Azərbaycanlı məhbusun xanımı aclığı dayandırıb

 Azərbaycan milli kimliyi uğrunda dinc mübariz, 7 ilə yaxındır Tehranın Evin zindanında saxlanan jurnalist Səid Mətinpurun xanımı Ətiyyə Tahiri 5 günlük aclıq aksiyasını dayandırıb. “Media forum” saytı “Oyannews.com”un farsdilli versiyasına istinadla xəbər verir ki, Ətiyyə Tahiri aclıq aksiyasını dayandırmağa bir qrup azərbaycanlı fəalın Zəncan şəhərindəki evində onu ziyarət edib dilə tutmasından sonra razılaşıb.

Azərbaycanlı fəalların ziyarətindən məmnun qaldığını bildirən Ətiyyə Tahiri yoldaşı Səid Mətinpurla son görüşündən danışıb: “Bir çox əzab-əziyyətdən sonra, nəhayət, Səidlə şüşə arxasından 5 dəqiqəlik görüşməyimə icazə verdilər. Səidin dediyinə görə, siyasi məhbusları son dərəcə kobud şəkildə döyüb şil-küt ediblər. Öz övladları ilə görüşə gələn məhbus valideynləri həmin günü ağlaşma ilə başa vurdular. Deyilənlərə görə, məhbusların durumu və səhhəti qənaətbəxş deyil”.

 Xatırladaq ki,aprelin 17-də Tehranın Evin zindanının 350-ci korpusunda saxlanan siyasi məhbuslar qəfil hücuma məruz qalıb. Hücum siyasi məhbusların zindan məmurlarının kobud və təhqiramiz şəkildə yoxlama aparmasına etirazından, birgə inqilabçı himn və mahnılar oxumasından sonra baş verib.

Ətiyyə Tahiri aclığa aprelin 19-da yoldaşının həbsxanada döyülməsi və təkadamlıq kameraya köçürülməsi xəbərini eşidəndən sonra başlamışdı.