XX əsr Azərbaycan aşıq sənəti Borçalı (Gürcüstan) qolunun sonuncu magikanı, 86 yaşlı Aşıq Məhəmməd Sadaxlı martın 25-də Haqqa qovuşdu. Aşıq Əmrah, Aşıq Hüseyn Saraçlı, Aşıq Alxan Qarayazılı, Aşıq Kamandar, Aşıq Aslan Kosalı, Aşıq Əhməd Sadaxlı və ustadı Xındı Məmmədlə çiyin-çiyinə məclislər keçirmiş, festivallar iştirakçısı olmuş, ozan sənətinin inkişafında kifayət qədər əmək qoymuş Məhəmməd Sadaxlı ömrünü şərəflə yaşamış, başı uca, üzü ağ Haqqa dönmüşdür.


Aşıq Məhəmməd Sadaxlı 1930-cu ildə Gürcüstanın Marneuli rayonunun Sadaxlı elinə bağlı Mollaoğlu kəndində dünyaya göz açmış, ömrünün sonuna qədər bu kənddə yaşamışdır. Yeddillik təhsil almış, sonra isə uşaqlıqdan meyil saldığı saz-söz sənətinə yiyələnmək üçün əlindən gələni etmişdir. İlk ustadı Açıq Xındı Məmməd olmuş, sonra isə Aşıq Hüseyn Saraçlıdan bəhrələnmişdir. O, saz ifaçılığını ustalıqla mənimsəmiş, dastançılıq ənənəsini dərindən öyrənmiş, aşıq poeziyasını yaddaşına köçürmüş, beləliklə də, ustalaşmış, ustadlaşmış və sözün əsil mənasında ağsaqqallıq mərtəbəsinə yüksəlmişdir. Yeri gəlmişkən, hər zaman “Borçalı” İctimai Cəmiyyətinin yanında olan, tədbirlərə sazı-sözüylə fövqəl bir rəng qatan, məsləhətlərini, tövsiyələrini əsirgəməyən Ustad Aşıq cəmiyyətin İdarə Heyətinin qərarı ilə “El Ağsaqqalı” mükafatına layiq görülmüşdür.

XX əsrin repressiyaları və II Dünya müharibəsi o dövr insanlarının çoxu kimi onun da qəlbini dağlamış, maddi və mənəvi çətinliklərlə üz-üzə qoymuşdur. Buna baxmayaraq, Aşıq Məhəmməd öz daş dözümü, dağ mətanəti, Haqq mübarizəsi ilə o qanlı-qadalı illəri arxada qoymuş, oğul-qız, nəvə-nəticə böyütmüşdür.

Ustad aşıq Məhəmməd Sadaxlının müdriklik, ustadlıq çağlarını yaşadığı dövrdə Gürcüstanda 80 və 85 illik yubileyləri təntənə ilə keçirilmiş, “Şərəf” ordeni ilə təltif edilmişdir.

Sədr Zəlimxan Məmmədlinin başçılığı ilə “Borçalı” İctimai Cəmiyyətinin İdarə Heyəti və bütün üzvləri ustad aşıq Məhəmməd Sadaxlının ailə üzvlərinə, yaxınlarına və bütün saz-sözsevərlərə dərin hüznlə başsağlığı verir. Ruhu şad, məkanı cənnət olsun. Elimiz var olsun.

“Borçalı” İctimai Cəmiyyətinin Mətbuat və İnformasiya Xidməti, 26 mart 2016-cı il