17-04-2026, 19:10
Naxçıvanda avtomobillər toqquşdu, xəsarət alanlar var
Naxçıvanda dörd nəfərin xəsarət alması ilə nəticələnən yol-nəqliyyat hadisəsi baş verib.
Hadisə Babək rayonu Araz kəndi yaxınlığında qeydə alınıb. 67-BN-063 dövlət nömrə nişanlı "Mercedes" markalı avtomobillə 67-BM-165 dövlət nömrə nişanlı "NAZ-Lifan" markalı avtomobil toqquşub. Qəza nəticəsində 1983-cü il təvəllüdlü Nazim Salmanov, 1977-ci il təvəllüdlü Aminə Ələkbərova, 1963-cü il təvəllüdlü Hikmət Muradov və 1970-ci il təvəllüdlü Zülfünaz Fərzəliyeva müxtəlif dərəcəli bədən xəsarətləri alıblar.
Onlar Naxçıvan Muxtar Respublika Xəstəxanasına yerləşdiriliblər. Hadisə yerinə polis əməkdaşları cəlb olunub, faktla bağlı araşdırma aparılır.
17-04-2026, 18:32
3 nəfər maksimum
bal topladı
Tam (11 illik) orta təhsil səviyyəsi üzrə 9 mart 2026-cı il tarixində keçirilmiş buraxılış imtahanının nəticələri elan olunub.
İmtahan iştirakçıları arasında 2 nəfər – Abşeron rayonu Ceyranbatan qəsəbəsi 1 saylı orta məktəbin məzunu Həsənli Aydın Çingiz oğlu və Bakı şəhəri, 289 saylı orta məktəbin (“Zəngi” liseyi) məzunu Qurbanov Muhammedali Əhməd oğlu 300 bal toplamaqla ən yüksək nəticəni göstərib.
ADA məktəbinin ingilis dilində tədris alan məzunu Fərəcov Mikayıl Elşən oğlu da 200 bal toplamaqla ən yüksək nəticəni göstərib.
Fərqli dildə tədris aparılan məktəblərin məzunları 2 fənn (riyaziyyat və xarici dil) üzrə imtahan verir və maksimal toplaya biləcəkləri bal 200-dür.
17-04-2026, 17:58
Prezident İlham Əliyev
Pakistanın Baş naziri ilə görüşüb
Azərbaycan Prezidenti İlham Əliyev aprelin 17-də 5-ci Antalya Diplomatiya Forumu çərçivəsində Pakistan İslam Respublikasının Baş naziri Məhəmməd Şahbaz Şəriflə görüşüb.
17-04-2026, 17:38
Cavid Vəkilov yazır:
Qayıdış Ümidinin Ünvanı:
Qərbi Azərbaycan
Tarix bəzən xalqların taleyində silinməz izlər buraxır. Bu izlər yalnız arxiv sənədlərində və ya tarix kitablarında qalmır, insanların yaddaşında, ailə xatirələrində və milli kimliyində yaşayır. Qərbi Azərbaycan məsələsi də Azərbaycan xalqının kollektiv yaddaşında belə mövzulardan biridir. Bu mövzu təkcə keçmişdə baş verən hadisələrin xatırlanması deyil, həm də tarixi həqiqətlərin qorunması, mədəni irsin unudulmaması və gələcək nəsillərin öz köklərini tanıması baxımından böyük əhəmiyyət daşıyır.
Qərbi Azərbaycan dedikdə, hazırda Ermənistan Respublikasının ərazisinə daxil olan və tarixən azərbaycanlıların yaşadığı bölgələr nəzərdə tutulur. Bu ərazilərdə əsrlər boyu azərbaycanlı kəndləri, şəhərləri, məscidləri, məktəbləri və zəngin mədəni həyat mövcud olmuşdur. Göyçə, Zəngəzur, İrəvan mahalı və digər bölgələr təkcə coğrafi məkanlar deyil, həm də minlərlə insanın həyat hekayələrinin, adət-ənənələrinin və mədəni irsinin formalaşdığı yerlər idi.
Tarixin müxtəlif mərhələlərində regionda baş verən hadisələr bu torpaqların demoqrafik və sosial mənzərəsinə ciddi təsir göstərmişdir. XIX əsrdə Cənubi Qafqazın Rusiya imperiyasının tərkibinə daxil olması ilə bölgədə əhalinin tərkibini dəyişdirən yeni siyasi və etnik proseslər baş verdi. Buna baxmayaraq, uzun müddət Qərbi Azərbaycan ərazilərində azərbaycanlılar mühüm demoqrafik və mədəni mövcudluğa malik olmuşlar.
XX əsr isə Qərbi Azərbaycanda yaşayan azərbaycanlıların taleyində daha mürəkkəb və ağır hadisələrlə yadda qaldı. Müxtəlif dövrlərdə baş verən siyasi gərginliklər, deportasiya prosesləri və etnik qarşıdurmalar nəticəsində yüz minlərlə azərbaycanlı doğma yurdlarını tərk etmək məcburiyyətində qaldı. Xüsusilə 1948–1953-cü illərdə Sovet hakimiyyətinin qərarları ilə Qərbi Azərbaycan ərazisində yaşayan azərbaycanlıların böyük hissəsi Azərbaycan SSR-in müxtəlif bölgələrinə köçürüldü. Bu köçürülmələr könüllü deyil, inzibati qərarlar əsasında həyata keçirilmişdir. Bu hadisə bir çox ailələrin həyatında dərin izlər buraxdı və onların doğma torpaqlarla əlaqəsini qırdı.
Daha sonrakı illərdə regionda baş verən hadisələr bu prosesin davam etməsinə səbəb oldu. Nəticədə Qərbi Azərbaycan ərazisində yaşayan son azərbaycanlı əhali də öz ata-baba yurdlarını tərk etməli oldu. Bu hadisələr təkcə insanların fiziki olaraq köçürülməsi ilə məhdudlaşmadı. Bir çox tarixi kəndlərin adları dəyişdirildi, azərbaycanlılara məxsus mədəni və dini abidələrin bir hissəsi ya məqsədli şəkildə dağıdıldı, ya da zamanla öz ilkin simasını itirməyə məruz qaldı. Beləliklə, bütöv bir mədəni və tarixi irs təhlükə ilə üz-üzə qaldı.
Bu gün Qərbi Azərbaycan məsələsi Azərbaycan cəmiyyətində daha geniş müzakirə olunan mövzulardan birinə çevrilmişdir. Bu istiqamətdə fəaliyyət göstərən qurumlardan biri də Qərbi Azərbaycan İcmasıdır. İcma Qərbi Azərbaycandan olan insanların tarixi yaddaşının qorunması, onların mədəni irsinin araşdırılması və bu mövzunun beynəlxalq ictimaiyyətə çatdırılması istiqamətində müxtəlif təşəbbüslərlə çıxış edir. Bu fəaliyyət təkcə keçmişi xatırlamaq deyil, həm də tarixlə bağlı həqiqətlərin sənədləşdirilməsi və gələcək nəsillərə ötürülməsi baxımından mühüm əhəmiyyət daşıyır.
Azərbaycanın yaxın tarixində baş verən hadisələr də bu məsələnin daha geniş kontekstdə müzakirə olunmasına təsir göstərmişdir. 2020-ci ildə baş vermiş Vətən müharibəsi nəticəsində Azərbaycan öz ərazi bütövlüyünü böyük ölçüdə bərpa etdi və uzun illər işğal altında qalmış torpaqlar azad olundu. Qarabağda əldə edilən bu tarixi qələbə göstərdi ki, uzun illər davam edən ədalətsizliklər gec də olsa aradan qalxa bilər. Bu hadisə təkcə siyasi və hərbi baxımdan deyil, həm də milli ruh və ədalət hissi baxımından böyük əhəmiyyət daşıdı.
Məhz bu baxımdan Qərbi Azərbaycan məsələsi də daha geniş tarixi və ictimai müzakirələrin bir hissəsi kimi diqqət mərkəzindədir. Çünki Qərbi Azərbaycandan köçürülmüş insanların xatirələri, onların doğma torpaqlara bağlılığı və tarixi yaddaşı Azərbaycan cəmiyyətinin mühüm bir hissəsini təşkil edir. Bu torpaqlar yalnız coğrafi məkan deyil, həm də minlərlə ailənin tarixidir.
Bu gün tarixçilər, tədqiqatçılar və ictimai xadimlər Qərbi Azərbaycanla bağlı araşdırmaların aparılmasını, tarixi faktların toplanmasını və bu mövzunun beynəlxalq müstəvidə tanıdılmasını vacib hesab edirlər. Bu prosesdə gənclərin fəallığı xüsusi əhəmiyyət daşıyır. Çünki tarixi yaddaşın qorunması yalnız keçmişi xatırlamaq deyil, həm də bu həqiqətləri gələcək nəsillərə çatdırmaq deməkdir.
Tarix göstərir ki, xalqlar öz yaddaşlarını yaşatdıqları müddətdə kimliklərini və mənəvi bağlarını qoruyurlar. Qərbi Azərbaycan mövzusu da məhz belə bir yaddaşın ifadəsidir. Bu torpaqlar haqqında xatirələr, araşdırmalar və yazılar davam etdikcə, həmin yerlərin adı da yaddaşlarda yaşayacaq. Qarabağda əldə olunan tarixi qələbə isə bir daha göstərdi ki, torpaq, yurd və ədalət anlayışları zaman keçsə də xalqın yaddaşından silinmir. Bu səbəbdən Qərbi Azərbaycan bu gün təkcə keçmişin xatirəsi deyil, həm də tarixi ədalətə olan inamın və qayıdış ümidinin rəmzi kimi yaşayır.
Cavid Vəkilov
Müvəkkil Hüquq Mərkəzi Könüllülər Departamentinin rəhbəri
17-04-2026, 17:16
Əliyev Şara ilə görüşdü
Aprelin 17-də Antalyada Azərbaycan Respublikasının Prezidenti İlham Əliyevin Suriya Ərəb Respublikasının keçid dövrü Prezidenti Əhməd əl-Şara ilə görüşüb. Söhbət zamanı Prezident İlham Əliyevlə Əhməd əş-Şaranın ötən il Azərbaycana səfəri zamanı, həmçinin 4-cü Antalya Diplomatiya Forumu çərçivəsində görüşləri məmnunluqla xatırlanıb.
Suriyada baş vermiş dəyişikliklərdən sonra ölkələrimiz arasında münasibətlərin inkişafı ilə bağlı konkret addımların atıldığı vurğulanıb.
Enerji sahəsində əməkdaşlığın vacibliyinə toxunularaq, bu xüsusda Azərbaycan qazının Türkiyə ərazisindən Suriyaya ixracı layihəsinin həyata keçirilməsinin əhəmiyyəti və bunun Suriyanın enerji təhlükəsizliyinə töhfə verməklə ümumilikdə bu ölkənin inkişafında önəmi qeyd olunub.
Əhməd əş-Şara Azərbaycanın Suriyaya göstərdiyi dəstəyə görə dövlət başçısına bir daha minnətdarlıq edib.
Görüşdə ikitərəfli münasibətlərin perspektivləri və qarşılıqlı maraq doğuran digər məsələlər ətrafında fikir mübadiləsi aparılıb, əlaqələrimizin inkişafında müxtəlif səviyyəli qarşılıqlı səfərlərin və təmasların roluna toxunulub.
Dövlətimizin başçısı Əhməd əş-Şaranı ölkəmizə səfərə dəvət edib.
Dəvət məmnunluqla qəbul olunub.
17-04-2026, 16:59
Antalyada yenidən görüşdülər
Azərbaycan Respublikasının Prezidenti İlham Əliyev Antalya Diplomatiya Forumu çərçivəsində türkiyəli həmkarı Rəcəb Tayyib Ərdoğan və Pakistanın Baş naziri Məhəmməd Şahbaz Şəriflə bir araya gəlib.
Butov.az xəbər verir ki, üç qardaş ölkənin başçıları səmimi söhbət ediblər.
17-04-2026, 15:18
Bircə arzum var idi...
“...Hər şənbə, bazar günləri ata yurduma gedirəm. Evimizdə əzizlərimi xatırlayıram; Atamı, anamı, 2 ildi dünyasını dəyişən qardaşımı, qəhrəman bacımı, itkin qardaşımı... Qapını açıb içəri keçəndə onların mənim yanımda olduqlarını hiss edirəm. Hiss edirəm ki, hətta küçədə də mənimlə addımlayırlar...” Xankəndi sakini, doğma yurduna qayıtmış Nəzakət Lətif qızı İsmayılova belə deyir. Nəzakət xanımın həyat hekayətini səssiz, ağrısız dinləmək olmur.
O, 1973-ci ildə Xankəndidə anadan olub. Ailənin 8 övladının sonuncusudur. Uşaqlıq, yeniyetməlik illəri Xankəndidə keçib. Burada erməni separatizminin baş qaldırdığı 1988-ci ildə ailəliklə evlərini tərk emək məcburiyyətində qalıblar. Evi ermənilər zəbt ediblər. Nəzakətgil əvvəlcə Ağdama gəliblər, sonra isə Xocalı şəhərində məskunlaşmalı olublar. O, 1991-ci ildə bu şəhərdə ailə qurub. Cəmi doqquz ayın gəlini olan Nəzakətin həyat yoldaşı Vidadi Xocalı soyqırımının qurbanlarındandır. Soyqırım hadisəsindən bir ay sonra qızı Ülviyyə dünyaya gəlib.
Onu da qeyd edək ki, Nəzakət xanımın özündən iki yaş böyük bacısı Zöhrə Quliyeva Xocalı özünümüdafiə batalyonunda döyüşçü, tibb bacısı olub. Gəncə Texnologiya Texnikumunda qiyabi təhsil alan vətənpərvər qız doğma yurdun müdafiəçiləri sırasına qoşulub. Nəzakət onun haqqında belə deyir: “1990-cı ilin noyabrında bir dəfə bacım avtobusla Ağdamdan Xocalıya gəlirmiş. Əsgərandan keçəndə ermənilər avtobusu güllə-barana tuturlar. Sürücü İlqar Novruzov yaralanır. Həmin anda Zöhrə özünü itirmir, sükan arxasına keçərək avtobusu idarə edir və 32 nəfər sərnişini sağ-salamat Xocalıya gətirib çıxarır...”
Zöhrənin igidliyi haqqında başqa bir hekayət də var. Xocalı soyqırımı zamanı o, qonşu qadının körpəsinə gücü çatmadığını görüb uşağı öz kürəyinə şəlləyir. Ancaq yolda yaralandığı üçün uşağı doğmalarına verir. Yaralı vəziyyətdə belə özünü itirmir, döyüş yoldaşlarına tibbi yardım göstərir. Və nəhayət, düşmənə əsir düşməsin deyə, son gülləsini öz sinəsinə sıxır. “Zöhrənin məzarı Ağdamın Şəhidlər Xiyabanındadı. Torpaqlarımız işğaldan azad edildikdən sonra Zöhrə bacımın da məzarını tapıb ziyarət etdim, onunla xeyli söhbətləşdim,” – deyə Nəzakət xanım bildirir. Cəsur döyüşçü qızın şücaətini ulu öndər Heydər Əliyev layiqincə dəyərlərndirib, özünün 25 fevral 1997-ci il tarixli Sərəncamı ilə onu ölümündən sonra "İgidliyə görə" medalı ilə təltif edib.
Nəzakət xanımın qardaşı Zakir Quliyev də iyirmi səkkiz yaşında Xocalı soyqırımında itkin düşüb. Bu günədək ondan bir xəbər yoxdur.
…Xocalıda 3 əzizini itirən Nəzakət xanım körpə qızı və valideynləri ilə birlikdə məcburi köçkünlüyün ağrı-acısını yaşayıb. Əvvəlcə Naftalanda, sonra Goranboyda müvəqqəti məskunlaşıb. Köçkünlük illərində ata-anasını da itirib. Həmin dövrü xatırlayan Nəzakət xanım deyir: “Əvvəldən körpələr evində işləmişdim. Goranboyda da öz işimlə bağlı çalışdım. Qızımı böyütdüm, indi şükür, ailəsi, 3 övladı var. Düz 36 il doğma vətənimə - Xankəndimə həsrət qaldım. Onda mənim bircə arzum var idi - Xankəndiyə qayıtmaq! Düşünürdüm ki, yurduma qayıtsam itirdiyim doğmalarımın da ruhları şad olar. Şükür, torpağıma qayıtdım”.
…Nəzakət xanım ən böyük arzusuna çatıb. İndi Xankəndidə yaşayır. Burada 1 nömrəli uşaq bağçasında dərzi kimi çalışır. Özünü xoşbəxt sanır. O deyir: “Qoy, bu sevinc dogma-yurd yuvasını itirmiş hər bir kəsə nəsib olsun! Bizə bu xoşbəxtliyi yaşadan şəhidlərimizə borcluyuq. Allah qazilərimizə can sağlığı versin, yaşasın müzəffər Prezidentimiz!”
Mina RƏŞİD
16-04-2026, 19:21
Abşeronda yağışın
fəsadları aradan
qaldırılır
Mart və aprel ayında yağan intensiv yağıntılar nəticəsində Abşeron rayonunun bir sıra ərazilərində - Xırdalan, Masazır, Məmmədli, Hökməli və Aşağı Güzdək yaşayış məntəqələrində, göl ətrafı yaşayış məskənlərində, o cümlədən Saray kəndinin relyefcə çökək hissələrində yağış suyunun və qrunt sularının artması müşahidə edilmişdir. İlk günlərdən etibarən su kütləsinin təxirəsalınmadan idarə olunması, istiqamətləndirilməsi, kənarlaşdırılması və digər əhəmiyyətli tədbirlərin görülməsi istiqamətində Abşeron Rayon İcra Hakimiyyəti, yerli bələdiyyələr, FHN-nin və ADSEA-nın nümayəndələri ilə birgə qərargah yaradılmışdır. Görülən işlər çərçivəsində yüksək məhsuldarlıqlı nasos və suçəkmə qurğuları vasitəsilə ərazilərdən suyun fasiləsiz
kənarlaşdırılması işi aparılmış, Fövqəladə Hallar Nazirliyinin, Azərbaycan Dövlət Su Ehtiyatları Agentliyinin, Abşeron RİH-nin yerli qurumlarının birgə səyləri ilə ərazilərə əlavə nasos və texniki vasitələr cəlb edilərək suçəkmə işləri gücləndirilmişdir.
Bildiririk ki, normadan dəfələrlə artıq yağış suyunun düşməsi, hal-hazırda da ara-sıra yağışların yağması və bununla əlaqədar olaraq nasosxanaların gücləndirilmiş iş rejimində çalışdırılması səbəbindən bəzi nasosxanaların fəaliyyətində yaranmış müvəqqəti fasilələr səbəbindən rayonun bəzi hissələrində içməli suyun verilişində yaranmış məhdudiyyətlər operativ tədbirlər nəticəsində aradan qaldırılmış və içməli su təminatı qısa müddətdə əvvəlki rejimə qaytarılmışdır.
Hazırda relyef cəhətdən ən çökək ərazilərdə yerləşən küçələrdə və ayrı-ayrı ünvanlarda fərdi yaşayış evlərinin həyətlərindən suyun kənarlaşdırılması, göllərin suyunun səviyyəsinin tənzimlənməsi və bənd vurulması, göl ətrafı ərazilərdə təmizlik işlərinin görülməsi həyata keçirilir. O cümlədən müraciətlər əsasında fərdi sahibkarlar tərəfindən inşa edilmiş və idarəçiliyi özəl şirkətlərdə olan çoxmənzilli yaşayış binalarına da dəstək verilib, zirzəmilərə dolan su kütləsinin tez bir zamandan çəkilməsi üçün əlavə nasoslar cəlb edilib. Artıq bir çox zirzəmilər tamamilə qurudularaq sakinlərin istifadəsinə verilib.
Bununla yanaşı bildiririk ki, hazırda da bu istiqamətdə həyata keçirilən fəaliyyət davam etdirilir və bundan sonra da lazimi addımlar atılacaqdır.
16-04-2026, 15:24
Əliyev Türkiyəyə
işgüzar səfərə gedib
Azərbaycan Respublikasının Prezidenti İlham Əliyev Türkiyə Respublikasının Prezidenti Rəcəb Tayyib Ərdoğanın dəvəti ilə 5-ci Antalya Diplomatiya Forumunda iştirak etmək üçün aprelin 16-da Türkiyəyə işgüzar səfərə gedib. Antalya Beynəlxalq Hava Limanında Prezident İlham Əliyevi Antalya şəhərinin valisi Hulusi Şahin və digər rəsmi şəxslər qarşılayıblar.
16-04-2026, 15:10
Daha 13 azərbaycanlının
əmlakı müsadirə olundu
Müharibə ilə bağlı daha 13 həmədanlıya qarşı cinayət işi açılıb və onların əmlaklarının müsadirəsi barədə qərar verilib.
Bu barədə Həmədan Prokurorluğu məlumat yayıb. Onlar "düşməənlə əməkdaşlıq" və "milli maraqlara zidd fəaliyyətlər"də günahlandırılıblar.
Cəzalandırılan azərbaycanlıların kimliyi barədə açıqlama verilməyib.
Qeyd edək ki, ötən həftə isə eyni ittihamlara görə 25 həmədanlının əmlakı müsadirə olunmuşdu.
P.S. Azərbaycanlıları müflisləşdirmək Fars rejiminin köhnə taktikasıdır. Adamları həbs edir. Mülk qarşılığında azadlığa buraxıb, olan-qalanın əlindən alır, qısa müddətdən sonra yenidən həbs edirlər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!