21-03-2025, 15:47
Rusların neçə faizi Putinə etibar edir? - Sorğu AÇIQLANDI
Rusların əksəriyyəti, yəni 79,8%-i prezident Vladimir Putinə güvənir.
Bu göstəricini Rusiyada sorğu keçirən Ümumrusiya İctimai Rəyin Öyrənilməsi Mərkəzi dərc edib.
Sorğunun nəticələrinə görə, respondentlərin yalnız 16%-i Rusiya prezidentinə inanmır. Rusiyalıların 78,1%-i Putinin fəaliyyətini müsbət, 13,6%-i isə mənfi qiymətləndirir.
Rusiyanın baş naziri Mixail Mişustinə respondentlərin 62,4%-i etibar edir, 18,4%-i ona etibar etmir, Rusiya vətəndaşlarının yarıdan çoxu (53,4%) hökumət başçısının fəaliyyətini bəyənir, 10,1%-i isə onun işini bəyənmir.
Gələn bazar günü Dövlət Dumasına seçkilər keçirilsə, hansı partiyaya səs verəcəklərini soruşduqda, rusiyalıların 35,9%-i “Vahid Rusiya”, 10,7%-i Rusiya Liberal Demokrat Partiyası (LDPR), 9,9%-i Rusiya Federasiyası Kommunist Partiyası (КПРФ), 6%-i “Yeni adamlar” partiyası, 3,9%-i "Ədalətli Rusiya - Patriotlar - Həqiqət naminə" partiyasının adını qeyd edib.
Sorğu 2025-ci il martın 10-dan 16-dək yaşı 18-dən yuxarı olan 1,6 min rusiyalı arasında keçirilib. Sorğu mobil nömrələrin təsadüfi seçimi ilə telefon vasitəsilə aparılıb.
21-03-2025, 14:50
Ermənistandan Türkiyəyə təşəkkür
Ermənistan xarici işlər nazirinin müavini Vahan Kostanyan Suriyaya humanitar yardımın çatdırılması üçün sərhədin müvəqqəti açılmasına görə türk həmkarlarına təşəkkür edib.
Ermənistan hökumətinin Türkiyə üzərindən Suriyaya göndərdiyi humanitar yardımı çatdırmaq üçün tibbi ləvazimat və ərzaq məhsulları daşıyan yük maşınlarının “Marqara” körpüsündən keçdiyi bildirilir.
“Mən türk həmkarlarıma bu humanitar missiyada əməkdaşlığa görə minnətdarlığımı bildirmək istəyirəm”, – Kostanyan X sosial şəbəkəsində yazıb.
Yüklərin çatdırılması üçün Ermənistan-Türkiyə sərhədindəki “Marqara” keçid məntəqəsi martın 21-dən 31-dək açıq olacaq.
Qeyd edək ki, 1993-cü ildən “Marqara” keçid məntəqəsindən praktiki olaraq ticarət və sərnişin daşınması üçün istifadə edilmir. Son illər Ermənistan onu modernləşdirib, keçid məntəqəsi fəaliyyətə hazırdır, lakin Türkiyə onu açmağa tələsmir və Ermənistanla münasibətlərin normallaşmasını İrəvanın Azərbaycanın şərtlərini yerinə yetirməsi ilə əlaqələndirir.
20-03-2025, 16:03
AK Partiyadan CHP-yə sərt cavab - Bu, siyasi əxlaqsızlığın zirvəsidir
Türkiyənin hakim Ədalət və İnkişaf Partiyasının (AK Partiya) sözçüsü Ömər Çelik İstanbul Böyükşəhər Bələdiyyəsi ilə bağlı başladılan istintaqla əlaqədar mətbuat konfransı keçirib.
Çelik Cümhuriyyət Xalq Partiyasının (CHP) sədri Özgür Özelin "sivil çevriliş" ittihamına sərt reaksiya verib.
"Siyasətçinin etməli olduğu məhkəmə prosesini izləməkdir. Heç birimiz dosyenin məzmunu ilə bağlı hər hansı məlumata sahib deyilik. Prokurorun ittiham aktını məhkəmənin necə dəyərləndirəcəyini qiymətləndirəcək olan siyasətçilər deyil. Ona görə də, heç birimizin məhkəmə prosesi ilə bağlı qiymətləndirməsi keçərli olmaz. Özgür Özel baş verənləri Prezidentimiz və AK Partiya tərəfindən CHP-yə qarşı "çevriliş" adlandırıb.
Onun istintaqla bağlı Prezidentimizə qarşı söylədikləri qəbuledilməzdir. Cənab Özgür Özel çevrilişə cəhd nədir, bunu siyasi təşkilatlar necə dəstəkləyər, deyə maraqlanırsa, bununla bağlı ən zəngin literatur CHP-nin tarixində mövcuddur. Özelin Prezidentimizi və partiyamızı "sivil çevriliş" ifadəsi ilə yan-yana anması siyasi əxlaqsızlığın zirvəsidir.
Siyasətdə harada dayanılmalıdır, CHP-nin öyrənməsi lazım, onun bununla bağlı qabiliyyətinin olmadığı görünür. Süni intellekt belə CHP-nin irəli sürdüyü arqumentlərdən daha yaxşısını ortaya qoya bilər. Süni intellektin CHP-yə öyrədəcəyi çox şey var. Süni intellektin daha ixtisaslı qiymətləndirmə aparacağı aşkardır".
20-03-2025, 15:50
Putin Suriyanın yeni başçısına mesaj göndərdi
Rusiya prezidenti Vladimir Putin Suriya dövlətinin başçısı Əhməd əl-Şaraaya mesaj göndərərək, ölkədə vəziyyəti tez bir zamanda sabitləşdirmək üçün yeni hökumətin səylərini dəstəklədiyini bildirib.
Bu barədə martın 20-də Rusiya liderinin mətbuat katibi Dmitri Peskov bildirib. Rusiya liderinin mesajı ərəb respublikasında zorakılığın başlanması fonunda yaranmış böhranlı vəziyyətin ardınca verilib.
“Putin Əhməd əl-Şaraaya mesajında ölkənin suverenliyi, müstəqilliyi, birliyi və ərazi bütövlüyünün təmin edilməsi maraqları naminə vəziyyətin tez bir zamanda sabitləşdirilməsi səylərini dəstəkləyib”, - deyə Dmitri Peskov bildirib.
Martın əvvəlində islamçı qruplar tərəfindən devrilmiş Bəşər Əsədin mənsub olduğu Suriyanın sahilyanı rayonlarında ələvilərin üsyanı başlayıb. Bu, təhlükəsizlik qüvvələri ilə silahlı toqquşmaya çevrilib. Bundan sonra Rusiya və ABŞ martın 10-da Suriyanın qərbində dinc əhalinin kütləvi şəkildə qətlə yetirilməsini müzakirə etmək üçün BMT Təhlükəsizlik Şurasının qapalı iclasının keçirilməsini istəyib. Bu gün Dəməşqdəki keçid hökuməti qətliam baş verən ərazilərdə əməliyyatın başa çatdığını elan edərək, böhranda günahkar saydığı ölkənin keçmiş rəhbərliyinin fəal tərəfdarlarını aradan qaldırmaq planını açıqlayıb.
Daha sonra keçid dövrünün prezidenti Əhməd əl-Şaraa Reuters-ə ətraflı müsahibə verib və o, tərəfdarlarının özlərini ən yaxşı şəkildə göstərmədiyini etiraf edib. Ayrı-ayrılıqda verdiyi müsahibədə Əhməd əl-Şaraa Rusiya ilə münasibətlərə toxunaraq, yeni hökumətin Suriya ilə Rusiya arasında parçalanmasını istəmədiyini bildirib.
20-03-2025, 14:58
İmamoğlu işində Acun Ilıcalının adı hallandı
İstanbul Böyükşəhər Bələdiyyəsinin sədri Əkrəm İmamoğlu barədə açılan istintaq işində adı hallanan və barəsində həbs qətimkan tədbiri seçilən Merthan Açıl media maqnatı Acun Ilıcalının köhnə bacanağı imiş.
Bu barədə "Sabah" qəzeti məlumat yayıb.
Acun Ilıcalının keçmiş həyat yoldaşı Şeyma Subaşının bacısı Kübra Açıl ilə evli olan və Acuna məxsus futbol klubu "Hull City"də işləyən Merthan Açılın 2019-cu ildə qurduğu reklam şirkəti vasitəsi ilə İstanbul Böyükşəhər Bələdiyyəsindən ard-arda tenderlər aldığı üzə çıxıb.
Merthan Açıl hazırda xaricdə olduğu üçün saxlanılmayıb.
Məlum olub ki, əməliyyatların başlamasının ardından Merthan Açıl tələm-tələsik sosial media hesablarını bağlayıb. Onun həyat yoldaşı isə sosial media hesablarını bağlamayıb, Kübra Açılın əməliyyat və iddialarla bağlı danışmaması, səssiz qalması diqqətlərdən yayınmayıb.
Qeyd edək ki, İstintaq çərçivəsində "Hull City"də işləyən Merthan Açılın sahibi olduğu şirkətin İstanbul Böyükşəhər Bələdiyyəsindən 334 milyon 718 min 500 TL (təxminən 10 milyon dollar) dəyərində müstəsna tenderlər aldığı məlum olub. Haqqında həbs qətimkan tədbiri seçilən Merthan Açıla məxsus "Creative Medya Reklam A.Ş" şirkəti konqreslər, toplantılar, mərasimlər, yarmarkalar, seminarlar, konsertlər, festivallar, teatr tamaşaları, sərgilər və təqdimatlar təşkil etməklə məşğul olub.
20-03-2025, 13:53
Sabah Ermənistan-Türkiyə sərhədi açılacaq
Martın 21-dən 31-dək Ermənistanın Türkiyə ilə sərhəddə yerləşən Marqara keçid məntəqəsi Suriyaya humanitar yüklərin daşınması üçün fəaliyyətə başlayacaq.
Bu barədə Ermənistan hökuməti martın 20-də keçirdiyi iclasda qərar qəbul edib.
“Ermənistan və Suriyanın müvafiq departamentlərinin nümayəndələri arasında keçirilən işgüzar görüşlər nəticəsində Ermənistan Respublikası tərəfindən Suriyaya humanitar yardım göstərilməsi məsələsinin də müzakirəsi barədə razılıq əldə olunub. Bu qərar layihəsinin qəbulu Ermənistan adından Suriyaya göndərilən humanitar yardım yüklərinin quru yolu ilə Türkiyə ərazisindən daşınması zərurətindən irəli gəlir”, - deyə qərarda bildirilir.
Xatırladaq ki, Nikol Paşinyan hökuməti Türkiyə ilə münasibətlərin normallaşdırılması siyasəti çərçivəsində üçüncü ölkə vətəndaşları və diplomatik pasport sahibləri üçün Türkiyə ilə sərhədlərin açılmasına dair razılaşmanın nə vaxtsa həyata keçəcəyi ümidi ilə Marqara keçid məntəqəsini təmir edib.
20-03-2025, 13:42
Tramp Ukraynadan AES-ləri də istədi
ABŞ prezidenti Donald Tramp ukraynalı həmkarı Vladimir Zelenski ilə telefon söhbəti zamanı təhlükəsizliyi təmin etmək üçün Ukraynanın nüvə stansiyalarının ABŞ mülkiyyətinə verilməsini təklif edib. Məlumatı Ağ Ev yayıb.
ABŞ dövlət katibi Marko Rubio və prezidentin milli təhlükəsizlik üzrə müşaviri Maykl Vals bildiriblər ki, Ukraynanın dörd atom elektrik stansiyasının ABŞ-ın mülkiyyətinə verilməsi onun enerji infrastrukturu üçün ən yaxşı müdafiə olacaq.
Onların sözlərinə görə, Tramp Zelenskiyə çərşənbə günü telefon danışığı zamanı belə bir təklif edib.
Bu arada Zelenski bildirib ki, Trampla söhbət zamanı yalnız Zaporojye Atom Elektrik Stansiyası ətrafındakı vəziyyətə toxunulub.
"Sual yalnız hazırda müvəqqəti işğal altında olan stansiyaya aiddir", - Ukrayna dövlətinin başçısı vurğulayıb.
“Stansiya işləmir, çünki Rusiya onu əlində tamamilə qeyri-qanuni saxlayır”.
Zelenskinin sözlərinə görə, bu stansiyanın bərpasının mümkünlüyü məsələsi qaldırılıb.
"Prezident soruşdu: "Əgər Amerikanın onu bərpa edə biləcəyi anlayışı olarsa necə?" ", - Ukrayna lideri bildirib.
“Mən ona dedim: bəli, modernləşmək olarsa, biz sizinlə bunu müzakirə etməyə hazırıq. Lakin biz eksklüziv olaraq Rusiyanın müvəqqəti işğalı altında olan bir stansiya haqqında danışdıq", - deyə Ukrayna dövlətinin başçısı fikrini yekunlaşdırıb.
20-03-2025, 11:30
Trampın oval kabineti: “...qırmızı düyməni bassam, dünyanın sonu gələcək” - FOTO
ABŞ prezidenti Donald Tramp deyib ki, Ağ Evin Oval kabinetindəki qırmızı düymə nüvə silahı buraxmaq üçün deyil, “dietin Cola” sifariş etmək üçündür.
Tramp bu barədə “Foks Nyus”a müsahibəsində bildirib.
“Hamı bunun nüvə düyməsi olduğunu düşünür. Deyirlər ki, mən onu bassam, dünyanın sonu gələcək”, - Tramp bildirib.
Qeyd edək ki, Trampın Oval kabinetdəki iş masası belə bir cihazla hələ onun ilk prezidentliyi dövründə təchiz edilmişdi.
Lakin 2021-ci ildə hakimiyyətə gələn və 2025-ci ilə qədər dövlət başçısı vəzifəsini icra edən Co Baydenin əmri ilə prezidentin iş masasındakı otağa bir stəkan qazlı içki gətirməyə xidmət edən qırmızı düyməni oradan çıxarmışdılar.
Amerikanın Respublikaçılar Partiyasını təmsil edən president Donal Tramp bu il yanvarın 20-də ikinci dəfə ABŞ administrasiyasının rəhbəri vəzifəsinə başlayıb. O, 2024-cü il noyabrın 5-də keçirilən seçkilərdə qalib gəlib. Tramp seçkilərdə Co Baydenin rəhbərlik etdiyi əvvəlki Vaşinqton administrasiyasının vitse-prezidenti olmuş Demokratlar Partiyasının namizədi Kamala Harrisi üstələyib.
Tramp ilk dəfə 2017-2021-ci illərdə Amerika prezidenti olub. O, ABŞ tarixində fasilədən sonra yenidən ən yüksək posta seçilən ikinci şəxs olub. Əvvəllər buna yalnız Qrover Klivlend (1885-1889-cu illərdə 22-ci və 1893-1897-ci illərdə 24-cü prezident) nail ola bilmişdi.
Tramp ABŞ-ın 45-ci və 47-ci prezidenti oldu.
"Oval kabinet" Ağ Evdə ən rəmzi məkan hesab olunur, prezidentliyin əzəmətini və gücünü nümayiş etdirir, bura ABŞ prezidentlərinin iş otağıdır.
"Oval kabinet"in binanın qərb hissəsində yerləşən və cənuba baxan üç böyük pəncərəsi və dörd qapısı var.
"Oval kabinet"in ilk versiyası 1909-cu ildə Prezident Uilyam Taftın rəhbərliyi altında memar Neytan Vayt tərəfindən hazırlanıb.
1934-cü ildə Prezident Ruzveltin rəhbərliyi altında kabinet yenidən qurulub. Onun modernləşdirilməsi Erik Qaqler tərəfindən həyata keçirilib.
Donald Trampın Ağ Evdəki "Oval kabinet"ə qayıtması ilə birlikdə gümüş qartal fiqurları və kaminin yanındakı masada Böyük Britaniyanın baş naziri Uinston Çörçillin büstü də qoyulub.
20-03-2025, 00:37
Bu halda istefa verəcəyəm - Vuçiç şərtini açıqladı
Təhlükəsizlik qüvvələrinin etirazçılara qarşı səs silahı istifadə etməsi ilə bağlı məlumatlar təsdiqlənərsə, bu halda istefa verəcəyəm.
Bunu Serbiya Prezidenti Aleksandar Vuçiç deyib.
"Mən sizə indi açıq şəkildə deyirəm - əgər bizim qüvvələrimiz səs silahı, "Qasırğa" istifadə ediblərsə, necə deyirlər, onda mən artıq prezident deyiləm. Siz aciz yalançılarsınız, utanmalısınız", - deyə serb lideri bildirib.
Qeyd edək ki, səs silahının istifadəsi ilə bağlı iddianı Serbiyanın keçmiş Baş Qərargah rəisi və müxalifət liderlərindən biri Zdravko Ponoş irəli sürüb. İddiaya görə, 15 mart tarixində Belqradda keçirilən aksiyada polis bu cihazdan istifadə edib.
20-03-2025, 00:02
Trampla səmimi söhbət etdim - Zelenski
ABŞ Prezidenti Donald Trampla çox mənalı, müsbət və səmimi söhbətim oldu.
Bunu Ukrayna Prezidenti Volodimir Zelenski X hesabında yazıb.
Zelenski martın 19-da ABŞ lideri Donald Trampla keçirdiyi telefon danışığından söz açaraq, “bu il davamlı sülhün əldə oluna biləcəyinə” əminliyini ifadə edib.
Prezidentin sözlərinə görə, Ukrayna və Amerika heyətləri sülhə nail olmaq üçün addımların əlaqələndirilməsini davam etdirmək üçün yaxın günlərdə Səudiyyə Ərəbistanında görüşməyə hazırdır.
"Mən Donald Trampa martın 11-də Ciddədə Ukrayna və Amerika komandalarının işinin yaxşı və məhsuldar başlamasına görə təşəkkür etdim - komandaların bu görüşü müharibənin sona çatması istiqamətində irəliləyişə əhəmiyyətli dərəcədə kömək etdi. Biz razılaşdıq ki, müharibəni sona çatdırmaq üçün Ukrayna Amerika lideri ilə birlikdə çalışmalıdır. Bu il davamlı sülh əldə edilə bilər”, - deyə Zelenski əlavə edib.
Onun sözlərinə görə, Tramp Putinlə söhbətinin təfərrüatlarını və müzakirə olunan əsas məsələləri onunla bölüşüb.
"Müharibənin tam dayandırılması üçün ilk addımlardan biri enerji və digər mülki infrastruktura hücumları dayandırmaq ola bilər. Mən bu addımı dəstəklədim və Ukraynanın da bunu həyata keçirməyə hazır olduğunu təsdiqlədim. Komandalarımız Ciddədə bu addımı müzakirə etdilər. Amerika tərəfi də cəbhə xəttində qeyd-şərtsiz atəşkəs təklif etdi. Hesab edirik ki, atəşkəs dövründə hərtərəfli sülh sazişinin hazırlanmasına imkan yaratmaq üçün belə addımlar lazımdır”,- deyə Zelenski vurğulayıb.
Bundan əlavə, Prezident Trampa döyüş meydanındakı vəziyyət və Rusiya zərbələrinin nəticələri barədə son məlumatı təqdim etdiyini bildirib:
"Biz Kursk vilayətindəki vəziyyət barədə danışdıq, hərbi əsirlərin azad edilməsi və rus qoşunları tərəfindən əsir götürülən ukraynalı uşaqların geri qaytarılması məsələsinə toxunduq. Həmçinin, Ukraynanın hava hücumundan müdafiə sisteminin vəziyyətini və insanların həyatını qorumaq üçün onun gücləndirilməsi imkanlarını müzakirə etdik".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!