14-12-2022, 21:07
NATO-nun 2023-cü il üçün hərbi büdcəsi artırıldı
NATO-nun 2023-cü il üçün hərbi büdcəsi cari illə müqayisədə 25,8% artırılaraq 1,96 milyard avroya qaldırılıb. Bu barədə alyansın mətbuat xidməti məlumat yayıb. “Müttəfiqlər çərşənbə günü Şimali Atlantika Şurasının iclasında NATO-nun 2023-cü il üçün mülki və hərbi büdcələri barədə razılığa gəliblər. Mülki büdcə 370,8 milyon avro, hərbi büdcə isə 1,96 milyard avro səviyyəsində müəyyən edilib ki, bu da 2022-ci illə müqayisədə 27,8% və 25,8% çoxdur”, - mətbuat xidmətinin bəyanatında deyilir .
14-12-2022, 21:03
8 nəfər minaya düşdü, biri dünyasını dəyişdi
Dekabrın 14-də, saat 18 radələrində Kəlbəcər rayonunun Çıraq kəndi ərazisində 8 nəfər şəxsin minaya düşməsi barədə Kəlbəcər hərbi prokurorluğuna məlumat daxil olub. Bu barədə Baş Prokurorluq, Daxili İşlər Nazirliyi və Müdafiə Nazirliyinin birgə məlumatında qeyd olunub. Aparılmış ilkin araşdırmalarla müəyyən olunub ki, təmir-tikinti işləri ilə məşğul olan şirkətin 4 nəfər əməkdaşı Kəlbəcər rayonunun Çıraq kəndi ərazisində piyada əleyhinə minaya düşüb. Həmçinin, müəyyən olunub ki, təxliyə ilə bağlı hadisə yerinə yollanan 4 nəfər hərbçi də minaya düşüb, onlardan 3-ü müxtəlif dərəcəli bədən xəsarətləri alıb, 1-i isə ölüb. Hazırda faktla bağlı Kəlbəcər hərbi prokurorluğunda araşdırma aparılır.
14-12-2022, 20:59
“Kəzılelma” pilotsuz təyyarəsi ilk uçuşunu həyata keçirdi
Türkiyənin "Baykar" şirkəti tərəfindən istehsal edilən "Kəzılelma" pilotsuz döyüş təyyarəsi ilk uçuşunu həyata keçirib. Bu barədə "Baykar" şirkətinin mətbuat xidməti məlumat yayıb. Bildirilir ki, sınaq Çorlu bölgəsində keçirilib və uğurla başa çatıb. Qeyd edək ki, pilotsuz təyyarə 1,5 tona yaxın faydalı yük qaldıra bilir, hava-hava, hava-yer tipli və digər raketlər daşımaq qabiliyyətinə malikdir.
14-12-2022, 20:56
İmamoğlu həbsə məhkum edildi
Türkiyə məhkəməsi İstanbul Böyükşəhər Bələdiyyəsinin sədri Əkrəm İmamoğlu barəsində 2 il 7 ay 15 gün həbs qərarı çıxarıb. Qərarda İstanbul merinə siyasi qadağanın qoyulması da nəzərdə tutulub. İmamoğlu Ali Seçki Komissiyasının üzvlərini təhqir etməkə ittiham olunur. Qərar yuxarı instansiya məhkəmələrinin təsdiqindən sonra qüvvəyə minəcək.
14-12-2022, 20:52
İlham Əliyevlə Ərdoğan Türkmənbaşıda görüşdü
Dekabrın 14-də Türkmənbaşı şəhərində Azərbaycan Respublikasının Prezidenti İlham Əliyevin Türkiyə Respublikasının Prezidenti Rəcəb Tayyib Ərdoğanla görüşü olub. Görüşdə ikitərəfli dostluq və qardaşlıq münasibətlərimizin bu il də bütün sahələrdə daha da genişləndiyi vurğulanıb. Birgə keçirilmiş hərbi təlimlərin müvəffəqiyyətlə başa çatdırıldığı qeyd olunub. Siyasi, hərbi, iqtisadi, nəqliyyat, energetika, müdafiə, müdafiə sənayesi sahələrində əməkdaşlığımızın bu il də uğurla davam etdirildiyi bildirilib. Görüşdə əlaqələrimizin perspektivləri barədə fikir mübadiləsi aparılıb.
14-12-2022, 20:49
Zelenskiyə mükafat təqdim edildi
Strasburq yerləşən Avropa Parlamentində 2022-ci il üçün Saxarov mükafatının təqdimat mərasimi keçirilib. Mükafatlandırma mərasimi Avropa Parlamentinin "Twitter" səhifəsində yayımlanıb. Mükafat Ukrayna xalqı adından tədbirdə iştirak edən Prezident Volodimir Zelenskiyə təqdim edilib.“Fikir azadlığına görə” İnsan Hüquqları Mükafatı 1988-ci ildə sovet fiziki və hüquq müdafiəçisi Andrey Saxarovun şərəfinə təsis edilib. 2021-ci ildə mükafat müxalifətçi Aleksey Navalnıya, 2020-ci ildə isə Belarus müxalifətinə verilib. Mükafatın pul məbləği 50.000 avrodur.
14-12-2022, 20:43
Çavuşoğlu aksiyayla bağlı Azərbaycanı dəstəklədi
Laçın dəhlizinin yaradılma məqsədi bəllidir. Rusların orada sülhü qorumaq vəzifəsi var, amma digər tərəfdən də Azərbaycanın öz torpaqlarındakı sərvətlərinin qanunsuz şəkildə çıxarılıb satılması həm beynəlxalq hüquqa ziddir, həm də Azərbaycanın sərvətlərinin oğurlanması mənasına gəlir. Bu barədə bu gün Türkiyə xarici işlər naziri Mövlud Çavuşoğlu Azərbaycan, Türkiyə və Türkmənistan Zirvə görüşündən sonra azərbaycanlı jurnalistlərin suallarına cavab olaraq qeyd edib. O bildirib ki, bir tərəfdən də nəzarətsiz ətraf mühit problemləri var və oraya müşahidəçi qismində gedən insanların qarşısının alınması pozuntuların nə dərəcədə şiddətli olduğunun göstəricisidir. "Rusiya tərəfi bu məsələdə Azərbaycanla əməkdaşlıq etməli, Rusiya sülhməramlılarının müvəqqəti yerləşdiyi ərazilərdə yaşayan ermənilər isə bu yoxlamaların qarşısını almamalıdır. Burada əsas vəzifə rusların üzərinə düşür, çünki Laçın dəhlizinin normal şəkildə işləməsi də onların məsuliyyətindədir. Bu məsələdə Azərbaycan hüquqi baxımından da, ədalətli olaraq qanunsuz fəaliyyətlərə qarşı çıxmaq baxımından da haqlıdır. Buna görə də biz Azərbaycanı bu haqlı mübarizədə də dəstəkləyirik", - deyə M.Çavuşoğlu bildirib
14-12-2022, 20:38
ABŞ-ın Ermənistandakı yeni səfiri
ABŞ Senatı (Konqresin Yuxarı Palatası) Kristina Kvinin Ermənistana səfir təyin olunmasını təsdiqləyib. Məlumatı Ermənistan KİV-i yayıb. Bildirilib ki, o, 2019-cu ildən ABŞ-ın Ukraynada səfir işləyib. 2016-2019-cu illərdə rəsmi Vaşinqtonun Fransadakı səfirinin iqtisadi məsələlər üzrə müavini olub. K.Kvin diplomatik xidmət ərzində ABŞ-ın Tailand, Böyük Britaniya, Avropa İttifaqı, Rusiya və Filippindəki diplomatik missiyalarında müxtəlif vəzifələrdə çalışıb.
14-12-2022, 20:34
DSX hərbi qulluqçusu qəfildən vəfat edib
Dekabr ayının 14-də saat 12:30-da Dövlət Sərhəd Xidmətinin Sərhəd Qoşunlarının “Qubadlı” Əlahiddə Sərhəd Diviziyasının müddətli həqiqi hərbi xidmət hərbi qulluqçusu əsgər Ələkbərli Miran Qamət oğlu xidmətdən qayıtdıqdan sonra istirahət edərkən səhhəti qəfil pisləşib. Dövlət Sərhəd Xidmətinin Mətbuat Mərkəzindən verilən məlumata görə, hərbi qulluqçuya intensiv tibbi yardım göstərilərək, dərhal Zəngilan rayon Ağalı kənd xəstəxanasına çatdırılıb. Həkimlərin ciddi səyinə baxmayaraq onun həyatını xilas etmək mümkün olmayıb. İlkin rəyə əsasən hərbi qulluqçunun ürək tutmasından vəfat etdiyi ehtimal olunur. Hazırda əsgər Miran Ələkbərlinin ölüm səbəbinin müəyyən edilməsi üzrə müvafiq tibbi ekspertizalar təyin edilib. Faktla bağlı prokurorluq orqanları ilə birgə araşdırma işləri aparılır. Dövlət Sərhəd Xidmətinin rəhbərliyi vəfat edən hərbi qulluqçumuzun ailəsinə və yaxınlarına dərin hüznlə başsağlığı verir.
14-12-2022, 20:30
Hərbi qulluqçumuz odlu silahla özünü öldürüb
Müdafiə Nazirliyinin N saylı hərbi hissəsinin hərbi qulluqçusu, əsgər Əsgərli Aslan Əkbər oğlunun 14 dekabr 2022-ci il tarixdə odlu silahdan atəş açmaqla özünü öldürməsi barədə Ağdam hərbi prokurorluğuna məlumat daxil olub. Respublika Hərbi prokurorunun böyük köməkçisi-Hərbi Prokurorluğun Mətbuat xidmətinin rəhbəri, baş ədliyyə müşaviri Firad Əliyev bildirib ki, daxil olmuş məlumat əsasında Ağdam hərbi prokurorluğunun əməkdaşları tərəfindən hadisə yerinə və meyitə baxış keçirib. "İş üçün əhəmiyyət kəsb edən predmetlər maddi sübut kimi götürülmüş, izahatlar alınmış və digər hərəkətlər icra edilib. Fakt üzrə Ağdam hərbi prokurorluğunda Azərbaycan Respublikası Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanılaraq şahidlər dindirilmiş, müvafiq ekspertizalar təyin edilmiş və təxirəsalınmaz zəruri istintaq hərəkətləri həyata keçirilib". Qurum rəsmisinin sözlərinə görə, hazırda istintaq davam etdirilir və qanunvericiliyin tələblərinə uyğun olaraq bütün tədbirlərin görülməsi təmin olunacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!