25-01-2023, 23:33
ABŞ və Almaniya Ukraynaya tank göndərilməsinə razılıq verdi
Bu gün Almaniya və ABŞ Rusiyanın işğalına qarşı mübarizə aparmaq üçün Ukraynaya döyüş tankları göndərməyə razılıq verib. ABŞ Prezidenti Co Bayden Ukraynaya 31 ədəd müasir "M1 Abrams" tankı, Almaniya kansleri Olaf Şolts isə 14 ədəd "Leopard 2" tankları göndəriləcəyini bildirib. Bayden administrasiyasının rəsmisi isə qeyd edib ki, tankların tədarük edilməsi bir neçə ay çəkə bilər. Şolts isə ilk tankların 2-3 ay ərzində Kiyevə çatdırılacağını bildirib. O, Almaniya parlamentində alqış sədaları altında deyib: “Almaniya Ukraynanı dəstəkləməkdə həmişə öndə olacaq”. Almaniya, həmçinin Ukraynaya hava hücumundan müdafiə, ağır artilleriya və çoxsaylı reaktiv yaylım atəşi sistemləri də daxil olmaqla əlavə hərbi yardım göndərəcək. Rəsmi Berlin üçüncü ölkələrin də Ukraynaya "Leopard" tankları tədarük etməsinə yaşıl işıq yandırıb. Bayden Ukraynanın əks-hücuma hazırlaşdığını bildirib. O, tankların ukraynalılara “açıq ərazidə manevr qabiliyyətini artırmaq” üçün lazım olduğunu deyib. Kiyev aylardır ki, öz qüvvələrinə uzun cəbhə xətlərini yarmaq və şərq və cənubda işğal olunmuş əraziləri geri qaytarmaq üçün Qərbdən tanklar istəyirdi. Bu gün 45 yaşını qeyd edən Ukrayna Prezidenti Volodimir Zelenski tanklarla bağlı qərar görə Şoltsa, eləcə də Baydenə təşəkkür edib. Bayden, həmçinin bu gün Şolts, Fransa prezidenti Emmanuel Makron, İtaliyanın baş naziri Giorgia Meloni və Britaniyanın baş nazirləri Rişi Sunak ilə Ukraynaya dəstək verməsini müzakirə edib.
25-01-2023, 23:28
İranın xarici işlər naziri fransalı həmkarı ilə danışdı
İranın xarici işlər naziri Hüseyn Əmir Abdullahian fransalı həmkarı Ketrin Kolonna ilə telefon danışığı aparıb. Bu barədə İran Xarici İşlər Nazirliyi məlumat yayıb. Nazirlər ikitərəfli münasibətlər və qarşılıqlı maraq doğuran məsələləri müzakirə ediblər. İran XİN başçısı bəzi Avropa ölkəsində müsəlmanların müqəddəs kitabı olan “Qurani-Kərim”in təhqir edilməsini pisləyib.
25-01-2023, 23:22
Mirzoyanın səsləndirdiyi fikirlər riyakarlığın bariz nümunəsidir - XİN
24 yanvar tarixində Ermənistan xarici işlər naziri Ararat Mirzoyanın Avropa İttifaqı Parlamentinin Xarici Əlaqələr Komitəsində çıxışı zamanı səsləndirdiyi fikirlər riyakarlığın bariz nümunəsidir. Bu barədə Azərbaycan Xarici İşlər Nazirliyinin bəyanatında deyilir. Bildirilib ki, Ermənistan xarici işlər nazirinin Laçın yolu ətrafında yaranmış vəziyyətin müharibə yolu ilə həll edilməsi təklifi ciddi təhdiddir: "Ermənistan rəhbərləri tərəfindən müharibəyə çağırış ideyalarının yeni olmadığı məlumdur. Hələ 2019-cu ildə Ermənistan Baş naziri Nikol Paşinyan “Qarabağ Ermənistandır”, keşmiş müdafiə naziri Tonoyan isə “yeni torpaqlar üçün yeni müharibə” barədə fikirlər səsləndirib. Xarici işlər naziri Mirzoyanın hərbi həll variantını təklif etməsi Ermənistanın tarixdən dərs çıxartmadığını və 30 il müddətində Azərbaycan ərazilərini işğalda saxlamasının nə ilə nəticələndiyini hələ də anlamadığını göstərir. Ermənistan tərəfinin bu avantürasının qarşısının alınması zəruridir. Görünür ki, 2020-ci il müharibəsindən sonra Ermənistanın üzərinə götürdüyü öhdəliklərin kobud şəkildə pozulması barədə (erməni silahlı qüvvələrini ərazilərimizdən tam çıxarmaması, Azərbaycan ərazisində qeyri-qanuni fəaliyyətləri davam etdirməsi, Laçın yolundan sui-istifadə edərək hərbçilərin rotasiyasını həyata keçirməsi, Azərbaycanda mina təhdidini davam etdirməsi, təbii sərvətlərin qanunsuz istismarı, üçüncü ölkə vətəndaşlarının Azərbaycan ərazisinə qanunsuz keçidinə şərait yaratması və s.) Azərbaycan tərəfindən Avropa İttifaqı və digər beynəlxalq təşkilatlara, habelə Parlamentlərə təqdim olunmuş danılmaz faktlara bu qurumlar tərəfindən əhəmiyyət verilməməsi Ermənistan tərəfini növbəti dəfə cəsarətləndirib. Eyni zamanda, Ermənistan xarici işlər nazirinin bu çıxışının Laçın yolu ətrafında yaranmış vəziyyətlə bağlı bir sıra beynəlxalq çevrələr tərəfindən verilmiş yanlış, sülhü dəstəkləməyən və revanşizmi təhrik edən bəyanatlardan ruhlandığı aydın olur. Ümumiyyətlə, müstəqillik qazanan dövrdən beynəlxalq hüququn norma və prinsiplərinə zidd olaraq Azərbaycanın beynəlxalq tanınmış ərazilərinə qarşı hərbi təcavüz və kütləvi qırğınlar törədən, işğal altında olan şəhərləri və yüzlərlə kəndi viran qoyan, azərbaycanlılara qarşı etnik təmizləmə həyata keçirən, yüz minlərlə əhalini öz doğma torpaqlarından qovan, BMT Təhlükəsizlik Şurasının 4 qətnaməsini yerinə yetirməyən Ermənistanın ərazilərimiz işğaldan azad olunandan sonra beynəlxalq hüquqa və beynəlxalq qaydalara istinad etməsi, beynəlxalq təşkilatlara üz tutması və müdaxilə etməyə çağırması absurddur". Qeyd olunub ki, Azərbaycanın təşəbbüskarı olduğu üç istiqamət üzrə danışıqlarda (bütün nəqliyyat kommunikasiyaların açılması, delimitasiya, sülh sazişinin imzalanması) Ermənistanın xoş niyyətlə iştirak etdiyi barədə xarici işlər naziri Mirzoyanın səsələndirdiyi fikirlərin həqiqəti əks etdirmədiyi yaxşı məlumdur. Ermənistan tərəfi sülh gündəliyi üzrə təkliflər irəli sürüləndən sonra aylarla müraciətlərimizə cavab verməməklə yanaşı, prosesin irəliləməsi üçün əməli addımlar atmayıb və müxtəlif bəhanələrlə davamlı olaraq prosesə maneçilik törədib: "Ermənistan tərəfinin növbəti dəfə guya Azərbaycanın “eksterritorial dəhliz” tələb etdiyi ideyalarını səsləndirməsi əsassızdır. Bir daha xatırladırıq ki, Üçtərəfli Bəyanatın 9-cu bəndinə əsasən, Ermənistanın “vətəndaşların, nəqliyyat vasitələrinin və yüklərin hər iki istiqamətdə maneəsiz hərəkətinin təşkili məqsədilə Azərbaycan Respublikasının qərb rayonları və Naxçıvan Muxtar Respublikası arasında nəqliyyat əlaqəsinin yaradılması” üzrə öhdəliyi mövcuddur. Ermənistan öz ərazisindən maneəsiz hərəkətin təmin edilməsinə razılıq verib və bu öhdəliyinə əməl etməlidir. Eynilə, Azərbaycanın 8 kəndini və onlarla kv. km ərazilərini hələ də işğal altında saxlayan Ermənistan tərəfinin Azərbaycanın delimitasiya prosesinə sadiq olmadığını bəyan etməsi təəccüb doğurur". Məlumatda deyilir ki, Azərbaycanın sülh sazişi imzalamaq təklifinə 8 aydan artıq müddətdə cavab verməyən, daha sonra sülh sazişinin imzalanmasını adətən uzun müddət çəkən delimitasiya prosesi ilə şərtləndirən, müəyyən edilməmiş sərhəd bölgəsində demilitarizasiya zonasının yaradılmasını təklif edən Ermənistanın müxtəlif bəhanələrlə sülh sazişinə maneçilik törətməsi, müəyyən elementləri qabardaraq danışıqlar prosesinin mahiyyəti barədə çaşqınlıq yaratması narahatlıq doğuran məqamdır və Ermənistanın addımlarını bir daha ölçüb-biçməsi zəruridir: "Öz milli siyasətini azərbaycanlılara və türklərə qarşı nifrət zəminində qurmuş və bütün addımlarında bunu nümayiş etdirən, ümumiyyətlə ərazisində yaşayan bütün etnik xalqları məhv və deportasiya edən ölkənin Azərbaycanı ermənilərə qarşı nifrətdə təqsirləndirməsi qəbuledilməzdir. Azərbaycanın məqsədinin guya “etnik təmizləmə” və erməni sakinlərin “deportasiyası” olduğu barədə əsassız iddialara gəldikdə, yüz minlərlə azərbaycanlıya qarşı etnik təmizləmə və kütləvi qırğınlar həyata keçirmiş Ermənistan tərəfinin xalqların hüquqlarının təmin edilməsi sahəsində fikir söyləmək üçün mənəvi haqqı yoxdur. Laçın yolu ətrafında yaranmış vəziyyətlə əlaqədar Ermənistan tərəfindən dəfələrlə səsləndirilmiş və sonuncu çıxış zamanı da təkrarlanmış ideyalarla əlaqədar qeyd edək ki, Azərbaycanın təbii sərvətlərinin qanunsuz istismarının, bu sərvətlərin Azərbaycandan Ermənistana daşınması və yalnız humanitar məqsədlər üçün nəzərdə tutulmuş Azərbaycanın suveren ərazisi olan Laçın yolundan sui-istifadə hallarının qarşısının alınması tələbi ilə dinc etirazlar Azərbaycan xalqının legitim hüququdur. Erməni sakinlərin yaşadığı Azərbaycan ərazilərində qeyri-qanuni fəaliyyətlər Azərbaycanın milli təhlükəsizliyinə hədədir və belə fəaliyyətlərə son qoyulması zəruridir. Azərbaycan bundan sonra da öz milli maraqlarının və təhlükəsizliyinin müdafiəsi məqsədilə bütün lazımi tədbirləri görməyə davam edəcək".
25-01-2023, 23:18
Qərbin hərəkəti Rusiya üçün təhlükə yaratmır - Bayden
Ukrayna qüvvələri əks-hücuma hazırlaşır. Bunu ABŞ Prezidenti Co Bayden deyib. O, həmçinin bildirib ki, Ukrayna kontekstində Qərbin hərəkətləri Rusiya üçün təhlükə yaratmır. Silah tədarükünün məqsədi Rusiya Federasiyası ilə eskalasiya deyil, Ukraynaya yardımdır. Bayden vurğulayıb ki, ABŞ yaxın həftələrdə Rusiya Federasiyasının hücum əməliyyatlarının güclənməsini gözləyir. "Biz lazım olduğu qədər Ukraynanı dəstəkləyəcəyik. Bu, Rusiyaya qarşı mübarizə deyil, bu, azadlıq mübarizəsidir", - ABŞ lideri deyib.
25-01-2023, 23:14
Mirzoyan Borellə görüşüb
Ermənistan xarici işlər naziri Ararat Mirzoyan Avropa İttifaqının xarici işlər və təhlükəsizlik siyasəti üzrə ali nümayəndəsi Cozep Borrel ilə görüşüb. Bu barədə Ermənistan Xarici İşlər Nazirliyi məlumat yayıb. Görüşdə Laçın yolundakı vəziyyət, Ermənistan-Azərbaycan münasibətlərinin tənzimlənməsi prosesində baş verənlər müzakirə edilib. Bundan əlavə, Ermənistan-Türkiyə münasibətlərinin tənzimlənməsi prosesinə də toxunulub.
25-01-2023, 23:09
Vətəndaşlığı olmayan şəxslərin viza alması üçün portal istifadə verildi
Azərbaycan Xarici İşlər Nazirliyi yanvarın 25-də ölkəyə səfər etmək niyyətində olan əcnəbi və ya vətəndaşlığı olmayan şəxslərin istifadəsi məqsədilə “Viza almaq üçün ərizə-anket portalı" istifadəyə verib. Bu barədə Azərbaycan XİN-dən məlumat verilib. Bildirilib ki, Azərbaycana səfər etmək istəyən əcnəbi və ya vətəndaşlığı olmayan şəxslər viza almaq üçün ərizə-anketi elektron qaydada doldurub, daha sonra təsdiq edərək baxılması üçün ölkənin diplomatik nümayəndəlik və konsulluqlarına göndərmək imkanına malik olacaq. Yeni elektron informasiya sisteminin tətbiqi əcnəbi və ya vətəndaşlığı olmayan şəxslərin viza müraciətlərinin baxılması və işlənməsi üçün sərf olunan müddətin minimuma enməsi, viza almaq üçün nəzərdə tutulan ərizə-anketin tam olaraq elektron doldurulması, vizanın rəsmiləşdirilməsi üçün tələb olunan bəzi sənədlərin elektron qaydada təqdim edilməsi və bununla müvafiq dövlət xidmətin göstərilməsində səmərəliliyin artırılması imkanını yaradacaq. Portal Azərbaycanın xarici ölkələrdəki diplomatik nümayəndəlik və konsulluqları, o cümlədən Xarici İşlər Nazirliyi vasitəsilə qəbul olunan viza müraciətlərinə aid olacaq. Bu baxımdan, elektron vizaların rəsmiləşdirilməsi “ASAN Viza” sisteminin portalı vasitəsilə həyata keçirilir və XİN-in istifadəyə verdiyi elektron informasiya sistemindən fərqləndirilməlidir. İlkin mərhələdə Azərbaycan Xarici İşlər Nazirliyi, o cümlədən Almaniya və Gürcüstandakı səfirliklərin portal vasitəsilə elektron qaydada doldurulan ərizə-anketləri qəbul ediləcək. Növbəti mərhələdə Azərbaycanın digər diplomatik missiyalarının mərhələli şəkildə portala qoşulmasının təmin edilməsi nəzərdə tutulub.
25-01-2023, 23:05
Baxmutdan çıxmaq barədə məsələ yoxdur - Rəsmi Ukrayna
"Nə qədər ki, müdafiə olunmaq mümkündür, Baxmutu tərk etməyəcəyik". Bunu Ukrayna Silahlı Qüvvələrinin Baş Qərargahının sözçüsü Andrey Kovalyev milli telemarafonun efirində deyib. Onun sözlərinə görə, hər şey nəzarət altındadır. "Mediada bu barədə çox dərc olunsa da, Baxmutdan çıxmaq barədə məsələ yoxdur. Baxmutda zirzəmilər var. Müdafiə olunmaq, ərazini saxlamaq üçün imkanlar mövcuddur. Döyüşçülərimiz Baxmutda qalmağa davam edəcək", - deyə sözçü qeyd edib. Xatırladaq ki, bu gün Ukrayna tərəfi rəsmi olaraq Soledarı tərk etdiyini açıqlayıb.
25-01-2023, 22:59
Mirzoyan Avropa İttifaqı rəsmisi ilə bir sıra məsələləri müzakirə etdi
Ermənistanın xarici işlər naziri Ararat Mirzoyan Avropa İttifaqının Cənubi Qafqaz üzrə xüsusi nümayəndəsi Toivo Klaarla görüşüb. Bu barədə "Sputnik Armenia" məlumat yayıb. Bildirilib ki, görüş Mirzoyanın Belçikaya səfəri çərçivəsində paytaxt Brüsseldə baş tutub. Tərəflər Aİ-nin Ermənistana yeni müşahidə missiyası göndərməsi barədə danışıblar. Bildirilib ki, bu, regionda sülh və sabitliyin təmin olunmasına yardımçı olacaq. Həmçinin Laçın yolundakı mövcud situasiyanın da müzakirə olunduğu qeyd edilib.
25-01-2023, 16:36
Polşanın baş naziri Almaniya kanslerinə təşəkkür etdi
Polşanın baş naziri Mateuş Moraveyski Almaniya federal kansleri Olaf Şoltsa təşəkkür edib. Baş nazir bu barədə twitter səhifəsində yazıb. Təşəkkür Ukraynaya "Leopard 2" tanklarının tədarükünə razılıq verilməsi ilə bağlı olub. "Çox sağ ol, Olaf Şolts! Bu, Rusiyanı dayandırmağa yönəlmiş böyük bir addımdır. Biz birlikdə güclüyük", - deyə Moraveyski qeyd edib. Bundan əvvəl Böyük Britaniyanın baş naziri Rişi Sunak və Ukrayna Prezident Ofisinin rəhbəri Andrey Yermak da Berlinin qərarını yüksək qiymətləndirmişdilər. Qeyd edək ki, Almaniyanın Nazirlər Kabineti çoxsaylı tənqidlərdən sonra bu gün Ukraynaya 14 ədəd "Leopard 2" tankının tədarükü barədə qərar qəbul edib.
25-01-2023, 16:32
Ukrayna hərbi qüvvələri Soledar yaşayış məntəqəsindən geri çəkildi
Ukrayna müdafiə qüvvələri şəxsi heyətin həyatını xilas etmək üçün Donetsk vilayətindəki Soledar yaşayış məntəqəsindən geri çəkilib. Bu barədə Ukrayna Silahlı Qüvvələrinin Şərq qrupundan Sergey Çerevatı bildirib. "Biz əvvəlcədən hazırlanmış müdafiə xətlərində möhkəmləndik. Əsas tapşırığı yerinə yetirdik. Ukrayna hərbçilərinin mühasirəyə alınması və ya əsir götürülməsi olmayıb. Bu, müharibədir. Hər bir komandir öz qoşunları üçün maksimum faydaya əsaslanaraq qərarlar qəbul edir. Biz düşmənimizin özünə icazə verdiyi lüksə malik deyilik. Yəni sadəcə döyüşçüləri ölməsi üçün qabağa ata bilmərik. Biz mümkün qədər manevr etməyə, atəş açmağa, düşməni tükəndirmək üçün kiçik qrup taktikalarından istifadə etməyə çalışırıq", - Çerevatı bildirib. "Əvvəllər Kiyev vilayətində, Xersonda, Xarkov əməliyyatında, Limanda əhəmiyyətli məğlubiyyətlər alması fonunda Rusiya diqqəti kiçik Soledar şəhərciyinə yönəltmək istəyir", - o qeyd edib. Xatırladaq ki, bir müddət əvvəl Rusiya Soledarı ələ keçirdiyini açıqlasa da, rəsmi Kiyev bunu təkzib etmişdi.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!