaq on minlərlə iştirakçının tədbir məkanları arasında rahat gediş-gəlişini təmin etmək istiqamətində fəaliyyətini davam etdirir. Bu çərçivədə tədbir iştirakçıları xüsusi marşrut üzrə hərəkət edəcək avtobuslarla yanaşı, “Bolt” və “Yango” kimi şirkətlərin mobil tətbiqlərindən də rahatlıqla istifadə edə biləcəklər. Bunun üçün adıçəkilən taksi şirkətlərinin mobil tətbiqlərinin sifariş menyularına “COP29” kateqoriyası daxil edilib. Bu funksiya sadəcə sifariş prosesini asanlaşdırmır, eyni zamanda sifarişçiləri ən yaxın taksi dayanacağına yönləndirir. Prosesin təhlükəsizliyini nəzərə alaraq, sözügedən taksi şirkətləri tərəfindən bu kateqoriya üzrə xüsusi avtomobillər ayrılıb və müvafiq stikerlərlə fərqləndirilib.
Bununla yanaşı, rəsmi COP29 tərəfdaşı olan “Baku Taxi” şirkəti də konfrans iştirakçılarına öz xidmətlərini təklif edir. Bu şirkətə məxsus taksilər Heydər Əliyev Beynəlxalq Aeroportundakı “Terminal-1” və Bakı Stadionunun müvafiq ərazilərində xidmət göstərəcəklər. Qeyd edək ki, “Baku Taxi”nin xidmətləri konfransda iştirak üçün akkreditasiyadan keçmiş və ya iştiraka dair təsdiq məktubu almış təkərli oturacaq istifadəçiləri üçün ödənişsiz olacaq.
6-11-2024, 14:36
Trampın qələbəsi erməniləri məyus etdi
ABŞ-da keçirilən prezident seçkilərində Respublikaçılar Partiyasının namizədi Donald Trampın qalib gəlməsi Ermənistanda məyusluqla qarşılanıb.
Bunu erməni politoloqlar və siyasi ekspertlərin açıqlama və şərhlərindən, erməni sosial şəbəkələrindəyi paylaşımlardan sezmək olur.
Qeyd edək ki, demokratları təmsil edən hazırkı prezident Co Bayden qondarma “erməni soyqırımı”nı tanıyıb, 2023-cü ildə isə o, 23 illik fasilədən sonra Azərbaycana birbaşa maliyyə yardımlarını qadağan edən bədnam “907-ci düzəliş”in icrasına imza atıb.
Təbii ki, Bayden Adminisistrasiyasının bu addımları erməniləri sevindimişdi. ABŞ-dakı erməni diasporu Kamala Harrisin seçilməsində maraqlı idi. Ermənilər düşünürdülər ki, Demokratlar Partiyasının namizədi Kamala Harrisin hakimiyyətə gəlişi onlara ikinci nəfəs verəcək.
Ötən il Azərbaycanın Qarabağda apardığı və ermənlərin oranı tərk etməsi ilə nəticələnən bir günlük antiterror əməliyyatından sonra Kamala Harrisin vitse-prezidenti olduğu Ağ Ev Adminstrasiyası ilə rəsmi Bakı arasında siyasi münasibətlər pisləşmişdi.
Harrisin özü də bəzi addımları ilə Qarabağ məsələsində mövqeyini ortaya qoymuşdu. Məsələn, Kamala Harris sentyabrın 23-də - Ermənistanın Müstəqillik Günündə ABŞ-ın erməni ictimaiyyətinə göndərdiyi müraciətdə Qarabağdan köçən ermənilərin “təhlükəsiz şəraitdə öz evlərinə” qayıtmalı olduğunu vurğulamış və “erməni soyqırımının unudulmamasına” dair çağırışlar etmişdi.
Xatırladaq ki, İkinci Qarabağ müharibəsi (2020-ci ilin sentyabr-noyabrı) Trampın prezidentliyinin son aylarına təsadüf edirdi. 2020-ci ildə Tramp adminstrasiyasının Azərbaycan-Ermənistan arasındakı müharibə ilə bağlı səssiz mövqeyi müşahidə olunmuşdu.
Amerika Araşdırmaları Erməni Mərkəzinin direktoru, politoloq Suren Sarkisyan hesab edir ki, Baydenin prezidentliyi dövründən fərqli olaraq Trampın zamanında Ermənistan-Amerika münasibətlərində müəyyən passivlik olacaq.
"Ancaq çox şey ABŞ-la necə işləməyimizdən asılıdır", - Sarkisyan deyib.
“Donald Tramp artıq 4 il ABŞ prezidenti vəzifəsini icra edib (2017-ci il yanvarın 20-dən 2021-ci il yanvarın 20-dək). Biz onun prezidentliyinin əsas prinsiplərini görmüşük və bilirik. Amma indi vəziyyət fərqlidir, xeyli vaxt keçib və Tramp ABŞ-ın 47-ci prezidenti seçilib”, - Suren Sarkisyan əlavə edib.
Suren Sarkisyan ümid edir ki, ermənilər yeni yanaşmaların şahidi də ola bilərlər:
“Çünki Trampın yeni komandası var, o, yeni insanlar və müşavirlərlə əhatə olunub. Ermənistan və erməni lobbi təşkilatlarının onunla necə işləyəcəyi çox vacibdir, çünki indi böyük iş meydanı açılıb”.
Politoloq Tramp Administrasiyası ilə gələcəkdə lobbiçilik işi aparanlar arasında Ermənistanın ABŞ-dakı səfirliyinin adını çəkməyib və bunu belə izah edib:
“Düzünü desəm, mən əmin deyiləm ki, bizim səfirliyimiz və Ermənistanın indiki hakimiyyət orqanları respublikaçılarla işləmək arzusundadırlar, onlar respublikaçılarla işləməkdən yayındılar, məndə belə təəssürat yarandı. Hesab edirəm ki, bu səbəbdən son illər Respublika Partiyası ilə ciddi əlaqələr qura bilməmişik. Həm Ermənistanın ABŞ-dakı səfirliyindən, həm də Xarici İşlər Nazirliyindən xüsusi gözləntim yoxdur”.
Politoloq Stepan Danielyan da deyib ki, Ermənistan hakimiyyəti zamanında Trampı dəstəkləməməklə səhv edib.
“Gürcüstan və Azərbaycan hakimiyyəti Trampa, Ermənistan hakimiyyəti isə demokratlara ümid bağladı”, - deyə Danielyan məyusluqda bildirib.
Ermələr sosial şəbəkələrdə də yazırlar ki, Donlad Tarmpın gəlişi Co Bayden administrasiyasına güvənən Nikol Paşinyanı pis vəziyyətdə qoydu. Ermənilər qorxurlar ki, bundan sonra Azərbaycan Ermənistana qarşı daha sərt mövqedən çıxış edəcək və rəsmi Bakı sülh müqaviləsinin imzalanması üçün daha çox güzəşt qoparmaqda israrlı olacaq...
Hətta o da iddia olunur ki, Donald Trampın gəlişi "Zəngəzur dəhlizi"nin açılışına yaşıl işıq yandıracaq...
Digər erməni politoloq Suren Surenyan da ABŞ-dakı seçkilərin nəticələrindən məyusluğunu gizlətməyib.
“Bu seçkilərin nəticələri, təbii ki, Nikol Paşinyanın hökumət siyasətinin iflasını da tam şəkildə ortaya qoydu”, - o deyib.
6-11-2024, 14:13
İlham Əliyev Trampı təbrik etdi
Azərbaycan Prezidenti İlham Əliyev Amerika Birləşmiş Ştatlarının yeni seçilmiş Prezidenti Donald Trampa təbrik məktubu göndərib. Təbrikdə deyilir:
"Amerika Birləşmiş Ştatlarının Prezidenti vəzifəsinə yenidən seçilməyiniz münasibətilə Sizi ürəkdən təbrik edirəm.
Seçkilərdə qazandığınız inamlı qələbə dost Amerika xalqının şəxsən Sizə, yürütdüyünüz siyasi xəttə böyük dəstək və etimadının aşkar ifadəsidir.
Azərbaycan Respublikası Amerika Birləşmiş Ştatları ilə münasibətlərinin hərtərəfli inkişafına xüsusi əhəmiyyət verir.
Siz birinci prezidentlik dövrünüzdə Azərbaycan ilə Birləşmiş Ştatlar arasında dostluq və əməkdaşlıq əlaqələrinin möhkəmlənməsinə, əməkdaşlığımızın davamlı və ardıcıl inkişafına böyük diqqət ayırırdınız. Məmnunluqla qeyd etmək istərdim ki, bu dövr ərzində qarşılıqlı etimad və dəstəyə əsaslanan tərəfdaşlığımız, o cümlədən bir sıra mühüm sahələrdə, xüsusilə də qlobal çağırışlara və terrorizmə qarşı mübarizədə, beynəlxalq sülhün və təhlükəsizliyin gücləndirilməsində, Avropanın enerji təhlükəsizliyinin təmin edilməsində birgə fəaliyyətimiz dinamik və yüksələn xətt üzrə inkişafı ilə səciyyələnirdi. Azərbaycanın enerji strategiyasına Sizin daim qətiyyətli dəstəyinizi xüsusi qeyd etmək istərdim.
Biz Birləşmiş Ştatlar ilə qarşılıqlı fəaliyyətimizin böyük potensialından yararlanaraq ikitərəfli tərəfdaşlığımızı bütün sahələrdə, o cümlədən siyasi, iqtisadi-ticari, təhlükəsizlik, enerji, yaşıl və rəqəmsal keçid və digər istiqamətlər üzrə daha da genişləndirmək və dərinləşdirmək əzmindəyik. İnanırıq ki, Sizin yeni prezidentlik dövrünüzdə Azərbaycan ilə Birləşmiş Ştatlar arasında münasibətlər daha da möhkəmlənəcək, yeni əməkdaşlıq sahələri müəyyən olunacaqdır.
Azərbaycan bundan sonra da Cənubi Qafqazda sülhün və təhlükəsizliyin möhkəmləndirilməsi istiqamətində fəaliyyətini davam etdirəcəkdir.
Əminəm ki, Azərbaycan-ABŞ dostluq münasibətlərinin güclənməsi, ölkələrimizin milli maraqları, o cümlədən milli təhlükəsizlik maraqları əsasında tərəfdaşlığımızın irəli aparılması yolunda bundan sonra da birgə səylər göstərəcəyik.
Bir daha Sizə ən səmimi təbriklərimi yetirir, möhkəm cansağlığı, xoşbəxtlik, dost Amerika xalqının rifahı naminə qarşıdakı ali dövləti fəaliyyətinizdə uğurlar arzulayıram".
6-11-2024, 14:07
Bu gecədən bəzi yollar bağlanır
8 Noyabr – Zəfər Günü ilə əlaqədar olaraq bu gün saat 00:00-dan etibarən Neftçilər, eləcə də 8 Noyabr prospektindən Ağ Şəhər Bulvarı istiqamətinə gedən yollarda tədbir bitənədək nəqliyyat vasitələrinin hərəkəti məhdudlaşdırılacaq.
Bu barədə Daxili İşlər Nazirliyinin (DİN) Baş Dövlət Yol Polisi İdarəsindən (BDYPİ) məlumat verilib.
Qeyd edilib ki, hərəkətin məhdudlaşdırılması “Zəfər” abidəsini ziyarət edənlərin rahat, fasiləsiz və təhlükəsiz hərəkətinin təmin olunması məqsədilə həyata keçirilir.
"Sürücülərdən qeyd edilən istiqamətlərdə nəqliyyat vasitələrinin hərəkətinə tətbiq ediləcək məhdudiyyətləri nəzərə almaları xahiş olunur", - deyə məlumatda vurğulanıb.
6-11-2024, 13:55
Ərdoğan İlham Əliyevin Şuşa sammitindəki təklifini xatırlatdı
Türkiyə Prezidenti Rəcəb Tayyib Ərdoğan Türk Dövlətləri Təşkilatının (TDT) Bişkekdə keçirilən sammitində ticarət-iqtisadi əməkdaşlığın inkişafı üçün nəqliyyat dəhlizlərindən, xüsusilə də Orta Dəhlizdən istifadə etmək və inkişaf etdirmək lazım olduğunu bildirib.
Bu barədə xarici KİV məlumat yayıb.
«Şuşa sammitində Azərbaycan Prezidenti (İlham Əliyev — red.) Orta Dəhlizdən səmərəli istifadə üçün xüsusi nümayəndə təyin etməyi təklif edib», — Ərdoğan xatırladıb.
Türkiyə lideri bu rolda Türkiyə Respublikasının namizədliyini irəli sürməyə hazır olduğunu bildirib. O, həmçinin Türk Dövlətləri üzvləri əhalisinin (175 milyon) və 1,2 trilyon dollar səviyyəsində ticarətin imkanlarını vurğulayıb.
Dünya Bankının məlumatına görə, Orta Dəhliz Çin və Qazaxıstanı Dostıq dəmir yolu stansiyası və ya Horqos keçidi ilə birləşdirən və sonra Qazaxıstandan keçərək Aktau stansiyasına, daha sonra Xəzər dənizindən keçərək Bakı/Ələt limanına gedən dəmir yolundan ibarətdir. Sonra dəhlizin marşrutu Azərbaycan və Gürcüstandan dəmir yolu ilə keçir, daha sonra dəmir yolu ilə Avropaya, Türkiyəyə qədər davam edir və Qara dənizdən keçir.
6-11-2024, 13:49
Türk Dövlətləri Təşkilatının yeni bayrağı
Türk Dövlətləri Təşkilatının (TDT) yeni bayrağı qəbul edilib.
Bu barədə Türk Dövlətləri Təşkilatının Bişkekdə keçirilən Dövlət Başçılarının 11-ci Zirvə görüşündə qərar qəbul olunub.
Türk xalqlarını birləşdirən ortaq tarixi və mədəni dəyərləri nəzərə alaraq və çoxşaxəli əməkdaşlığın, qarşılıqlı tərəqqinin, birlik və həmrəyliyin gücləndirilməsinə sadiqliyini təsdiq edərək, Türkdilli Dövlətlərin Əməkdaşlıq Şurası Xarici İşlər Nazirləri Şurasının 22 avqust 2012-ci il tarixində Bişkekdə keçirilmiş iclasının Memorandumuna əsasən, Dövlət Başçıları Şurası aşağıdakılar barədə qərar qəbul edib:
1 və 2 nömrəli əlavələrdə göstərildiyi kimi, Türk Dövlətləri Təşkilatının bayrağı onun təsviri ilə birlikdə qəbul edilsin və bu Qərarın 1-ci bəndinə uyğun olaraq, digər Türkdilli Dövlətlərin Əməkdaşlıq Şurası bayraqlarının rəng sxemlərinin Türk Dövlətləri Təşkilatının bayrağına uyğunlaşdırılmasına davam edilsin və bu təşkilatların yenilənmiş bayraqları qəbul edilsin.
6-11-2024, 13:44
Paşinyan da Trampı təbrik edib
Ermənistan Baş naziri Nikol Paşinyan ABŞ Prezidenti seçilən Donald Trampı təbrik edib.
Bu barədə Paşinyan özünün sosial media hesabında yazıb.
“Biz ikitərəfli strateji münasibətlər qurmaq üçün birgə işləməyi səbirsizliklə gözləyirik”, - o qeyd edib.
6-11-2024, 13:15
"Dostum... " - Ərdoğandan Trampa təbrik
Türkiyə Prezidenti Rəcəb Tayyib Ərdoğan ABŞ-nin prezidenti seçilən Donald Trampı təbrik edib.
Bu barədə o, özünün sosial media hesabında yazıb.
"ABŞ-da böyük mübarizədən sonra prezident seçkilərində qalib gələn və yenidən ABŞ prezidenti seçilən dostum Donald Trampı təbrik edirəm", - o qeyd edib.
"Yeni dövrdə Türkiyə-ABŞ əlaqələrinin güclənəcəyini və Fələstin məsələsi və Rusiya-Ukrayna müharibəsi başda olmaqla regional və qlobal böhranların və müharibələrin sona çatacağını ümid edirik. Daha ədalətli dünya üçün daha çox səy göstəriləcəyinə inanıram. Ümid edirəm ki, seçkilər dost və müttəfiq ABŞ xalqı və bütün bəşəriyyət üçün faydalı olacaq", - Ərdoğan əlavə edib.
6-11-2024, 12:53
Sabahın havası
Milli Hidrometeorologiya Xidməti sabahın hava proqnozunu açıqlayıb.
Noyabrın 7-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gecə bəzi yerlərdə qısamüddətli az yağış yağacağı ehtimalı var.
Mülayim şimal-qərb küləyi gündüz şimal-şərq küləyi ilə əvəz olunacaq.
Havanın temperaturu gecə 5-8° isti, gündüz 12-16° isti olacaq. Atmosfer təzyiqi 772 mm civə sütunundan 775 mm civə sütununa yüksələcək. Nisbi rütubət gecə 70-75 %, gündüz 55-60 % olacaq.
Azərbaycanın rayonlarında hava şəraiti əsasən yağmursuz keçəcək. Lakin gecə bəzi şərq rayonlarında qısamüddətli yağış yağacağı, şimşək çaxacağı gözlənilir. Arabir duman olacaq. Qərb küləyi əsəcək.
Havanın temperaturu gecə 3-7° isti, gündüz 12-17° isti, dağlarda gecə 2-5° şaxta, yüksək dağlıq ərazilərdə 5-10° şaxta, gündüz 3-7° isti olacaq.
6-11-2024, 12:35
Dünyadakı bütün müharibələrə son qoyacam! - Trampdan ilk AÇIQLAMA
ABŞ-ın 47-ci prezidenti seçilən Donald Tramp Floridada tərəfdarları qarşısında çıxış edərkən qalib gəldiyini bildirib.
“Uşaqlarımızın layiq olduğu güclü, təhlükəsiz və firavan Amerikanı yaratmayana qədər dincəlməyəcəyəm”, - o deyib.
Seçicilər qarşısında çıxışı zamanı Tramp, Ukrayna da daxil olmaqla bütün müharibələrə son qoyacağını bildirib.
Tramp "Vəzifə müddətim ərzində müharibə olmayacaq. Mən müharibələri dayandıracağam. Vəzifəmin 4 ilində müharibə olmayıb" deyib.
Bundan əlavə, o, ABŞ-ın siyasi kursunu 180 dərəcə döndərəcəyini və amerikalıların ölkələrində nəzarəti bərpa etdiyi dövrə qayıtmaq niyyətində olduğunu açıqlayıb. O, həmçinin vergilərin azaldılmasını və neft hasilatının artırılmasını elan edərək, ABŞ-ın Rusiya və Səudiyyə Ərəbistanından daha çox neftə sahib olacağını vəd edib.
Xatırladaq ki, 5 noyabr seçkisində respublikaçı Donald Tramp qələbə üçün lazım olan seçici səslərinin sayını (270) toplayıb ikinci dəfə prezident Ağ Evə qayıdacaq.
Bu qələbə onu Qrover Klivlenddən sonra fasilələrlə ikinci müddətə qalib gələn ilk prezident edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!