11-01-2023, 23:21
Laçın yolundan qanunsuz fəaliyyətlər üçün istifadə edilir - Ceyhun Bayramov
"Laçın yolundan qeyri-qanuni fəaliyyətlər və mina təhdidlərinin davam etməsi üçün istifadə edilir". Bunu Azərbaycanın xarici işlər naziri Ceyhun Bayramov Səudiyyə Ərəbistanının Şura Məclisində Azərbaycanla parlamentlərarası dostluq qrupunun sədri Faiz Bin Abdulla Əl-Şəhri ilə görüşündə bildirib. Nazir Laçın yolunda azərbaycanlı fəalların etirazlarının səbəblərini qarşı tərəfin diqqətinə çatdırıb. Bundan əlavə, son 2 ildə Ermənistanın çoxsaylı təxribatları, o cümlədən erməni silahlı qüvvələrini ərazilərimizdən tam çıxarılmaması, Laçın yolundan qeyri-qanuni fəaliyyətlər və mina təhdidlərinin davam etməsi üçün istifadə edilməsi barədə məlumat təqdim edilib. C.Bayramov həmçinin, Ermənistanın Azərbaycana qarşı təcavüzkar siyasəti, ölkəmizin ərazilərinin 30 ilə yaxın Ermənistan tərəfindən işğalı barədə qarşı tərəfə məlumat verib. Bu xüsusda, Səudiyyə Ərəbistanının 30 il ərzində ölkəmizə dəstəyi məmnunluqla vurğulanıb. Həmçinin Azərbaycanın Ermənistanla sülh sazişinin imzalanması istiqamətində atdığı addımlar və təşəbbüslər, habelə işğaldan azad olunmuş ərazilərimizdə bərpa-quruculuq işləri və həyata keçirilən layihələr barədə qarşı tərəf məlumatlandırılıb.
11-01-2023, 23:07
Putin iranlı həmkarı ilə bir sıra məsələləri danışdı
Rusiya Prezidenti Vladimir Putin iranlı həmkarı İbrahim Rəisi ilə telefon danışığı aparıb. Bu barədə Kremlin mətbuat xidməti məlumat yayıb. Telefon danışığı zamanı enerji, nəqliyyat və logistika sahələrində qarşılıqlı layihələrin həyata keçirilməsi müzakirə edilib. Dövlət başçıları Suriya nizamlanmasında əsas rol oynayan Astana prosesi çərçivəsində koordinasiyanı müsbət qiymətləndiriblər.
11-01-2023, 23:01
Polşa prezidenti Ukraynaya hərbi yardım vəd etdi
Lvovda səfərdə olan Polşa prezidenti Anjey Duda ölkəsinin Ukraynaya “Leopard 2” tanklarını təhvil verəcəyini bildirib. O, bunun beynəlxalq koalisiya çərçivəsində həyata keçiriləcəyini deyib. “Biz qərara gəldik ki, Polşa tərəfinin bu cür dəstəyi Ukraynaya verilsin. “Leopard” tanklarından ibarət qrup beynəlxalq koalisiyanın tərkibində təhvil veriləcək”, - deyə Polşa prezidenti vurğulayıb. Qeyd edək ki, Polşada 240-dan çox "Leopard 2" tankı var.
11-01-2023, 22:55
3 ölkə arasında bəyənnamə imzalandı
Ukraynanın Lvov şəhərində Polşa, Litva və Ukrayna dövlət başçılarının üçtərəfli görüşü keçirilib. Bu barədə "Unian" agentliyi məlumat yayıb. Görüş Polşa prezidenti Anjey Duda və Litvanın dövlət başçısı Qitanas Nausedanın Ukraynaya səfəri çərçivəsində baş tutub. Bildirilib ki, tərəflər birgə bəyannamə imzalayıblar.
11-01-2023, 18:13
Hərbiçi qardaşlarımıza yardım etmək insanlıq borcumuzdur - Ərdoğan
Türkiyə prezidenti Rəcəb Tayyib Ərdoğan Azərbaycan hərbçilərinin Türkiyədə müalicə almasından danışıb. Ərdoğan bu barədə Beynəlxalq Ombudsmanlar Konfransında çıxışı zamanı söz açıb. "Biz Rusiya və Ukraynaya yaralılar üçün humanitar dəhliz açılması təklifini vermişik. Sadəcə Rusiya-Ukrayna deyil, eyni zamanda Suriyadan, Azərbaycandan, Liviyadan yaralıları gətirib müalicə edib geri göndəririk. Bu, bizim insani borcumuzdur", - deyə o bildirib. O qeyd edib ki, Türkiyə Cənubi Qafqazda qeyri-sabit vəziyyətin aradan qaldırılmasına töhfə verib.
11-01-2023, 18:08
Rusiyanın müdafiə qabiliyyətini artıracağıq - Putin
Rusiya prezidenti Vladimir Putin ölkəsinin müdafiə qabiliyyətindən danışıb. Putin bu barədə ilin ilk hökumət iclasında danışıb. O bildirib ki, operativ təhlükəsizliyi gücləndirmək üçün ordunu gücləndirmək lazımdır. "Biz Rusiyanın müdafiə qabiliyyətini artıracağıq. İstənilən xarici təzyiqə baxmayaraq suveren inkişafın təmin olunması vacibdir", - deyə Rusiya prezidenti vurğulayıb. Bundan əlavə, Putin baş nazir Mixail Mişustin hökumətinin 2022-ci il üzrə fəaliyyətini yüksək qiymətləndirdiyini əlavə edib.
11-01-2023, 18:04
İsrailə yeni səfir təyin olundu
Muxtar Məmməd oğlu Məmmədov Azərbaycan Respublikasının İsrail Dövlətində fövqəladə və səlahiyyətli səfiri təyin edilib. Bu barədə Prezident İlham Əliyev sərəncam imzalayıb. M.Məmmədov bu təyinata qədər elm və təhsil nazirinin müavini vəzifəsində çalışıb.
11-01-2023, 18:00
Eks-prezidentdən Paşinyanın iddiasına rədd cavabı
İrəvan şəhərinin ümumi yurisdiksiya məhkəməsi eks-prezident Robert Köçəryanın baş nazir Nikol Paşinyana qarşı iddiasını rədd edib. Bu barədə məhkəmədən bildirilib. Qərarda deyilir ki, Robert Köçəryanın baş nazir Nikol Paşinyan tərəfindən ona qarşı ədalətli məhkəmə araşdırması hüququnun pozulduğunu təsdiqləmək, pozuntu nəticəsində dəymiş qeyri-maddi zərərin ödənilməsi tələbi rədd edilsin. Köçəryanın şərəf və ləyaqətinə dəyən zərərin ödənilməsinini tələb etməsi də qəbul olunmayıb. Xatırladaq ki, baş nazir eks-prezidentlər barəsində danışarkən çıxışında demişdi ki, 2008-ci il martın 1-də xalq hakimiyyəti uğrunda mübarizədə mühüm mərhələ oldu. 2008-ci il martın 1-də Ermənistanın o vaxtkı başçıları ordunu xalqın üstünə qaldıraraq vətəndaşları gülləbaran etmək qərarına gəldilər.
11-01-2023, 17:57
Ermənistanda qadınların orduya cəlb olunmasıyla bağlı qanun hazırlanır
Ermənistanda qadınların hərbi xidmətə cəlb olunması barədə yeni qanun layihəsi hazırlanır. Bu barədə ölkənin müdafiə nazirinin müavini Arman Sarkisyan bildirib. "Qadınlar üçün orduda xidməti könüllülük prinsipi ilə olacaq. Bununla bağlı qanun layihəsi hələ işlənmə mərhələsindədir. Hazırda layihənin üzərində işlənilir. Bir neçə hüquqi prosedurdan sonra bu layihə ictimai müzakirələrə açıq olacaq", - deyə nazir müavini vurğulayıb. O bildirib ki, qadınlar müdafiə və təhlükəsizlik sahələrində daha aktivdirlər. Sarkisyanın sözlərinə görə, bir müddət əvvəl nazirliyin qadınlar üçün təşkil etdiyi atıcılıq kurslarının nəticələri hərbi rəhbərliyi təəccübləndirib.
11-01-2023, 17:54
Ukrayna problemini danışıqlar yolu ilə həll etməyə hazırıq, lakin.. - Peskov
Rusiya Ukrayna problemini danışıqlar yolu ilə həll etməyə hazırdır, lakin hələ ki belə bir perspektiv yoxdur. Bunu Kremlin rəsmi nümayəndəsi Dmitri Peskov deyib. O qeyd edib ki, məqsədlərə dinc, siyasi və diplomatik yollarla nail olmaq Moskva üçün daha üstün variantdır. Peskov deyib ki, Ukrayna qanunlarının prezident Zelenskiyə Rusiya hər hansı əlaqə qurmağı və ya dialoq aparmağı qadağan etdiyi bir şəraitdə, qərblilər də açıq-aydın Kiyevə bu məsələdə çeviklik göstərməyə mane olur. “Orada bu barədə danışmağa meylli deyillər”, - deyə dövlət başçısının mətbuat katibi bildirib. Rusiya-Ukrayna müharibəsi baylayandan sonra təmas qrupları arasında bir neçə üzbəüz danışıqlar aparılıb. Moskva və Kiyev nümayəndələri Belarusda dəfələrlə görüşüblər və nümayəndə heyətlərinin sonuncu təkbətək görüşü 2022-ci il martın 29-da İstanbulda keçirilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!