“Sabah” qəzetinin bağışlanmaz səhvi 

Bəyanatda deyilir: “Türkiyənin “Sabah” qəzetində  dərc edilən “3 Başkenti, 11resmi dili ve 5 dilde ulusal marşı var!” başlıqlı yazısı Birlik üzvlərinin ciddi rahatsızlığına nədən olmuşdur. (http://www.sabah.com.tr/dunya/2014/11/09/3-baskenti-11-resmi-dili-ve-5-dilde-ulusal-marsi-var). Məqalədə Azərbaycanın işğal olunmuş Dağlıq Qarabağ ərazisi “Dağlık Karabağ Cumhuriyeti” kimi göstərilmişdir. Saxta “erməni soyqırımı”nın 100 illiyini bütün dünyada Türkiyə əleyhinə siyasi kampaniyaya çevirən dünya ermənilərinə belə ayı xidmətində bulunan qəzetdə bilərəkdən, ya bilmədən bu cür bağışlanmaz səhvin dərc edilməsinə etiraz edirik. Bu gün yalnız Azərbaycan belə məkrli oyunların qarşısında Türkiyə ilə çiyin-çiyinə, qol-qola dayanmışdır.  Biz qeyri-hökumət təşkilatı olaraq, “Sabah”ın erməni dəyirmanına su tökməsinə heç cür haqq qazandıra bilmirik. Hesab edirik ki, bu kimi yazılar Türkiyə ilə Azərbaycan arasındakı münasibətlərə zərbə vurmaq istəyənlərin mənafeyinə xidmət edir. 20 ildən artıqdır ki, Ermənistan Azərbaycan torpaqlarını işğal edib, minlərlə azərbaycanlını girov götürüb, on minlərlə insanı qətlə yetirib. Ermənilər qoca, uşaq, qadın demədən azərbaycanlılara bəşəriyyətin görmədiyi işgəncələri veriblər.Türkiyə də məhz buna görə 1993-cü ildən Ermənistanla bütün diplomatik əlaqələri dayandırmışdır. “Sabah” qəzeti   beynəlxalq qurumlar tərəfindən işğalçılıq aktını rəsmən təsdiq edən BMT-nin 4 qətnaməsini də saya salmadan  Azərbaycanın işğal olunmuş ərazilərini ermənilərə məxsus dövlət kimi göstərib.Dünyanın heç yerində tanınmayan, qəbul edilməyən qondarma bir qurumun müstəqil dövlət kimi təqdim olunması Azərbaycanın ərazi bütövlüyünə qarşı təhdiddir.

Qardaş bir ölkədə fəaliyyət göstərən “Sabah” qəzeti bu yazı ilə on minlərlə Azərbaycanlı şəhidlərin ruhunu təhqir edib. Təcili şəkildə “Sabah” qəzetindən bu məsələ ilə bağlı Azərbaycan xalqından üzr istəməsini, təkzib verməsini və materialı saytdan silməsini tələb edirik.”

İdarə Heyəti.