10-06-2023, 11:04
Zakir Həsənov təxribatların qarşısını almaqla bağlı göstərişlər verdi
Azərbaycan Respublikasının müdafiə naziri, general-polkovnik Zakir Həsənov Ali Baş Komandan tərəfindən qarşıya qoyulan tapşırıqları, Ordumuzun üzərinə düşən bütün vəzifələri layiqincə yerinə yetirmək, eləcə də mümkün təxribatların qarşısını dərhal və qətiyyətlə almağa hər an hazır olmaq barədə konkret göstərişlər verib. Bu barədə Müdafiə Nazirliyinin Azərbaycan Ordusunun Quru Qoşunlarının hazırlıq planına əsasən, azad edilmiş ərazilərdə keçirilən komanda-qərargah təlimi ilə bağlı yaydığı məlumatda bildirilib. Yekun iclasında təlimin gedişatını müsbət qiymətləndirən nazir, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin Azərbaycan Ordusu qarşısında qoyduğu tapşırıqları iclas iştirakçılarının diqqətinə çatdırıb. Müdafiə naziri Ali Baş Komandan tərəfindən qarşıya qoyulan tapşırıqları, Ordumuzun üzərinə düşən bütün vəzifələri layiqincə yerinə yetirmək, eləcə də mümkün təxribatların qarşısını dərhal və qətiyyətlə almağa hər an hazır olmaq barədə konkret göstərişlər verib. Döyüş hazırlığının, o cümlədən hərbi qulluqçuların peşəkarlıq səviyyələrinin daim yüksək səviyyədə saxlanılması, təlim və məşqlərin daha keyfiyyətli və intensiv keçirilməsi ilə bağlı vəzifəli şəxslər qarşısında tapşırıqlar qoyulub.
10-06-2023, 10:51
Tokayev fövqəladə hallar nazirini işdən çıxardı
Qazaxıstan Prezidenti Kasım-Jomart Tokayev ölkənin fövqəladə hallar naziri Yuri İlinin vəzifəsindən azad edilməsi haqqında fərman imzalayıb. Bu barədə Kazinform agentliyi məlumat yayıb. Nazirin işdən çıxarılması ölkənin şərqində davam edən böyük meşə yanğını fonunda baş verib. Onun məhz bu səbəbdən vəzifəsindən azad olunduğu bildirilir. Son məlumatlara görə, meşə yanğınları 60 min hektar sahəni əhatə edir. Hadisə nəticəsində meşə təsərrüfatının 3 işçisi həlak olub, 11 nəfər isə itkin düşüb. Təbii fəlakət zonasından 316 nəfər təxliyə olunub. Yanğınla mübarizəyə helikopter və hərbi qulluqçular cəlb edilib.
10-06-2023, 10:07
Rusiya İran PUA-dan aktiv şəkildə istifadə edir - ABŞ rəsmisi
Rusiya son həftələrdə Kiyevə zərbələr endirmək və Ukrayna əhalisini terrora məruz qoymaq üçün İran istehsalı pilotsuz uçuş aparatlarından (PUA) aktiv şəkildə istifadə edir. Bunu Ağ Evin sözçüsü Con Kirbi deyib. O vurğulayıb ki, Ukraynada davam edən müharibə fonunda Rusiya-İran hərbi tərəfdaşlığı dərinləşir. Ağ Ev rəsmisinin sözlərinə görə, PUA-lar İranda istehsal edilib, Xəzər dənizi üzərindən daşınıb və sonra Rusiya qüvvələri tərəfindən Ukraynaya qarşı istifadə edilib. Kirbi qeyd edib ki, Rusiyanın gələn ilin əvvəlində tam şəkildə fəaliyyətə başlaya biləcək PUA istehsalı zavodunun tikintisi üçün lazım olan materialları İrandan aldığı barədə dəqiq məlumatlar var. “Biz narahatıq ki, Rusiya İran PUA-larını öz ərazisində istehsal etmək üçün işləyir”, - Kirbi bildirib.
Xəritə: İran Rusiyaya PUA-ları bu marşrutla göndərir
Ağ Ev PUA-ların daşınma istiqamətini göstərən xəritəni və Rusiyada PUA istehsalı planlaşdırılan ərazinin peyk görüntülərini yayıb. Məlumata görə, Rusiya İran PUA-larını Alabuqa xüsusi iqtisadi zonasında istehsal etmək istəyir. Kirbinin sözlərinə görə, İran və Rusiya arasında dəstək hər iki istiqamətdə gedir. Belə ki, İran Rusiyadan helikopterlər və radarlar da daxil olmaqla milyardlarla dollar dəyərində hərbi texnika almaq niyyətindədir.
Peykdən çəkilən foto: Rusiyanın İran PUA-larını istehsal etmək istədiyi Alabuqa xüsusi iqtisadi zonası
"Rusiya İrana misilsiz müdafiə əməkdaşlığı, o cümlədən raket, elektronika və hava hücumundan müdafiə sahəsində əməkdaşlıq təklif edir. Bu, Ukrayna, İranın qonşuları və beynəlxalq ictimaiyyət üçün zərərli olan tammiqyaslı müdafiə tərəfdaşlığıdır. Biz bu fəaliyyətləri ifşa etmək və pozmaq üçün əlimizdə olan bütün vasitələrdən istifadə etməyə davam edirik və biz daha çox şey etməyə hazırıq”, - sözçü deyib. Ağ Ev dronların ötürülməsinin Birləşmiş Millətlər Təşkilatının qaydalarının pozulması olduğunu və ABŞ-ın iki ölkəni məsuliyyətə cəlb etməyə çalışacağını bəyan edib. “Biz İran hərbi texnikasının Rusiyaya ötürülməsində iştirak edən aktorlara qarşı sanksiyaları davam etdirəcəyik”, - Kirbi vurğulayıb. Xatırladaq ki, ABŞ Rusiyaya PUA tədarükünə görə İranın hərbi şirkətlərinə sanksiya tətbiq edib. İran Rusiyaya PUA göndərdiyini etiraf edib, lakin onların müharibədən əvvəl tədarük edildiyini bildirib.
10-06-2023, 09:43
Erməni silahlı qüvvələri mövqelərimizi atəşə tutdu
Ermənistan silahlı qüvvələrinin bölmələri iyunun 9-u saat 23:20-dən iyunun 10-u saat 00:35-dək Basarkeçər rayonunun Qaraiman və Günəşli yaşayış məntəqələri istiqamətlərində yerləşən mövqelərindən Ordumuzun Daşkəsən rayonunun Astaf yaşayış məntəqəsi istiqamətində yerləşən mövqelərini atıcı silahlardan fasilələrlə atəşə tutub. Bu barədə Müdafiə Nazirliyindən məlumat verilib. Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri tərəfindən Ordumuzun Xocalı və Şuşa rayonları istiqamətlərində yerləşən mövqeləri də fasilələrlə atəşə tutulub. Bölmələrimiz tərəfindən qeyd olunan bütün istiqamətlərdə adekvat cavab tədbirləri görülüb.
10-06-2023, 07:15
DMX yanında İctimai Şuranın üzvləri Şəki şəhərinə səfər ediblər
Dövlət Miqrasiya Xidməti yanında İctimai Şuranın üzvləri Xidmətin müxtəlif struktur bölmələri tərəfindən miqrasiya proseslərinin həyata keçirilməsi vəziyyəti ilə yaxından tanış olmaq üçün mütəmadi olaraq görüşlər təşkil edir.
Növbəti tədbir çərçivəsində İctimai Şura üzvləri Şəki şəhərinə səfər ediblər.
Burada Şura üzvləri Şəki Regional Miqrasiya idarəsində olublar. İdarədə onlara regional idarənin əhatə etdiyi rayonlarda əcnəbi və vətəndaşlığı olmayan şəxslərin hüquqlarının müdafiəsi və onların ölkə ərazisində qanuniləşdirilməsi istiqamətində görülən işlər, elektron xidmətlər, mütəmadi təşkil edilən səyyar xidmətlər, keçirilən maarifləndirmə tədbirləri və digər fəaliyyət istiqamətləri barədə məlumat verilib.
Eyni zamanda səfər çərçivəsində Şura üzvləri Şəki “ASAN Həyat” kompleksində ümumi işin təşkili, miqrasiya və digər əlaqəli pəncərələrin fəaliyyəti ilə də tanış olublar.
9-06-2023, 22:54
Veteran cüdoçularımız qızıl medalın sahibi oldu
Azərbaycan veteran cüdoçuları Sloveniyanın Podçetrtek şəhərində keçirilən Avropa çempionatında 3 qızıl medal qazanıblar. Federasiyadan verilən məlumata görə, ikinci yarış günündə M3 və M4 yaş kateqoriyası üzrə 15 idmançı mübarizə aparıb. M3 yaş kateqoriyasında Zülfüqar Hüseynov (81 kq), M4 yaş kateqoriyası üzrə Babək Hacıyev (60 kq) və Vüqar Budaqov (73 kq) fəxri kürsünün ən yüksək pilləsinə qalxıblar. M3 yaş kateqoriyası üzrə Ceyhun Hüseynov (81 kq) və Ramil Muradov (100 kq), M4 yaş kateqoriyası üzrə isə Mahir Ağamirzəyev (90 kq) və Emil Hüseynov (100 kq) 5-ci yeri tutublar
9-06-2023, 22:33
Gürcüstanın Baş naziri Olaf Şoltsla görüşdü
Gürcüstanın Baş naziri İrakli Qaribaşvili Berlində
Almaniya Kansleri Olaf Şolts ilə görüşüb. Bu barədə Gürcüstan hökuməti məlumat yayıb. Liderlər dünyada gedən prosesləri, yeni çağırışları, o cümlədən Cənubi Qafqazda cərəyan edən hadisələri, sülh danışıqlarını müzakirə edib. Qaribaşvili Gürcüstanın Avropaya inteqrasiya yolunda atdığı addımlar, həyata keçirilən islahatlar və Avropa Komissiyasının tövsiyələrinin həyata keçirilməsində əldə olunan mühüm irəliləyişlər barədə Şoltsa ətraflı məlumat verib.
9-06-2023, 21:38
Müdafiə Nazirliyi erməni yaydığı məlumatı yalanladı
Azərbaycan Ordusunun bölmələri tərəfindən guya iyunun 9-u saat 18:30-da Basarkeçər rayonunun Qaraiman yaşayış məntəqəsi istiqamətində Ermənistan silahlı qüvvələrinin hərbi qulluqçularını daşıyan avtomobilə atəş açılması barədə bu ölkənin müdafiə nazirliyinin yaydığı məlumat tamamilə yalandır, həqiqətə uyğun deyil. Bu barədə Azərbaycanın Müdafiə Nazirliyindən bildirilib. "Qarşı tərəfin yaydığı bu məlumatı qəti surətdə təkzib edirik", - nazirliyin yaydığı məlumatda qeyd olunub.
9-06-2023, 20:39
Əli Əsədov Soçiyə işgüzar səfəri çərçivəsində Putinlə görüşdü
Azərbaycan Respublikasının Baş naziri Əli Əsədov iyunun 9-da Soçiyə işgüzar səfəri çərçivəsində Müstəqil Dövlətlər Birliyi (MDB) Hökumət Başçıları Şurasının üzvlərinin Rusiya Federasiyasının Prezidenti Vladimir Putin ilə görüşündə iştirak edib. Nazirlər Kabinetinin mətbuat xidmətindən bildirilib ki, Rusiya Prezidenti MDB Hökumət Başçıları Şurasının üzvlərini salamlayıb. Ə.Əsədov görüşdə çıxış edərək, Azərbaycan Prezidenti İlham Əliyevin salamlarını və ən xoş arzularını Rusiya Prezidenti Vladimir Putinə çatdırıb. Baş nazir Azərbaycan-Rusiya strateji tərəfdaşlığının ikitərəfli gündəliyində yer alan məsələlərə də toxunub.
9-06-2023, 19:47
Hakan Fidan rusiyalı həmkarıyla telefon danışığı apardı
Türkiyənin xarici işlər naziri Hakan Fidan rusiyalı həmkarı Sergey Lavrovla telefon danışığı aparıb. Bu barədə Türkiyə Xarici İşlər Nazirliyi məlumat yayıb. Lavrov Hakan Fidanı yeni vəzifəsi münasibətilə təbrik edib. Telefon danışığı zamanı ikitərəfli əlaqələr və regionlar məsələlər ətrafında fikir mübadiləsi aparılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!