14-02-2024, 17:44
Rusiya-Azərbaycan təmaslarına hazırlıq davam edir - Zaxarova
Rusiya sülhməramlı kontingentinin fəaliyyəti ilə bağlı növbəti Rusiya-Azərbaycan təmaslarına hazırlıq davam edir. Bu sahədə dialoqumuz müntəzəm və konstruktiv xarakter daşıyır.
Bunu Rusiya Xarici İşlər Nazirliyinin rəsmi nümayəndəsi Mariya Zaxarova sülhməramlıların gələcəyi ilə bağlı yanaşmaları şərh edərkən deyib.
Müzakirə olunan məsələlər arasında ermənilərin hüquqlarının və təhlükəsizliyinin lazımi səviyyədə təmin olunmaqla Qarabağa qayıtması perspektivləri, birgə patrulların təşkili, mədəni, tarixi və dini irs abidələrinin mühafizəsi də var.
14-02-2024, 17:37
Azərbaycan xalqı bir yumruq kimi birləşib - Prezident
Bu gün Azərbaycan xalqı bir yumruq kimi birləşib.
Bu sözləri Prezident İlham Əliyev fevralın 14-də keçirilən andiçmə mərasimindəki nitqində deyib.
Bizi birləşdirən ümummilli məsələnin Qarabağın azad edilməsi olduğunu xatırladan dövlətimizin başçısı qeyd edib: “Bu məsələ artıq öz həllini tapdı və bu birlik daimi olmalıdır. Milli birlik daimİ olmalıdır, çünki Azərbaycanın önəmi artır, dünyada oynadığı rolu artır”.
14-02-2024, 17:19
Prezident: “Əldə edilmiş bütün nailiyyətlərin mənbəyi Azərbaycan xalqıdır”
2003-cü ildə verdiyim bütün vədlər yerinə yetirildi.
Bunu Prezident İlham Əliyev andiçmə mərasimindəki nitqində deyib.
Dövlətimizin başçısı, həmçinin bildirib:
“Əldə edilmiş bütün nailiyyətlərin mənbəyi Azərbaycan xalqıdır, onun mənə göstərdiyi inam və onun vahid amal ətrafında birləşmə bacarığıdır. Biz doğrudan da bütün dünyaya sübut etmişik ki, böyük xalqıq”.
14-02-2024, 16:53
Magistratura imtahanı üzrə respublika birincisi seçdiyi ixtisasdan danışdı
Magistratura təhsilimi Azərbaycan Respublikasının Prezidenti yanında Dövlət İdarəçilik Akademiyasında almaq istəyirəm. Hədəfim ixtisasım üzrə işləməkdir.
Bu sözləri açıqlamasında 2024/2025-ci tədris ili üçün ali təhsil müəssisələrinin magistraturalarına qəbul imtahanlarında 93 bal toplayaraq respublika birincisi olan Gültən Məhərrəmli bildirib.
Tam orta təhsilini Babək rayonunun Qaraqala kəndində alan Gültən Məhərrəmli qeyd edib ki, məktəbi bitirdikdən sonra 558 balla Azərbaycan Dövlət Neft və Sənaye Universitetinin (ADNSU) İnformasiya texnologiyaları ixtisasına qəbul olub: “Magistraturaya qəbul imtahanında mümkün 95 baldan 93 bal toplamışam. Bu nəticə ilə respublika birincisi olmuşam. Gələcək planım magistratura təhsilimi Azərbaycan Respublikasının Prezidenti yanında Dövlət İdarəçilik Akademiyasında almaqdır. Hədəfim isə ixtisasım üzrə işləməkdir”.
Gültən Məhərrəmli qeyd edib ki, bu uğurunun kökündə dayanan əsas amil imtahana ciddi hazırlaşmağıdır: "İmtahan nəticələrini ilk olaraq ailəmlə paylaşdım. Ailəmə, sevdiklərimə və məni dəstəkləyənlərə təşəkkürümü bildirirəm".
14-02-2024, 16:40
Qəbul imtahanının ikinci mərhələsi üzrə sınaq imtahanı keçiriləcək
Dövlət İmtahan Mərkəzi fevralın 18-də ali təhsil müəssisələrinə qəbul imtahanının ikinci mərhələsi üzrə sınaq imtahanı keçirəcək.
DİM-dən verilən xəbərə görə, sınaq imtahanında iştirakçılara ali təhsil müəssisələrinin bakalavriat səviyyəsinə qəbul imtahanının II mərhələsinin modelinə uyğun test tapşırıqları təqdim olunacaq.
İmtahanda iştirak etmək üçün yazılış internet vasitəsilə aparılıb və 3469 abituriyent qeydiyyatdan keçib. İmtahan fevralın 18-də Bakı, Sumqayıt, Naxçıvan, Gəncə, Şəmkir, Şəki, Bərdə, Göyçay, Şirvan, Xaçmaz və Lənkəran şəhərlərində ümumilikdə 20 binada təşkil olunacaq.
Sınaq imtahanı bütün binalarda saat 11:00-da başlanacaq. İmtahanda iştirak edəcək abituriyentlərin nəzərinə çatdırırıq ki, imtahan binasına buraxılış saat 10:45‑də başa çatacaq. İmtahanın başlanmasına 15 dəqiqə qalmış buraxılış rejimi başa çatır. Bundan sonra gələn iştirakçılar imtahan binasına buraxılmırlar. İmtahan iştirakçıları qeyd olunanları nəzərə almalı və buraxılış vərəqəsində göstərilən vaxtdan gec olmayaraq imtahan binasında olmalıdırlar.
İmtahanın müddəti 3 saatdır. Yazılı cavab vermək tələb olunan açıq tipli tapşırıqların cavabları “cavab vərəqi”ində nəzərdə tutulan müvafiq yerlərdə, digər tapşırıqların cavabları isə “cavab kartı”ında qeyd olunur. İmtahanın sonunda cavab vərəqələri və cavab kartları abituriyentlərdən təhvil alınır, sual kitabçalarını isə aparmağa icazə verilir.
İmtahan iştirakçılarının nəzərinə çatdırırıq ki, cavab kartındakı mәlumatlar optik qurğu vasitәsilә oxunur. Ona görə də optik qurğuların tələblərinə əsasən, cavab kartını qara vә ya tünd göy rәngdә yazan mürәkkәb axıtmayan diyircәkli qәlәmlә, yaxud tünd rəngdə yazan sadә karandaşla doldurmaq lazımdır. Cavablar üçün nəzərdə tutulmuş dairələrin içi göstərilən növ qələmlərlə və ya karandaşla tam qaralanmalıdır. Abituriyentlərə tövsiyə olunur ki, cavab kartında cavabları tam əmin olduqdan sonra qeyd etsinlər və ya cavab kartında imtahan bitənədək hər hansı düzəliş etmək imkanının olması üçün dairələri karandaşla qaralasınlar.
İmtahanın idarə edilməsi üçün 40 imtahan rəhbəri, 310 nəzarətçi, 20 ümumi imtahan rəhbəri, 55 buraxılış rejimi əməkdaşı ayrılıb.
Abituriyentlərin nəzərinə çatdırırıq ki, imtahan binalarına buraxılış yalnız abituriyentlərin şəxsiyyət vəsiqəsinin əsli və "İmtahana buraxılış vərəqəsi" əsasında həyata keçirilir.
Göstərilən sənədlərindən biri olmayan, sənədləri arasında uyğunsuzluq olan, imtahana şəxsiyyət vəsiqəsinin surəti ilə gələn, başqasının şəxsiyyət vəsiqəsi ilə qeydiyyatdan keçən abituriyentlər imtahana buraxılmırlar.
13-02-2024, 20:48
3 idmançımız dünya çempionatının finalına vəsiqə qazandı
Azərbaycanın daha üç yunan-Roma güləşçisi Rumıniyanın paytaxtı Buxarestdə keçirilən Avropa çempionatında finala yüksəlib.
60 kiloqram çəki dərəcəsində çıxış edən Nihat Məmmədli ilk mərhələdə bolqarıstanlı Nedyalko Petrov üzərində inamlı qələbə qazanıb – 7:0.
O, daha sonra danimarkalı Nikolay Mohammadiyə 3:2 hesabı ilə qalib gələrək 1/4 finala yüksəlib. N.Məmmədli litvalı Justas Petraviçyusu tam üstünlüklə (8:0) məğlub edərək adını yarımfinala yazdırıb. Yarımfinalda rumıniyalı Razvan Arnauta da eyni hesabla vaxtından əvvəl qalib gələn Nihat ilk dəfə böyüklər arasında Avropa çempionatının finalına vəsiqə qazanıb. İdmançı həlledici görüşdə moldovalı Viktor Çiobanu ilə qarşılaşacaq.
Həsrət Cəfərov (67 kiloqram) 1/8 finalda serbiyalı Sebastyan Naddan güclü olub – 6:1. Titullu güləşçimiz bolqarıstanlı Abu Muslim Amayevə də şans tanımayıb – 13:4. H.Cəfərov yarımfinalda norveçli Morten Toresenə 7:1 hesabı ilə qalib gələrək ikinci dəfə Avropa çempionatının finalına yüksəlib. Həsrət həlledici görüşdə rusiyalı Ruslan Biçurinlə mübarizə aparacaq.
Ülvü Qənizadə (72 kiloqram) gürcüstanlı Giorgi Çxikvadzeni minimal fərqlə (2:1) üstələyib. O, fransalı Mamadassa Sillanı isə 4:3 hesabı ilə xalçadan məyus yola salıb. Ü. Qənizadə Ukraynanı təmsil edən soydaşımız Pərviz Nəsibovla gərgin mübarizə şəraitində keçən qarşılaşmada da sevinən tərəf olub – 5:3. Ülvü titulunu qorumaq üçün finalda Selçuk Canı məğlub etməyə çalışacaq.
Rafiq Hüseynov (82 kiloqram) 1/8 finalda türkiyəli Alperen Berberə uduzub – 1:7. Rəqib finala yüksəldiyi üçün idmançımız sabah təsəlliverici görüşə çıxacaq. O, gürcüstanlı Gela Bolkvadzeylə güləşəcək.
Murad Əhmədiyev (97 kiloqram) isə debütdə hollandiyalı Tiron Sterkenburqa sonuncu xal prinsipinə əsasən (1:1) məğlub olub.
Qeyd edək ki, Azərbaycan fevralın 18-dək davam edəcək Avropa çempionatında 25 güləşçi ilə təmsil olunur.
13-02-2024, 20:37
Ailə üzvlərini qətlə yetirən şəxs əvvəl də cinayət törədib
Xətai rayonunda atasını, anasını, qardaşını, bacısını və bacısının 5 yaşlı uşağını balta ilə qətlə yetirən 1999-cu il təvəllüdlü Əhməd Əhmədov daha əvvəl də cinayət törədib.
Bu barədə onun yaxınları məlumat verib.
Bildirilir ki, Əhməd 15 yaşında bir nəfəri bıçaqlayıb.
Əldə etdiyimiz məlumata görə, sözügedən hadisə məktəbdə olub.
Hadisənin digər təfərrüatları məlum deyil.
Qeyd edək ki, faktla bağlı Xətai Rayon Prokurorluğunda Cinayət Məcəlləsinin 120.2.4 (xüsusi amansızlıqla qəsdən adam öldürmə) və 120.2.7-ci (iki və ya daha çox şəxsi öldürmə) maddələrilə cinayət işi başlanıb, Əhməd Əhmədov prokurorluğun qərarı ilə iş üzrə şübhəli şəxs qismində tutulub.
13-02-2024, 20:08
5 nəfəri amasızlıqla qətlə yetirən Əhməd qaydasız döyüşlə məşğul olub
Xətai rayonunda atasını, anasını, qardaşını, bacısını və bacısının 5 yaşlı uşağını balta ilə qətlə yetirən 1999-cu il təvəllüdlü Əhməd Əhmədov barədə bir sıra məlumatlar açıqlanıb.
Əhməd Əhmədov qaydasız döyüşlə məşğul olurmuş.
Onun idman zamanı başından xəsarət aldığı bildirilir.
Yaxınları Əhmədin qətli törədən zaman anlaqsız vəziyyətdə olduğunu və ailəsini öldürdüyünü xatırlamadığını bildirib.
Qeyd edək ki, faktla bağlı Xətai Rayon Prokurorluğunda Cinayət Məcəlləsinin 120.2.4 (xüsusi amansızlıqla qəsdən adam öldürmə) və 120.2.7-ci (iki və ya daha çox şəxsi öldürmə) maddələrilə cinayət işi başlanıb, Əhməd Əhmədov prokurorluğun qərarı ilə iş üzrə şübhəli şəxs qismində tutulub.
13-02-2024, 19:33
Ailə üzvlərini öldürən Əhmədin psixoloji problemləri olub
Bu gün Bakıda ata və anasını, o cümlədən qardaşını öldürməkdə şübhəli bilinən Əhməd Əhmədovun psixoloji problemləri olub.
Bunu ailənin yaxınları jurnalistlərə açıqlamasında bildirib.
“İki gün əvvəl Əhmədin atası Mehmanla bir yerdə idik. Mənə dedi ki, Əhməd dərmanlarını atmır. Dedi ki, həkimlə danışmışam, aparıb Mərdəkandakı xəstəxanaya qoyacam” - ailə yaxınları deyib.
Məlumata görə, Əhməd ailədən ayrı yaşayıb, subay olub:
“Amma ailənin əli Əhmədin üstündə idi. Gündəlik 25-30 manat da pul verirdilər. Bir maşın da ayırmışdılar, taksi fəaliyyəti ilə məşğul olurdu”.
13-02-2024, 18:05
Qadın keçmiş əri tərəfindən öldürüldü
Fevralın 13-də Bakı şəhərinin Nərimanov rayonunda qadın keçmiş həyat yoldaşı tərəfindən öldürülüb.
Daxili İşlər Nazirliyinin Mətbuat xidmətindən verilən məlumata görə, saat 17:30 radələrində sözügedən ərazidə küçələrin birində İbrahimova Sevinc Rəfail qızı qətlə yetirilib.
Cinayət əməlini tötətməkdə şübhəli bilinən qadının keçmiş həyat yoldaşı 1985-ci il təvəllüdlü Quliyev Rövşən Eldar oğlu polis əməkdaşları tərəfindən keçirilən tədbirlərlə saxlanılıb.
Araşdırma aparılır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!