16-02-2022, 21:22
Rusiya ilə raket və hücum silahlarını müzakirə etməyin ən yaxşı yolu birbaşa danışıqlardır. Bu açıqlama ilə NATO Baş katibi Yens Stoltenberq çıxış edib. “NATO Rusiyanı təhdid etməyən müdafiə ittifaqıdır. Biz Rusiyanın təhlükəsizlik problemlərini müzakirə etmək, silahlara nəzarət mövzusunu nəzərdən keçirmək üçün danışıqlar masası arxasına əyləşməyə hazır olduğumuz barədə illər və aylardır danışırıq. Əgər onlar raketlərdən və hücum silahlarından narahatdırlarsa, o zaman bunu həll etməyin ən yaxşı yolu raketlərin sayını necə azalda biləcəklərini müzakirə etmək üçün danışıqlar masasına oturmaqdır. Biz bunu əvvəllər də etmişik, Rusiya ilə razılaşmalar əldə etmək olar”, - Stoltenberq qeyd edib.
16-02-2022, 21:03
Milli Məclisdə aqrar sahə ilə bağlı dinləmə keçirilib
Fevralın 16-da Milli Məclisin İqtisadi siyasət, sənaye və sahibkarlıq komitəsi Aqrar siyasət komitələrinin təşkilatçılığı, Kənd Təsərrüfatı Nazirliyinin iştirakı ilə birgə dinləmə keçirilib. Milli Məclisin Mətbuat və ictimaiyyətlə əlaqələr şöbəsindən verilən xəbərə görə, Milli Məclisin komitə sədri Tahir Mirkişili bildirib ki, dinləmədə Azərbaycanda aqrar sahə üzrə görülən işlər, qarşıda duran çağırışlar və inkişaf hədəflərinə dair təqdimatlar keçiriləcək və müzakirələr aparılacaq.
Kənd təsərrüfatı sahəsinin Azərbaycan iqtisadiyyatında, ixracatında tutduğu mövqeyindən söz açan Tahir Mirkişili iqtisadi məşğul əhalinin əhəmiyyətli hissəsinin bu sektorda çalışdığını, qeyri-neft ixracında kənd təsərrüfatı məhsullarının ilk beşlikdə yer aldığını vurğulayıb. Azərbaycanda aqrar sahədə həyata keçirilən islahatların öz bəhrələrini verməkdə olduğuna toxunan komitə sədri 2022-ci ilin dövlət büdcəsində bu istiqamətdə, o cümlədən aqrar sığortaya ayrılan vəsaitləri qeyd edib. Komitə sədri bildirib ki, bununla belə qarşıda duran çağırışlar – dünyada ərzaq məhsulları üzrə müşahidə olunan çatışmazlıq, bu cəhətdən qiymətlərin artması, iqlim dəyişikliyi ilə bağlı ortaya çıxan çətinliklər bu sahəyə yeni yanaşmaların tətbiqini və diqqətin artırılmasını zəruri edir.
Milli Məclisin Aqrar siyasət komitəsinin sədri Tahir Rzayev də dinləmənin aqrar sahənin inkişaf etdirilməsi yollarının müəyyənləşdirilməsi baxımından faydalı olacağına inamını ifadə edib. Bu sahənin çətinliklərindən, xüsusən də onun təbii amillərdən asılı olmasından danışıb.
Ölkənin ərzaq təhlükəsizliyinin təmin olunmasının yerli istehsalın üzərində qurulduğunu qeyd edən Tahir Rzayev aqrar sahənin inkişafı və aktual məsələləri ilə bağlı fikirlərini bildirib.
Kənd təsərrüfatı naziri İnam Kərimov son beş ildə aqrar sahədə məhsul artımının təxminən 25 faiz təşkil etdiyini, kənd təsərrüfatı üzrə müsbət inkişaf dinamikasının 2021-ci ildə də davam etdiyini, ümumi istehsal həcmində 3,4 faizlik artım qeydə alındığını açıqlayıb. O, Elektron Kənd Təsərrüfatı İnformasiya Sisteminin yaradılması, texnika və damazlıq heyvan satışı bazarının artıq tam liberallaşması, bazar iqtisadiyyatı tələblərinə uyğun aqrar sığorta sisteminin tətbiqi barədə məlumat verib.
Nazir mövcud olan məhdud torpaq və su resurslarından səmərəli istifadənin aktuallığını xüsusi vurğulayıb.
Sonra dinləmədə təqdimatlar həyata keçirilib. Diskussiya şəraitində keçən dinləmədə qaldırılan məsələlərə aydınlıq gətirilib, suallar cavablandırılıb.
Tədbirə yekun vuran Tahir Mirkişili dinləmələrdə fəal iştirak etdiklərinə görə qonaqlara və deputatlara təşəkkür edib və aparılan fikir mübadiləsinin aqrar sahənin inkişafı baxımından faydalı olacağına inamını bildirib.
16-02-2022, 15:10
Rusiya ermənini Bakıya göndərirdi - Qarşısı alındı
Ermənistan Baş Prokurorluğu ölkə vətəndaşının Rusiyadan Azərbaycana deportasiyasının qarşısını alıb.
“Sputnik Armenia” xəbər verir ki, Azərbaycanda doğulmuş erməni Rusiyada inzibati qaydaları pozub, buna görə onun ölkədən deportasiyası barədə qərar verilib. Məhkəmə qərarında səhvən onun Azərbaycan vətəndaşı kimi göstərilməsinə görə, Ermənistan vətəndaşının Bakıya deportasiyası riski yaranıb.
Ermənistan tərəfinin müraciətindən sonra Rusiya tərəfi qərara dəyişiklik edib və o, Ermənistana deportasiya edilib. (APA)
16-02-2022, 13:45
Müdafiə Nazirinin sabiq müavini, Hərbi Hava Qüvvələri və Hava Hücumundan Müdafiə Qoşunlarının keçmiş komandanı, ehtiyatda olan general-mayor Altay Mehdiyev Silahlı Qüvvələrin Baş Qərargahının keçmiş rəisi, general-polkovnik Nəcməddin Sadıkovla bağlı iddialar irəli sürüb. Sosial şəbəkə hesabında bu barədə geniş açıqlama yayan Altay Mehdiyev 2000-ci illərin əvvəllərində Naxçıvan Muxtar Respublikasında Yuxarı Buzqov yaşayış məntəqəsi yaxınlığındakı Buzqov yüksəkliyi də daxil olmaqla geniş ərazinin işğaldan azad edilməsi əməliyyatı barədə bəzi faktları açıqlayıb. General məlum qeydində Nəcməddin Sadıkovu ittiham edərək yazıb ki, onun rəhbərliyi altında keçirilən uğurlu əməliyyatdan xəbər tutan Baş Qərargahın keçmiş rəisi dərhal geri çəkilməyi əmr edib:
“Əməliyyat zamanı planımıza uyğun olaraq, qısa bir zamanda, düşmənə göz açmağa belə imkan vermədən, çox eşalonlu mina sahələrini uğurla keçərək, bir nəfər olsun belə itki vermədən, ən yeni taktiki üsullarla torpaqlarımızı azad etdik! Dəhşətlisi ondan ibarətdir ki, keçirdiyim döyüş əməliyyatlarının ən qızğın vaxtında yeni azad etdiyimiz Buzqov dağında əməliyyatı idarə edərkən, o zaman Baş Qərargah rəisi vəzifəsində olan general Nəcməddin Sadıkov mənimlə mobil telefonla əlaqə saxlayaraq, taktiki vəziyyətlə maraqlanmadan, araşdırmadan, çox acıqlı və qəzəbli bir tərzdə dedi:
- Siz haradasınız? Nə ilə məşğulsunuz?
- Ön xətdə! Müdafiə xəttini möhkəmləndirməklə məşğuluq!
- Hansı müdafiə xəttini möhkəmləndirməklə? Bu dəqiqə Ermənistanın Baş Qərargah rəisi Arutunyan mənimlə əlaqə saxlayıb bildirdi ki, siz hücuma keçib onların "torpaqlarını" zəbt etmisiniz. Yerevanda Prezident Aparatı qarşısında mitinq keçirilir. Mən sizə əmr edirəm: təcili olaraq əvvəlki mövqelərimizə qayıdın!”
Altay Mehdiyevin açıqlaması sosial mediada ciddi müzakirə predmetinə çevrilib. Bildirilir ki, generalın Nəcməddin Sadıkovla bağlı iddiaları araşdırılmalı, ittihamlar öz təsdiqini taparsa, Baş Qərargahın keçmiş rəisinə cinayət işi açılaraq, həbsinə qərar verilməlidir.
Bununla bağlı danışan deputat Fazil Mustafa hesab edir ki, general Altay Mehdiyevin açıqlamasında çox ciddi hərbi cinayətdən söhbət gedir. Onun fikrincə, Nəcməddin Sadıkova yönəlmiş ittihamları araşdırmaq lazımdır:
“İddia edilir ki, Nəcməddin Sadıkov hərbi cinayətin müəllifidir. Belə olan halda konkret ittiham üzrə hüquq-mühafizə orqanları və prokurorluq cinayət işi qaldırmalıdır. Qarşı tərəfin iddialarının nə qədər haqlı olub-olmadığını müəyyənləşdirmək üçün şahidlər dindirilməli, ifadələr alınmalıdır. İfadələr əsasında da konkret qərarlar qəbul olunmalıdır”.
Deputat vurğulayıb ki, bu məsələnin üstündən ötüb keçmək olmaz. Çünki ortada olduqca ağır ittihamlar var:
“Burada vətənə xəyanətdən tutmuş, ən ciddi hərbi cinayətdən söhbət gedir. Eyni zamanda söhbət yüzlərlə əsgərin taleyindən, Azərbaycanın ərazi bütövlüyündən gedir. Həmçinin, vəzifə səlahiyyətindən istifadə edərək Azərbaycanın ərazi bütövlüyünü təmin etmək istəyən qüvvələrə qarşı əks fəaliyyətdən bəhs olunur. Bunlar çox ciddi ittihamlardır. Bu ittihamı diqqətdən kənarda saxlamaq olmaz”.
Nəcməddin Sadıkova qarşı cinayət işinin açılmasına gəlincə, Fazil Mustafa qeyd edib ki, kimliyindən asılı olmayaraq, təqsirkarların hamısı öz cəzasını almalıdır:
“Cinayət işi açılmalı olan təqsirkar şəxlərin əvvəl izahatı, daha sonra ifadəsi alınmalı, bundan sonra həmin şəxsin şahid, zərərçəkmiş və ya təqsirkar olduğu müəyyənləşdirilməlidir”.
Turqay Musayev
16-02-2022, 13:25
Hava nəqliyyatı vasitəsilə Azərbaycana giriş-çıxışına icazə verilən şəxslərin siyahısı genişləndirilib.
Bununla bağlı Baş nazir Əli Əsədov Nazirlər Kabinetinin “Xüsusi karantin rejiminin müddətinin uzadılması və bəzi məhdudiyyətlərin aradan qaldırılması ilə bağlı tədbirlər barədə” qərarında dəyişiklik edilməsi barədə qərar imzalayıb. Yeni qərarla Birləşmiş Millətlər Təşkilatının (BMT) icazə sənədi- pasportu olan şəxslərin Azərbaycana giriş-çıxışına icazə veriləcək.
Qeyd edək ki, indiyə qədər Azərbaycanın vətəndaşlarına, həmçinin diplomatik pasport sahiblərinə, Azərbaycanda xarici ölkələrin diplomatik nümayəndəliklərinin və konsulluqlarının rəhbərlərinə, əməkdaşlarına və onların ailə üzvlərinə, Azərbaycan Respublikasında iş icazəsi olan əcnəbilərə və vətəndaşlığı olmayan şəxslərə, Azərbaycan Respublikasında müvəqqəti və ya daimi yaşamaq icazəsi olan əcnəbilərə və vətəndaşlığı olmayan şəxslərə və onların ailə üzvlərinə (arvadı (əri), himayəsində olan valideynləri və 18 yaşına çatmamış uşaqları, habelə 18 yaşına çatmış sağlamlıq imkanları məhdud uşaqları), habelə ölkəyə girişinə Azərbaycan Respublikasının Nazirlər Kabineti yanında Operativ Qərargah tərəfindən xüsusi icazə verilmiş şəxslərə münasibətdə – müvafiq təsdiqedici sənədlər və uçuşdan əvvəl 72 saat ərzində verilmiş COVID-19-a dair PCR testinin neqativ nəticəsini təsdiq edən sənəd əsasında hava nəqliyyatı vasitəsilə Azərbaycana giriş-çıxışına icazə verilirdi.
16-02-2022, 13:09
Türkiyə ordusu 13 PKK/YPG terrorçusunu zərərsizləşdirib.
Axar.az xəbər verir ki, bu barədə Türkiyənin Milli Müdafiə Nazirliyinin Tvitter səhifəsində məlumat paylaşılıb.
“Zeytun budağı” və “Fərat qalxanı” əməliyyat bölgələrinə daxil olmağa cəhd edən 13 PKK/YPG terrorçusu qəhrəman türk əsgərləri tərəfindən məhv edilib”, - məlumatda bildirilir.
16-02-2022, 13:07
NATO Rusiya sərhədlərinə doğru genişlənməyə davam edir.
Bu sözləri Rusiya Prezidenti Vladimir Putin Almaniya kansleri Olaf Şoltsla görüşündə deyib.
"NATO-nun genişlənməsi ilə bağlı... Çox gözəl bir ifadə dediniz: "Deyirlər ki, yaxın illərdə Ukrayna NATO-da olmayacaq". “Deyirlər” nə deməkdir? Siz və mən dövlətlərarası münasibətlərdə “deyirlər” sözünü başa düşməliyik. 30 ildir deyirlər ki, NATO-nun ümumiyyətlə, Rusiya sərhədlərinə doğru bir qarış belə genişlənməsi olmayacaq. Və bu gün biz NATO infrastrukturunu öz evimizin kandarında görürük”, - Putin bildirib.
16-02-2022, 13:03
Rusiya qoşun toplayır, şantaj edir, əzələ göstərir, hətta uyğun məqamda hücum da edir.
Postsovet məkanındakı bütün milli zəmində yaranan münaqişlərin başında Rusiya dayanır. Amma ilk dəfədir ki, dünya bu avtoritar dövlətə qarşı birləşdi. Zənnimcə, dünya ölkələrinin, xüsusilə də Qərbin, eləcə də Yaponiyanın bu məsələyə prinsipial münasibəti, Rusiya üçün hazırladıqları sanksiya paketləri Kreml sahibi Putini ciddi qorxutdu. Bu sözləri politoloq Qabil Hüseynli Rusiya qoşunlarının Ukrayna sərhədlərindən çəkilməsini şərh edərkən deyib.
“Rusiyanın Ukrayna müharibəsində qələbə qazanmaq şansı yoxdur. Çünki Qərb Ukraynaya çox böyük dəstək verir. Lazım gəlsə, müharibəyə də müdaxilə ediləcək. Yəni Ukraynaya qoşun yeridilsəydi, rəsmi Kiyevin və tərəfdaşlarının ciddi müqavimətinə rast gəlinəcəkdi. Ruslar qorxdu, amma əvəzində Dövlət Duması Donetsk və Luqansk “respublika”larını tanımaq haqqında qərar çıxardı. Rusiyanın istədiyi Donbas vilayətini Ukraynadan almaq idi. Bu əraziləri qoşunsuz işğal etdilər və bundan sonra tanınma prosesi gedəcək. Sonra da həmin ərazilərin Rusiyaya birləşdirilməsi üçün qərar çıxaracaqlar. Müstəqil bir ölkənin ərazilərini hissə-hissə ələ keçirirlər”, - politoloq bildirib.
Q.Hüseynlinin fikrincə, Rusiya sözün əsl mənasında postsovet məkanının jandarmı kimi çıxış edir:
“Kiminsə torpağını işğal edir, kimisə cəzalandırır, kiminsə ölkəsində dövlət çevrilişi edir... Rusiya dünya nizamında qarışıqlıq yaradan bir ölkədir”.
16-02-2022, 09:22
ABŞ-ın dediyi “hücum günü” gəldi: Qərb – ABŞ və Böyük Britaniya həm siyasi, həm də media üzərindən bu gün “nəsə baş verəcəyin”dən bəhs edir.
- Britaniyanın baş naziri Boris Conson Avropa Komissiyasının sədri Ursula fon der Leyenlə telefon söhbətində “dünyanın yaxın saatlarda ayıq olmasını” müzakirə ediblər;
- Bayden Putinlə dialoqun davam etdirilməsinə razılaşdığını bildirib, eyni zamanda, “bütün ssenarilərə hazır olduqlarını” bəyan edib: “NATO torpaqlarını qoruyacağıq” deyir, lakin bu, Ukraynaya aid deyil; ABŞ prezidenti əvvəlki mövqeyində qalır, “Rusiya Ukraynanı işğal edərsə, uzunmüddətli sanksiyalarla qarşılıq verəcəyik” deyir. Vaşinqton bununla “işğal günün”dən öncə Rusiyaya “sonuncu xəbərdarlığını” edir, lakin həm də beynəlxalq ictimaiyyətdə 16 fevral ssenarisinə inamı gücləndirir.
Qərb mediası da “16 fevral işğal günü” versiyasının doğruluğunu təsdiqləməyə çalışır.
ABŞ-ın texnologiya şirkəti “Maxar” Rusiya-Ukrayna sərhədindən yeni peyk görüntüləri yayıb: iddialara görə, Rusiya ordusu təlim bölgəsindən cəbhəyə doğru irəliləyir. Britaniyanın “San” qəzeti Rusiyanın fevralın 16-da sübh vaxtı – saat 05:00-da (Bakı vaxtı ilə) hücuma keçəcəyini yazır. Zelenski 16 fevral tarixini Milli Birlik günü elan etdi və bu, Rusiya təhlükəsinə qarşı həmrəylik nümayişi olmaqla yanaşı, Qərbdə “hücum günü” ilə bağlı yaradılan təşvişə qarşı da gedişdir: Rəsmi Kiyev müharibə haqda informasiya axınının səbəb olduğu iqtisadi itkiləri mümkün qədər azaltmağa çalışır. Rusiya israrla hücum etməyəcəyini desə də, dünyanı inandıra bilmir.
16 fevralda nə baş verə bilər?
Rusiyanın genişmiqyaslı hücuma keçməsi ağılsızlıq olardı və Moskvanın təkcə mövqeyi yox, diplomatik gedişləri də buna getməyəcəyini deməyə əsas verir, ən azından 16 fevral tarixində yox (sonrakı dövrdə belə ehtimal azdır). Heç nəyin baş verməməsi Rusiyanı haqlı, ABŞ-ı haqsız çıxara bilər və bu, həm də etibarlılıq məsələsi baxımından əhəmiyyətlidir. Bu situasiya fonunda bu gün nələrinsə baş verəcəyi gözləntisi artır, lakin baş verəcəklərin kimin tərəfindən edilməsini müəyyənləşdirmək də çətin olacaq.
Artıq Ukrayna Müdafiə Nazirliyinin rəsmi saytına kiberhücumların olduğu haqda məlumatlar var və bu, “hücumun başlanğıcı” kimi dəyərləndirilir.
16-02-2022, 09:05
Ordumuz öz ərazimizdədir, kiməsə təhlükə yaratmır
Rusiya hərbçiləri Rusiya Federasiyasının ərazisindədir və heç kimə təhlükə törətmir.
Bunu Rusiyanın BMT-dəki daimi nümayəndəsinin birinci müavini Dmitri Polyanski bildirib.
O, Qərb mətbuatında Rusiyanın guya təhdid olması ilə bağlı yayılan xəbərləri şərh edərkən deyib:
“Mənim heç bir təhdiddən xəbərim yoxdur: Bizim ərazimizdəki ordumuz heç kimə təhlükə yaratmır”.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!