1-05-2025, 16:08
Britaniya və Fransa Fələstini tanımağa hazırlaşır
Britaniya Fransa ilə Fələstin dövlətinin tanınması planlarını müzakirə edir.
Bu barədə Britaniyanın “The Guardian” qəzeti məlumat yayıb.
Qeyd edilib ki, bu addım BMT-nin himayəsi altında iyunun 2-4-də təşkil olunan “iki xalq üçün iki dövlət” planının həyata keçirilməsi üzrə beynəlxalq konfransla eyni vaxta düşə bilər.
Britaniya və Fransa Fələstini 2025-ci il yayın əvvəlində tanıya bilər.
Çərşənbə günü Britaniya parlamentinin komitəsində danışan xarici işlər naziri Devid Lammi ilk dəfə olaraq London və Parisin Səudiyyə Ərəbistanının birgə sponsorluğu ilə keçiriləcək konfransla əlaqədar Fələstinin tanınması məsələsini müzakirə etdiyini təsdiqləyib. Eyni zamanda, o, daha əvvəl vurğulamışdı ki, Fələstin dövlətçiliyinin tanınması üçün zəruri şərt Qəzza zolağında radikal HƏMAS hərəkatının nümayəndələrinin hakimiyyətdən tamamilə uzaqlaşdırılması və hərəkat liderlərinin muxtariyyəti tərk etməsi olacaq.
Məqalədə qeyd edildiyi kimi, Fələstinin BMT Təhlükəsizlik Şurasının iki daimi üzvü tərəfindən tanınması Fələstin-İsrail nizamlanması sahəsində səylərə yeni təkan verə bilər, lakin buna gedən yolda bir çox diplomatik maneələr var. Əsas olanlardan biri İsrailin müqaviməti olacaq, onun rəhbərliyi Fələstinin tanınmasının HƏMAS və İranın mövqelərini gücləndirəcəyinə inanır. Üstəlik, Lamminin çıxışında vurğuladığı kimi, London Fələstinin Böyük Britaniya və Fransa tərəfindən tanınmasının sırf simvolik bir jest olmasını istəmir. Onun fikrincə, belə bir addım o vaxt atılmalıdır ki, maksimum effekt verə, regionda vəziyyəti müsbətə doğru dəyişə bilər.
Aprelin 9-da Fransa prezidenti Emmanuel Makron bildirib ki, Paris iyunda Fələstin dövlətçiliyini tanıya bilər. 2024-cü ildə Yaxın Şərqdə vəziyyət pisləşdikcə İrlandiya, İspaniya və Norveç hakimiyyətləri Fələstin Dövlətini tanıdıqlarını elan etdilər. İsrail buna cavab olaraq Dublin, Madrid və Oslodan səfirlərinin məsləhətləşmələr üçün geri çağırıldığını elan edib. Eyni zamanda İrlandiya, İspaniya və Norveç diplomatik nümayəndəliklərinin rəhbərləri yəhudi dövlətinin Xarici İşlər Nazirliyinə çağırılıb.
1-05-2025, 15:57
Balasanyan Putinə yalvardı
Özünü qondarma “artsaxın qəhrəmanı” adlandıran Xocalı qatili Vitali Balasanyan Rusiya Federasiyasının Prezidenti Vladimir Putinə müraciət edib.
V.Balasanyan V.Putinə müraciətində alman faşizmi üzərində qazanılan qələbəyə erməni xalqının da töhfə verdiyini qeyd edib. O, Qarabağdan olan ermənilərin II Dünya müharibəsindəki iştirakından bəhs edib.
Vitali Balasanyan Putinə yalvararaq, ondan 2020-2023-cü illərdə Qarabağı tərk etmiş ermənilərin geri qaytarılmasına yardım göstərməyi xahiş edib.
Vitali Balasanyan Xocalı qətliamını törədənlərdən biridir. O, Xocalıdakı döyüşlər zamanı əsir alınan Azərbaycanın Milli Qəhrəmanı Natiq Qasımovu şəxsən işgəncə verməklə qətlə yetirib.
Azərbaycan Ordusu 2023-cü ilin sentyabrında Qarabağda separatçılara qarşı antiterror əməliyyatları keçirəndə, Balasanyan Əsgəranda gizlənmişdi. 2023-cü il sentyabrın 28-də o, Qarabağı tərk edərək gizli yollarla Ermənistana qaçıb.
Ermənistan mətbuatı onun dağ yolları ilə qaçmağa müvəffəq olduğu barədə məlumat yayıb. İddiaya görə, Balasanyan gizli dağ yolları ilə piyada getdiyinə görə, Ermənistana yalnız oktyabrın ilk ongünlüyündə çata bilib.
30-04-2025, 18:00
Ərdoğan Suriya kürdlərinin təklifini rədd etdi
Türkiyə prezidenti Rəcəb Tayyib Ərdoğan Suriyadakı kürd qruplarının Suriyanın mərkəzləşdirilməmiş idarəetmə sisteminə keçməsi ilə bağlı tələblərini rədd edib.
Ərdoğan bunun “xəyaldan başqa bir şey olmadığını” və ona qonşu ölkədə yer olmadığını deyib.
Mərkəzləşdirilməmiş struktur çağırışı Suriyanın islamçı liderləri tərəfindən də rədd edilib.
"Federal quruluş məsələsi boş xəyaldan başqa bir şey deyil. Onun Suriya reallığında yeri yoxdur. "Mən kürdlərə federal quruluş xəyal etməməyi və bölgəni təhdid edəcək qərarlar verməməyi, əksinə, bölgədə sabitliyə xidmət edəcək addımlar atmağı tövsiyə edirəm", - Ərdoğan Romadan qayıdarkən jurnalistlərə açıqlamasında deyib.
Türkiyə və Suriyanı ayıran 911 kilometrlik sərhədə işarə edən Ərdoğan, "birləşmiş Suriyadan başqa, sərhədlərimizin xaricində heç bir zorakı quruluşa icazə verməyəcəyik" deyib.
ABŞ-ın dəstəklədiyi kürd qruplaşmalaerı Türkiyə tərəfindən “terror təşkilatı” hesab edilir.
30-04-2025, 17:17
Trampla Zelenskinin Vatikandakı söhbətinin TƏFƏRRÜATI
Vatikanda – Papanın dəfni öncəsi ABŞ lideri Donald Trampla Ukrayna prezidenti Vladimir Zelenski arasında baş tutmuş 15 dəqiqəlik söhbətin təfərrüatları açıqlanıb.
“Axios” portalının məlumatına görə, Zelenski söhbət zamanı ABŞ prezidentini Rusiya lideri Vladimir Putinə qarşı daha sərt mövqe tutmağa və atəşkəs üçün prioritetlərə yenidən baxmağa çağırıb.
Nəşrin yazdığına görə, Zelenskinin müşavirləri onun “Oval kabinetdəki fəlakətdən sonra” Trampla təkbətək söhbət etmə riski olub-olmaması ilə bağlı müxtəlif fikirlərə sahib olublar. “Axios” mənbələri deyiblər ki, Zelenski sonda Trampın Putin haqqında fikrini ilk dəfə dəyişməyə müvəffəq olduğunu hiss edib. Və İtaliyadan qayıdarkən Amerika prezidenti jurnalistlərlə söhbətində Rusiya prezidentini Kiyevə kütləvi hücuma görə tənqid edib.
“Zelenskinin məsləhətçiləri əsəbi idilər və bəziləri – hələ də fevralın 28-də Oval ofis səhnəsindən travma alıblar – Zelenskiyə Trampla təkbətək görüşün yaxşı fikir olduğuna əmin olmadıqlarını söylədilər”, – məqalədə deyilir.
Mənbələrdən birinin “Axios”a bildirdiyinə görə, əvvəlcədən heç nəyə qərar verilməyib və ilkin fikir dəfn mərasimindən sonra görüşməyə çalışacaqları olub.
Liderlər Vatikana çatan kimi bir-biri ilə qarşılaşdılar və Müqəddəs Pyotr Bazilikasında təkbətək görüşmək üçün yer tapdılar. Mənbələrə görə, Zelenski Trampa deyib ki, ABŞ prezidenti daha çox təzyiq göstərməyincə, Putin yerindən tərpənməyəcək.
Mənbə bildirib ki, Tramp Putinə münasibətini dəyişməli ola biləcəyini deyib. Nəşr yazır ki, Zelenski həmçinin Trampı sülh danışıqlarının başlanğıc nöqtəsi kimi qeyd-şərtsiz atəşkəslə bağlı ilkin təklifinə qayıtmağa sövq edib, Ukrayna bunu qəbul edib, lakin Rusiya bunu rədd edib.
30-04-2025, 15:17
Avropada ötən il bu qədər insan yoxsulluq həddində yaşayıb - STATİSTİKA
Avropa İttifaqı (Aİ) ölkələrinin əhalisinin 21%-i 2024-cü ildə yoxsulluq və ya sosial təcrid riski ilə üzləşib.
Bu informasiya Avropa Statistika Ofisinin (Eurostat) yaydığı məlumatda öz əksini tapıb.
Beləliklə, ötən il Aİ ölkələrində ümumilikdə 93,3 milyon nəfər yoxsulluq həddində həyatlarını davam etdiriblər.
Yoxsulluq həddində yaşayanların sayının ən yüksək olduğu ölkələr aşağıdakılar olub:
-Bolqarıstan-30,3%
-Rumınya-27,9%
- İspaniya-25,8%
-Litviya-25,8%.
Yoxsulluq və sosial təcrid səviyyəsinin aşağı olduğu ölkələrin siyahısına isə bu dövlətlər daxildir:
-Çexya-11,3%
-Slovenya-14,4%
-Niderland-15,4%
-Polşa-16%
-İrlandiya-16,7%
Yoxsulluk səviyyəsi Almaniyada 21,1%, Fransada 20,5%, İtaliyada isə 23,1% olaraq təsbit olunub.
30-04-2025, 14:53
Jurnalist cəbhədə həlak olub
Rusiyanın genişmiqyaslı işğalının ilk günündən Ukraynanı müdafiə etməyə gedən jurnalist və teleaparıcı Vladimir Kotsur cəbhədə həlak olub.
Bu barədə Ali Radanın Söz Azadlığı Komitəsi məlumat yayıb.
"Vladimir Kotsurun Ukrayna jurnalistikasındakı uzunmüddətli karyerası ilk növbədə idman mövzularının inkişafı ilə bağlı olub. Onun aparıcı yerli telekanallardakı fəaliyyəti Ukraynada idmanın populyarlaşmasında bütöv bir eranı formalaşdırıb", - bəyanatda qeyd olunur.
Bildirilir ki, 2022-ci ildə Rusiyanın tammiqyaslı işğalı başlaması ilə Vladimir Kotsur kənarda qalmayıb və əlində silah Ukraynanı müdafiə etmək yolunu seçib.
Onun 10 il işlədiyi “Sport-Ekspress Ukrayna” nəşri qeyd edib ki, aprelin 29-da Rovno vilayətindən olan jurnalist Vladimir Kotsurun cəbhədə həlak olması ilə bağlı faciəli xəbər daxil olub.
Qeyd olunur ki, iyulun 5-də Vladimirin 54 yaşı tamam olacaqdı.
30-04-2025, 13:54
Türkiyə Netanyahunun təyyarəsinə "yaşıl işıq" yandırdı
Türkiyə İsrailin Baş naziri Benyamin Netanyahunun təyyarəsinin Azərbaycana səfər üçün öz hava məkanından istifadəyə icazə verib.
Bu barədə məlumatı “AIA Global News” (“Azerbaijani-Israeli Alliance Global News”) portalı yayıb.
Məlumatda qeyd edilib ki, İsrailin Baş naziri mayın 7-də axşam saatlarında “Kanaf Zion” adlı hökumət təyyarəsi ilə Azərbaycana yola düşəcək.
Netanyahunun təyyarəsinə Türkiyə səmasından uçuşa icazə verilməsinə Azərbaycanın vasitəçilik etdiyi bildirilir.
"Times of Israel" nəşrinin Baş nazirin ofisindən əldə etdiyi məlumata görə, Benyamin Netanyahu mayın 7-də Azərbaycana səfər edəcək, mayın 11-də İsrailə qayıdacaq.
Mayın 8-də Netanyahu Azərbaycan Prezidenti İlham Əliyev və yəhudi icmasının üzvləri ilə görüşəcək.
Həmin gün Netanyahunun Azərbaycanın Milli Qəhrəmanı, milliyətcə yəhudi Albert Aqarunovun məzarını ziyarət edəcəyi də gözlənilir.
30-04-2025, 13:31
9 May paradı təxirə salınmayacaq! - Peskov
Moskvada 9 May Qələbə paradı Kiyevin təhdidlərinə baxmayaraq baş tutacaq.
Bunu Rusiya prezidentinin mətbuat katibi Dmitri Peskov jurnalistlərə bildirib.
"Zelenski bir çox fərqli bəyanatlar verir, əksəriyyəti uğursuz olur. Parad olacaq, siz və mən bu paradı qürurla izləyəcəyik”, - deyə Peskov Ukrayna hakimiyyətinin parada təhdidlərlə bağlı Kremlin mövqeyini bölüşüb.
Daha əvvəl Vladimir Zelenski Ukraynanın Moskvanı diplomatiya ilə məşğul olmağa təşviq etmək üçün “Rusiyanın Qələbə paradının keçirilməsindən narahat olmalıdır” demişdi.
Putin Moskvada keçirilməsi nəzərdə tutulan 9 May Qələbə paradına bir sıra dost ölkələrin dövlət başçılarını dəvət edib. Ermənistanın baş naziri Nikol Paşinyan artıq paradda iştirakını təsdiqləyib. Hindistan Baş naziri Narendra Modi isə 9 May paradında iştirak etməyəcək.
30-04-2025, 13:00
İran-ABŞ danışıqlarının yeri açıqlandı
İran-ABŞ danışıqlarının növbəti raundu İtaliyanın paytaxtı Romada keçiriləcək.
Bunu Nazirlər Kabinetinin iclası çərçivəsində İranın xarici işlər naziri Abbas Arakçi deyib.
O, həmçinin bildirib ki, İran bu cümə günü üç Avropa ölkəsi (İngiltərə, Fransa və Almaniya) ilə ayrıca görüş keçirəcək.
Beynəlxalq Atom Enerjisi Agentliyinin (MAQATE) prezidenti Rafael Qrossinin “danışıqlar bizim nəzarətimiz altında aparılmalıdır” açıqlamasına cavab verən Arakçi bu ifadəninn doğru olmadığını bildirib.
"Yoxlama işi Agentliyin üzərinə düşə bilər, lakin bu rol müzakirə oluna bilər".
İranın uranın zənginləşdirilməsi ilə bağlı “qırmızı xətlər”inin çox açıq olduğunu vurğulayan Arakçi, bu xətlərin ABŞ tərəfinə də çatdırıldığını bildirib.
Danışıqlara ev sahibliyi edən ölkənin Oman olduğunu xatırladan Arakçi, logistik səbəblərə görə danışıqların Romada keçirilməsinə qərar verildiyini, lakin danışıqların yeri məsələsinin İran üçün fundamental bir məsələ olmadığını və bununla bağlı vaxt itirməyə ehtiyac görmədiklərini bildirib.
Danışıqlar üçün müəyyən bir vaxt cədvəlinin olmadığını bdeyən Arakçi, "uzun və nəticəsiz danışıqlara girmək istəmirik, qarşı tərəfin də bu məsələdə eyni yanaşmaya sahib olduğuna inanırıq" deyib.
30-04-2025, 11:57
Moskva Zelenskinin təhdidinə cavab verdi
Rusiya Xarici İşlər Nazirliyinin rəsmi nümayəndəsi Mariya Zaxarova Ukrayna prezidenti Vladimir Zelenskinin Rusiyaya mümkün hücumlara, o cümlədən Qələbə Paradını pozmaq təhlükəsinə eyham vurduğu bəyanata cavab verib.
Zaxarova Zelenskinin sözlərini Kiyevin terror siyasətinin birbaşa sübutu adlandırıb və onu sülh təşəbbüslərini pozmaqda ittiham edib.
“Kiyev rejimi sözün əsl mənasında terror aktları planlaşdırdığı halda ondan hansı “atəşkəs”dən danışmaq olar”, - Rusiya Xarici İşlər Nazirliyinin sözçüsü Telegram kanalında yazıb.
Onun sözlərinə görə, Ukrayna liderinin oxşar bəyanatları bir daha təsdiqləyir ki, məhz Zelenski və onun radikal ətrafı sülh təşəbbüslərinə mane olur.
Xatırladaq ki, daha əvvəl Zelenski mayın 9-da Moskvada keçiriləcək Qələbə Paradına hücum etmək istəyinə eyham vurmuşdu.
O, Rusiya rəhbərliyinin tədbirin təhlükəsizliyinə şübhə ilə yanaşdığını qeyd edərək, bu narahatlıqların əsaslı olduğunu vurğulayıb. Bundan əlavə, Zelenski deyib ki, Rusiya tərəfi Ukrayna ərazisində davam edən hərbi münaqişəyə daha çox diqqət yetirməlidir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!