14-05-2023, 13:16
Prezidentliyə namizəd olanlar səsvermədə iştirak etdi
Türkiyədə prezidentliyə namizədlər səsvermə prosesində iştirak ediblər. Hazırkı prezident Rəcəb Tayyib Ərdoğan və xanımı Əminə Ərdoğan İstanbulda Saffet Çebi adına məktəbdə səs verib. Cümhuriyyət Xalq Partiyasının sədri Kamal Kılıçdaroğlu və Ata İttifaqının namizədi Sinan Oğan da səsvermə prosesinə qatılıblar. Kılıçdaroğlunu Ankarada seçki məntəqəsində həyat yoldaşı Selvi Kılıçdaroğlu müşayiət edib. Qeyd edək ki, bu gün Türkiyədə prezident və parlament seçkiləri keçirilir. Səsvermə prosesi saat 08:00-da başlayıb, 17:00-da başa çatacaq. Prezident postu uğrunda üç namizəd – hazırkı Prezident Rəcəb Tayyib Ərdoğan, Cümhuriyyət Xalq Partiyasının sədri Kamal Kılıçdaroğlu və Ata İttifaqının namizədi Sinan Oğan mübarizə aparırlar. Məmləkət Partiyasının sədri Muharrem İncə seçkilərə üç gün qalmış namizədliyini geri götürüb.
14-05-2023, 13:07
Sabahın hava proqnozu
Azərbaycanda mayın 15-nə gözlənilən hava proqnozu açıqlanıb. Ekologiya və Təbii Sərvətlər Nazirliyinin Milli Hidrometeorologiya Xidmətindən verilən məlumata görə, Bakıda və Abşeron yarımadasının bəzi yerlərində arabir yağış yağacağı gözlənilir. Arabir güclənən şimal-qərb küləyi günün ikinci yarısında mülayimləşəcək. Havanın temperaturu gecə 8-12°, gündüz 13-16° isti olacaq. Atmosfer təzyiqi 766 millimetr civə sütunundan 761 millimetr civə sütununa enəcək. Nisbi rütubət 70-80 faiz təşkil edəcək. Azərbaycanın rayonlarının bəzi yerlərində havanın arabir yağıntılı olacağı gözlənilir. Ayrı-ayrı yerlərdə leysan xarakterli intensiv olacağı, şimşək çaxacağı, dolu düşəcəyi, dağlıq ərazilərdə qar yağacağı proqnozlaşdırılır. Bəzi yerlərdə duman olacaq. Mülayim qərb küləyi əsəcək. Havanın temperaturunun gecə 9-14°, gündüz 14-17° isti, dağlarda gecə 0-4° şaxta, gündüz 0-5° isti olacağı bildirilir.
14-05-2023, 12:55
Zəlzələ bölgəsinin sakinləri də səsvermədə iştirak edir
Türkiyə Ali Seçki Komissiyası (YSK) Kahramanmaraş mərkəzli 11 vilayətdə baş verən zəlzələlərə görə müxtəlif tədbirlər həyata keçirib. Zəlzələdən təsirlənən bölgələrdə nöqsanları müəyyənləşdirən YSK bu ərazilərdə qurulan konteynerlərdə seçkilərin şəffaf keçirilməsi üçün hazırlıq işləri görüb. Bölgədə əvvəllər seçki qutuları qurulan məktəblərdə yenə də səsvermə olacaq. Dağılmış və ya zədələnmiş məktəblərdə isə səslər məktəblərin bağçalarında, yaxın ərazidə qurulan konteynerlardə veriləcək. Zəlzələdən zərər çəkmiş seçicilər daimi qeydiyyatda olduqları yerdə səs verəcəklər və səslər həmin dairə üzrə hesablanacaq. Zəlzələ bölgəsindən olan təxminən 133 min seçicinin qeydiyyatı isə başqa şəhərlərə köçürülüb. Seçkidə xəstəliyi və ya əlilliyi səbəbindən yataq xəstəsi olan seçicilər üçün də daşınan seçki qutuları yaradılıb. Bu seçicilər səyyar seçki qutularında səs verə biləcəklər. Qeyd edək ki, bu seçkidə ilk dəfə olaraq gözdən əlillər onlar üçün hazırlanmış xüsusi şablonla səs verəcəklər.
14-05-2023, 12:38
Türkiyədə keçirilən seçki səsvermələri davam edir
Türkiyədə prezident və parlament seçkiləri keçirilir. Səsvermə prosesi saat 08:00-da başlayıb, 17:00-da başa çatacaq. Türkiyənin xarici işlər naziri Mövlud Çavuşoğlu və daxili işlər naziri Süleyman Soylu səsvermə prosesində iştirak ediblər. Çavuşoğlu Antalyada, Soylu isə İstanbulda səs verib. Hazırda səsvermə davam edir.
14-05-2023, 12:24
Qızım planlı şəkildə öldürülüb - Şəhid xanımının atası
Ötən gün Vətən müharibəsi şəhidi Saleh Qurbanovun xanımı Ləman Qurbanova qaynı tərəfindən qətlə yetirilib. Mərhumun atası qızının ölümünün planlı şəkildə həyata keçirildiyini bildirib. “Uşağımı pirə aparıb. Bir-iki ay bundan əvvəl qaynı qızıma hücum etdi, onun başını kəsirdi. Nədi-nədi qızım telefon işlədir. Telefonu bütün dünya işlədir, hamının qızı, gəlini işlədir, əxlaqsızlıq eləmir ki! Hadisə günü zəng etdim ki, haradasız? Dedi ki, Sumqayıta çatırlar. Dedim, uşağı evə gətir. Dedi ki, niyə narahatsan, narahat olma. O, qızımı planlı şəkildə öldürüb”, - L.Qurbanovanın atası qeyd edib.
14-05-2023, 11:58
Ərdoğan İstanbulda yerləşən orta məktəbdə səs verəcək
Türkiyədə prezident və parlament seçkiləri ilə əlaqədar səsvermə davam edir. Türkiyə Prezidenti Rəcəb Tayyib Ərdoğan prezident və 28-ci çağırış parlament seçkilərində səsini İstanbulun Üsküdar rayonundakı Saffet Cəbi orta məktəbində verəcək. Qeyd edək ki, Prezident Ərdoğanın səs vermək üçün günorta saatlarında Saffet Cəbi orta məktəbinə gəlməsi gözlənilir.
14-05-2023, 11:43
Qısa müddətdə əks-hücumla bağlı addımlar atılacaq - Zelenski
Ukrayna Prezidenti Vladimir Zelenski əks-hücuma böyük əzmlə hazırlaşdıqlarını, qısa zamanda mühüm addımlar atacaqlarını bildirib. Rusiyanın 24 fevral 2022-ci ildə Ukraynaya hücumundan sonra ilk dəfə İtaliyanın paytaxtı Romaya səfər edən Zelenski rəsmi təmaslarını başa vurduqdan sonra axşam saatlarında İtaliya dövlət televiziyasında proqrama qatılaraq italyan jurnalistlərin suallarını cavablandırıb. Zelenski İtaliya və Fransanın dəstəyi ilə səmalarını qoruya bildiklərini, bu ölkələrdən alınan hava hücumundan müdafiə sistemləri olmasaydı, daha çox itki verəcəklərini söyləyib.Əhəmiyyətli olanın müharibəni bitirmək olduğunu deyən Ukrayna Prezidenti, xaos içində yaşamaq istəmədiklərini əlavə edib. Putinlə danışmaq istəmədiyini vurğulayan Zelenski Ukraynanın çıxış yolunun əks-hücum olduğunu bildirib. O, həmçinin Ukraynanın Krım sərhədinə çatdığı təqdirdə Rusiya daxilində Putinə dəstəyin azalacağını iddia edib. Qeyd edək ki, Ukraynanın əks-hücumunun nə vaxt baş verəcəyi ilə bağlı suala isə Zelenski: "Qısa müddətdə mühüm addımlar atılacaq. Biz böyük əzmlə hazırlaşırıq. Zamanla bağlı dəqiq tarix açıqlaya bilmərəm, ancaq biz qələbəyə inanırıq", - deyə cavab verib.
14-05-2023, 10:25
Esmira Günəşin Becrəvan kəndində kitab təqdimatı olub
Mayın 13-ü şairə Esmira Günəşin Cəlilabadın Bəcrəvan kənd tam orta məktəbində şəhidlərə həsr etdiyi "Qəlbimizdə yaşayanlar" kitabının təqdimatı olub. Qeyd edək ki, kitabda yer alan şəhidlərdən Ayaz Abasov, Fərid Hüseynov və Mirnağı Şərifov Becrəvan kənd tam orta məktəbin məzunlarıdır. Tədbirdə şəhid ailələri, məktəbin müəllim, şagird kollektivi və kənd sakinləri iştirak ediblər. Tədbirdə Azərbaycan Respublikasının Dövlət Himni səsləndikdən və şəhidlərin ruhu bir dəqiqəlik sükutla anıldıqdan sonra Esmira Günəşin şeirlərinin kompozisiyaları, vətənpərvər musiqilər və qonaqların çıxışı ilə davam edib. Tədbirdə ilk olaraq məktəbin direktoru Mübariz Kərimov çıxış edərək məktəbin şəhid məzunları haqqında məlumat verib və şairə Esmira Günəşə gördüyü işlərlə bağlı təşəkkürünü bildirib. Daha sonra şəhid ailələrinin çıxışları zamanı müəllif kitablarını imzalayaraq onlara təqdim edib. Tədbirin sonunda isə şairə Esmira Günəş tədbirin keçirilməsində əziyyəti olanlara- direktor Mübariz Kərimova, Gülənə müəlliməyə, Xəyalə müəlliməyə və Dürdanə müəlliməyə təşəkkürünü bildirib. Rəsmi hissədən sonda qonaqlar məktəbdə şəhidlərin adını daşıyan kabinetlərlə tanış olublar. Daha sonra isə bir-bir şəhidlərin abidəsi, məzarları və ev muzeyləri ziyarət olub. Xatirə şəkilləri çəkilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!