30-10-2023, 12:40
Sabahın hava proqnozu
Bakıda və Abşeron yarımadasında oktyabrın 31-də hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Milli Hidrometeorologiya Xidmətindən verilən məlumata görə, gecə və səhər bəzi yerlərdə duman olacaq.
Mülayim cənub-şərq küləyi əsəcək. Havanın temperaturu gecə 13-16° isti, gündüz 20-25° isti olacaq. Atmosfer təzyiqi 772 mm civə sütunundan 769 mm civə sütununa enəcək. Nisbi rütubət gecə 80-90 %, gündüz 55-65 % olacaq.
Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi dağlıq ərazilərdə qısamüddətli yağış yağacağı, şimşək çaxacağı ehtimalı var. Gecə və səhər bəzi rayonlarda duman olacaq. Şərq küləyi bəzi şərq rayonlarında arabir güclənəcək.
Havanın temperaturu gecə 12-17° isti, gündüz 22-27° isti, dağlarda gecə 5-10° isti, gündüz 12-17° isti olacaq.
29-10-2023, 21:53
AzTV-nin keçmiş baş redaktoru vəfat etdi
"Azərbaycan Televiziya və Radio Verilişləri" Qapalı Səhmdar Cəmiyyətinin (AzTV) proqram baş redaksiyasının sabiq baş redaktoru Rafiq Savalan vəfat edib.
Bu barədə televiziyanın mətbuat xidmətindən məlumat verilib.
Qeyd olunub ki, o bu gün 83 yaşında vəfat edib.
Ağayev Rafiq İmanqulu oğlu 1940-cı il dekabrın 1-də Bakı şəhərində anadan olub.
O, Azərbaycan Dövlət Televiziya və Radio Verilişləri Şirkətində Azərbaycan radiosu təbliğat və xəbərlər baş redaksiyasında müxbir, kiçik redaktor, böyük redaktor, siyasi icmalçı (1966–1975), radionun uşaqlar üçün proqram baş redaksiyasının baş redaktoru (1975–1996) vəzifələrində çalışıb.
Teleşirkətdə “Səhər” proqramının baş redaktor müavini vəzifəsində işləyib.
Rafiq Savalan həm də ədəbi fəaliyyətlə məşğul olub. Onun hekayələri, felyetonları, publisist yazıları və tərcümələri dövri mətbuatda müntəzəm çap olunub, efirdə səslənib.
O, 1990-cı il yanvarın 19-da işğalçı sovet qoşunlarının Azərbaycan televiziyasının enerji blokunu partlatdıqları zaman təxribatların daha geniş miqyas almasına mane olmuş cəsarətli, qorxmaz vətənpərvərlərdən biri kimi yadda qalıb. 20 yanvar faciəsindən üç gün sonra Azərbaycan SSR Ali Sovetinin səhərə qədər davam edən fövqəladə sessiyasında ictimaiyyətin nümayəndəsi kimi iştirak edib, deputatların təklifi ilə redaksiya heyətinə seçilib.
Həmin axşam deputat, Azərbaycan Yazıçılar İttifaqının sədri Anar və Rafiq Savalan dünya xalqlarına, dünya parlamentlərinə müraciətin rus dilində mətnini yazaraq yayıblar.
Rafiq Savalan 1988-ci ildən Azərbaycan Yazıçılar Birliyinin üzvü, 1976-cı ildən Jurnalistlər Birliyinin üzvü və Jurnalistlər Birliyinin “Qızıl qələm” mükafatı laureatı olub.
Allah rəhmət eləsin!
29-10-2023, 20:55
1923 kvadratmetrlik Türkiyə bayrağı nümayiş etdirildi
Türkiyə Respublikasının 100-cü ildönümü münasibətilə İzmit Körfəzində sahəsi 1923 kvadratmetrlik Türkiyə bayrağı nümayiş etdirilib.
Bu barədə TRT kanalı məlumat yayıb.
Nümayiş Türkiyənin Kocaeli şəhər bələdiyyəsi tərəfindən təşkil edilib.
Bayraq 7 nəfər tərəfindən 5 gündə hazırlanıb.
29-10-2023, 20:09
Türkiyə son iyirmi ildə möhtəşəm uğurlara imza atdı - Spiker
Siyasətini dünyəvilik, demokratiya və millətçilik kimi təməl prinsiplər əsasında quran Türkiyə son iyirmi ildə böyük siyasi və dövlət xadimi, Prezident Rəcəb Tayyib Ərdoğanın rəhbərliyi ilə möhtəşəm uğurlara imza atıb.
Bu fikirləri Milli Məclisin sədri Sahibə Qafarova Türkiyə Respublikasının yaranmasının 100 illiyi münasibətilə keçirilən tədbirdə səsləndirib.
Milli Məclisin sədri bildirib ki, Türkiyənin Birləşmiş Millətlər Təşkilatı, NATO, “Böyük iyirmilik”, İslam Əməkdaşlığı Təşkilatı, Türk Dövlətləri Təşkilatı kimi beynəlxalq təsisatlarda yaxından iştirakı onu sülh və sabitlik uğrunda çıxış edən qlobal oyunçuya çevirib.
“Haqq-ədalət və dürüstlük meyarları üzərində qurulan Türkiyə diplomatiyası ixtilafların yoluna qoyulmasında, dialoqun inkişafında və sülh təşəbbüslərinin irəli aparılmasında söz sahibidir”, - deyə Sahibə Qafarova vurğulayıb.
Bu gün Türkiyə Ordusu, hərbi hava və hərbi dəniz qüvvələrinin dünyanın ən güclü silahlı qüvvələri sırasında olduğunu diqqətə çatdıran Milli Məclisin sədri “Türkiyə yüz ili” konsepsiyasının yeni əsrdə Türkiyəyə daha böyük nailiyyətlər qazandıracağından əminliyini ifadə edib.
29-10-2023, 19:38
Prezident Cümhuriyyət bayramıyla bağlı müraciət ünvanladı
Azərbaycan Prezidenti İlham Əliyev Türkiyə Cümhuriyyətinin elan edilməsinin 100 ili münasibətilə verilən rəsmi ziyafətin iştirakçılarına müraciət ünvanlayıb.
Ölkə Prezidentinin müraciətini Milli Məclisin spikeri Sahibə Qafarova oxuyub.
29-10-2023, 18:33
Türkiyə və Azərbaycan tarix boyu bir-birinə dəstək olub - Baş Konsul
Türkiyə və Azərbaycan tarix boyu bir-birinə dəstək olublar. Bunun ən böyük örnəyinə Qarabağ müharibəsində və Türkiyədə baş vermiş zəlzələ zamanı şahid olduq.
Bunu Türkiyə Cümhuriyyətinin yaradılmasının 100-cü ildönümü münasibətilə Türkiyə Respublikasının Naxçıvandakı Baş Konsulluğu tərəfindən təşkil edilən yubiley tədbirində jurnalistlərə açıqlamasında baş konsul Asip Kaya deyib.
Asip Kaya bildirib ki, sevincdə və kədərdə birlikdə olmağın qürurunu yaşayırıq:
"Türkiyənin güclənməsi Azərbaycanın da güclənməsi deməkdir. Bizim 100-cü ildönümümüz eyni zamanda Azərbaycanın da 100-cü ildönümüdür. İnşallah, bu 100 illik Türk dünyası əsri olacaq. Türkiyə və Azərbaycanın rəhbərliyində bütün Türk dünyası bir araya gələrək böyük birlik yaradacaq. Bunun yolu isə Naxçıvandan keçir. Çünki Naxçıvan önəmli bir dəhlizdir. Zəngəzur dəhlizi vasitəsilə Azərbaycan və Türkiyə bir-birinə qovuşacaq. Türk dünyası yenidən dirçələcək. Buna ürəkdən inanırıq. Naxçıvan bu mənada çox önəmli rol oynayacaq. Naxçıvanın gələcəyi çox parlaqdır".
29-10-2023, 17:34
Şahdağ Milli Parkında yanğın baş verdi - VİDEO
Şahdağ Milli Parkında yanğın olub.
Bu barədə Fövqəladə Hallar Nazirliyindən bildirilib.
Qeyd olunub ki, Fövqəladə Hallar Nazirliyinin “112” qaynar telefon xəttinə Qəbələ rayonunun Qəmərvan kəndi yaxınlıqda Şahdağ Milli Parkının dağlıq-meşəlik ərazisində yanğın baş verməsi barədə məlumat daxil olub.
Dərhal əraziyə FHN Dövlət Yanğından Mühafizə Xidmətinin Qəbələ Rayon Yanğından Mühafizə Hissəsinin qüvvələri cəlb olunub.
Yanğınsöndürənlər tərəfindən həyata keçirilmiş zəruri və təxirəsalınmaz tədbirlər sayəsində yanğın genişlənərək sıx meşəlik əraziyə keçməsinə imkan verilmədən qısa müddətdə söndürülüb.
Yanğın nəticəsində Şahdağ Milli Parkının ərazisində 600 m² sahədə xəzəl və ağac qırıntıları yanıb. Ağaclar yanğından mühafizə olunub.
29-10-2023, 17:26
Türkiyə bayram ab-havasındadır
Bu gün Türkiyə Respublikasının qurulmasının 100 illiyidir.
Xatırladaq ki, 1923-ci il oktyabrın 29-da Türkiyə Böyük Millət Məclisi Cümhuriyyəti elan edib.
Türkiyə Cümhuriyyətinin yaradılması Birinci Dünya müharibəsindən sonra Osmanlı dövlətini parçalayıb məhv etmək istəyənlər üzərində qələbənin nəticəsidir.
Hazırda Türkiyə Cümhuriyyətinin ərazisi 783 min kv. km, əhalisi isə 86 milyondan çoxdur.
Bu gün Cümhuriyyət Bayramı münasibətiylə ölkənin dörd bir yanında küçələr, ticarət mərkəzləri, yaşayış binaları və s. bayraqlarla bəzədilib, dövlət əhəmiyyətli bir çox tədbir keçirilib.
Butov.az Türkiyədən həmin rəngli görüntüləri təqdim edir.
29-10-2023, 17:10
Səfirimiz Ərdoğanı Cümhuriyyət Günü münasibətilə təbrik etdi
Azərbaycanın Türkiyədəki səfiri Rəşad Məmmədov Türkiyə Prezidenti Rəcəb Tayyib Ərdoğanın qəbulunda iştirak edərək onu Cümhuriyyət Günü münasibətilə təbrik edib.
Bu barədə Azərbaycan səfirliyinin mətbuat xidməti məlumat yayıb.
“Bu gün səfir Rəşad Məmmədov Türkiyə Respublikası Prezident Kompleksində keçirilən qəbulda iştirak edib və cənab Prezident Rəcəb Tayyib Ərdoğana Cümhuriyyətin 100-cü ildönümü münasibətilə təbriklərini çatdırıb. Neçə belə yüzilliklərə, Türkiyə!”, – diplomatik missiya qeyd edib.
29-10-2023, 13:03
Sabahın havası
Oktyabrın 30-na gözlənilən hava şəraiti açıqlanıb.
Milli Hidrometeorologiya Xidmətindən verilən xəbərə görə, sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Səhər bəzi yerlərdə zəif duman, az çiskin olacaq. Mülayim şimal-qərb küləyi gündüz arabir güclənəcək.
Havanın temperaturu gecə 15-18° isti, gündüz 20-25° isti olacaq. Atmosfer təzyiqi 763 mm civə sütunundan 772 mm civə sütununa yüksələcək. Nisbi rütubət 60-70 % olacaq.
Oktyabrın 30-da Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi dağlıq ərazilərdə qısamüddətli yağış yağacağı, şimşək çaxacağı ehtimalı var. Gecə və səhər bəzi rayonlarda duman olacaq. Mülayim şərq küləyi əsəcək.
Havanın temperaturu gecə 12-17° isti, gündüz 20-25° isti, dağlarda gecə 5-10° isti, gündüz 12-17° isti olacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!