Xəzərdə 90 №-li kəşfiyyat quyusunda yanğın baş verib. ANS PRESS ARDNŞ-in rəsmi saytında yer almış hadisə ilə bağlı məlumatı nəzərinizə çatdırır:

"90 №-li kəşfiyyat quyusu “Bulla-dəniz” yatağının şimal-şərq qanadında 29 №-li özüldən məhsuldar qatın VIII horizontunun karbohidrogen potensialının qiymətləndirilməsi məqsədi ilə layihələndirilib.

Quyuda qazma işlərinə 06.11.2012-ci ildə başlanılmışdır (dənizin dərinliyi- 26,5 metr). 17.08.2013-cü il tarixində gecə saat 23 radələrində 5868 metr dərinlikdə qazma zamanı quyuda qaz təzahürləri müşahidə olunub. Kəsilişə görə bu dərinlik məhsuldar qatın VIII horizontunun ortasına uygun gəlir. Qaz təzahürünün qarşısını almaq üçün qazma briqadası tərəfindən mümkün olan bütün tədbirlər görülmüşdür.

Buna baxmayaraq gecə 23:30-da quyu açıq qaz fontanına keçmiş və yanğın baş vermişdir. Görülən təcili tədbirlər nəticəsində platformada olan işçilər evakuasiya olunaraq sahilə çıxarılmışdır. Hal-hazırda özülün ətrafında yanğınsöndürən gəmilər yanğına nəzarət edir. Quyunun bağlanması üçün tədbirlər planı hazırlandıqdan sonra yanğının söndürülməsinə başlanacaq.

Baş vermiş hadisənin səbəbləri araşdırılır".