“Daha çox hansı bəstəkarla işlyirsiniz, ən bahalı mahnınız hansı olub?”.

Butov.az Teleqraf.com-a istinadə sənətçilərimizin cavablarını təqdim edir:


Nadir Qafarzadə: “Daha çox Fərid Kərimlinin mahnılarını ifa etmişəm. Ümumiyyətlə, hansı mahnı xoşuma gəlirsə ifa edirəm. Seçim edərkən ətrafımdakı insanlarla məsləhətləşirəm, amma sonda özüm qərar verirəm. Mahnılara pul vermirəm, mənə hədiyyə edirlər”.



Günay İbrahimli: “Bir çox bəstəkarlarla – Aygün Səmədzadə, Pərviz Mahmudov və başqaları ilə işləmişəm. Mahnılarımın qiyməti Azərbaycan üçün standart qiymətlərdir və normaldır. Amma ən bahalı mahnımın qiymətini açıqlamayacam. Əslində, müğənninin diplomu onun təqdim edəcəyi mahnılardır. Mənim bir kaprizim var, mahnını özüm seçib oxumalıyam. Deyə bilməzlər ki, sifarişli mahnıdır və bu qədər pul veririk, oxumalısan. Xoşum gəlməyən iş olsa, milyon versələr də oxumaram”.



Ayan Babakişiyeva: “Ən çox Elçin İmanovun mahnılarını ifa edirəm. O, müəllimim olmaqla yanaşı, ən gözəl nəğmələrimin müəllifidir. Mahnının qiyməti önəmli deyil, əsas odur ki, bəstəkarın adı mənim üçün dəyərli olsun. Xanım İsmayılqızının bir çox mahnısını ifa etmişəm. Ən önəmlisi odur ki, hər zaman sənətkarlarla işləmişəm və bu belə də davam edəcək”.



Sevda Yəhyayeva: “Əslində, bu günə qədər çox bəstəkarın yaradıcılığına müraciət etmişəm. Pərviz Mahmudov, İsmayıl Əsədov, İsa Məlikov, Nailə Mirməmmədli, Hakan Erol, Rəhim Rəhimli, Elçin Cəfərov,Tərlan Məmmədhüseynov, Vüqar Camalzadə, Nazim Məmmədov və bir çox sənətkarla işləmişəm. İfa etdiyim bütün mahnıları baha qiymətə almışam”.



Xuraman Şuşalı: “Vaxtilə bahalı mahnılar almışam. Amma qiymətini açıqlamaq istəməzdim. Bir çox mahnılarım var ki, çox bahalıdır, onlara yüksək məbləğdə pul xərcləmişəm. Bahalı mahnılar da gözlənilən nəticəni verir. İndiyədək Nailə Mirməmmədli, Gövhər Həsənzadə kimi sənətkarlarla işləmişəm”.



Samira Allahverdiyeva: “Bir çox bəstəkarın mahnısını ifa etmişəm. Ən çox işlədiyim bəstəkar Muxtar Abseynov və Sevda Məmmədlidir. İfa etdiyim mahnılar təxminən eyni qiymətdə olub. Onların qiymətini açıqlamaq istəmirəm”.