Dövlət qulluğu üzrə imtahan nəticələri elan olundu

Dövlət qulluğunda fəaliyyətin davam etdirilməsi (BB vəzifə qrupu) üzrə noyabrın 12-də keçirilən imtahanın nəticələri elan olunub.
Dövlət İmtahan Mərkəzindən bildirilib ki, namizədlər imtahan nəticələri ilə buradan tanış ola bilərlər.
İştirakçılar imtahan nəticələri haqqında məlumatı, mobil operatorlar (Azercell, Bakcell, Nar, Naxtel) vasitəsilə “iş nömrəsi”ni 7727 nömrəsinə göndərməklə də öyrənə bilərlər.
Dövlət qulluğunda fəaliyyətin davam etdirilməsi imtahanında 247 namizəd iştirak edib. İmtahan nəticələrinə əsasən, BB1 altqrupu üzrə 56, BB2 altqrupu üzrə 71, BB3 altqrupu üzrə 53, BB4 altqrupu üzrə 36 nəfər olmaqla, ümumilikdə 216 namizəd tələb olunan şərtləri ödəyərək uğur qazanıb.
Test imtahanından müvəffəqiyyətlə keçən namizədlərə altqruplara daxil olan vəzifələrə uyğun olaraq sertifikat veriləcək. Sertifikatın qüvvədə olma müddəti 5 ildir.
İmtahan nəticələri ilə bağlı Apellyasiya komissiyasına müraciət etmək istəyənlər 14 noyabr saat 10:00-dan 16 noyabr saat 17:00-dək DİM-in saytında yerləşdiriləcək elektron ərizəni doldurmaqla qeydiyyatdan keçə bilərlər. Göstərilən müddət ərzində qeydiyyatdan keçməyənlər sonradan apellyasiya üçün müraciət edə bilməyəcəklər.
Bir namizədin ərizəsi (müraciəti) üzrə ən çox 15 dəqiqə müzakirə aparıla bilər. Ayrılan vaxt bitdikdə, kənar şəxs müzakirəyə qoşulduqda və ya etik davranış qaydaları pozulduqda müzakirə prosesi dayandırılır.

Paşinyan ölkəsiylə Fransa arasındakı münasibətdən sui-istifadə edir

“Ermənistanın baş naziri Nikol Paşinyan ölkəsi ilə Fransa arasındakı münasibətdən, həmçinin onun BMT Təhlükəsizlik Şurasının (TŞ) daimi üzvü statusundan sui-istifadə edir”.
Bu barədə Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyovun “Azadlıq Radiosu”nda (“Radio Free Europe/Radio Liberty”) dərc olunan məqaləsində deyilir.
O qeyd edib ki, Qarabağın Ermənistanın işğalı altında qaldığı son 20 ildən artıq müddətdə Azərbaycanın əsas motivi müstəqillik, ərazi bütövlüyü və suverenlik uğrunda mübarizə olub: “İndi bu məsələ həll olunub. Tarixi ədaləti bərpa etmişik”.
Onun fikrincə, Ermənistanda revanşist əhvali-ruhiyyə siyasi müxalifətdə daha güclü olsa da, bu ölkənin baş naziri Nikol Paşinyan da belə istiqamətdə fikirləri söyləməkdən çəkinmir: “Ermənistanın revanşizmdən əl çəkdiyini göstərən ilk addım bu olmalıdır: Paşinyan bəyanatlarla deyil, real addımlarla göstərməlidir ki, o, son hərbi eskalasiyanın nəticəsinə mübahisə ediləcək məsələ kimi yanaşmır”.
Azərbaycan Prezidentinin nümayəndəsi xatırladıb ki, Azərbaycanla Ermənistan arasında birinci müharibə zamanı 600 mindən çox etnik azərbaycanlı Ermənistanın işğal etdiyi əraziləri tərk etməyə məcbur olub: “Hazırda Azərbaycan hökuməti keçmiş məcburi köçkünlərin geri qayıtmasını təmin etmək üçün bu ərazilərin minalardan təmizlənməsi və bərpasına milyardlarla vəsait xərcləyir. Məcburi köçkünlərin geri qayıtması azərbaycanlıları birləşdirən amilə çevrilməlidir”.
“Hesab edirəm ki, indi Azərbaycanın milli ideyası sülhü möhkəmləndirmək, ölkənin bütün ərazilərində həyat tərzini yaxşılaşdırmaqdır. O, müstəqil dövlət olsa da, əvvəllər bütün ərazilərinin inkişafı ilə bağlı imkana malik deyildi. Yəni qarşıdakı onilliklər üçün ən vacib vəzifə azad edilmiş ərazilərə normal həyatın qaytarılması olacaq”, - o, sonda vurğulayıb.

Hərbi qulluqçumuz odlu silahla özünü güllələdi

Müdafiə Nazirliyinin N saylı hərbi hissəsinin hərbi qulluqçusu, baş leytenant Bəndəliyev Elsun Habil oğlunun odlu silahdan atəş açmaqla özünü öldürməsi barədə Tərtər hərbi prokurorluğuna məlumat daxil olub.
Bu barədə Hərbi Prokurorluğun Mətbuat xidmətindən məlumat verilib.
Daxil olmuş məlumat əsasında Tərtər Hərbi Prokurorluğunun və Azərbaycan Respublikası Hərbi Prokurorluğunun Kriminalistika və İnformasiya Texnologiyaları İdarəsinin əməkdaşları tərəfindən hadisə yerinə və meyitə baxış keçirilib, iş üçün əhəmiyyət kəsb edən predmetlər maddi sübut kimi götürülüb, izahatlar alınıb və digər hərəkətlər icra edilib.
Fakt üzrə Tərtər hərbi prokurorluğunda Azərbaycan Respublikası Cinayət Məcəlləsinin müvafiq maddəsi ilə cinayət işi başlanılaraq şahidlər dindirilmiş, müxtəlif ekspertizalar təyin edilmiş və təxirəsalınmaz zəruri istintaq hərəkətləri həyata keçirilib.
Hazırda istintaq davam etdirilir və qanunvericiliyin tələblərinə uyğun olaraq bütün tədbirlərin görülməsi təmin olunacaq.

Ermənistan öz öhdəliklərini yerinə yetirmədi - Prezident

"Ermənistan Şərqi Zəngəzurla Naxçıvan arasında əlaqənin yaradılması ilə bağlı öz öhdəliklərini yerinə yetirmədi".
Bunu Azərbaycan Prezidenti İlham Əliyev noyabrın 13-də ATƏT Parlament Assambleyasının prezidenti Pia Kaumanı qəbul edərkən deyib.
Prezident bildirib ki, Ermənistan Azərbaycan torpaqlarının işğalını əbədiləşdirməyə çalışırdı: "İşğal dövründə həyata keçirilmiş vasitəçilik missiyaları tamamilə uğursuz olmuş, işğal və təcavüzün nəticələrini aradan qaldırmamışdır".
Dövlət başçısı vurğulayıb ki, 44 günlük Vətən müharibəsindən sonra imzalanmış 2020-ci il 10 noyabr Bəyanatından irəli gələn öhdəlikləri Ermənistan yerinə yetirmədi: "Belə ki, Ermənistan nəinki Qarabağdakı silahlı qüvvələrini ərazidən çıxarmamışdır, hətta həmin ərazini hərbi texnikanın, silahlı qüvvələrinin şəxsi heyətinin və minaların daşınması üçün məqsədyönlü şəkildə istifadə edirdi".

İlham Əliyev ATƏT Parlament Assambleyasının prezidentini qəbul etdi

Azərbaycan Respublikasının Prezidenti İlham Əliyev noyabrın 13-də ATƏT Parlament Assambleyasının prezidenti Pia Kaumanı qəbul edib.
Görüşdə Cənubi Qafqaz regionunda vəziyyətlə və ATƏT Parlament Assambleyasının rolu ilə bağlı fikir mübadiləsi aparılıb.
Dövlətimizin başçısı qeyd edib ki, Cənubi Qafqaz regionunda artıq yeni reallıqlar yaranıb. Prezident İlham Əliyev vurğulayıb ki, regionda baş vermiş son hadisələr Ermənistanın Azərbaycana qarşı 30 ilə yaxın davam etmiş işğalı və hərbi təcavüzü kontekstində nəzərdə keçirilməlidir. Bu işğal və təcavüzün nəticələrinə baxılmadan regionun gələcəyi ilə bağlı baxışların irəli sürülməsi düzgün yanaşma olmaz.
Prezident İlham Əliyev bildirdi ki, Ermənistan Azərbaycan torpaqlarının işğalını əbədiləşdirməyə çalışırdı. İşğal dövründə həyata keçirilmiş vasitəçilik missiyaları tamamilə uğursuz olub, işğal və təcavüzün nəticələrini aradan qaldırmayıb.
Dövlətimizin başçısı vurğulayıb ki, 44 günlük Vətən müharibəsindən sonra imzalanmış 2020-ci il 10 noyabr Bəyanatından irəli gələn öhdəlikləri Ermənistan yerinə yetirmədi. Belə ki, Ermənistan nəinki Qarabağdakı silahlı qüvvələrini ərazidən çıxarmayıb, hətta həmin ərazini hərbi texnikanın, silahlı qüvvələrinin şəxsi heyətinin və minaların daşınması üçün məqsədyönlü şəkildə istifadə edirdi. Həmçinin Ermənistan Şərqi Zəngəzurla Naxçıvan arasında əlaqənin yaradılması ilə bağlı öz öhdəliklərini yerinə yetirmədi.
Prezident İlham Əliyev qeyd edib ki, artıq bu məsələlər keçmişdə qaldı. Hazırda regionun sülh gündəliyi üçün çox yaxşı imkanlar var. Dövlətimizin başçısı vurğulayıb ki, 44 günlük Vətən müharibəsindən sonra sülh müqaviləsi və onun əsasını təşkil edən prinsiplər təşəbbüsü ilə də məhz Azərbaycan çıxış edib. Prezident İlham Əliyev qeyd edib ki, Azərbaycan Cənubi Qafqazda davamlı sülhün tərəfdarıdır və regional sülh gündəliyini, Ermənistanla münasibətlərin normallaşdırılmasını və sülh müqaviləsinin imzalanmasını dəstəkləyir.
Dövlətimizin başçısı bildirib ki, Azərbaycan hazırda birgəyaşayış və geriqayıtma hüququ ilə əlaqədar aydın və şəffaf proqramı təqdim etsə də, azərbaycanlıların Ermənistana geri qayıdışı ilə bağlı geriqayıtma hüququnu Ermənistan inkar edir və bununla əlaqədar olaraq hər-hansı bir baxış ortaya qoymayıb.
Görüşdə qeyd olunub ki, ATƏT Parlament Assambleyası Ermənistan və Azərbaycan nümayəndə heyətləri arasında etimadın qurulması baxımından səmərəli platforma ola bilər.

Ağdam rayonunda yerləşən Türkiyə hərbiçilərinin fəaliyyət müddəti uzadıldı

Azərbaycanın Ağdam rayonunda yerləşən Türkiyə-Rusiya Birgə Monitorinq Mərkəzində xidmət edən türkiyəli hərbçilərin fəaliyyət müddəti daha bir il uzadılır.
Türkiyə Prezidenti Rəcəb Tayyib Ərdoğan bu həftə ərzində məsələ ilə bağlı qanun layihəsini parlamentə göndərəcək.
Layihə daha sonra Türkiyə Böyük Millət Məclisində müzakirəyə çıxarılacaq.
Qanunverici orqan türkiyəli hərbçilərin Azərbaycanda qalma müddətinin daha bir il uzadılmasına razılıq versə, qərar rəsmi mətbuatda dərc olunandan sonra qüvvəyə minəcək.
Xatırladaq ki, 2020-ci il noyabrın 17-də Türkiyə Böyük Millət Məclisi ölkənin Silahlı Qüvvələrinə qoşunlarını bir il müddətinə Azərbaycana göndərmək səlahiyyəti verib.
2021 və 2022-ci illərin noyabrında Türkiyənin Azərbaycandakı hərbçilərinin fəaliyyət müddəti bir il uzadılıb.

Sabahın hava proqnozu

Noyabrın 14-nə gözlənilən hava proqnozu açıqlanıb.
Milli Hidrometeorologiya Xidmətindən verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Gecə və səhər bəzi yerlərdə duman olacaq. Arabir güclənən cənub-qərb küləyi axşam şimal-qərb küləyi ilə əvəz olunacaq.
Havanın temperaturu gecə 12-15° isti, gündüz 16-20° isti olacaq. Atmosfer təzyiqi 763 mm civə sütunundan 756 mm civə sütununa enəcək. Nisbi rütubət 60-70 % olacaq.
Azərbaycanın rayonlarında havanın əsasən yağmursuz keçəcəyi, lakin gecəyə doğru bəzi yerlərdə yağış yağacağı gözlənilir. Ayrı-ayrı yerlərdə leysan xarakterli olacağı, şimşək çaxacağı ehtimalı var. Gecə və səhər bəzi rayonlarda duman olacaq. Qərb küləyi gündüz bəzi yerlərdə arabir güclənəcək.
Havanın temperaturu gecə 7-12° isti, gündüz 17-22° isti, dağlarda gecə 0-5° isti, gündüz 8-13° isti olacaq.

Gənc əsgərlərin andiçmə mərasimləri keçirildi

Müdafiə nazirinin təsdiq etdiyi 2023-cü ilin hazırlıq planına uyğun olaraq Azərbaycan Ordusunda gənc əsgərlərin andiçmə mərasimləri keçirilib.
Bu barədə Müdafiə Nazirliyindən bildirilib.
Andiçmə mərasimlərində hərbi orkestrin müşayiəti ilə döyüş bayrağı təntənəli surətdə sıra meydanına gətirildikdən sonra tədbirlər açıq elan olunub.
Öncə xalqımızın Ümummilli Lideri Heydər Əliyevin və ölkəmizin ərazi bütövlüyü uğrunda həlak olan şəhidlərimizin xatirəsi bir dəqiqəlik sükutla yad edilib, Dövlət Himni səsləndirilib. Sonda gənc əsgərlər təntənəli surətdə Hərbi andı qəbul edərək Vətənə sadiq olacaqlarına söz veriblər.
Müdafiə Nazirliyinin nümayəndələri və hərbi hissə komandanlıqları, eləcə də şəhid ailələrinin üzvləri, veteranlar, əsgər valideynləri çıxış edərək gənc əsgərlərə Vətənə, dövlətə və Ali Baş Komandana, hərbi anda sadiq olmalarını, nümunəvi, nizam-intizamlı xidmət etməyi, silah və texnikanın sirlərini dərindən öyrənərək döyüş qabiliyyətlərini daim artırmalarını, komandir-rəis heyətinin əmr və sərəncamlarını dəqiq və vaxtında yerinə yetirmələrini, torpaqlarımızın müdafiəsi naminə döyüşə hər an hazır olmalarını tövsiyə ediblər.
Yekunda şəxsi heyət təntənəli şəkildə hərbi marşın sədaları altında tribuna önündən keçiblər.

Sabahın havası

Noyabrın 13-də Azərbaycanda gözlənilən hava şəraiti açıqlanıb.
Milli Hidrometeorologiya Xidmətindən verilən məlumata görə, sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Arabir güclənən cənub-şərq küləyi gündüz mülayim şimal-qərb küləyi ilə əvəz olunacaq.
Havanın temperaturu gecə 12-16° isti, gündüz 17-20° isti olacaq. Atmosfer təzyiqi 762 mm civə sütunu olacaq. Nisbi rütubət 60-70 % olacaq.
Azərbaycanın rayonlarında havanın əsasən yağmursuz keçəcəyi gözlənilir. Gecə və səhər bəzi rayonlarda duman olacaq. Mülayim qərb küləyi əsəcək.
Havanın temperaturu gecə 7-11° isti, gündüz 18-23° isti, dağlarda gecə 1° şaxtadan 4°-dək isti, gündüz 5-10° isti olacaq.

ÜZÜ DÖNSÜN AYRILIĞIN...

Ürəklərdə yalnız xoş xatirələriylə yaşayan Elgün Rzayevi amansız əcəl 6 ildir, bizdən ayırıb. Ömür-gün yoldaşı Aydan Rzayevanın statusunda paylaşdıqlarını və ili ərəfəsində qələmə aldıqlarımı saytın izləyicilərinə təqdim edirəm.

* * *
Bu gün yoxluğunun 6-cı il dönümüdür. Çiyinlərimdə ağır yüklə, ürəyimizdə çox böyük dərdlə səni sənsiz göz yaşları ilə anırıq. Səndən sonra hər şey, çox şey dəyişdi. Bir sənin yoxluğuna öyrəşə bilmədim. Qəbullana bilmədim sənsizliyi, mənim hörmətli, ziyalı dostum, sirdaşım, həyat yoldaşım. Evimizin günəşi idin. Artıq 6 ildir ki, o günəş doğmur. Çox çətindi yoxluğun. Nə vaxtsa qayıdarsan deyib, özümüzü inandıraraq yaşayırıq. Əslində isə dönməyəcəyini bilirəm. Sənsiz ruhən ölsəm də, cismən yaşayıram. Nə bilim, bəlkə də ölmüşəm, bilmirəm. Günəşli bir gündə evdən çıxdın, bir daha qayıtmadın. Yoxluğun qəlbimizin ən ağır dərdidir, əzizim. Adını çağırmaq istəyirəm. Səni evimizdə istəyirəm. Yaşamağını istəyirəm. Yenə birlikdə olmağımızı istəyirəm. Ancaq əlimdən heç nə gəlmir. Allahın qisməti belə imiş. Bir də nə vaxt görüşərik, bilmirəm. Bircə onu bilirəm ki, sənsizliyə tab gətirmək ağırdır, dözülməzdir. Sən güllərdə, çiçəklərdə yat, mənim xoşbəxt adamım. Cismən yanımda olmasan da, ruhumda, gözlərimdə, ürəyimdə, evimizdə, baxdığım hər yerdəsən.
Aydan Rzayeva

* * *
Ayrılıqların ən dəhşətlisi olan ölüm... Dörd hərfli sözün vahiməsi necə dəhşət... O ki yarımçıq qırılmış ömür ola... Yolu başa çatmayan səfər ola... Belə ömürləri qələmə almağın ağırlığı bilsəniz necə çətin...
Elgün Rzayev Vaqif oğlu 1977-ci ildə Lənkəran şəhərində anadan olub. 1983-cü ildə Lənkəran şəhər 4 saylı beynəlmiləl orta məktəbin 1-ci sinfinə gedib, 1993-cü ildə həmin məktəbi bitirib. 1993-97-ci illərdə Bakı Menecment Universitetinin Beynəlxalq iqtisadı münasibətlər və menecment fakültəsində gömrük işi ixtisası üzrə bakalavr dərəcəsi alıb. 1997-2001-ci illərdə Lənkəran Dövlət Universitetinin İnzibati İdarəetmə fakültəsində gömrük işinin təşkili və idarə edilməsi üzrə yenidən təhsil alıb, 2001-ci ildə hərbi xidmətə çağırılıb. Bir il Sərhəd Qoşunları Dəstəsində xidmət edib. Hərbi xidmətdən sonra sahibkarlıqla məşğul olub. 2007-ci ilin yanvarından 2013-cü ilin noyabrınadək Milli Təhlükəsizlik Nazirliyinin Lənkəran şəhər şöbəsində çalışıb. Və oradan təqaüdə çıxıb. Yenə də sahibkarlıqla məşğul olub.
40 illik yarımçıq ömrün qısa, yığcam bioqrafiyası.
“Astarada 1 nəfərin ölümü, 6 nəfərin yaralanması ilə nəticələnən zəncirvari yol-nəqliyyat hadisəsi baş verib. Ağır qəzada Rzayev Elgün Vaqif oğlu ölüb”. Bu xəbər ildırım sürətilə yayılır. Bir payız günü. Noyabrın 12-si. Aydın, günəşli hava. Nə duman var, nə də qar, yağış... Ömür qisməti bura kimiymiş.
Elgün Rzayevin ailə üzvləriylə görüşəndə anası Tərifə müəllimə, qayı-nanası Naibə xanım da onlarda idi. Gözlərinin yaşı qurumamış anaları dinləmək çox ağırdı mənə. Elgünü tanımamağıma təəssüflənirlər. Nə yaxşı ki, şəxsən tanımamışam. Onsuz da onun doğmalarının, əzizlərinin ovqatındayam. Göz yaşlarımı boğa bilmirəm. Tanısaydım, daha çətin olacaqdı... Söhbətlərdən aydın olur ki, Elgün Rzayev bir evdən, bir ailədən yox, eldən gedən oğullardandı. Uşaqlıqdan sanki yaşından tez böyüyüb. Xarakteri xeyirxahlıqla, qayğıkeşliklə yoğrulub. Sözündə, danışığında kim olubsa, əməlində, işində də o olub. Sözünün, əməlinin ağası... İştirak etdiyi hər yerdə xoş aura, gözəl atmosfer yarada bilib. İlk tanışlıqdan hamının yaddaşında dost kimi qalıb.
2006-cı ilin 14 yanvarında qapılarında toy çalınıb. Ailəyə Aydan adlı gəlin gəlib. Həmin ilin noyabrın 27-də nübar qızları Gülay dünyaya göz açıb. 2011-ci ildə Gülayın Leyla adlı bacısı ailəyə daha bir sevinc gətirib. Normal, xoşbəxt ailə həyatı yaşayırlar. Aydan Rzayeva Lənkəranda V.Əliyev adına 4 saylı humanitar təmayüllü məktəb-liseydə dərs deyir. Peşəsini sevən Aydan müəllimə məktəbin sevilən müəllimlərindəndir. Dəfələrlə məktəb rəhbərliyinin, Lənkəran Şəhər İcra Hakimiyyətinin başçısı Taleh Qaraşov cənablarının Fəxri Fərmanlarıyla təltif olunub. Gülay məktəbin əlaçı şagirdlərindəndir. Leyla da ötən il məktəbə qədəm qoyub. Anasının sinfində təhsilə başlayıb. Hər şeyin düz xətlə getdiyi bir dövrdə əcəl macal vermədi...
Onlara qonaq gedəndə avqust ayının 4-ü idi. Bir gün əvvəl balaca Leylanın doğum gününü qeyd ediblər. Atasının yoxluğunu dərk etməyən Leylanın gözləri yolda qalıb. Axı atası hər il onları müxtəlif yerlərə aparıb, doğum gününü qeyd edərdilər. Aydan özünə yer tapa bilmir. 12 illik birgə ömürdə bir gün də ayrı qaldıqları yadına gəlmir. Hər yerə bir gedib, bir qayıdıblar. 9 ayın ayrılığına necə dözüb, tab gətirməyinə özü də inana bilmir.
Həyatda hamımız müəllimlərimizi ən güclü insan bilirik. İlk məllimimizə olan sevgini isə ilk məhəbbət kimi ömrümüz boyu qəlbımizdə yaşadırıq. Aydan müəllimə ötən dərs ilində birinci sinfi götürmüşdü. Sentyabrdan noyabrın 12-nə cəmi 2 ay vaxt keçmişdi. Amma müəllimlə şagirdləri arasında qeyri-adi bağlılıq yaranmışdı. Leylası da həmin sinfın şagirdlərindəndi. Həyat yoldaşının qəfıl ayrılığından sarsılan Aydan müəllimə işdən çıxmağı, işlədiyi məktəbə bir daha qayıtmamağı qərarlaşdırır. Fəqət məktəbin təcrübəli direktoru Yeganə Əsgərova Aydan müəlliməni bu fıkrindən daşındırır.
Atasının yoxluğunu bir dəfə də dilinə gətirməyən 11 yaşlı Gülay bu əbədi ayrılığın nə olduğunu dərk edə bilmədiyindən atasının yolunu gözləyir. Hiss və duyğularını kağızlarla bölüşür. Onlarda olanda mənə yaxınlaşıb əlindəki dəftəri göstərərək - ilk dəfə anama şeir yazmışam. Atama oxumuşdum, çox xoşuna gəlmişdi. Sonra bacıma, müəllimlərimə yazdım. Onların da xoşuna gəldi. İndi atama yazıram... Baxışları kövrəldi, gözləri nəmləndi... Dəftərindəki dörd bəndlik şeirini mənə verdi ki, evdə oxuyum. Hisslərini evdəkilərdən gizlətməyə çalışırdı.

Ən gözəl varlıqdır o həyatda,
Bir an unutmazsan onu dünyada.
Canındır sənin, varındır sənin
Həmişə qoruyan atandır sənin.

Zəhmətkeş, qayğılı bu gözəl insan,
Hər zaman sevibdir səni o insan.
İndi niyə gəlməyirsən, ay ata?
Bəs nə vaxt gələcəksən, ay ata?

Hər zaman qoruyub səni hər anda,
Unutmaq olarmı səni bir an da?!
Həmişə sevirəm səni qəlbimdə,
Həkk olub qalmısan sən yaddaşımda.
Darıxıram sənin üçün hər zaman,
Gözləyirəm mən yolunu hər zaman.
Bilirəm ki, gələcəksən, unutmazsan sən bizi,
İnanırıq gələcəksən bir zaman...
Əlbəttə, qızcığazın misraları bugünkü ovqatının təzahürüdür. Kin bilir, bəlkə də, bu istedadlı qız gələcəkdə “Gülay Elgünqızı” imzası ilə tanınıb atasının adını soyadında yaşadacaq...
Əvvəldə dediyım kimi, bir evdən, bir ailədən yox, eldən gedən oğul haqqında hamının qəlbində az qala bir kitablıq söz var. Amma hamısını yazıya gətirə bilmədim. Ən yaxınlarının ürək sözlərini qələmə aldım.
Böyük əmisi Yaşar Rzayev: - Elgün hamımızın əzizi, hamımızın sevimlisi idi. Yaşından asılı olmayaraq hamıyla ünsiyyət qurmağı, hamıyla dostluq etməyi bacarırdı. Qohum-əqrəba arasında problemi olan hər kəs ona müraciət edirdi. Dost-tanışı çox olduğundan hamının probleminin həllinə nail olmağı baçarırdı. Gözlənilməz qəza nəticəsində aramızdan qəfil getməsi hamımızı sarsıdıb. Özümüzə gələ bilmirik. Məzarı nurla dolsun.
Kiçik əmisi Rafail Rzayev: - Elgün qohum-qardaş arasında sevilən-seçilən bir oğul idi. Dost yolunda, qohum-qardaş yolunda canından keçməyə hazır bir oğul idi. Onun üçün müşkül məsələ, aça bilmədiyi qapı yox idi. Təəssüf ki, əcələ qalib gələ bilmədi. Hadisədən bir az əvvəl işimizə nazirlikdən müfəttişlər gələcəkdi. Həmişə olduğu kimi, Elgünlə danışdım. Narahatlığa heç bir əsas olmadığını bildirdi. Müfəttişlər gələnə kimi mehmanxana, yeməkxana problemi həll olundu. Gəlib müfəttişlərlə də tanış oldu. İlk tanışlıqdan aralarında xoş münasibət yarandı. Aradan bir həftə sonra bu faciəli hadisə baş verdi. Müfəttişlər eşidən kimi zəng vurdular. İşgüzar, istiqanlı bir cavanın vaxtsız gedişinə təəssüfləndilər. Onun yeri ömrümüz boyu qəlbimizdə boş qalacaq. Ruhu şad olsun.
Bibisi Hacı Elazə xanım: - Ürəyimizin əziz parası olan Elgünün yoxluğundan danışmaq mənə çox ağırdır. Faciəli qəzadan sonra özümüzə gələ bilmirik. Elgün hamımızm ümid qapısıydı. Çətinliyə düşən kimi Elgünü axtarırdım. Münasibətdə təmənnasız idi. Xeyirxahlıqdan, yaxşılıq etməkdən zövq alırdı. Haqqında günlərlə danışsam, qurtarmaz. Təsəllimiz yadigarları olan 2 qız balasıdır. Hamımız sevimli Aydanına arxa-dayaq olub Gülayla Leylanı atalarının adına layiq böyütməkliyik. Yeri cənnətlik olsun.
Qayınatası İntiqam Hüseynov: - Elgünü balalarımdan ayırmırdım. Bu hörməti, bu məhəbbəti özü qazanmışdı. Hər iki ailədə qohumluq münasibəti yüksək səviyyədə qorunurdu. Elgün xarakterinə uyğun olaraq hər işdə ehtiyatlı idi. Maşın sürməkdə də beləcə. Onun qədər ehtiyatlı maşın sürən ikinci şəxs tanıya bilmirəm. Bu faciə - maşın qəzası necə baş verdi, inana bilmirəm. Əlimizdən heç nə gəlmir. Təsəllimiz övladlarıdır. Allah qorusun.
Deyirlər, bu fani dünyada insanı əcəli öldürmür. İnsan onu sevənlərin bitib qurtardığı yerdə ölür. Bu mənada Elgün Rzayev onu tanıyanların qəlbində zaman-zaman yaşayıb ölümsüzlük qazanacaq.

Sevda ƏLİBƏYLİ,
“Söz” jurnalının baş redaktoru








[/center]