16-11-2022, 18:07
Sabah da yağış yağacaq
Sabah, noyabrın 17-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gecə bəzi yerlərdə qısamüddətli yağış yağacağı ehtimalı var. Bu barədə Milli Hidrometeorologiya Xidmətindən məlumat verilib. Mülayim cənub-qərb küləyi günün ikinci yarısında şimal-qərb küləyi ilə əvəz olunacaq. Havanın temperaturu gecə 9-11° isti, gündüz 13-16° isti olacaq. Bakıda gecə 9-11° isti, gündüz 13-15° isti olacaq. Atmosfer təzyiqi 758 mm civə sütunu olacaq. Nisbi rütubət 60-70 % olacaq. Azərbaycanın rayonlarında hava şəraiti əsasən yağmursuz keçəcək. Gecə və səhər saatlarında duman olacaq. Mülayim qərb küləyi əsəcək. Havanın temperaturu gecə 6-9° isti, gündüz 15-19° isti, dağlarda gecə 0-5° şaxta, gündüz 4-8° isti olacaq.
16-11-2022, 18:04
Baydendən Trampın yenidən prezident olmaq istəyinə reaksiya
ABŞ lideri Co Bayden Donald Trampın 2024-cü ildə keçiriləcək növbəti prezident seçkilərində iştirak etmək niyyətinə reaksiya verib. Butov.az xəbər verir ki, Bayden Twitter-də sələfinin "nailiyyətlərini" xatırladan qısa video yayımlayıb. Trampın sadalanan “nailiyyətləri” arasında iqtisadiyyatı zənginlərə yönəltmək, rekord işsizlik, səhiyyə sisteminə hücum, ekstremistlərlə flört etmək, qadınların hüquqlarına zərbə vurmaq və s. qeyd edilib. Bayden videonun altına "Donald Tramp Amerikanı məğlub etdi" yazıb. Xatırladaq ki, ABŞ-ın keçmiş prezidenti Donald Trampın 2024-cü ildə keçiriləcək prezident seçkilərində iştirak etmək niyyətini açıqladığı barədə məlumat yayılıb. Onun köməkçiləri seçkilərdə iştirak üçün rəsmi ərizə veriblər. "Amerikanın qayıdışı indi başlayır!", - Tramp Floridadakı iqamətgahının qarşısında toplaşan tərəfdarlarına müraciət edərək deyib. Tramp eyni zamanda, ABŞ-ın hazırkı prezidenti Baydeni Ukrayna münaqişəsinin öhdəsindən gələ bilmədiyi üçün ölkəsini nüvə müharibəsi astanasına gətirdiyinə görə tənqid edib.
16-11-2022, 18:01
Ukraynada azərbaycanlı zabit və 2 qardaş həlak oldu
Ukraynada gedən müharibədə daha 3 azərbaycanlı həlak olub. Butov.az xəbər verir ki, Ukrayna Milli Qvardiyasının azərbaycanlı polkovnik leytenantı Rüstəmov Samir Atəşli oğlu ölkənin şərq istiqamətində döyüşlərdə həlak olub. Bundan başqa, Ukraynaın Xerson vilayətinin hələki işğal altında olan kəndlərinin birində əslən Azərbaycanın Zərdab rayonundan olan 2 gənc qardaş faciəli şəkildə həlak olublar. Ölən gənclərin yaxınları ərazinin hələlik Rusiyanın işğalı altında olduğu üçün onların adlarının çəkilməsini istəməyib.
16-11-2022, 17:59
Xızıda raket mərmisi tapıldı
Xızıda raket mərmisi tapılıb. Bu barədə Fövqəladə Hallar Nazirliyindən məlumat verilib. Bildirilib ki, FHN-in “112” qaynar telefon xəttinə Xızı rayonunun Məşədi Həsən kəndi ərazisində hərbi sursat aşkar edilməsi barədə məlumat daxil olub. Məlumatla əlaqədar dərhal FHN-in Xüsusi Riskli Xilasetmə Xidmətinin (XRXX) minalardan təmizləmə üzrə çevik qrupu hadisə yerinə cəlb edilib. Hüquq-mühafizə orqanı əməkdaşları ilə birgə ərazidə müvafiq təhlükəsizlik tədbirləri görüldükdən sonra hadisə yerinə baxış zamanı aşkar edilmiş sursatın 1 ədəd 140mm-lik OF-14M turboreaktiv raket mərmisi olduğu müəyyən edilib. Sursat XRXX-nin çevik qrupunun mütəxəssisləri tərəfindən zərərsizləşdirilməsi üçün ərazidən götürülərək kənarlaşdırılıb. Hadisə yerində və ona yaxın ətraf ərazidə əlavə axtarış zamanı başqa hər hansı təhlükəli və ya şübhəli əşya aşkar edilməyib.
16-11-2022, 17:55
Bayden Sunakla Polşadakı raket insidentini müzakirə etdi
ABŞ prezidenti Co Bayden və Böyük Britaniyanın baş naziri Rişi Sunak G20 sammiti çərçivəsində Polşadakı raket insidenti ilə bağlı görüş keçiriblər. Butov.az xəbər verir ki, məlumatı Ağ Ev yayıb. Ağ Evin bəyanatında Bayden və Sunakın Ukraynaya raket zərbələri ilə bağlı müzakirələr apardığı və ABŞ və Böyük Britaniya hökumətlərinin Kiyevi dəstəklədiyi vurğulanıb. "Onlar həmçinin Polşanın şərqində baş verən partlayışı və Polşa ilə bağlı davam edən təhqiqata tam dəstəyimizi müzakirə ediblər", - məlumatda deyilir. Noyabrın 15-də axşam Polşa mediası iki raketin Polşa ərazisinə düşdüyünü - Ukrayna ilə sərhəddəki kənddə iki nəfərin həlak olduğunu bildirib. Ölkənin Xarici İşlər Nazirliyi Polşaya düşən raketin Rusiya istehsalı olduğunu bildirib. ABŞ-dan verilən yeni açıqlamada raketin Kiyevin Rusiya raketlərini vurmaq üçün atdığı raketlərdən biri olduğu bildirilib. Rusiya Müdafiə Nazirliyinin məlumatına görə, Ukrayna-Polşa dövlət sərhədi yaxınlığındakı hədəflərə heç bir zərbə endirilməyib və bəzi dağıntıların dərc edilən fotolarının Rusiya silahları ilə heç bir əlaqəsi yoxdur.
16-11-2022, 17:53
Ərdoğan: "Rusiyanın açıqlamasına hörmət etməliyəm”
Türkiyə prezidenti Rəcəb Tayyib Ərdoğan ötən gecə Polşaya düşən raketlərlə bağlı jurnalistlərin sualına cavab verib. Ərdoğan "Rusiyanın açıqlamasına hörmət etməliyəm” deyib: “Rusiyanın "Bu işin bizimlə heç bir əlaqəsi yoxdur" deməsi bizim üçün vacibdir. Baydenin raketlərin Rusiya istehsalı olmadığını deməsi onların Rusiya ilə heç bir əlaqəsi olmadığını göstərir. Məsələnin araşdırılması vacibdir”. Qeyd edək ki, dünən axşam saatlarında Polşanın Ukrayna ilə sərhədindəki kəndə raket atılıb və 2 dinc sakin həlak olub. ABŞ-dan verilən yeni açıqlamada raketin Kiyevin Rusiya raketlərini vurmaq üçün atdığı raketlərdən biri olduğu bildirilib.
16-11-2022, 17:51
Ərdoğan G20 sammitində mətbuat konfransı keçirib
Türkiyə prezidenti Rəcəb Tayyib Ərdoğan İndoneziyada keçirilən G20 Liderlərinin Zirvə toplantısından sonra media mərkəzində mətbuat konfransı keçirib. Ərdoğan İstanbuldakı son terror hadisəsi ilə bağlı “İŞİD-lə mübarizə bəhanəsi ilə terror təşkilatına dəstək verənlər tökülən hər damla qanda da ortaqdır” deyib. Prezident terrorla mübarizə ilə bağlı “Türkiyənin ədalətli mübarizəsi üçün bütün dost və müttəfiqlərimizin səmimi dəstəyini gözləyirik” söyləyib: “Terror təhlükəsini mənbəyində aradan qaldırmaq strategiyamızı qətiyyətlə həyata keçirməyə davam edəcəyik”. Ərdoğan çıxışında bu ifadələrdən istifadə edib: “Nə edirlərsə etsinlər, kimin arxasında gizlənirlərsə etsinlər, terrorçular onları gözləyən acı taledən qaça bilməyəcəklər”. ABŞ-dan F-16-ların tədarükü ilə bağlı danışarkən Ərdoğan, "cənab Bayden müsbət irəliləyişlərin olduğunu söylədi" deyib. Prezident taxıl dəhlizi ilə bağlı "danışıqlarımız davam edir və inanıram ki, bir problem yoxdur" söyləyib.
16-11-2022, 17:48
ABŞ: Polşaya düşən raket Ukrayna tərəfindən atılıb
Ötən gecə Polşa ərazisinə düşən raket, ilkin məlumatlara görə, Ukrayna hərbçiləri tərəfindən Rusiya raketini vurmaq üçün buraxılıb. Bu barədə “Associated Press” ABŞ rəsmilərinə istinadən məlumat yayıb. "İlkin məlumatlar göstərir ki, Polşanı vuran raket Ukrayna qüvvələri tərəfindən yaxınlaşan Rusiya raketinə atılıb", - agentliyin açıqlamasında deyilir. Dünən axşam saatlarında Polşanın Ukrayna ilə sərhədindəki kəndə raket atılıb və 2 dinc sakin həlak olub. ABŞ-dan verilən yeni açıqlamada raketin Kiyevin Rusiya raketlərini vurmaq üçün atdığı raketlərdən biri olduğu bildirilib.
16-11-2022, 16:49
Kadırov Zelenskiyə hədə-qorxu gəldi: "Kiyevə qədər gedəcəyik”
Çeçenistan rəhbəri Ramzan Kadırov Ukrayna prezidenti Vladimir Zelenskinin Rusiya ilə münaqişənin gərginliyini azaltmaq üçün təqdim etdiyi “sülh formulu”nu tənqid edib və Kiyev rəhbərliyinə əks şərtlər irəli sürüb. Kadırovun sözlərinə görə, Kiyev hakimiyyəti indi heç bir tələb irəli sürmək iqtidarında deyil. Çeçenistan rəhbəri vurğulayıb ki, Rusiyanın şərtlərinə gəlincə, onlar "daha realdır". “Söhbət “Luqansk və Donetsk xalq respublikaları”nın, eləcə də Krım, Xerson və Zaporojye vilayətlərinin Rusiya kimi tanınmasından gedir. Bundan əlavə, Ukrayna hakimiyyəti rusdilli əhaliyə qarşı vəhşiliklərdə iştirak etmiş bütün “faşist cinayətkarları və şeytanları” ekstradisiya etməli, əks halda onlar rəsmən mühakimə olunmalıdırlar”. Ramzan Kadırov əlavə edib ki, birdən qeyri-mümkün bir şey baş verərsə və bu şərtlərə əməl edilmədən “xüsusi əməliyyat” başa çatarsa, Çeçenistanda onun da daxil olduğu könüllülər olacaq ki, onlar “Banderanın faşistlərini və şeytanlarını hər damla qana görə cavablandıracaq”. "Biz “Azovçular” kimi bütün bu şər ruhların sağ qalacağı danışıqların əleyhinəyik. Biz danışıqların qəti əleyhinəyik. Nasistləri məhv edəcəyik, Türkiyəyə qaçanları ömürlük həbs cəzası ilə geri qaytaracağıq. Bəli, Ukrayna silahlı qüvvələrini, digər xidmətlərin əməkdaşlarını başa düşə bilərik - onlar dövlət qulluqçularıdır. Amma nasizm, satanizm - nə qədər ki, belə cərəyanlar var, hansı danışıqlardan danışmaq olar, mən ümumiyyətlə təsəvvür edə bilmirəm”, - Kadırov bildirib. Çeçenistan rəhbəri deyib ki, “xüsusi əməliyyat nəzərdə tutulduğu kimi, tam başa çatdırılmalıdır”. "Cinayətkarları məhv edərək, sona qədər gedib Kiyevə çatmalıyıq. Heç kim inanmasa belə, Uca Tanrının adından belə bir niyyətimiz var və biz bunu həyata keçirəcəyik", - o əlavə edib.
16-11-2022, 16:46
Zelenski NATO-nu Rusiyaya cavab verməyə çağırdı
Rusiyanın terroru təkcə dövlət sərhədlərimizlə məhdudlaşmır, Rusiya raketləri Polşanı da vurdu. Bunu Ukrayna Prezidenti Volodimir Zelenski axşam videomüraciətində bildirib. Prezident qeyd edib ki, Rusiya nə qədər cəzasızlıq hiss etsə, bir o qədər çox təhlükəli olacaq. "NATO ərazisinə raket zərbələri endirildi. Bu, Rusiyanın kollektiv təhlükəsizliyə raket hücumudur. Bu, çox əhəmiyyətli bir eskalasiyadır. Biz hərəkət etməliyik", - Zelenski dünya güclərinə səslənib. Xatırladaq ki, Rusiya ordusu bu gün Ukraynaya 100-ə yaxın raket atıb. Raketlərdən ikisi Polşanın Ukrayna ilə sərhəddə yerləşən Prjevoduv şəhərinə düşüb. Hadisə nəticəsində iki nəfərin öldüyü bildirilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!