9-07-2024, 14:02
“Şərqi Zəngəzuru Ana Vətənə qovuşduran siyasət”
QHT layihəsi: “Şərqi Zəngəzuru Ana Vətənə qovuşduran siyasət” mövzusunda elmi seminar keçirilib
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə “Zəngəzur” Cəmiyyətləri İctimai Birliyinin “Şərqi Zəngəzur - Quruculuq və Böyük Qayıdışın ünvanı” layihəsi çərçivəsində AMEA-nın Lənkəran Regional Elmi Mərkəzində “Azərbaycan Respublikasında iqtisadi rayonların yeni bölgüsü haqqında” Azərbaycan Respublikasının Prezidenti İlham Əliyevin 7 iyul 2021-ci il tarixli Fərmanının 3 illiyinə həsr olunmuş elmi seminar keçirilib.
Seminarı giriş sözü ilə açan Mərkəzin direktoru, filologiya üzrə fəlsəfə doktoru Mehman Əliyev dövlət başçımızın imzaladığı bu sənədin mətnini iştirakçıların diqqətinə çatdırıb, 44 günlük müharibədə qazanılan möhtəşəm zəfərdən sonra Şərqi Zəgəzur ellərinin da Ana Vətənə qovuşduğunu, bu torpaqların dirçəlişi, yenidən məskunlaşdırılması prosesinin də dövlət başçımızın başçılığı ilə uğurla davam etdiyini bildirib.
“Zəngəzur” Cəmiyyətləri İctimai Birliyinin sədri, tarix üzrə fəlsəfə doktoru, yazıçı-publisist Hacı Nərimanoğlu “Şərqi Zəngəzuru Ana Vətənə qovuşduran siyasət” mövzusunda video-təqdimatla çıxış edib. İşğaldan azad edilən yurd yerlərimizdə genişmiqyaslı dirçəliş, tikinti, abadlıq işlərinə başlandığını video görüntülərlə təqdim edən məruzəçi ölkə rəhbərimizin “Zəngəzurun Şərqi varsa, onun Qərbi də var, bunların qovuşması artıq zaman məsələsidir” sözlərini xatırladaraq deyib: “Bu gün hər bir azərbaycanlı fəxrlə görür ki, hərb meydanında qazanılan qələbənin ardınca başlayan Quruculuq və Böyük Qayıdışın da memarı Azərbaycan Prezidentidir”.
Dini Qurumlarla İş üzrə Dövlət Komitəsinin Lənkəran bölgəsi üzrə şöbənin müdiri Qağayı Məmmədov, şöbənin aparıcı məsləhətçisi Səyyad Babakişiyev, Lənkəran Regional Elmi Mərkəzinin əməkdaşlarından Samir Kərimov, Fəranə Mikayılova, Aqil Həsənov, Fuad Hüseynov və İsaq Məmmədov təqdimatla bağlı çıxış ediblər. Xüsusi qeyd edilib ki, Birliyin və Elmi Mərkəzin bir qrup üzvü AMEA-nın ilk şəhidi, REM-in əməkdaşı olmuş Mahsun Bağırzadənin və Şərqi Zəngəzuda döyüşlərdə şəhid olan igid vətən övladlarının valideynləri və qazilərlə işğaldan azad edilmiş yurd yerlərimizə səfər edərək bu işlərin geniş miqyasının şahidi olmuşlar.
Elmi seminarın iştirakçılarına, REM və digər dövlət, qeyri-hökumət və media qurumlarına Hacı Nərimanoğlunun müəllifliyi ilə QHT-nin nəşr etdirdiyi “Şərqi Zəngəzur – Quruculuq və Böyük Qayıdışın ünvanı” layihəsi çərçivəsində nəşr edilən eyni adlı kitabın nüsxələri təqdim olunmuşdur.
6-07-2024, 14:34
"Qərbi Azərbaycan Kubok"u uğrunda final…
İyunun 26-da "Qərbi Azərbaycan Kubok"u uğrunda başlanan mini futbol turniri artıq final mərhələsindədir. Məlumat verdiyimiz kimi, tarixdə ilk dəfə təşkil olunan mini futbol turnirində Qərbi Azərbaycanın rayon icmalarını təmsil edən gənclərdən ibarət 20 komanda iştirak edib. Gərgin yarışmalardan uğurla keçən Qafan və Qəmərli komandaları finala çıxıblar. İyulun 7-də saat 17:00-da Bakı Tennis Akademiyasında komandaların qarşılaşması olacaq. Bəri başdan qeyd edək ki, oyunu hansı komandanın udmasıdan asını olmayaraq qazanan Qərbi Azərbaycan olacaq. Çünki bu turnir müqəddəs bir amal- Qərbi Azərbaycana qayıdış naminə təşkil olunub.
Xatırladaq ki, finala çıxan Qəmərli komandası Vedi komandasına 9:3, Basarkeçərə 4:2, Keşkəndə 2:1 hesabı ilə qalib gəlib. Digər finalçı-Qafan komandası isə Sərdarabada 7:0, Böyükqarakilsəyə 8:7, Meğriyə 3:0, Loru komandasına 6:2 hesablı qələbə çalıb.
Azarkerləri iyulun 7-də Bakı Tennis Akademiyasında gözləyəcəyik. Həmin gün həm də qaliblər mükafatlandırılacaq.
Qərbi Azərbaycan Bütöv Azərbaycanın qoparılmış parçasıdır!
Zəngəzur Azərbaycandır! Hədəfimiz Bütöv Azərbaycandır!
Qafan komandasının ən gənc təəssübkeşi Bəhruz Piriyev pərəstiş etdiyi 9 nömrəli oyunçu Əleyman Məmmədovla görüşmək üçün babası Bəhruzu oyun meydançasına aparıb. Nəticədən hamı məmnundur, üzlər gülür. Bəli, ulu babası Zəngəzurdan erməni faşistləri tərəfindən didərgin salınan Bəhruz bala Zəngəzur yolçularına qoşulur. Yolunuz açıq olsun!
“Butov.az”
Bozqurd balaları türklüyünə simgə çəkir
2-07-2024, 19:12
“Şərqi Zəngəzur-Quruculuq və Böyük Qayıdışın ünvanı”
Azərbaycan Milli Elmlər Akademiyasının Mərkəzi Elmi Kitabxanasında (MEK) yazıçı-publisist, tarix üzrə fəlsəfə doktoru Hacı Nərimanoğlunun yeni çapdan çıxan “Şərqi Zəngəzur – Quruculuq və Böyük Qayıdışın ünvanı” kitabının təqdimatı olub.
MEK-in direktoru, texnika elmləri üzrə fəlsəfə doktoru, dosent Hüseyn Hüseynov tədbiri giriş sözü ilə açıb, bildirib ki, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə "Zəngəzur" Cəmiyyətləri İctimai Birliyi tərəfindən həyata keçirilən “Şərqi Zəngəzur – Quruculuq və Böyük Qayıdışın ünvanı” layihəsi çərçivəsində nəşr edilən kitabda Azərbaycan Prezidenti, Müzəffər Ali Baş Komandan İlham Əliyevin rəhbərliyi, sarsılmaz siyasi iradəsi, qətiyyətli sərkərdəlik bacarığı sayəsində xalqımızın və rəşadətli ordumuzun 44 gün davam edən Vətən müharibəsində qazandığı möhtəşəm Zəfər, dövlətimizin başçısının rəhbərliyi ilə Şərqi Zəngəzur iqtisadi rayonunda başlanan genişmiqyaslı işlər zəngin informasiya və analitik materiallarla əks olunub. Natiq qeyd edib ki, “Prezident İlham Əliyev Şərqi Zəngəzurun bərpasının və Böyük Qayıdışın memarıdır” adlı “Ön söz”lə açılan kitabda Prezident İlham Əliyev və birinci xanım Mehriban Əliyevanın 44 günlük tarixi qələbədən bir neçə gün sonra - 16 noyabr 2020-ci ildə Şərqi Zəngəzur bölgəsinə ilk səfərlərindən başlayaraq Cəbrayıl, Kəlbəcər, Qubadlı, Laçın və Zəngilan rayonlarında çoxsaylı görüşlərinə, açılış və təməlqoyma törənlərinə dair məlumatlar rəngli fotolarla 60-dan çox başlıqla Zəfər, Dirçəliş və Böyük Qayıdış fəsillərində təqdim olunub.
Bakı Dövlət Universitetinin kafedra müdiri, professor Abbas Abbasov təqdim edilən kitabda Vətənimizin ayrılmaz parçası olan Zəngəzurun tarixi keçmişi, Prezident İlham Əliyevin Şərqi Zəngəzur iqtisadi rayonunun yaradılması haqqında qərarının siyasi əhəmiyyəti, nankor qonşularımızın törətdikləri vandalizmin nəticələrinin aradan qaldırılması üçün gerçəkləşən Dövlət proqramlarının, reallaşan layihələrin bugünkü mənzərəsi və gələcək perspektivləri, Şərqi Zəngəzurun iqtisadi potensialı, təbii sərvətləri barədə materiallara geniş yer verilməsini müsbət dəyərləndirib.
“Zəfər” ordenli şəhid polkovnik Babək Səmidlinin bacısı Röxsanə Səfərzadə Prezident, Müzəffər Ali Baş Komandan İlham Əliyev və Birinci Xanım Mehriban Əliyevanın şəhid ailələrinə diqqət və qayğısının kitabda geniş sənədli yazılı materiallarla, foto-şəkillərlə əks olunmasını razılıqla qeyd edib. Bildirib ki, MEK-də yeni yaradılmış “Qarabağ Qəhrəmanları” Fondunda müəllifin “Şəhidlər”, Qardaşlığın Zəfəri” kitabları ilə yanaşı bu nəşr də öz layiqli yerini tutacaqdır.
MEK-in elmi katibi Şəbnəm Rüstəmova QHT Agentliyinin ciddi informasiya, maarifləndirmə yönümlü layihələri maliyyələşdirməsinin əhəmiyyətini vurğulayaraq yüksək poliqrafik formatda rəngli tərtibatda nəşr edilmiş 240 səhifəlik kitabın MEK-ə təqdim edilən nüsxələrinin AMEA-nın kitabxanalarına, elm və təhsil müəssisələrinə də paylanacağını bildirib:
“Kitabdakı materillardan aydın görünür ki, Prezident İlham Əliyevin nəşrin üz səhifəsində də əks olunmuş bu fikri artıq gerçəkləşmə yolundadır: “Mən demişdim ki, biz Qarabağı və Şərqi Zəngəzuru cənnətə çevirəcəyik”.
Səmimi fikir mübadiləsindən sonra çıxış edən müəllif Hacı Nərimanoğlu kitabın donoru QHT Agentliyinə və təqdimatda iştirak edən şəhid ailələrinin üzvlərinə, Qarabağ müharibəsi veteranlarına, AMEA, BDU, QHT və KİV əməkdaşlarına təşəkkürünü bildirib.
İştirakçılara kitabın nüsxələri, üzərində QHT-nin loqosu və layihənin adı həkk olunmuş qələmlər hədiyyə olunub.
1-07-2024, 19:18
7 cavabsız qol
Əziz oxucular, "Qərbi Azərbaycan Kuboku" uğrunda mini futbol turnirində növbəti oyun Qafan- Sərdarabad komandaları arasında oldu. Bu gün saat 13-də Bakı Tennis Akademiyasının stadionunda keçirilən oyunda Qafan futbol komandasının meydana buraxılan bütün üzvləri yüksək oyun nümaiş etdirdilər. Bu arada komandanın qapıçısının xidmətini xüsusi qeyd etməmək insafsızlıq olar. Gərgin oyun zamanı Qafan futbolçuları 7 qola imza atdılar.
Rəqib komandanın oyunçuları axıra qədər mübarizə aparsalar da hesabları açılmadı. Beləliklə oyun 7:0 hesabı ilə Qafan futbol komandasının qələbəsi ilə başa çatdı.
“Butov.az”
1-07-2024, 10:29
"Qərbi Azərbaycan Kuboku" uğrunda yarış davam edir
26 iyun - 06 iyul tarixlərində Qərbi Azərbaycana qayıdış ətrafında icma üzvlərinin sıx birləşməsi, gənclər arasında kommunikasiyanın möhkəmləndirilməsi, eyni zamanda sağlam həyat tərzinin təbliği, icmanın fəaliyyətində kütləviliyin artırılması və sağlam cəmiyyətin formalaşdırılmasına dəstək məqsədilə rayon icmalarının təşəbbüsü və Qərbi Azərbaycan İcmasının təşkilatçılığı ilə mini futbol üzrə Qərbi Azərbaycan Kuboku keçirilir.
Mini futbol turnirində Qərbi Azərbaycanın rayon İcmalarını təmsil edən gənclərdən ibarət 20 komanda iştirak edir.
30 iyun 2024-cu il tarixdə, saat 20:00-da Bakı Tennis Akademiyasının zalında Meğri-Amasiya mini-futbol komandaları ilk görüşü kecirildi. Megri komandası əzmlə oynayaraq 4-3 hesabı ilə qalib gəldi .
Oyunu izləməyə Meğri İcmasının sədri akademik Fikrət Əliyev, megrili ziyalılar, iş adamları, Gənclər surası üzvləri,Kənd İcma sədrləri, icma üzvləri, sakinləri və ata-baba yurdrları Zəngəzurdan olan balaca azarkeşlərdə oyunu izləməyə gəlmişdilər. Gücümüz BİRLİYİMİZDİR !
8-06-2024, 17:11
Şərqi Zəngəzurun Zəfər, Quruculuq və Böyük Qayıdışa həsr olunmuş kitab çıxıb
Azərbaycan Prezidenti, Müzəffər Ali Baş Komandan İlham Əliyevin rəhbərliyi, sarsılmaz siyasi iradəsi, qətiyyətli sərkərdəlik bacarığı sayəsində xalqımızın və rəşadətli ordumuzun 44 gün davam edən Vətən müharibəsində qazandığı möhtəşəm Zəfərdən dərhal sonra Şərqi Zəngəzur iqtisadi rayonunda başlanan genişmiqyaslı işlər yazıçı-publisist, tarix üzrə fəlsəfə doktoru Hacı Nərimanoğlunun “Şərqi Zəngəzur – Quruculuq və Böyük Qayıdışın ünvanı” kitabında zəngin informasiya və analitik materiallarla əks olunub.
Elm və Təhsil Nazirliyinin Şərqi Zəngəzur Regional Təhsil İdarəsinin müdiri Fuad Bədəlovun “Prezident İlham Əliyev Şərqi Zəngəzurun bərpasının və Böyük Qayıdışın memarıdır” adlı ön sözü ilə açılan kitabda Prezident İlham Əliyevin 44 günlük tarixi qələbədən bir neçə gün sonra - 16 noyabr 2020-ci ildə Şərqi Zəngəzur bölgəsinə ilk səfərlərindən başlayaraq Cəbrayıl, Kəlbəcər, Qubadlı, Laçın və Zəngilan rayonlarında çoxsaylı görüşlərinə, açılış və təməlqoyma törənlərinə dair məlumatlar rəngli fotolarla 60-dan çox başlıqla Zəfər, Dirçəliş və Böyük Qayıdış fəsillərində təqdim edilib.
Kitabda Vətənimizin ayrımaz parçası olan Zəngəzurun tarixi keçmişi, Prezident İlham Əlievin Şərqi Zəngəzur iqtisadi rayonunun yaradılması haqqında qərarının siyasi əhəmiyyəti, nankor qonşularımızın törətdikləri vandalizmin nəticələrinin aradan qaldırılması üçün gerçəkləşən dövlət proqramlarının, reallaşan layihələrin bu günkü mənzərəsi və gələcək perspektivləri, Şərqi Zəngəzurun iqtisadi potensialı, təbii sərvətləri barədə materiallar da yer alıb.
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə "Zəngəzur" Cəmiyyətləri İctimai Birliyi tərəfindən həyata keçirilən “Şərqi Zəngəzur Quruculuq və Böyük Qayıdışın ünvanı” layihəsi çərçivəsində nəşr edilən kitabda Prezident İlham Əliyevin apardığı məqsədyönlü siyasətin regionda daimi sülhün, əmin-amanlığın bərpasına şərait yaradacağına inam ifadə olunur.
İctimai Birlikdən “Bütöv Azərbaycan” qəzetinə verilən məlumata görə, kitab Qarabağ və Şərqi Zəngəzur regionunun təhsil müəssisələrinə, kitabxanalara, icra, özəl strukturlara, ictimai təşkilatlara, şəhid ailələrinə, vətən müharibəsi iştirakçılarına, QHT və KİV-ə paylanır. “Füyuzat” nəşriyyatında rəngli formatda çıxan kitabın elektron variantı Birliyin www.zengezur.com saytının “Kitablar” bölümündə yerləşdirilib.
6-06-2024, 13:38
Şəhid ataları və qazilər Şərqi Zəngəzurda
“Zəngəzur” Cəmiyyətləri İctimai Birliyi Bakı, Lənkəran, Astara, Sabirabadda doğulub 44 günlük Vətən müharibəsində Şərqi Zəngəzur bölgəsinin Cəbrayıl, Zəngilan, Qubadlı rayonlarında erməni işğalçılarına qarşı savaşlarda igidlik göstərərk şəhid olmuş əsgərlərimizin valideynlərinin və yaralı döyüşçülərin həmin torpaqlara səfərini təşkil edib.
Səfər Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirilən “Şərqi Zəngəzur - Quruculuq və Böyük Qayıdışın ünvanı” layihəsi çərçivəsində gerçəkləşib.
Şəhid Mahsun Bağırzadənin atası Zahir Bağırov, şəhid Bəxtiyar Mayılovun atası İxtiyar Mayılov övladlarının şəhid olduqları məkanları ziyarət ediblər, onların səngər yoldaşları, son döyüşlərinin şahidləri baş leytenant Elnur Talıbov, II qrup əlil Möhnət Səmədovun xatirələrini dinləyiblər.
Şəhidlərin II Qarabağ müharibəsində hərbi xidmət keçdikləri N. hərbi hissəsinin şəxsi heyəti ilə keçirilən görüşdə çıxış edən şəhid ataları və qazilər, “Zəngəzur” Cəmiyyətləri İctimai Birliyinin sədri, yazıçı-publisist, tarix üzrə fəlsədə doktoru Hacı Nərimanoğlu, AMEA Lənkəran Regional Elmi Mərkəzinin direktoru, şair, filologiya üzrə fəlsəfə doktoru Mehman Qaraxanoğlu və başqaları Azərbaycan Prezidenti, Ali Baş Komandan İlham Əliyevin rəhbərliyi ilə əsgər və zabitlərimizin göstərdikləri igidlikdən danışmış, qazanılan möhtəşəm zəfərin tarixi-siyasi, mənəvi-psixoloji əhəmiyyətini vurğulamışlar.
Səfərdə iştirak edənlər Füzuli, Cəbrayıl, Zəngilan və Qubadlıda görülən genişmiqyaslı bərpa, tikinti işləri ilə, Zəngilan rayonunun Aşağı Ağalı kəndində yurd yerlərinə qayıdan ailələr üçün yaradılan nümunəvi şəraitlə əyani tanış olublar.
6-06-2024, 13:15
Şəhidlər ölməz…
Əziz oxucular, 1987-ci ildə bünövrəsi qoyulmuş Bütöv Azərbaycançı Tələbə- Gənclər qrupunun ilk üzvlərindən olan Əbdüləli Əhmədov artıq tələbəlik illərini çox geridə qoyub. Ömrünün müdriklik çağlarını yaşayan həkim dostumuzun ürəyi yenə də Bütöv Azərbaycan eşqilə döyünür. Elə bu dəfəki paylaşımı da Azərbaycanımızın müstəqilliyi, ərazi bütövlüyü uğrunda canından keçən Vətən övladlarından biri haqqındadır. Həmin paylaşımı və şəhidimizin fotosunu diqqətinizə çatdırırıq:
“Salam olsun Azərbaycan xalqınin dəyərli övladlarına. Sizlərə unudulmaz bir Şəhidimiz haqqında məlumat vermək istərdim. Ölməz Şəhidimiz 1974- cü ildə Zəngəzur mahalının Qafan rayonunun Pürülü kəndində Əsgər atanın və Qönçə ananın ailəsində dünyaya göz açmış Abış Məmmədovdur. Qəhrəman Şəhidimiz 1988- ci ilə qədər Zeyvə qəsəbəsində orta məktəbdə təhsil almışdır. Hərbi qulluğa gedən qeyrətli eloğlumuz 1993- cü ildə I Qarabağ Müharibəsində Qubadlının müdafiəsinə qoşulub.
Şəhidlər ölməz,
Vətən bölünməz.
Bütün Şəhidlərimizin ruhuna ehtiramla:
Əbdüləli ƏHMƏDOV
6-06-2024, 12:25
Polad, daha bir 50…
Sosial medianın ən fəal və aparıcı nümayəndələrindən biri olan Polad Poladovu respublikamızda çox adam tanıyır. Qərbi azərbaycanlılar arasında isə, demək olar ki, tanımayan yoxdur. Çünki Polad bütün şüurlu həyatını Qərbi Azərbaycanın mədəni irsinin, milli-mənəvi dəyərlərinin, görkəmli şəxsiyyətlərinin, ziyalı zümrəsinin təbliğinə həsr edib. Elə bu məqsədlə də “Ellilər”(Qərbi Azərbaycan), “İrəvan”, “Qafan eli” qruplarını və bir neçə internet səhifəsi yaradaraq informasiya yayımı ilə məşğul olur. Poladın ictimai-siyasi fəaliyyəti göz qabağında olsa da, imzasını tanıtsa da, təvazökarlığından özünü tanıtmağa həvəs göstərmir.
Əziz oxucular, bu gün hamımızın sevimlisi, Qərbi Azərbaycan İcmasının formalaşmasında xüsusi xidmətləri olan, Qafan rayon icmasının qurucularından biri, cəfakeş, təəssübkeş və çoxumuzun mükəmməl informasiya mənbəyi olan Polad bəyin dogum günüdür. Bu münasibətlə onu “Bütöv Azərbaycan” ailəsi adından, özünün də bir tərəfinin mənsub olduğu Əfəndi uşağı adından və Kurud-Kirs icması adından təbrik edirik. Sağlam, uzun ömür və yorulmaz fəaliyyətində uğurlar arzulayırıq. Elə bu arzularla da Poladın qısaca tərcümeyi-halını diqqətinizə çatdırırıq.
Polad Osman oğlu Poladov 1974-cü il iyunun 6-da Zəngəzur mahalının Qafan rayonunun Kurud kəndində döğulub. 8 illik təhsilini doğma kənddə alıb. Tam orta təhsili Bakı şəhərindəki 106 nömrəli məktəbdə başa vurub. Müəllim ailəsində doğulan Polad sazın, sözün sehrində böyüyüb. Beşiyi başında saz çalındığından gendən, qandan gələn milli təəssübkeşlik, fədakarlıq ruhuna da hopub. Ona görə də Vətəninə, millətinə, elinə, obasına qırılmaz tellərlə bağlanıb.
Polad Poladov 1999-cu ildə Azərbaycan Dövlət Neft Akademiyasının bakalavr pilləsini, 2001-ci ildə isə magistr pilləsini fərqlənmə diplomu ilə bitirib. 2001-2003-cü illərdə həqiqi hərbi xidmət keçib. 2003-cü ildə baş leytenant hərbi rütbəsində ordu sıralarından tərxis olunub.
20 ildən çoxdur mülkü həyatını xeyirxah işlərə, el-obaya, dövlətə, millətə xidmətə həsr eləyib. 50 ilin aşırımından geri boylanan Polad bəyə daha bir 50 il irəli boylanmağı, doğulduğu Zəngəzura qovuşmağı arzulayırıq.
Sevgi və sayğılarla: Tamxil ZİYƏDDİNOĞLU
4-05-2024, 23:44
36 ilin həsrəti
36 il əvvəl Zəngəzur mahalının Mahmudlu kəndindən, üzü görünməzə, sonu bilinməzə bir karvan qalxdı. Karvan nə yaylaq köçü aparırdı, nə də ticarət yükü. Bu köç ellikcə gedirdi. Amma hamının yükü eyni ağırlıqda dərd yüküydü. Erməni façistlərinin rus əsgərlərinin süngüsü ilə gətirdikləri faciə bütün Qərbi Azərbaycanı bürümüşdü. Yollarda yalnız qan izi, evlərdə ah-nalə səsləri...Hər şey bir-birinə qarışmışdı. Kimsə kimsədən xəbər tuta bilmirdi. Hərə başını götürüb bir diyara üz tutmuşdu.
Artıq aradan bir qərinə keçib. O vaxt nənə-baba olanlar dünyasını dəyişib. Ata-analar nənə, baba olub. Qundaqda gələnlər ata, anadır.
36 il əvvəl pərən-pərən düşən Mahmudlu camaatı xeyli vaxtdır icma halında fopmalaşıb. İcma üzvləri bundan sonra yurda qayıdış karvanına qoşulmağı gözləyirlər. Bu istəkdə olanların bir qismi aprelin 28-də Qafan rayonunun Mahmudlu Kənd İcmasının sədri Sərvər Azadəlioğlunun təşkilatçılığı ilə Masazır kəndindəki “Kənd Ocağı” restoranında görüş keçiriblər. Bu görüşə gələnlərin hərəsi yol boyu bir xəyalın qanadından asılıb. Kimisi qızlarla yemlik yığıb, gül topladığını, təndirə çörək yapıb fətir bişirdiyini xatırlayıb, kimisi dumanlı dağların yaşıl qoynunda, çəndə, çisgində quzu otardığı günləri, kimisi də at belində Dəfdən, Qazmacadan belə oymaq-oymaq gəzdiyi yerlərin həsrətilə qovrulub.
Görüşü Sərvər müəllim açaraq kənd camaatını salamlayıb. Qeyd edib ki, kəndimizin bura toplaşan camaatından 36 ildir ki, ayrı düşmüşük. Mənfur qonşularımızın silahlı hücumu nəticəsində Qərbi Azərbaycanımızın hər yerində olduğu kimi biz- Qafan rayonunun Zəngəzur mahalının Mahmudlu kənd camaatı da 1988-ci ilin sərt qış aylarında dədə-baba yurdumuzdan didərgin düşdük. Hərəmiz Azərbaycanın müxtəlif güşələrində məskunlaşdıq. Özümüzə uyğun yaşamımızı bərpa etdik. Möhtərəm prezidentimiz İlham Əliyevin dəstəyi ilə Qərbi Azərbaycan İcması yaradılıb. Bu icmanın tərkibində bütün rayonlar öz icmalarını yaradıblar. O cümlədən Qafan rayonunun icması da yaradılıb. Onun rəhbəri gözəl alim, tibb elmləri doktoru, professor Eldar Abasovdur. İcmamızın məqsədi Qərbi Azərbaycanın rayonlarından qaçqın salınmış insanları öz dədə-baba yerlərinə qaytarmaqdır. Biz inanırıq ki, yaxın vaxtlarda hamımızın arzusu yerinə yetiriləcək.
Görüşdə kənd camaatından Bayramov Şirvan Vilayət oğlu, Qarayev Faiq Səməd oğlu, Azadəliyev Şakir Əhməd oğlu, Ağayarova Arifə İxtiyar qızı, Əhmədova İradə Süleyman qızı, Mehdiyeva Teyyubə Mehdi qızı və başqaları öz ürək sözlərini, yaddan çıxmayan xatirələrini söyləyiblər. Elbrus Əliyev isə üzünü Aftil əmioğluya tutaraq Qazangölə getmək arzusunu iki bənd şeirlə ifadə edib. Görüş iştirakçılarına Qərbi Azərbaycanın İcmasından verilmiş üzvlük vəsiqəsi və döş nişanları təqdim edilib.
Həsrət dolu sevincə bürünən görüş çox maraqlı keçib. Kəndin məzəli əhvalatları, hafizələrə hopan hadisələri yada salınıb. Musiqiçilərin ifa etdikləri mahnılar tədbirə xüsusi rəng qatıb, hər kəsə xoş ovqat bəxş edib. Görüşə yekun vuran Aftil Bayramov icma üzvləri adından görüşün təşkilatçısı Sərvər Azadəliyevə minnətdarlığını bildirib və belə görüşlərin tez-tez keçirilməsini xahiş edib. Axırda xatirə şəkili çəkdirilib.
“Bütöv Azərbaycan”
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!