30-06-2023, 10:07
ABŞ-ın İran üzrə nümayəndəsi vəzifəsindən azad edildi
ABŞ-ın İran üzrə xüsusi nümayəndəsi Robert Melli məxfi sənədlərlə düzgün işləməməklə şübhəli bilinərək vəzifəsindən uzaqlaşdırılıb. Mellinin işi Dövlət Departamenti tərəfindən araşdırılır. Bildirilib ki, yoxlama başlayandan bir müddət sonra Melli məxfi sənədlərə çıxışını itirsə də, öz vəzifələrini yerinə yetirməyə davam edib, lakin cümə axşamı günü o, ödənişsiz məzuniyyətə buraxılıb. Robert Melli məlumatı CNN-ə təsdiqləyib: “İstintaqın təhlükəsiz və tezliklə başa çatacağını gözləyirəm”.
Qeyd edək ki, Mellinin vəzifələrini indi müvəqqəti olaraq Abram Paley icra edir.
29-06-2023, 15:56
“Vaqner”in qiyamı Putini zəiflədib - Almaniya kansleri
"Vaqner"in başlatdığı hərbi qiyam Rusiya Prezidenti Vladimir Putini zəiflədib. Bunu "ARD" televiziyasına müsahibəsində Almaniya kansleri Olaf Şolts deyib. “Mən onun zəiflədiyinə inanıram, çünki bu, avtokratik güc strukturlarında çatların olduğunu və həmişə iddia etdiyi kimi sistemin möhkəm olmadığını göstərir”, - deyə Şolts bildirib. O, eyni zamanda Priqojinin başlatdığı üsyanla Qərbin heç bir əlaqəsinin olmadığını da söyləyib.
29-06-2023, 15:43
Kreml "Vaqner"in Afrika və Yaxın Şərqdəki bölmələrini ələ keçirməyi düşünür
Rusiya hakimiyyəti "Vaqner" muzdlu qruplaşmasının rəhbəri Yevgeni Priqojinin “qlobal imperiyasını” nəzarətə götürmək niyyətindədir. Bu barədə "The Wall Street Journal" qəzeti yazıb. Qeyd olunur ki, Kreml "Vaqner"in Afrika və Yaxın Şərqdə fəaliyyət göstərən bölmələrini ələ keçirmək istəyir. Nəşr diplomatlara və kəşfiyyatçılara istinadən yazır ki, Rusiyanın cənubunda baş verən hadisələrdən sonra “Moskvanın diplomatik fəaliyyətinin sıçrayışı” baş verib. Rusiya nümayəndələri Afrika və Yaxın Şərq ölkələrinə gediblər. Bildirilir ki, "Vaqner" həmin bölgələrə öz fəaliyyətini fasiləsiz, lakin yeni rəhbərliyin nəzarəti altında davam etdirəcək. Məlumata görə, Rusiya xarici işlər nazirlərinin müavinlərindən biri Dəməşqə səfər edərək Suriya prezidenti Bəşər Əsədə şəxsən “Vaqner qrupları bundan sonra orada təkbaşına fəaliyyət göstərməyəcək” deyə məlumat verib. WSJ, həmçinin yazır ki, Rusiya Xarici İşlər Nazirliyinin yüksək rütbəli məmurları Mərkəzi Afrika Respublikasının (CAR) prezidenti Faustin-Arçange Tuadereyə zəng vurub. Qeyd olunur ki, onun mühafizəçiləri arasında "Vaqner"in döyüşçüləri də var. Diplomatlar Mərkəzi Afrika Respublikasının rəhbərini Rusiyada baş verən hadisələrdən sonra şirkətin Afrikadakı fəaliyyətini dayandırmayacağına inandırıblar. Nəşrin məlumatına görə, Rusiyadan kənarda təxminən 6000 "Vaqner" döyüşçüsü bar. Onlar Mərkəzi Afrika Respublikasında mədənlərin və siyasətçilərin mühafizəsi ilə məşğul olur, neft quyularına nəzarət edir və Suriya hökumətinin nəzarəti altında olan əraziləri qoruyurlar.
29-06-2023, 12:21
Polşa ABŞ-dan 15 milyard dollarlıq zenit-raket kompleksi alır
Polşa ABŞ-dan 15 milyard dollar dəyərində "Patriot" zenit-raket kompleksləri alacaq. Bu barədə ABŞ-ın Müdafiə Təhlükəsizliyi Əməkdaşlıq Agentliyi məlumat yayıb. Məlumata görə, sövdələşmə çərçivəsində 48-ə qədər "Patriot PAC-3" buraxılış qurğusu və 644-ə qədər "Patriot PAC-3 MSE" raketi, həmçinin radar və idarəetmə komponentləri satılacaq. Silah ixracına nəzarət edən Dövlət Departamenti sazişi təsdiqləyib. "Planlaşdırılan saziş Polşanın raketdən müdafiə qabiliyyətini təkmilləşdirəcək və Polşanın hərbi potensialının təkmilləşdirilməsi məqsədlərinə nail olmağa kömək edəcək, eyni zamanda ABŞ və digər müttəfiqlərlə qarşılıqlı fəaliyyət qabiliyyətini daha da artıracaq”, - açıqlamada deyilir.
29-06-2023, 10:45
[b]Mərakeş Quranın yandırılmasından sonra səfirini geri çağırdı[/b]
İsveçin paytaxtı Stokholmda müqəddəs Quran kitabının yandırılmasından sonra Mərakeş Stokholmdakı səfirini məsləhətləşmələr üçün geri çağırıb. Bu barədə Mərakeş Xarici İşlər Nazirliyi məlumat yayıb. “Kralın göstərişi ilə İsveçin ölkədəki müvəqqəti işlər vəkili Rabata, Stokholmdakı səfir isə məsləhətləşmələr üçün geri çağırılıb”, - XİN-in açıqlamasında deyilir. Nazirlik aksiyanı “bir milyarddan çox müsəlmanın hisslərinə məhəl qoymayan məsuliyyətsiz, düşmənçilik hərəkəti” adlandırıb. İyunun 28-də Stokholmun mərkəzində yerləşən Medborjarplatsen meydanındakı məscidinin yaxınlığında 37 yaşlı Salvan Momika adlı iraqlı mühacir aksiya keçirib. O, kitabın səhifələrini qoparıb, onlarla ayaqqabılarını silib və daha sonra Quranı yandırıb. İsveç hakimiyyəti bu cür hərəkətlərin qanuni olduğu bildirib, ancaq aksiyanın yersiz olduğunu vurğulayıb. Mitinqdən dərhal sonra Salvan Momikaya qarşı dini ədavətin qızışdırılması və yanğın qadağasının pozulması ilə bağlı protokol tərtib edilib. Türkiyənin Xarici İşlər Nazirliyi, parlament və hökumət üzvləri hadisəni pisləyib.
29-06-2023, 10:33
Pakistanda silahlı insident - 9 nəfər öldü
Pakistanın Xayber Paxtunxva əyalətində yaşayış binasına silahlı hücum edilib. Hücum nəticəsində 9 nəfər ölüb, 2 nəfər yaralanıb. Hadisə çərşənbə günü səhər saatlarında Mələkənd rayonunda baş verib. Üç silahlı şəxs yaşayış binalarından birinə soxularaq sakinlərə atəş açıb, sonra isə hadisə yerini tərk edib. Bildirilir ki, hücuma səbəb ailələr arasında mübahisə ola bilər.
29-06-2023, 00:58
ABŞ konsulluğuna hücum ölümlə nəticələndi
ABŞ-ın Ciddədəki konsulluğuna hücum olub. Bu barədə "Al-Jazeera" telekanalı məlumat yayıb. Bildirilir ki, hücum nəticəsində mühafizəçi həlak olub. Diplomatik nümayəndəliyə hücum edən şəxs Səudiyyə Ərəbistanı təhlükəsizlik qüvvələri tərəfindən məhv edilib.
28-06-2023, 21:49
“Vaqner” Polşa üçün potensial təhlükə formasıdır - Andjey Duda
Polşa prezidenti Andjey Duda "Vaqner" muzdlularının Belarusda olmasının qonşu ölkələri təhdid edə biləcəyindən narahatlığını ifadə edib. Bu barədə o, Kiyevdə çıxışı zamanı danışıb. Duda qeyd edib ki, Belarusun Polşa, Litva və Latviya ilə sərhədləri var və muzdlular bu ölkələr üçün təhlükə yarada bilər. “Sual yaranır: bu hərəkətin məqsədi nədir? "Vaqner" qrupunun, yəni Rusiya ordusunun konkret olaraq Belarusdakı əsl niyyətləri nədən ibarətdir? Bu, konkret olaraq bizim ölkələrimiz, NATO ölkələri, Polşa üçün potensial təhlükə formasıdır”, - o vurğulayıb. Eyni zamanda Ukrayna prezidenti Vladimir Zelenski qeyd edib ki, Belarusda rus muzdlularının olmasında böyük təhlükə görmür.
28-06-2023, 21:06
Bayden Rusiyada son baş verən hadisələri qiymətləndirdi
ABŞ prezidenti Co Bayden Rusiyada son baş verən hadisələri qiymətləndirib. O, Ağ Evdə jurnalistlərin suallarını cavablandırıb. Bayden bildirib ki, Rusiya prezidenti Vladimir Putin Ukraynadakı müharibədə uduzur: “O, açıq şəkildə Ukraynadakı və ölkə daxilindəki müharibəni uduzur”. Buna baxmayaraq, ABŞ lideri vurğulayıb ki, "Vaqner" qiyamından sonra Putinin mövqelərinin zəiflədiyini söyləmək hələ tezdir. "Putin bütün dünyada pariyaya çevrilib", - Amerika prezidenti əlavə edib.
28-06-2023, 19:19
İsveçdə “Quran” kitabı yandırıldı - Türkiyə XİN-dən sərt reaksiya
İsveçin paytaxtı Stokholmun mərkəzində İraqdan olan 37 yaşlı mühacir Salvan Momika müqəddəs "Quran" kitabını yandırıb. Bu barədə İsveçin “Aftonbladet” qəzeti yazıb. Aksiya Stokholm polisinin icazəsi ilə həyata keçirilib. Salvan Momika "Quran"ın vərəqlərini cırıb, onlarla ayaqqabılarını silib, daha sonra kitabı yandırıb. Stokholm məscidi yaxınlığında baş tutan aksiyanı media nümayəndələri də daxil olmaqla 200-dən çox insan izləyib. Nəşr bildirir ki, həmin şəxs İsveç himnini də oxuyub və ölkənin bayrağını dalğalandırıb. Orada olanlardan bəziləri Salvan Mömikin ünvanına təhqirlər səsləndiriblər. İzləyən şəxslətdən biri daş atmağa çalışıb, o, polis tərəfindən saxlanılıb. SVT xəbər verir ki, polis tədbirin təşkilatçısına qarşı dini ədavətin qızışdırılması, eləcə də od yandırmaq qadağasını pozmaq ittihamı ilə protokol tərtib edib. Nəşrin məlumatına görə, aksiyadan əvvəl polis ictimai yerdə od yandırmağa görə cərimə olunacağı barədə xəbərdarlıq edib. Türkiyənin xarici işlər naziri Hakan Fidan İsveçdə Qurana edilən hücuma sərt reaksiya verib. "Mən bu alçaq hərəkəti qınayıram. İfadə azadlığı bəhanəsi ilə İslama zidd bu hərəkətlərə icazə verilməsi qəbuledilməzdir", - o qeyd edib.
Xatırladaq ki, yanvarın sonunda Türkiyənin Stokholmdakı səfirliyinin qarşısında "Quran" kitabı yandırılıb. Bundan sonra Türkiyə İsveçin NATO-ya daxil olmasına razılıq verməyəcəyini açıqlayıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!