18-01-2026, 17:01
Tehranda heç bir səfirlik bağlanmayıb - İran XİN
İran Xarici İşlər Nazirliyi (XİN) ölkədəki son hadisələr fonunda Tehranda fəaliyyət göstərən xarici ölkə səfirliklərinin bağlanması barədə yayılan məlumatları təkzib edib.
Bu barədə İran Xarici İşlər Nazirliyinin sözçüsü İsmayıl Bəqayi keçirdiyi həftəlik mətbuat konfransında bildirib.
Diplomat vurğulayıb ki, İranda heç bir xarici ölkənin səfirliyi fəaliyyətini dayandırmayıb və yayılan xəbərlərdəki rəqəmlər, eləcə də adlar həddindən artıq şişirdilib.
"Əminliklə deyə bilərəm ki, heç bir səfirlik bağlanmayıb. Tehrandakı diplomatik missiyalar adi qaydada öz fəaliyyətlərini davam etdirirlər," - deyə o qeyd edib.
Bununla belə, Bəqayi ölkədə tətbiq edilən internet məhdudiyyətlərinin diplomatik korpusun işinə mənfi təsir etdiyini etiraf edib. O bildirib ki, internetin kəsilməsi səbəbindən bir çox səfirlik və konsulluqlar problemlərlə üzləşib.
XİN rəsmisi həmçinin təsdiqləyib ki, ölkədə yaranmış gərginlik və narahatlıq səbəbindən bəzi diplomatik nümayəndəliklər əməkdaşlarının bir qismini müvəqqəti olaraq İrandan çıxarıblar.
Sözçü əlavə edib ki, işçi heyətinin müvəqqəti azalması təbii olaraq konsulluq xidmətlərində müəyyən ləngimələrə və ya axsaqlıqlara səbəb ola bilər:
"Təbii haldır ki, səfirlik işçilərinin bir qismi müvəqqəti olaraq işdə olmadıqda, xidmət göstərilməsində problemlər yarana bilər. Lakin ümid edirik ki, mövcud gedişatı nəzərə alaraq, müvəqqəti gedən diplomatlar geri qayıdacaq və səfirliklərin fəaliyyəti tam normal axarına düşəcək," - XİN sözçüsü əlavə edib.
18-01-2026, 16:30
Karapetyan ev dustaqlığına köçürüldü
İrəvanda "Taşir" Şirkətlər Qrupunun rəhbəri Samvel Karapetyan istintaq təcridxanasından evə aparılıb.
Xatırladılır ki, yanvarın 16-da S.Karapetyan Antikorrupsiya Məhkəməsinin qərarı ilə xəstəxanadan cəzaçəkmə müəssisəsinə köçürülmüşdü.
Həmin məhkəmə aşağı instansiya məhkəməsinin 2025-ci ilin sonunda qəbul etdiyi ev dustaqlığı barədə qərarı ləğv etmişdi.
Lakin yanvarın 17-də Antikorrupsiya Məhkəməsi S.Karapetyanın ev dustaqlığı müddətinin uzadılması barədə yeni qərar qəbul edib.
İş adamının evinin qarşısına toplaşan tərəfdarlarına xəbərdarlıq edilib ki, məhkəmənin qərarına əsasən, S.Karapetyana yaxınlaşmaq və onunla danışmaq qadağandır.
Qeyd edək ki, "Taşir" Şirkətlər Qrupunun rəhbəri Samvel Karapetyan ruhanilərlə hökumət arasında münaqişə fonunda Erməni Apostol Kilsəsini açıq şəkildə dəstəklədikdən sonra, 2025-ci ilin iyun ayında həbs edilib. Sonradan iş adamına qarşı "vəzifə səlahiyyətlərindən və ya təsir gücündən istifadə etməklə külli miqdarda çirkli pulların yuyulması" ittihamı ilə yeni cinayət işi açılıb.
18-01-2026, 16:17
İranda etirazlar: Ölənlərin sayı 5 000-ə çatdı
İranda keçirilən genişmiqyaslı etirazlar zamanı ölənlərin sayı 5 000 nəfərə çatıb. Onlardan təxminən 500-ü təhlükəsizlik xidmətinin əməkdaşıdır.
Bu barədə "Reuters" agentliyi adı çəkilməyən İran rəsmisinə istinadən bildirib.
Rəsmi şəxsin sözlərinə görə, hakimiyyət orqanları İranda keçirilən etirazlar zamanı 5 000 nəfərin ölümünü təsdiqləyib, terrorçuları və silahlı üsyançıları günahsız iranlıları öldürməkdə ittiham edib.
Rəsmi şəxs qeyd edib ki, ən ağır toqquşmaların bəziləri və ən yüksək ölüm sayı separatçıların aktiv olduğu İranın şimal-qərbində qeydə alınıb.
HRANA insan haqları qrupu şənbə günü ölənlərin sayının 3 308-ə çatdığını bildirib. Həmçinin İranda 24 000-dən çox insanın həbs olunduğunu da bildirib.
18-01-2026, 16:03
Suriya ordusu strateji Fərat bəndini ələ keçirdi
Suriya ordusu Təbqa şəhəri yaxınlığındakı strateji əhəmiyyətli Fərat su bəndinə nəzarəti ələ keçirib.
Bu barədə ölkənin Energetika Nazirliyi rəsmi məlumat yayıb.
Bildirilib ki, hökumət qüvvələri gün ərzində həyata keçirilən əməliyyatlar nəticəsində ərazini "Suriya Demokratik Qüvvələri"ndən (SDQ) təmizləyərək nəzarətə götürüb.
Baş verən hadisələr fonunda ABŞ Suriya ilə bağlı xarici siyasət kursunu yenidən nəzərdən keçirmək məcburiyyətində qalıb.
Məsələ burasındadır ki, Vaşinqton illərdir İŞİD terror qruplaşmasına qarşı mübarizədə SDQ-yə dəstək verirdi. Lakin hazırda Ağ Ev bu dəstəyi 2024-cü ilin sonlarında Bəşər Əsəd hakimiyyətini devirən və hazırda Suriya Prezidenti olan Əhməd Şaraa hökumətinə verdiyi yeni dəstəklə balanslaşdırmağa çalışır.
18-01-2026, 15:52
Avtomobil və motosiklet oğurlayan şəxslər saxlanıldılar
Paytaxtın Binəqədi rayonunda bir nəfər "VAZ-21011" markalı nəqliyyat vasitəsinin qaçırıldığı barədə polisə məlumat verib.
Bu barədə DİN-in Mətbuat xidmətindən bildirilib.
Polis əməkdaşlarının həyata keçirdikləri tədbirlərlə əməli törətməkdə şübhəli bilinən S.Sultanzadə saxlanılıb, avtomobil sahibinə qaytarılıb.
Həmçinin rayon ərazisində motosiklet oğurlamaqda şübhəli bilinən İ.Cəfərov da polis əməkdaşları tərəfindən saxlanılıb.
Araşdırmalar davam etdirilir.
18-01-2026, 15:30
Qar Ağsu aşırımında nəqliyyatın hərəkətini iflic etdi
Yağan qar səbəbindən günorta saatlarında Bakı–Şamaxı–Yevlax avtomobil yolunun Ağsu aşırımından keçən hissəsində nəqliyyat vasitələrinin hərəkətində çətinliklər yaranıb.
Xüsusilə sərt döngəli və enişli hissələrdə bəzi nəqliyyat vasitələri yolda qalıb, yol-nəqliyyat qəzaları qeydə alınıb.
Sürücülərə hava şəraitini nəzərə almaq tövsiyə edilib.
18-01-2026, 15:11
Sabunçuda 10 kiloqrama yaxın narkotik dövriyyədən çıxarıldı
Polis əməkdaşları tərəfindən narkotik vasitələrin satışı və qanunsuz dövriyyəsinə qarşı əməliyyatlar davam etdirilir.
Bu barədə DİN-in Mətbuat xidmətindən bildirilib.
Məlumata görə, Sabunçu Rayon Polis İdarəsi 15-ci Polis Şöbəsinin əməkdaşları tərəfindən həyata keçirilən növbəti tədbir zamanı 32 yaşlı Şadman Zamanlı şübhəli şəxs qismində saxlanılıb. Ondan 9 kiloqram 955 qram narkotik vasitə marixuana aşkarlanaraq götürülüb.
Saxlanılan şəxs ifadəsində narkotik vasitələri satış məqsədilə əldə etdiyini bildirib.
Araşdırmalar davam etdirilir.
18-01-2026, 14:24
İraqın XİN başçısı İrana getdi
İraqın xarici işlər naziri Fuad Hüseyn bu gün İrana səfər edib.
Səfər çərçivəsində iraqlı nazir Tehranda İranın xarici işlər naziri Abbas Əraqçi ilə görüşüb.
Tərəflər arasında baş tutan görüşdə ikitərəfli əlaqələr və regional məsələlər ətrafında fikir mübadiləsi aparılıb.
18-01-2026, 13:55
33 yaşlı kişi bədbəxt hadisə nəticəsində öldü
Şəmkirdə 33 yaşlı kişi bədbəxt hadisə nəticəsində ölüb.
1993-cü il təvəllüdlü A.Məmmədov evin həyətində yerləşən tövlənin dam örtüyündən ot bağlaması düşürərkən ehtiyatsızlıqdan pilləkəndən yıxılıb və bu vaxt onun başı beton səthə çırpılıb.
Ağır xəsarət alan zərərçəkən xəstəxanaya çatdırılsa da, onun həyatını xilas etmək mümkün olmayıb.
Faktla bağlı araşdırma aparılır.
18-01-2026, 00:56
Pəhləvi İran xalqını etiraza çıxmağa çağırdı
İranın sonuncu şahının oğlu Rza Pəhləvi ölkədə davam edən gərginlik fonunda yenidən etiraz çağırışı ilə çıxış edib.
O, X sosial şəbəkəsində paylaşdığı müraciətdə iranlıları 27–29 yanvar tarixlərində kütləvi etiraz əhval-ruhiyyəsini açıq şəkildə nümayiş etdirməyə çağırıb.
Pəhləvi bildirib ki, İslam Respublikasının rəhbərliyi ölkədə vəziyyətin guya “normal” olduğunu göstərməyə çalışır, lakin bu iddialar reallığı əks etdirmir.
Onun sözlərinə görə, mövcud hakimiyyətlə İran cəmiyyəti arasında dərin və barışmaz uçurum var və bu uçurum zorakılıq və repressiyalarla daha da dərinləşib.
O vurğulayıb ki, ali dini lider Ayətullah Əli Xamenei və mövcud siyasi sistem tarix səhnəsindən silinməyincə, ölkədə heç bir normallaşmadan danışmaq mümkün deyil.
Rza Pəhləvi küçələrə çıxmağın təhlükəli olduğu şəraitdə belə etirazın alternativ formalarının mümkün olduğunu qeyd edib. O, vətəndaşları evlərindən etiraz səsləri ucaltmağa, işdən imtinaya və ümumi tətilə çağıraraq, cəmiyyətin səssiz qalmamalı olduğunu bildirib.
Pəhləvinin sözlərinə görə, bu cür kollektiv etiraz formaları həm ölkə daxilində, həm də beynəlxalq aləmdə İran cəmiyyətinin iradəsini nümayiş etdirə bilər.
Müraciətdə xüsusilə qeyd olunub ki, 27–29 yanvar tarixlərində, saat 20:00-da ölkə üzrə milli şüarların səsləndirilməsi ilə “bütün dünyanın iranlıların səsini eşitməsi” hədəflənir. Pəhləvi beynəlxalq ictimaiyyətin iranlıların cəsarətini gördüyünü və daha açıq dəstək verəcəyini iddia edib. O, çıxışını “sonun yaxın olduğu” və “İranın yenidən geri qaytarılacağı” mesajı ilə yekunlaşdırıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!