24-03-2026, 21:23
Lvovda binalara zərbələr endirilib, yaralananlar var
Rusiya ordusu Ukraynanın Lvov şəhərində yaşayış binalarına zərbələr endirib.
Bu barədə UNİAN məlumat yayıb.
Hadisə nəticəsində ağır yaralıların olduğu bildirilir.
Lvov Xüsusi Əməliyyatlar Komandanlığı əhalini sığınacaqlarda qalmağa çağırıb.
Komandanlıqdan hücumlar nəticəsində yeddi nəfərin yaralandığı bildirilib.
24-03-2026, 17:34
İsrail bombalandı - Ərəblər yaralandı
İrandan atılan raketin partlaması nəticəsində İsrailin Neqev əyalətində 3 bədəvi ərəb yaralanıb.
Onlardan 1-i orta dərəcəli xəsarət alıb, 2 körpə isə yüngül xəsarət alıb.
Xaıtlradaq ki, müharibə başlayandan bəri İsraildə 19 nəfər ölüb, 4500-dən çox insan isə müxtəlif xəsarətlər alıb.
24-03-2026, 17:28
İranla danışıqlara Vens rəhbərlik edəcək
ABŞ-nin vitse-prezidenti Cey Di Vens İranla müharibənin başa çatdırılması üzrə mümkün danışıqlarda ABŞ nümayəndə heyətinə rəhbərlik edə bilər.
Bu barədə "The Guardian" nəşri Pakistan mənbələrinə istinadən məlumat yayıb.
Məlumata görə, danışıqların Pakistanda keçirilməsi ehtimal olunur. Bildirilir ki, rəsmi Vaşinqton bu görüşlərdə yüksək səviyyəli təmsilçiliklə iştirak etməyi planlaşdırır.
Qeyd olunur ki, Vensin nümayəndə heyətinə rəhbərlik etməsi ehtimalı tərəflər arasında diplomatik səylərin intensivləşdiyini göstərir.
24-03-2026, 16:57
Müxalifət liderinə həbs cəzası verildi
Gürcüstanda müxalifət lideri Elene Xoştariya 1 il 6 ay müddətinə azadlıqdan məhrum edilib.
Siyasətçi Tbilisi meri Kaxa Kaladzenin seçkiöncəsi bannerinə markerlə “Rus arzusu” yazdığına görə məsuliyyətə cəlb olunub. Dəymiş zərərin 570 lari olduğu bildirilir.
Məlumata görə, Xoştariya məhkəmə iclasında iştirak etməyib və “heç bir hakimiyyət qolunu tanımadığını” bəyan edib.
Onun vəkili çıxarılan hökmü “tamamilə qanunsuz” adlandırıb. Prokurorluq isə təqdim olunan sübutların kifayət etdiyini bildirib.
Qeyd olunur ki, Xoştariyanın azadlığa çıxmasına təxminən bir il qalıb.
24-03-2026, 16:35
Kobaxidze Gürcüstan azərbaycanlılarına təşəkkür etdi
"Bu qardaşlıq dəstəyini heç vaxt unutmayacağıq".
Bunu Gürcüstan Baş naziri İrakli Kobaxidze ölkə müsəlmanlarına, o cümlədən azərbaycanlılara müraciətində deyib.
Baş nazir müsəlman icmasını Ramazan və Novruz bayramları münasibətilə təbrik edib, xüsusilə də Katolikos-Patriarx II İlyanın xatirəsinə həsr olunmuş milli matəm dövründə onların bayramı qeyd etməmək barədə qərarını yüksək qiymətləndirib.
"Bu günlərdə səmimi başsağlığına və bayram tədbirlərinin ləğvinə görə xüsusi minnətdarlığımı bildirirəm. Əsrlər boyu əcdadlarımız Gürcüstanın tarixini yan-yana yaşayıb-yaradıb və biz birlikdə Gürcüstanın gələcəyini qururuq", - deyə Kobaxidze qeyd etdi.
24-03-2026, 16:10
Xamenei ABŞ ilə danışıqlara razılıq verib
İranın xarici işlər naziri Abbas Araqçı ABŞ prezidenti xüsusi nümayəndəsi Stiv Uitkoffla telefon danışığında ölkənin Ali Rəhbəri Müctəba Xameneinin Vaşinqtonla danışıqlara razılıq verdiyini bildirib.
Bu barədə İsrailin “Ynet” nəşri yüksək vəzifəli iranlı rəsmiyə istinadən məlumat yayıb.
Məlumata görə, tərəflər arasında telefon danışığı martın 19-da baş tutub. Bildirilir ki, İran tərəfi ABŞ-a ölkədə qərarların hansı səviyyədə qəbul olunduğunu göstərmək və Araqçının hakimiyyəti təmsil etdiyini vurğulamaq istəyib.
Nəşr yazır ki, danışıqların şərtləri əvvəlki müzakirələrlə eynidir. Belə ki, İran zənginləşdirilmiş uranın ölkədən çıxarılmasını müzakirə etməyə hazırdır, lakin nüvə proqramından və ballistik raketlərdən imtina etməyi planlaşdırmır.
Həmçinin qeyd olunur ki, İran tərəfi müharibənin tezliklə başa çatmasına razıdır, lakin bu, Tehranın irəli sürdüyü şərtlər daxilində mümkün hesab olunur.
ABŞ prezidenti Donald Tramp isə martın 23-də Vaşinqton və Tehran arasında danışıqların getdiyini açıqlayıb və onları çox yaxşı və məhsuldar adlandırıb. Məlumata görə, Tramp bu səbəbdən Pentaqona İranın enerji infrastrukturuna planlaşdırılan zərbələri 5 gün təxirə salmağı tapşırıb.
Bununla belə, rəsmi Tehran ABŞ-la hər hansı birbaşa danışıqlar apardığını təkzib edir. “Axios” nəşrinin yazdığına görə isə tərəflər arasında mümkün danışıqlarda Türkiyə, Misir və Pakistan vasitəçi rolunu oynayıb. Bu ölkələrin xarici işlər nazirləri iki gün ərzində həm ABŞ, həm də İran tərəfi ilə ayrı-ayrılıqda görüşlər keçiriblər.
24-03-2026, 15:34
Laricaninin yerinə o təyin olundu
Məhəmməd Bağır Zülqədr İran Təhlükəsizlik Şurasının yeni katibi təyin edilib.
İran Prezidentin kommunikasiya idarəsinin rəhbəri Məhəmməd Mehdi Təbatəbainin sözlərinə görə, qərar İslam İnqilabının Ali Lideri Müctəba Xameneinin təsdiqindən sonra verilib.
İran prezidentinin fərmanı ilə Məhəmməd Bağer Zülqədr İslam Respublikası Ali Milli Təhlükəsizlik Şurasının yeni katibi təyin edilib.
O bu postda İsrailin hava zərbəsi zamanı öldürülən Əli Laricanini əvəz edəcək.
24-03-2026, 14:47
Xarq adası uğrunda döyüşlər başlayacaq
Trampın İranla danışıqlar elan etməsinə baxmayaraq, ABŞ Yaxın Şərqdə qoşun toplayır.
ABŞ İrana qarşı potensial əməliyyata hazırlıqlar fonunda Yaxın Şərqdəki hərbi mövcudluğunu genişləndirməyi düşünür.
Nəşrin məlumatına görə, ABŞ ordusu 82-ci Hava-Desant Diviziyasından təxminən 3000 əsgərin bölgədə yerləşdirilməsi ehtimalını müzakirə edir. Onların 31-ci Dəniz Ekspedisiya Bölməsinin dəstəyi ilə İranın Xarq Adasını ələ keçirmək əməliyyatında iştirak edə biləcəyi gözlənilir. Lakin Pentaqondan və ya ABŞ Mərkəzi Komandanlığından hələlik rəsmi əmr alınmayıb.
Eyni zamanda, hərbi logistikada əhəmiyyətli artım qeydə alınıb. 12 martdan bəri ABŞ-dan Yaxın Şərqə ən azı 35 C-17 hərbi nəqliyyat təyyarəsi uçub, daha 11 təyyarə isə uçuş həyata keçirir. Əməliyyatda ordu, donanma və hava qüvvələri də daxil olmaqla, silahlı qüvvələrin müxtəlif qolları iştirak edir.
Əsas uçuşlar Corciya, Vaşinqton, Şimali Karolina, Kentukki və Virciniyadakı hərbi bazalardan həyata keçirilir. Bəzi uçuşlar İsraildəki düşərgələrə, o cümlədən Ovda hava bazasına və İordaniyadakı Kral Feysəl və Kral Hüseyn hava bazalarına yönəlib.
Yerləşmənin miqyası Amerika hərbi qüvvələrinin regionda əhəmiyyətli dərəcədə artdığını göstərir. Bundan əlavə, 82-ci Hava-Desant Diviziyasının bölmələrinin ABŞ ərazisindən Yaxın Şərqə doğru hərəkət etməyə başladığı barədə məlumatlar var ki, bu da mümkün quru əməliyyatlarına hazırlıqların aparıldığını göstərə bilər.
24-03-2026, 14:29
]Ya Donbasdan geri çəkil, ya da yardım kəsiləcək!
ABŞ-nin Ukrayna ilə danışıqlarda Kiyevdən Donbasın nəzarətdə qalan hissələrindən qoşunlarını çıxarmağı tələb etdiyi iddia olunur.
Bu barədə “Ukrainska Pravda” nəşri mənbələrə istinadən məlumat yayıb.
Bildirilib ki, tərəflər arasında son danışıqlar martın 21-22-də keçirilib. Mənbənin sözlərinə görə, Ukrayna tərəfi ABŞ və Rusiya arasında Alyaskanın Ankoric şəhərində əldə olunan razılaşmalar fonunda müəyyən təzyiqlərlə üzləşir.
Ukrayna Prezidenti Volodimir Zelenskinin komandasından anonim danışan şəxs qeyd edib ki, müzakirələr zamanı əsas mövzu daim Donbas məsələsinə yönəlir. Onun sözlərinə görə, ABŞ tərəfi bu ərazilərdən geri çəkilmə qarşılığında Ukraynaya təhlükəsizlik zəmanətləri vəd edir.
Mənbə bildirib ki, Vaşinqton əsas məsələlər üzrə razılıq əldə olunmasa, danışıqlardan çəkilə və diqqətini İran, Konqresə aralıq seçkilər və digər prioritetlərə yönəldə bilər.
Eyni zamanda qeyd olunub ki, Ukrayna üçün belə bir geri çəkilmənin praktik icrası olduqca mürəkkəb və mübahisəli məsələ olaraq qalır.
24-03-2026, 14:13
“Xalq Səfərbərlik Qüvvələri”nin komandiri öldürülüb
İraqın qərbindəki Ənbar vilayətində “Xalq Səfərbərlik Qüvvələri”nin obyektinə hücum edilib.
Bu barədə “Reuters” İraqın təhlükəsizlik və səhiyyə xidmətlərindəki mənbələrə istinadən məlumat yayıb.
Bildirilib ki, aviazərbələr nəticəsində ən azı 15 döyüşçü, o cümlədən qruplaşmanın Ənbardakı əməliyyatlar komandanı Saad əl-Beyci həlak olub, 30 nəfər yaralanıb.
Hücuma görə ABŞ günahlandırılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!