Nərimanov rayonundakı 177 saylı tam orta məktəbdə Azərbaycanın Milli Qəhrəmanı Əsəd Cəlal oğlu Əhmədova həsr olunmuş “Şəhidlər ölməzlər” adlı anım mərasimi keçirildi. Mərasimdə Azərbaycanın dövlət müstəqilliyi, ərazi bütövlüyü uğrunda şəhid olanların, o cümlədəın Milli Qəhrəman Əsəd Əhmədovun xatirəsi yad edildikdən sonra, məktəbin şagirdləri Azərbaycanın bayrağını tədbirin keçirildiyi salona gətirdilər. Bu xoş məqam tədbir iştirakçılarının hərarətli alqışları ilə müşayiət olundu.

Ədəbi- bədii gecənin təşkilatçısı, dil-ədəbiyyat müəllimi, metodbirləşmə sədri Nazilə Rəsul qızı Əliyeva Qərbi Azərbaycanda- Lori Pəmbək mahalında, Cəlal müəllimin ailəsində boya-başa çatmış Əsəd Əhmədovun qəhrəmanlığı, keçdiyi şərəfli döyüş yolu haqqında məlumat verdi. Onun göstərdiyi şücaətləri, cəsarətini və igidliyini Böyük Vətən müharibəsi illərində qəhrəmancasına həlak olmuş, adları Sovet Ensiklopediyasında yer almış əmiləri,Veysəl və Rəsul Əhmədovlara oxşaması ilə və irsi keyfiyyətlərlə bağladı.
Mərasimdə mərhum Heydər Əliyevin şəhid ailələrinə göstərdiyi qayğı və dəstəkdən söhbət açan natiqlər qeyd etdilər ki, məhz onun imzaladığı fərmanla, 1993-cü ildə Əsəd Əhmədova "Azərbaycanın Milli Qəhrəmanı" fəxri adı verilib. Daha sonra, 2015-ci ildə isə hörmətli prezidentimiz İlham Əliyevin diqqəti nəticəsində qəhrəman oğul böyütdüyü üçün, şəhidin anası Simuzər xanıma “Dədə Qorqud” Milli fondu tərəfindən “Mehriban ana” medalının verilməsi vurğulandı.
V-VII-VIII sinif şagirdləri Əsəd Əhmədovun 22 illik nakam həyatından söhbət açaraq bu mövzuda şeirlər söylədilər, səhnəciklər göstərdilər. Məktəbin tarix müəllimi Rəvanə Məmmədovanın tərtib etdiyi “İgid əsgər möhkəm dayan” adlı videoçarx nümayiş etdirildi.

Mərasimdə Azərbaycan Televiziyasının və digər kütləvi informasiya vasitələrinin nümayəndələri, Səfərbərlik və Hərbi xidmətə çağırış üzrə Dövlət xidmətinin Nərimanov Rayon İdarəsinin rəisi, polkovnik Qəşəm Mahmudov, Hərb Tarixi Muzeyinin direktoru, ehtiyatda olan polkovnik Əzizağa Qənizadə,”Ordu” qəzetinin müxbiri Lalə Hüseynova, şəhid Əsəd Əhmədovun qardaşı, Qarabağ müharibəsi əlili İntiqam Əhmədov, bacısı Afidə xanım Əhmədova iştirak etdilər. Afidə xanım Əhmədova ailələri adından çıxış edərək şəhid ailələrinə daim diqqət yetirdiyinə görə hörmətli prezidentimiz İlham Əliyevə minnətdarlığını bildirdi.

Mərasim M.Tağıyevin ifasında “Zəfər marşı”ilə başa çatdı. Məktəbin direktoru Həqiqət Qarayeva,TTİDM Afilə Cəfərova mərasim iştirakçılarına minnətdarlıqlarını bildirdilər .
Nazilə Rəsulqızı (Əliyeva)
177-saylı tam orta məktəbin
dil-ədəbiyyat müəllimi, metodbirləşmə sədri.