ABŞ-ın “Abrams” tankları“Noble Partner-2016” adlı genişmiqyaslı hərbi təlimlərdə iştirak etmək üçün Gürcüstana gətiriləcək.
Məlumata görə, bu barədə Gürcüstanın müdafiə naziri Tina Xidaşeli məlumat verib. Onun sözlərinə görə, tanklar Tiflis ətrafına may ayında gətiriləcək.
Gürcüstan və ABŞ orduları arasında eyni adlı təlimlər 2015-ci ildə də keçirilib. Təlimlərin əsas məqsədi isə gürcü-ABŞ orduları arasında əməkdaşlığın möhkəmləndirilməsidir.

Gürcüstanın müdafiə naziri Tina Xidaşeli

Bu il keçiriləcək təlimlərə piyada bölmələrinin hərbi qulluqçularının gələcəyi gözlənilir. “Rustavi 2” televiziyasının məlumatına görə, Gürcüstan tərəfi artıq ABŞ-dan 70 ton hərbi yük gətirib.
Ötən ilin may ayında təşkil edilən təlimlərdə 400 gürcü hərbçisi iştirak edib. Tiflis yaxınlığında yerləşən Vaziani hərbi bazasında 200-dən çox ABŞ hərbçisi gürcülərlə birlikdə güc nümayiş etdirib.

“Abrams” tankı

Həmin vaxt Gürcüstana gətirilmiş texnika arasında 14 “Bredli” piyada döyüş maşını, logistika təminatı maşınları və təlimlər üçün nəzərdə tutulmuş ləvazimat var idi.
Azərbaycanın ən yaxın qonşularından olan Gürcüstan həmçinin ABŞ-ın böyük nüfuza malik olduğu NATO hərbi bloku ilə sıx əməkdaşlıq edir.

Gürcüstan-Azərbaycan sərhədi (qırmızı xətlə işarələnib)

Bundan əvvəl ABŞ Quru Qoşunlarının komandanı, general Reymond Oderino bəyan etmişdi ki, Rusiya ilə müharibə ehtimalına görə Birləşmiş Ştatların Avropaya təcili göndərməli olduğu qüvvələrin miqdarı ciddi ölçülərdə artırılmalıdır.
NATO regionda Rusiyanın təsirini azaltmaq üçün hətta Gürcüstan ərazisində hərbi baza tikir. Təlim-məşq bazası NATO ölkələrinin, tərəfdaş ölkələrin və Gürcüstanın hərbi qüvvələrinin birgə təlimi üçün nəzərdə tutulur. /anspress/