11-01-2026, 19:36
Venesuelanı ABŞ qoruyacaq
ABŞ prezidenti Donald Tramp Venesuela və Kuba ilə bağlı sərt açıqlama verib.
Tramp sosial şəbəkədə paylaşdığı bəyanatda bildirib ki, Kuba uzun illər Venesueladan neft və maliyyə dəstəyi alaraq bunun əvəzində Venesuela rəhbərliyini qoruyub, lakin bu dövr artıq başa çatıb.
Trampın sözlərinə görə, Venesuela prezidenti Nikolas Maduronu qoruyan kubalı qüvvələrin əksəriyyəti ABŞ-ın ötən həftə həyata keçirdiyi zərbə nəticəsində məhv edilib. O vurğulayıb ki, Venesuelanın artıq “ölkəni illərlə girov saxlayan quldurların və reketlərin” müdafiəsinə ehtiyacı yoxdur.
ABŞ prezidenti qeyd edib ki, bundan sonra Venesuelanı dünyanın ən güclü ordusuna sahib olan Amerika Birləşmiş Ştatları qoruyacaq. Tramp əlavə edib ki, Kubaya nə neft, nə də pul axını davam edəcək və bu göstərici “sıfır” olacaq.
Bəyanatında Tramp Kubaya açıq xəbərdarlıq edərək, “çox gec olmadan razılaşmaya getməyi” tövsiyə edib.
11-01-2026, 19:22
]Ukrayna Xəzərdə neft obyektinə ZƏRBƏ ENDİRDİ
Ukrayna Müdafiə Qüvvələri Xəzər dənizində “Lukoil”a məxsus üç qazma qurğusunu, Luqansk bölgəsində müvəqqəti ələ keçirilmiş ərazidə Rusiyanın Buk-M3 zenit-raket sistemini və Xerson bölgəsində Rusiya ordusunun bir bölməsini məhv edib.
Bu barədə Ukrayna Silahlı Qüvvələrinin Baş Qərargahı məlumat yayıb.
Məlumatda bildirilir ki, Rusiya ordusunun hərbi və iqtisadi potensialının azaldılması tədbirləri çərçivəsində Ukrayna Müdafiə Qüvvələrinin bölmələri Xəzər dənizində “Lukoil”a məxsus strukturlara zərbələr endirib. Bu obyektlər Rusiya ordusuna dəstək fəaliyyətlərində iştirak edir.
Qeyd edilib ki, zərbələr qeydə alınıb. Zərərin miqdarı hələ də müəyyən edilir.
Luqansk bölgəsinin müvəqqəti ələ keçirilmiş ərazisindəki Baraniçevo kəndi yaxınlığında Buk-M3 zenit-raket sistemi buraxılış qurğusu da atəşə tutulub. Baş Qərargahın qeyd etdiyi kimi, bu orta mənzilli hava hücumundan müdafiə sistemi aerodinamik hədəfləri vurmaq üçün nəzərdə tutulub.
İlkin məlumatlara görə, zərbələr və partlayışlar qeydə alınıb.
Bundan əlavə, Rusiya ordusunun loqistik və döyüş imkanlarını azaltmaq üçün 49-cu Ordunun loqistik bölməsi atəşə tutulub.
Baş Qərargah Müdafiə Qüvvələrinin Rusiya qoşunlarının hərbi-iqtisadi imkanlarını və hücum potensialını sistematik şəkildə zəiflətməyə davam etdiyini vurğulayıb.
Zərbələr Ukraynaya qarşı silahlı təcavüzdə birbaşa iştirak edən hədəflərə endirilib.
11-01-2026, 18:59
İsrail Livandakı “Hizbullah” hədəflərini vurdu
İsrail Müdafiə Qüvvələri Livanın cənubunda “Hizbullah”a məxsus bir neçə hərbi obyektə, o cümlədən silah anbarlarına və istehsal müəssisələrinə yeni hava zərbələri endirib.
Bu barədə ordunun açıqlamasında qeyd olunub.
İsrail tərəfi bu addımı “Hizbullah”ın atəşkəs razılaşmasını sistematik şəkildə pozmasına cavab kimi qiymətləndirib. Məlumata görə, bu gün həyata keçirilən zərbələr zamanı hədəf olaraq qruplaşmanın silah gizlətdiyi hərbi şaxtalar və infrastruktur obyektləri seçilib.
Xatırladaq ki, Livan Silahlı Qüvvələri yanvarın 8-də ölkənin cənubunda – Litani çayına qədər olan ərazidə silahlı qrupların tərksilah edilməsi planının birinci mərhələsini uğurla başa vurduğunu elan etmişdi.
11-01-2026, 18:45
İranda etirazçılar geri çəkilmirlər
İran ABŞ tərəfindən hücuma məruz qalacağı təqdirdə cavab verəcəyini bəyan edib. Bu xəbərdarlıq etirazçıların hökumətin sərt tədbirlərinə baxmayaraq küçələrə çıxmağa davam etdiyi bir vaxtda səsləndirilib.
BBC-yə danışan iki xəstəxananın tibb işçiləri son iki gün ərzində 100-dən çox cəsədin xəstəxanalara gətirildiyini bildiriblər.
Məlumata görə, etirazlar artıq İranın bütün əyalətlərində 100-dən çox şəhər və qəsəbəyə yayılıb.
İranın baş prokuroru bildirib ki, etiraz edən hər kəs “Allaha düşmən” hesab ediləcək və bu, ölüm hökmü ilə cəzalandırıla bilən cinayətdir.
Məlumatda o da qeyd edilir ki, etirazlar gücləndikcə ölənlərin və yaralananların sayı artmaqda davam edir. İki insan haqları təşkilatı təhlükəsizlik əməkdaşları da daxil olmaqla 100-dən çox insanın həlak olduğunu bildirib.
Bir neçə xəstəxananın əməkdaşları BBC-yə deyiblər ki, yaralı və ölənlərin çoxluğu səbəbindən xəstəxanalar həddindən artıq yüklənib.
Beynəlxalq media qurumları İrandan birbaşa reportaj hazırlaya bilmir. Buna baxmayaraq, bəzi videolar yayılıb və media nümayəndələri İranda olan bir neçə şəxslə danışa bilib.
İranın ikinci ən böyük şəhəri olan Məşhəddə etirazçılarla təhlükəsizlik qüvvələri arasında toqquşmalar barədə xəbərlər var.
11-01-2026, 18:34
Sabah hava onlar üçün əlverişsiz olacaq - XƏBƏRDARLIQ
Sabahın tibbi-meteoroloji proqnozu açıqlanıb.
Bu barədə Milli Hidrometeorologiya Xidməti məlumat yayıb.
Məlumata görə, yanvarın 12-də Abşeron yarımadasında gilavar küləyinin arabir güclənəcəyi gözlənilir ki, bu da bəzi meteohəssas insanlarda narahatlıq hissi yarada bilər.
11-01-2026, 18:11
Sabahdan Gəncə-Qəbələ-Gəncə qatarı fəaliyyətə başlayır
"Azərbaycan Dəmir Yolları" QSC (ADY) sərnişin məmnuniyyətinin daha da yüksəldilməsi məqsədilə 12 yanvar tarixindən etibarən ilk dəfə Gəncə–Qəbələ–Gəncə marşrutu üzrə müntəzəm sərnişindaşıma xidmətinə başlayır.
Bu barədə Azərbaycan Dəmir Yolları" QSC-dən bildirilib.
Müasir elektrik qatarı hər gün saat 10:10-da Gəncə Dəmiryol Vağzalından Qəbələ istiqamətinə, saat 18:00-da isə Qəbələdən Gəncəyə hərəkət edəcək. Səfərin ümumi müddəti 1 saat 50 dəqiqə təşkil edir.
Sərnişinlər marşrut üzrə Goran, Yevlax, Ləki və Ağdaş stansiya və dayanacaqlarından da istifadə edə biləcəklər.
Qatarlarda standart, standart+, biznes və birinci siniflər üzrə səyahət imkanları təklif olunacaq.
Biletlərin minimal qiyməti Gəncə–Qəbələ istiqamətində 4.30 AZN, Ləki–Qəbələ istiqamətində isə 1.70 AZN təşkil edir.
Bu reys Bakıdan Qəbələyə və əks istiqamətə hər gün səfər etməyə də imkan verəcək. Belə ki, Bakı–Qazax qatarı ilə saat 10:50-də Ləki stansiyasına çatıb, daha sonra saat 11:12-də Gəncə–Qəbələ istiqamətində hərəkət edən qatarla Qəbələyə səfər etmək mümkündür. Sərnişinlər Qəbələ–Gəncə qatarından istifadə edərək saat 18:45-də Ləki stansiyasına çatıb, saat 19:02-də Qazax–Bakı qatarı ilə Bakıya gələ bilərlər.
Biletləri ADY-nin rəsmi veb-saytı və "ADY Mobile" tətbiqi vasitəsilə almaq olar.
Yeni sərnişindaşıma marşrutu qərb və şimal-qərb bölgələri arasında əlçatanlığın artırılmasına və daxili turizmin inkişafına töhfə verəcək. Bu, Gəncə–Mingəçevir–Gəncə marşrutundan sonra ADY-nin ikinci regiondaxili sərnişindaşıma marşrutu olaraq bölgələrdə nəqliyyatın imkanlarının artırılmasına, regionlararası nəqliyyat bağlantısının və mobilliyin genişləndirilməsinə xidmət edəcək.
11-01-2026, 18:05
Gülüstan vilayətində iğtişaş təşkilatçıları SAXLANILDILAR
İranın Gülüstan vilayətində iğtişaşların bir sıra təşkilatçıları saxlanılıb, digərləri isə təqib altındadır və yaxın zamanda həbs olunacaqlar.
Bu barədə Gülüstan vilayətinin Məhkəmə İdarəsi məlumat yayıb.
Bildirilib ki, baş verən iğtişaşlar zamanı Gürganda 4 bank binası dağıdılıb və daha 2 bank binasına 50% ziyan vurulub.
Bundan başqa, Gürgan vilayətinin inzibati binası da yandırılıb.
11-01-2026, 17:44
Pezeşkian xalqı meydanlara çağırdı
“İran xalqı iğtişaşlarla razılaşmadığını ifadə etmək üçün küçələrə çıxmalıdır”.
İran prezidenti Məsud Pezeşkianın bu sözlərini "Al Mayadeen" telekanalı yayıb.
İran prezidenti xalqa televiziya müraciətində bildirib:
“İran xalqını meydanlara çıxmağa, mövqeyini ifadə etməyə və iğtişaşların onun tələblərini təhrif etməsinə imkan verməməyə çağırırıq”, – deyə prezident bildirib. O vurğulayıb ki, “İran cəmiyyəti məscidləri yandıranları qəbul etmir”.
Pezeşkian mülki şəxslərin həlakı ilə bağlı başsağlığı verib və gəncləri terrorizmə və iğtişaşlarda iştiraka qarşı xəbərdar edib. “Biz sülh yolu ilə keçirilən etirazları rəsmi şəkildə tanıyır və etirazçılarla dialoqu öz borcumuz hesab edirik. Ölkə daxilində etiraz edən bütün tərəflərlə görüşməyə hazırıq”, – deyə o əlavə edib.
Qeyd edək ki, 2025-ci il dekabrın 29-da Tehranda rialın məzənnəsinin kəskin ucuzlaşmasına etiraz olaraq ticarətçilərin aksiyaları başlayıb. Dekabrın 30-da etirazlara tələbələr də qoşulub. İğtişaşlar ölkənin əksər böyük şəhərlərinə yayılıb. 2026-cı il yanvarın 2-də küçələrdə silahlı naməlum qruplar peyda olub, hüquq-mühafizə orqanları ilə toqquşmaların sayı artıb. İran hakimiyyəti iğtişaş törədənləri terrorçu adlandırıb və hadisələrin təşkilinə görə məsuliyyəti İsrail və ABŞ-nin üzərinə qoyub.
11-01-2026, 17:32
Avstraliyada qasırğa - 22 mindən çox insan işıqsız qaldı
Avstraliyada 22 mindən çox insan "Kodzi" siklonu səbəbindən elektrik və istiliksiz qalıb.
Bu barədə ABC televiziya kanalı məlumat verib.
Qeyd olunub ki, elektrik kəsintiləri əsasən Makkay və Uitsandey bölgələrində baş verib.
Artıq qasırğa zəifləyərək tropik siklona çevrilib və ölkə daxilində hərəkət edir.
Hakimiyyət orqanları şiddətli hava şəraiti ilə bağlı xəbərdarlıqlarını davam etdirir.
11-01-2026, 17:18
Rus ordusu Beloqoryeni tutdu
Rusiya ordusu Zaporojye vilayətinin Beloqorye yaşayış məntəqəsini işğal edib.
Bu barədə Rusiya Müdafiə Nazirliyi məlumat yayıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!