15-05-2025, 21:20
Rusiya-Ukrayna danışıqları sabah keçiriləcək
Rusiya və Ukrayna arasında İstanbulda keçiriləcək danışıqlar mayın 16-da başlayacaq.
Bu barədə TASS mənbəyə istinadən məlumat yayıb.
“Bəli, danışıqlar mayın 16-sı başlayacaq”, - danışıqların təşkilinə yaxın mənbə müvafiq suala cavab verərkən söyləyib.
15-05-2025, 20:26
Dənizdə boğulduğu ehtimal edilirdi - 7 ay sonra sağ tapıldı
Bakıda 7 aydır itkin kimi axtarılan şəxs tapılıb.
Bu barədə Daxili İşlər Nazirliyi məlumat yayıb.
Bildirilib ki, itkin kimi axtarılan 28 yaşlı Qurbanlı Kənan Vaqif oğlu Sabunçu Rayon Polis İdarəsi 15-ci Polis Bölməsinin əməkdaşları tərəfindən tapılıb.
Qeyd edək ki, ötən ilin oktyabrında itkin düşən K. Qurbanlının dənizdə batdığı ehtimal olunurdu.
Onun indiyədək harada olduğu hələlik açıqlanmayıb.
15-05-2025, 20:24
Zelenskidən danışıqlarla bağlı yeni format
Ukrayna ilə bağlı danışıqlar hətta onlayn aparıla bilər.
Bunu Ukrayna prezidenti Volodimir Zelenski Türkiyə prezidenti Rəcəb Tayyib Ərdoğanla görüşdən sonra Ukrayna prezident aparatının YouTube kanalında yayımlanan mətbuat konfransında deyib.
O qeyd edib ki, media var, internet var: “Qarşılaşmaq və bütün prosesləri çətinləşdirməyə ehtiyac yoxdur”.
15-05-2025, 19:21
Marko Rubio Türkiyədə
Türkiyənin xarici işlər naziri Hakan Fidan NATO xarici işlər nazirlərinin Antalyada keçirilən görüşü çərçivəsində ABŞ Dövlət katibi Marko Rubio ilə görüşüb.
Bu barədə Türkiyə Xarici İşlər Nazirliyindən bildirilib.
Onların hansı məsələləri müzakirə etdikləri hələ ki açıqlanmayıb.
15-05-2025, 19:02
Zelenski Ərdoğanla bağlı paylaşım etdi
Ukrayna Prezidenti Volodimir Zelenski türkiyəli həmkarı Rəcəb Tayyib Ərdoğanla Ankarada keçirdiyi görüşlə bağlı paylaşım edib.
O, “X” səhifəsində Ərdoğanla əməkdaşlıq, təhlükəsizlik təminatları, atəşkəsin monitorinqi, dənizdə minalardan təmizləmə, Ukraynanın yenidən qurulması və dövlətlər arasında tərəfdaşlığın inkişafı məsələlərini də müzakirə etdiyini diqqətə çatdırıb.
O, bu məsələlərin əksəriyyəti ilə bağlı həmkarı ilə ortaq baxışa malik olduğunu qeyd edib.
15-05-2025, 18:49
İlham Əliyev Albaniyaya getdi - FOTO
Azərbaycan Prezidenti İlham Əliyev Albaniyanın Baş naziri Edi Ramanın və Avropa İttifaqı Şurasının Prezidenti Antonio Koştanın dəvəti ilə “Avropa Siyasi Birliyi”nin 6-cı Zirvə toplantısında iştirak etmək üçün Tiranaya işgüzar səfərə gedib.
Tirana şəhərinin Beynəlxalq Hava Limanında dövlət başçısını Albaniya Baş nazirinin müavini, İnfrastruktur və energetika naziri Belinda Balluku və digər rəsmi şəxslər qarşılayıblar.
15-05-2025, 18:18
İstanbulda Ukraynanı o təmsil edəcək - Zelenski TƏSDİQLƏDİ
İstanbulda Rusiya və Ukrayna nümayəndələri arasında keçiriləcək görüşdə prezident Volodimir Zelenski iştirak etməyəcək.
Zelenski Ukrayna nümayəndə heyətini İstanbula göndərdiyini təsdiqləyib.
O, bu barədə Türkiyə prezidenti Ərdoğanla görüşündən sonra keçirilən mətbuat konfransında bildirib.
Zelenskinin sözlərinə görə, nümayəndə heyətinin rəhbəri Ukraynanın müdafiə naziri Rustem Umerov olacaq.
Prezident əlavə edib ki, Ukrayna nümayəndə heyətinin atəşkəs məsələsini müzakirə etmək mandatı var.
15-05-2025, 18:03
Putinin köməkçisi: Ukrayna ilə danışıqlarda kompromisə hazırıq
İstanbulda Ukrayna ilə danışıqlarda Rusiya nümayəndə heyətinə başçılıq edən prezidentin köməkçisi Vladimir Medinski mümkün kompromislərə və onların müzakirəsinə hazır olduqlarını bildirib.
Bu barədə "RİA Novosti"nin məlumatında bildirilib.
O, həmçinin qeyd edib ki, nümayəndə heyəti işgüzar münasibət saxlayır.
Hazırda Rusiya nümayəndə heyəti İstanbul danışıqları üçün Ukrayna tərəfini gözləyir.
15-05-2025, 17:37
İmişli hadisələrinə görə tutulanlar hakim qarşısına çıxarılır
İmişli hadisələrinə görə tutulan 14 nəfərin cinayət işləri üzrə məhkəmənin hazırlıq iclası keçirilib.
İmişli Rayon Məhkəməsində keçirilən prosesdə təqsirləndirilən şəxslərin anket məlumatları dəqiqləşdirilib.
Daha sonra cinayət işinin məhkəmə baxışına verilməsi barədə qərar qəbul olunub.
Növbəti proses mayın 27-nə təyin olunub.
Xatırladaq ki, yanvarın 18-də İmişlidə Dövlət Yol Polisi avtomobilinin iştirakı ilə ölümlə nəticələnən yol qəzası baş verib. Belə ki, ərazidə xidmət aparan yol polisi avtomobilinin qarşısına qəflətən digər avtomobil çıxıb və qəza nəticəsində yol kənarında olan 3 məktəbli dünyasını dəyişib.
İstintaqla müəyyən olunub ki, İmişli rayon sakini, 2008-ci il təvəllüdlü Bəylər Bayramlı qohumuna məxsus olan avtomobili qanunsuz ələ keçirməklə qaçıraraq, sürücülük hüququ olmadan idarə edib yol hərəkəti qaydalarını pozaraq ehtiyatsızlıqdan iki şəxsin ölümünə, bir şəxsin isə sağlamlığına ağır zərər vurulmasına səbəb olub. Daha sonra qəzada xəsarət alan uşaqlardan biri də Bakıda müalicə olunduğu klinikada vəfat edib.
Həmçinin ittihama görə o, idarə etdiyi avtomobili qəzanın baş verdiyi yerdə saxlayaraq hadisə yerindən qaçıb.
Bəylər Bayramlı Cinayət Məcəlləsinin 185.1 (talama məqsədi olmadan qanunsuz olaraq avtomobil ələ keçirmə), 263-1.4 (yol hərəkəti və ya nəqliyyat vasitələrinin istismarı qaydalarını nəqliyyat vasitələrini idarə etmək hüququ olmayan şəxs tərəfindən pozma ehtiyatsızlıqdan iki şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələri ilə təqsirləndirilən şəxs qismində cəlb olunub və barəsində həbs qətimkan tədbiri seçilib.
Hadisədən sonra qəzaya səbəb olan avtomobili idarə edən şəxs, eləcə də qəzaya düşən Yol Patrul Xidməti avtomobilinə zərər vuraraq hadisə yerində hüquq pozuntusu törətməyə cəhd göstərən şəxslər saxlanılıblar.
Məhkəmənin qərarı ilə saxlanılan 14 nəfər (Bayramlı Bəylər, Babayev Rasif, Cabbarlı Anar, Usublu Vüqar, Səfərov Şamil, İbrahimov Elman, Bağırov Abbas, Məmmədov Taleh, Tağıyev Raqib, Məmmədov Qoşqar, Əliyev Sənan, Əzimov Elxan, Quliyev Ruslan, Rzayev Rahib) barələrində həbs qətimkan tədbiri seçilib.
Qəzaya düşən Yol Patrul Xidməti avtomobilinə zərər vuraraq hadisə yerində hüquq pozuntusu törətməyə cəhd göstərən şəxslərə Cinayət Məcəlləsinin 221.2.1. (Xuliqanlıq - bir qrup şəxs tərəfindən törədildikdə) maddəsi ilə ittiham verilib.
15-05-2025, 17:21
Laçında insanlar səbirsizliklə bu anı gözləyirlər
Azərbaycanın doqquzuncu beynəlxalq hava limanı hesab edilən Laçın aeroportunun bu il istifadəyə veriləcəyi gözlənilir. Bu barədə xəbəri yanvarın 28-də nəqliyyat məsələlərinə həsr olunan müşavirədə çıxışı zamanı Azərbaycan Prezidenti İlham Əliyev açıqlayıb.
Qeyd edək ki, Laçın Beynəlxalq Hava Limanının may ayında istifadəyə veriləcəyi barədə xəbərlər yayılıb. Artıq hava limanında bir neçə sınaq uçuşları edilib.
Hava limanı Laçından 62 kilometr aralıdadır. Hava limanının uçuş-enmə zolağının uzunluğu 3000 metr, eni 60 metr, perron sahəsi 50 min kvadratmetr olacaq. Terminalın sahəsi isə 5 min kvadratmetrdir. Aeroport tikintisinin ilkin mərhələsi kimi ərazisinin hamarlaşdırılması işləri görülür. 6,9 milyon m³ ərazidən torpaq çıxarılacaq (o cümlədən partlayışla) və 3,8 milyon m³ əraziyə torpaq doldurulacaq. Burada saatda 200 sərnişinə beynəlxalq standartlara uyğun xidmət göstərmək mümkün olacaq.
Laçın sakinləri də hava limanının açılışını səbirsizliklə gözləyir. Qeyd edək ki, Türkiyə Prezidenti Rəcəb Tayyib Ərdoğanın da hava limanının açılışında iştirak edəcəyi bildirilir.
Laçında yaşayan ziyalı Qəzənfər Hüseynov deyir ki, qardaş ölkə prezidentinin gəlişi ilə bağlı xəbərlər Laçında da eşidilib, insanlar da səbirsizliklə bu anı gözləyirlər:
“Rəcəb Tayyib Ərdoğanın Laçın haqqında səsləndirdiyi şeirə və digər şeylərə görə bütün Azərbaycan xalqı kimi Laçınlıların da qəlbində özünə məxsus yer qazanıb İnsanlar bu xəbəri sevinclə qarşıladı. Türkiyə qardaş ölkədir, türk milləti uğurumuza sevinən, kədərimizə ağlayan bir millətdir”.
Q.Hüseynov qeyd edib ki, Laçında müasir tipli elektrik idarəedici sistem qurulub:
“Yaxın günlərdə bu sistemin açılışının edilməsi gözlənilir. Bununla yanaşı bayaq avtomobil yolunun da açılışı olacaq. Bunlardan əlavə mərkəzi küçədə abadlıq işləri davam etdirilir, hansı ki, bura Bakının “Tarqovu” küçəsi kimi olacaq. Dünən Prezidentin səlahiyyətli nümayəndəsinin verdiyi məlumata görə, şəhərin mərkəzində 18 alman tipli yaşayış evi tikiləcək. Həmin küçədə muzey, şairlər evi, rəsm qalereyası da hazırlanacaq. Ümumiyyətlə şəhərlər bağlı sosial layihələr çoxdur”.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!